តុលាការខេត្តព្រះសីហនុសម្រេចឃុំខ្លួនជនជាតិចិន១៦នាក់ក្រោយពីប៉ះទង្គិចដោយអាវុធជាមួយពលរដ្ឋខ្មែរ
2020.05.22
សាលាដំបូង និងអយ្យការអមសាលាដំបូងខេត្តព្រះសីហនុ។ រូបថតថ្ងៃទី២៧ ខែមីនា ឆ្នាំ២០១៥
RFA
តុលាការខេត្តព្រះសីហនុបានសម្រេចឃុំខ្លួនជនជាតិចិនចំនួន ១៦នាក់ ក្រោយពីបានប៉ះទង្គិចគ្នាដោយអាវុធជាមួយពលរដ្ឋខ្មែរនៅកោះរុង។ មន្ត្រីសិទ្ធិមនុស្សបានសំដែងការព្រួយបារម្ភពីករណីអសន្តិសុខនៅពេលមានវត្តមានជនជាតិចិនឡើងវិញនៅក្នុងខេត្តជាប់មាត់សមុទ្រ។
មន្ត្រីជាន់ខ្ពស់អគ្គស្នងការនគរបាលជាតិឱ្យដឹងថា តុលាការខេត្តព្រះសីហនុ បានសម្រេចឃុំខ្លួនជនជាតិចំនួន ១៦នាក់ ក្រោយពីបានផ្ទះអាវុធនៅភោជនីយដ្ឋានមួយកន្លែង នៅកោះរុង កាលពីថ្ងៃទី១៤ ខែឧសភាកន្លងទៅនេះ តែមិនបណ្ដាលឱ្យមានមនុស្សណាម្នាក់រងរបួសនោះទេ។
អ្នកនាំពាក្យអគ្គស្នងការនគរបាលជាតិលោក ឆាយ គឹមឃឿន បញ្ជាក់ថា អាជ្ញាធរក៏កំពុងស្វែងរកចាប់ខ្លួនជនជាតិខ្មែរចំនួន៣នាក់ផ្សេងទៀតក្នុងនោះ មានមេបញ្ជាការរងកងទ័ពជើងទឹកគឺលោក ហាស់ សុភា ដែលកំពុងរត់គេចខ្លួនក្រោយពីមានជម្លោះប្រដាប់អាវុធកើតឡើង។
លោកបញ្ជាក់ថា កាលពីថ្ងៃទី១៤ កន្លងទៅនេះ ក្នុងភោជនីយដ្ឋានមួយនៅកោះរុង មានការឈ្លោះប្រកែកគ្នាមួយរវាងជនជាតិចិន និងជនជាតិខ្មែរដែលឈានរហូតដល់ការផ្ទុះអាវុធបានកើតឡើង តែលោកមិនទាន់បញ្ជាក់ថា ភាគីណាជាអ្នកបង្កហេតុមុននោះទេ។
លោកនិយាយថា ក្រោយពីកើតហេតុក្រុមសមត្ថកិច្ចបានឃាត់ខ្លួនជនជាតិចិនចំនួន ២៥នាក់ និងជនជាតិខ្មែរចំនួន ៦នាក់។ ក្រោយពីបានសាកសួរសមត្ថកិច្ចក៏សម្រេចដោះលែងជនជាតិខ្មែរទាំង ៦នាក់នោះឱ្យមានសេរីភាពវិញតែក្នុងចំណោមនោះមាន២នាក់បានដោះលែងឱ្យនៅក្រៅឃុំតែដាក់ឱ្យស្ថិតនៅក្រោមការត្រួតពិនិត្យពីតុលាការ។
លោកបញ្ជាក់ថា ចំណែកជនជាតិចិនទាំង ២៥នាក់ មានតែ ១៦នាក់ប៉ុណ្ណោះជាជនសង្ស័យថា បានបង្កឱ្យមានអំពើហិង្សាកើតឡើង ចំណែកអ្នកផ្សេងទៀតមិនជាប់ពាក់ព័ន្ធទេ។
អគ្គមេបញ្ជាការកងទ័ពជើងទឹក លោក ទៀ វិន ប្រាប់អាស៊ីសេរីថា លោកមិនទាន់បានដឹកពីព័ត៌មាននេះនៅឡើយដោយលោកកំពុងបំពេញបេសកកម្មមកទីក្រុងភ្នំពេញ។
ជម្លោះប្រដាប់អាវុធរវាងជនជាតិចិន និងជនជាតិខ្មែរ នៅតំបន់កោះរុងនេះបានបង្កឱ្យមានការព្រួយបារម្ភចំពោះអសន្តិសុខដែលបានកើតមានឡើងនៅខេត្តជាប់មាត់សមុទ្រមួយនេះ។
អ្នកសម្របសម្រួលសមាគមសិទ្ធិមនុស្សអាដហុក (Adhoc) អ្នកស្រី ជាប សុធារី មានប្រសាសន៍ថា នៅក្នុងអំឡុងខែឧសភា នេះមានអំពើហិង្សាបានកើតមានឡើងចំនួន ៣ករណី ហើយដែលបង្កឡើងដោយជនជាតិចិន។
អ្នកស្រីបញ្ជាក់ថា ជម្លោះភាគច្រើនគឺបានកើតមានឡើងរវាងជនជាតិចិនគ្នាឯង ហើយចុងក្រោយនេះគឺកើតឡើងរវាងជនជាតិខ្មែរ និងជនជាតិចិន។អ្នកស្រីបារម្ភថា បញ្ហាអសន្តិសុខអាចនឹងកម្រើកឡើងវិញនៅពេលដែលជនជាតិចិនបានវិលត្រឡប់មកខេត្តព្រះសីហនុ៖ «យើងឃើញមានបទល្មើសនៅក្នុងដើមខែឧសភាហ្នឹង ឃើញមានបទល្មើសជាបន្តបន្ទាប់ដែរ។ ប៉ុន្តែកាលមុននៅក្នុងខែបី ខែបួនហ្នឹងរាងស្ងាត់តែឥឡូវហ្នឹងវាចាប់ផ្ដើមកើតមានឡើងហើយយើងមិនដឹងថា វាទៅមុខទៀត វាយ៉ាងម៉េចដែរ»។
អ្នកស្រី ជាប សុធារី បានបញ្ជាក់ថា ដើមខែឧសភានេះ ខេត្តព្រះសីហនុចាប់ផ្ដើមមានវត្តមានជនជាតិចិនឡើងវិញហើយ ក្រោយពីពួកគេបានវិលត្រឡប់ទៅស្រុកកំណើតមួយរយៈចាប់តាំងពីជំងឺកូវីដ១៩ បានផ្ទុះឡើងកាលពីចុងខែធ្នូ ឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
អត្ថបទពេញនិយម
សង្គម
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
- អ្នកវិភាគថា ការផ្ដល់ជំនួយគ្រឿងយោធារបស់ឥណ្ឌូណេស៊ីមកឱ្យកម្ពុជា គឺដើម្បីកាត់បន្ថយឥទ្ធិពលចិន
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- សមត្ថកិច្ចឃាត់ខ្លួនជនជាតិចិន ៧នាក់ពាក់ព័ន្ធករណីផ្ទុះអាវុធនៅខេត្តព្រះសីហនុ
- កម្ពុជានឹងមិនអាចទាក់ទាញភ្ញៀវទេសចរទេ បើមិនដោះស្រាយបញ្ហាឧក្រិដ្ឋកម្មក្នុងប្រទេស