ពលរដ្ឋ​នៅ​តែ​ចងចាំ​ស្នាព្រះហស្ត ព្រះបរម​រតនកោដ្ឋ សម្ដេច​ព្រះ នរោត្ដម សីហនុ

2018-10-14
អ៊ីម៉ែល
មតិ
Share
បោះពុម្ព
២១-តុលា-២០១២៖ ព្រះ​ឆាយាល័ក្ខណ៍​ព្រះ​ករុណា​ព្រះ​បាទ​សម្ដេច​ព្រះ នរោត្តម សីហនុ ដែល​គេ​ដាក់​តាំង​នៅ​ខាង​មុខ​ខ្លោងទ្វារ​វត្ត​ប៉ាហ៊ី ក្រុង​ប៉ៃលិន ខេត្ត​ប៉ៃលិន។
២១-តុលា-២០១២៖ ព្រះ​ឆាយាល័ក្ខណ៍​ព្រះ​ករុណា​ព្រះ​បាទ​សម្ដេច​ព្រះ នរោត្តម សីហនុ ដែល​គេ​ដាក់​តាំង​នៅ​ខាង​មុខ​ខ្លោងទ្វារ​វត្ត​ប៉ាហ៊ី ក្រុង​ប៉ៃលិន ខេត្ត​ប៉ៃលិន។
RFA

ពលរដ្ឋនៅតែចងចាំ​ស្នាព្រះ​ហស្ត​របស់​សម្តេចព្រះនរោត្ត​ម សីហនុ ព្រះបរម​រតនកោដ្ឋ​ដដែល បើ​ទោះ​ជា​ពេល​នេះ ព្រះអង្គ​បាន​ចាក​ឆ្ងាយ​មិន​ត្រឡប់​វិញ អស់​រយៈ​ពេល ៦ឆ្នាំទៅហើយក្តី។ ក្រុម​ពលរដ្ឋ​រម្លឹក​ពី​ព្រះអង្គ​នៅ​ពេល​នេះ ខណៈ​ប្រជាជាតិ​កម្ពុជា​កំពុង​រៀបចំ​ពិធី​រម្លឹក​ការ​យាង​សោយ​ទិវង្គត​របស់​ព្រះអង្គ នៅ​ថ្ងៃ​ទី១៥ ខែ​តុលា។

ពលរដ្ឋលើកឡើង​ស្រដៀងៗ គ្នា​ថា មូលហេតុ​ដែល​ពួក​គេ​នៅ​តែ​នឹក​ស្តាយ​ស្រណោះ​សម្តេច​ព្រះ នរោត្តម សីហនុ ព្រះបរម​រតនកោដ្ឋ ព្រោះ​ទ្រង់​ជា​ក្សត​ដែល​បាន​ដឹក​នាំ​ប្រទេស​កម្ពុជា​ឲ្យ​មាន​ការ​រីក​ចម្រើន និង​ធ្វើ​ជាតិ​មាន​សុខ​សន្តិភាព។ ពលរដ្ឋ​ក៏​ចង់​ឃើញ​អ្នក​ដឹក​នាំ​សព្វ​ថ្ងៃ​យក​គំរូ​តាម​ព្រះអង្គ គឺ​យក​ប្រយោជន៍​ជាតិ​ធំ​ជាង​ប្រយោជន៍​បក្ស និង​ក្រុម​ខ្លួន។

ពលរដ្ឋម្នាក់​លោក ខែម ភារម្យ និយាយ​ថា សម្តេច​ព្រះ នរោត្តម សីហនុ ជា​ក្សត្រ​ឆ្នើម​មួយ​ព្រះអង្គ​កាល​ពី​ទ្រង់​នៅ​មាន​ព្រះជន្ម។ ពលរដ្ឋ​រូប​នេះ​រម្លឹក​ថា អ្វី​ដែល​ធ្វើ​ឲ្យ​លោក​មិន​អាច​បំភ្លេច​ទ្រង់​បាន​នោះ គឺ​ទ្រង់​បាន​ទាមទាម​ឯករាជ្យ​ពី​បារាំង និង​បាន​ដឹក​នាំ​ប្រទេស​កម្ពុជា​ឲ្យ​មាន​កំណើន​សេដ្ឋកិច្ច​ខ្ពស់៖ «ខ្ញុំ​នឹក​ស្រណោះ​អាល័យ​ព្រះអង្គ​ដែរ ព្រោះ​ខ្ញុំ​នឹក​ពី​អនុស្សាវរីយ៍​ដែល​ព្រះ​អង្គ​ដឹក​នាំ​មាន​ការ​រីក​ចម្រើន របស់​ប្រើប្រាស់​យើង​អាច​ផលិត​បាន​សព្វ​បែប​សព្វ​យ៉ាង»។.

ពលរដ្ឋម្នាក់ទៀត លោក ហង្ស ស៊ីសុវត្ថិ លើក​ឡើង​ដែរ​ថា សម្តេច​ព្រះ នរោត្តម សីហនុ​ ជា​ក្សត្រ​ ឈ្លាសវៃ​មួយ​អង្គ ព្រោះ​ទ្រង់​បាន​ដឹក​នាំ​ប្រទេស​ជាតិ​បាន​យ៉ាង​ល្អ ដែល​ធ្វើ​ឲ្យ​ប្រទេស​ជិត​ខាង​មិន​ហ៊ាន​រំលោភ​បំពាន​ទឹក​ដី​កម្ពុជា។ ពលរដ្ឋ​រូប​នេះ ចង់​ឃើញ​ព្រះមហាក្សត្រ​សព្វថ្ងៃ ដែល​ជា​ព្រះ​រាជ​បុត្រា​របស់​សម្តេច សីហនុ ដឹក​នាំ​ប្រទេស​ដោយ​ម៉ឺងម៉ាត់​ដូច​សម្តេច​ឪ និង​ជួយ​រក​យុត្តិធម៌​ជូន​ពលរដ្ឋ​ស្លូត​ត្រង់​ដែល​កំពុង​រង​គ្រោះ៖ «សូម​ឲ្យ​ទ្រង់​ម៉ឺងម៉ាត់​ក្លាហាន ហ៊ាន សម្រេច អា​កាត់​ដំណោះ​ស្រាយ​ជាតិ​ឲ្យ​មាន​លទ្ធិ​ប្រជាធិបតេយ្យ មាន​ការ​គោរព​សិទ្ធិមនុស្ស ហើយ​រក​យុត្តិធម៌​ជូន​ពលរដ្ឋ​ក្រីក្រ ដែល​កំពុង​រងគ្រោះ​ព្រោះ​បញ្ហា​ដីធ្លី ដែល​ត្រូវ​អាជ្ញាធរ ក៏​ដូច​មន្រ្តី​មាន​អំណាច​កំពុង​ធ្វើ​បាប​រាស្រ្ត»

ព្រះបាទ​សម្ដេច​ព្រះ​នរោត្ដម សីហនុ បាន​សោយ​ទិវង្គត​កាល​ពី​ថ្ងៃ​ទី​១៥ ខែ​តុលា ឆ្នាំ​២០១២ នៅទី​ក្រុង​ប៉េកាំង ប្រទេស​ចិន ដោយ​រោគ​គាំង​បេះដូង ក្នុង​ព្រះជន្ម ៩០​ព្រះវស្សា។ ថ្ងៃ​ទី១៥ ខែ​តុលា ឆ្នាំ​នេះ ក៏​មាន​ការ​រៀបចំ​ពិធី​រម្លឹក​ព្រះ​វិញ្ញាណក្ខន្ធ​ ព្រះបរម​រតន​កោដ្ឋ​ព្រះបាទ នរោត្តម សីហនុ គម្រប់​ខួប​ ៦​ឆ្នាំ​ទូទាំង​ប្រទេស និង​តាម​ទីកន្លែង​ផ្សេងៗ គ្នា​ផង​ដែរ។

ពលរដ្ឋរស់នៅ​ក្រុង​ភ្នំពេញ​លោកស្រី រិន គីម និយាយ​ថា លោកស្រី​ចង់​ឃើញ​អ្នក​ដឹក​នាំ​ប្រទេស​សព្វ ថ្ងៃ​មាន​ស្មារតី​បង្រួបបង្រួម​ជាតិ និង​ចេះ​ការពារ​ទឹក​ដី​ដូច​សម្តេច សីហនុ។ ពលរដ្ឋ​រូប​នេះ​និយាយ​ទៀត​ថា លោកស្រី​មិន​ចង់​ឃើញ​អ្នក​នយោបាយ​ឈ្លោះ​ទាស់​ទែង​គ្នា​ដូច​សព្វថ្ងៃ​នេះ​ទេ ព្រោះ មិន​ចំណេញ​ដល់​ជាតិ​ឡើយ៖ «ខ្ញុំ​ចង់​ឲ្យ​វីរជន​កូន​ខ្មែរ​ទាំង​អស់​ចេះ​ស្រឡាញ់​ជាតិ​មាតុភូមិ​ដូច​ហ្លួង​ជា​ម្ចាស់​ស្រលាញ់ ចេះ​មើល​ជាតិ មើល​ទឹក​ដី គោរព​ច្បាប់»។

លោកស្រី រិន គីម អះអាង​ថា កាល​ពី​សម័យ​សម្តេច សីហនុ ដឹក​នាំ ប្រទេស​កម្ពុជា​មាន​ការ​រីក ចម្រើន​ស្ទើរ​គ្រប់​វិស័យ។ ពលរដ្ឋ​រូប​នេះ ចង់​ឃើញ​អ្នក​ដឹក​នាំ​ប្រទេស​សព្វថ្ងៃ​ដឹក​នាំ​ប្រទេស​ឲ្យ​ការ​រីក​ចម្រើន​ដូច​កាល​ពី​ទ្រង់​ដឹក​នាំ​ប្រទេស៖ «»

ចំណែក​អ្នក​ប្រើប្រាស់​បណ្តាញ​ទំនាក់ទំនង​សង្គម​ហ្វេសប៊ុក​ភាគ​ច្រើន​បាន​បង្ហោះ​ឆាយាល័ក្ខណ៍​សម្តេច សីហនុ និង​វីដេអូ​ស្តីពី​ព្រះរាជ​សកម្មភាព​របស់​ទ្រង់ កាល​ពី​ព្រះអង្គ​នៅ​មាន​ព្រះ​ជន្ម។ អ្នក​ខ្លះ​ទៀត ក៏​បង្ហោះ​វីដេអូ​ព្រះ​សូរសៀង​ចម្រៀង​របស់​ព្រះអង្គ​ផង​ដែរ៖ «ឃើញ​ព្រះអង្គ​លោក​ដឹក​នាំ​ល្អ ដូច​ថា កាល​ពី​លោក​នៅ​ក្មេង​រីក​ចម្រើន មាន​តាំង​ពី​រោងចក្រ​ស៊ីម៉ង់ តាំង​ពី​មន្ទីរពេទ្យ ថា​សព្វ​បែប​សព្វ​យ៉ាង​ទាំង​អស់​ខ្ញុំ​រាប់រៀប​មិន​អស់​ទេ ច្រើន​ពេក»។

អ្នកជំនួញផ្នែក​វិស័យ​កសិកម្ម​លោក ម៉ុង ឬទ្ធី បាន​បង្ហោះ​រូប របស់​លោក​ដែល​បាន​ថត​ជា​មួយ​សម្តេច សីហនុ និង​បាន​សរសេរ​នៅ​លើ​ហ្វេសប៊ុក​របស់​លោក​ថា កូន​ចៅ ប្រជានុរាស្រ្ត​គ្រប់ៗ ​រូប​សូមថ្វាយ​មហា​ព្រះរាជ​កុសល​ថ្វាយ​ដួង​ព្រះ​វិញ្ញាណក្ខន្ធ​ទ្រង់ សូម​ស្តេច​យាង​សោយ​សុខ ក្នុង​ឋាន​បរម​សុខ​កុំ​បី​ឃ្លាងឃ្លៀត​ឡើយ។

ស្នាព្រះហស្ត​សំខាន់ៗ របស់​សម្ដេចព្រះ នរោត្ដម សីហនុ ដែល​បាន​ចារ​ទុក​ក្នុង​ប្រវត្តិសាស្រ្ត រួមមាន ការ​ទាមទារ​ឯករាជ្យ​ពី​បារាំង ការ​ទាមទារ​ប្រាសាទ​ព្រះវិហារ​ពី​ប្រទេស​ថៃ និង​ការ​ធ្វើ​ឲ្យ​សេដ្ឋកិច្ច​ប្រទេស​មាន​ភាព​រីក​ចម្រើន​ខ្លាំង​ក្នុង​ពេល​ព្រះអង្គ​ដឹក​នាំ​ប្រទេស ព្រម​ទាំង​ចូលរួម​ផ្តួចផ្តើម​សន្ធិសញ្ញា​កិច្ច​ព្រមព្រៀង​សន្តិភាព ២៣ តុលា​ជា​ដើម។ ទោះ​ជា​បែប​នេះ​ក្តី ព្រះអង្គ​ក៏​មាន​ជាប់​ពាក់ព័ន្ធ​ក្នុង​របប​កម្ពុជា​ប្រជាធិបតេយ្យ ដែល​ជា​របប​មួយ​ធ្វើ​ឲ្យ​កម្ពុជា​ធ្លាក់​ដល់​ចំណុច​សូន្យ និង​បាន​ធ្វើ​ឲ្យ​ពលរដ្ឋ​ខ្មែរ​រាប់​លាន​នាក់ បាន​បាត់បង់​ជីវិត​នៅ​ក្នុង​របប​នោះ។

ទន្ទឹម​នឹង​ការ​រម្លឹក​ពី​ការ​សោយ​ទិវង្គត​របស់​សម្ដេចព្រះ នរោត្តម សីហនុ របប​ក្រុង​ភ្នំពេញ​ឆ្នាំ​នេះ ប្រកាស​ថា នឹង​រៀបចំ​ប្រារព្ធ​ខួប ៦ឆ្នាំ​នៃ​ការយាង​សោយ​ទិវង្គត​របស់ព្រះបរម​រតនកោដ្ឋ នៅ​ថ្ងៃ​ទី១៥ ខែ​តុលា ដោយ​តម្រូវ​ឲ្យ​តំណាង​មន្រ្តី​រាជការ​គ្រប់​ស្ថាប័ន នាំ​គ្នា​ទៅ​ដាក់​កម្រង​ផ្កា និង​គោរព​ព្រះវិញ្ញាណក្ខន្ធ​ព្រះអង្គ​នៅ​ទីតាំង​តម្កល់​ព្រះបរមរូប​ ដែល​ឋិត​នៅ​ជិត​វិមាន​ឯករាជ្យ ព្រម​ទាំង​បាន​ណែនាំ​ដល់​អាជ្ញាធរ​ថ្នាក់​ខេត្ត និង​គ្រប់​វត្ត​អារាម​ ត្រូវ​រៀបចំ​ពិធី​គោរព និង​ឧទ្ទិស​ថ្វាយ​ព្រះរាជ​កុសល​ដល់​ព្រះ​វិញ្ញាណក្ខន្ធ​ព្រះរបម​រតនកោដ្ឋ​ផង​ដែរ។

រីឯ​ព្រះ​បរម​រាជវាំង ក៏​បាន​ណែនាំ​សាលាក្រុង​ភ្នំពេញ និង​បណ្តា​ខេត្ត​នៅ​ទូទាំង​ប្រទេស​ឲ្យ​ដាក់​តាំង​ព្រះបរម​ឆាយាល័ក្ខណ៍​ព្រះបរម​រតនកោដ្ឋ ដោយ​ប្រើប្រាស់​ព្រះ​បរម​ឆាយាល័ក្ខណ៍​ថ្មី មាន​សោភ័ណភាព​លម្អ​ដោយ​ភ្លើង​ពណ៌។ នៅ​តាម​បណ្តា​មន្ទីរ អង្គភាព ក្រុមហ៊ុន រោងចក្រ សហគ្រាស គ្រឹះស្ថាន​សាធារណៈ សាលារៀន ត្រូវ​តុបតែង​លម្អ​ទង់​ជាតិ ទង់​សាសនា ទង់​ព្រះមហាក្សត្រ និង​បដា​ពាក្យ​ស្លោក ហើយ​អាជ្ញាធរ​មូលដ្ឋាន ត្រូវ​ណែនាំ​ពលរដ្ឋ​ឲ្យ​ចង​ទង់ជា​តិ​នៅ​មុខ​ផ្ទះ។

ការណែនាំរបស់ស្ថាប័ន​ព្រះរាជវាំង​ស្តីពី​ការ​រៀបចំ​ប្រារព្ធ​ខួប ៦ឆ្នាំ​នៃ​ការ​យាង​សោយ​ទិវង្គត​ព្រះ នរោត្តម សីហនុ នៅ​ពេល​នេះ គឺ​បន្ទាប់​ពី​មាន​ការ​រិះគន់​ពី​ពលរដ្ឋ និង​អតីត​មន្រ្តី​នៅ​ព្រះរាជវាំង​ថា ការ​រៀបចំ​ប្រារព្ធ​ខួបនៃ​ការយាង​សោយ​ទិវង្គតរបស់​សម្តេច សីហនុកន្លងទៅ សាលាក្រុង​ភ្នំពេញ​មិន​បាន​យក​ចិត្តទុក​រៀបចំ​សោភណ្ឌភាពក្នុងទីក្រុង និងមិនបានដាក់តាំង​ឆាយាល័ក្ខណ៍​សម្តេច សីហនុ ឲ្យ​បាន​ល្អ​ត្រឹមត្រូវ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Vibol

ពី Phnom Penh

I will never forget. It is Sihanok who caused the life of 3 millions Khmer died of starvation and killing. It is him who make communist won until now. It was him who made many of my relatives died during Khmer Rouge time. He is just a murderer who got away from justice.

Oct 15, 2018 07:26 PM

ចៅចិត្ត

ឈ្លាសវៃចំណាប់តើ...ខំជួយយួនអោយយួនដឺក
ជញ្ជូនគ្រាប់រំសេវឆ្លងកាត់តាមកំពង់ផែកំពង់សោមយកទៅអោយយៀកកុងនៅទល់ដែន...
ដល់យួនឈ្នះសង្គ្រាម....មិនមែនត្រឹមតែយួនមិនដឹងគុណគាត់ទេ....ថែមទាំងយួនបកក្បាល
មកខាំខ្មែរទៀត.។
នេះមិនទាន់ទាំងរំលឹករឿងគាត់រត់ទៅដឺកដៃយួនយៀកកុងខ្មែរក្រហមអោយមកសម្លាប់ខ្មែរយ៉ាងរង្គាល..ហើយដោះសារថាគាត់ជាប់គុកខ្មែរក្រហម។

Oct 15, 2018 12:01 PM

គេហទំព័រ​ទាំងមូល