សមត្ថកិច្ចក្រសួងមហាផ្ទៃបានឃាត់ខ្លួនជនជាតិចិន២នាក់ បន្ទាប់ពីបានធ្វើសកម្មភាពលួចនៅខេត្តសៀមរាប ហើយបើករត់គេចខ្លួនមកទីក្រុងភ្នំពេញ។
នាយការិយាយល័យព្រហ្មទណ្ឌកម្រិតស្រាល លោក ខេង ម៉េងឈាង បានប្រាប់គេហទំព័រ និងព័ត៌មានអគ្គស្នងការដ្ឋាននគរបាលជាតិថា សមត្ថកិច្ចបានឃាត់ខ្លួនជនសង្ស័យទាំងពីរនាក់នេះក្នុងខណ:បើកបរម៉ូតូមួយគ្រឿងឆ្ពោះមកទីក្រុងភ្នំពេញកាលពីថ្ងៃទី ១៨ ខែវិច្ឆិកា នៅលើផ្លូវជាតិលេខ៦ ស្រុកពញាឮ ខេត្តកណ្ដាល។
សមត្ថកិច្ចដកហូតបាន ម៉ូតូ ១គ្រឿង ដែលជារបស់ជនរងគ្រោះ និង សោកាច់កម៉ូតូ ចំនួន ៣គ្រាប់ និងឧបករណ៍ ប្រើសម្រាប់គាស់ផ្ទះ និងសម្ភារៈ មួយចំនួនទៀត។
លោកខេង ម៉េងឈាង សន្និដ្ឋានថាជនជនសង្ស័យទាំងពីរនេះបានកាច់កម៉ូតូ ធ្វើសកម្មភាពគាស់ផ្ទះ និងលួចរថយន្តផងដែរ។
បន្ទាប់ពីបញ្ចប់ការសួរនាំ ជនសង្ស័យទាំងពីរត្រូវបានប្រគល់ជូន កម្លាំងជំនាញនៃស្នងការដ្ឋាននគរបាលខេត្តសៀមរាប ដែលជាម្ចាស់ករណីដើម្បីចាត់ការបន្ដ៕