ថៅកែ​រោងចក្រ W&D បញ្ឈប់​កម្មករ​ ១២៧​នាក់ ដោយ​​ចោទ​​ថា ញុះញង់​​ឱ្យ​​កម្មករ​​ធ្វើ​​កូដកម្ម

ដោយ វ៉ែន សុមេធ
2019-02-14
អ៊ីម៉ែល
មតិ
Share
បោះពុម្ព
សកម្មភាព​កម្មករ​រោងចក្រ ដាប់ប៊ែលយូ អែនឌី (W&D) នៅ​ខណ្ឌ​មានជ័យ រាជធានីភ្នំពេញ តវ៉ា​បិទ​ផ្លូវ ២១៧ កាល​ពីថ្ងៃ​ទី៥ ខែ​កុម្ភៈ ឆ្នាំ​២០១៩។
សកម្មភាព​កម្មករ​រោងចក្រ ដាប់ប៊ែលយូ អែនឌី (W&D) នៅ​ខណ្ឌ​មានជ័យ រាជធានីភ្នំពេញ តវ៉ា​បិទ​ផ្លូវ ២១៧ កាល​ពីថ្ងៃ​ទី៥ ខែ​កុម្ភៈ ឆ្នាំ​២០១៩។
Screenshot

មន្ត្រី​ក្រសួង​ការងារ​បាន​កោះហៅ​តំណាង​កម្មករ​ទៅ​ប្រជុំ​នៅ​ក្រសួង​ការងារ ជា​បន្ទាន់​នៅ​ថ្ងៃ​ទី​១៣ កុម្ភៈ គឺ​ក្រោយពេល​ថៅកែ​រោងចក្រ ដាប់ប៊ែលយូ អែនឌី (W&D) នៅ​ខណ្ឌ​មានជ័យ បានសម្រេច​មិន​ទទួល​យក​កម្មករ ចំនួន ១២៧​នាក់ ក្នុងចំណោម​កម្មករ​ជាង ១.៧០០នាក់ ដែល​បាន​ធ្វើ​កូដកម្ម កន្លង​មក។ មន្ត្រី​សហជីព​ជំរុញ​ឱ្យ​ភាគី​ថៅកែ​រោងចក្រ​ទទួលយក​កម្មករ​ទាំងអស់​ចូល​ធ្វើការ​វិញ ដោយ​កុំ​មាន​ការ​រើសអើង ឬ​ចោទប្រកាន់ ទើប​អាច​បិទ​បញ្ចប់​ជម្លោះ​ក្រុម​កម្មករ​បដិសេធ​ថា ពួកគេ​មិន​បាន​ញុះញង់​កម្មករ​ឱ្យ​ធ្វើ​កូដកម្ម​ទេ។ គឺ​ពួកគេ​នាំគ្នា​ចេញ​មក​ធ្វើ​កូដកម្ម ទាមទារ​ប្រាក់​អតីតភាព​ទាំងអស់​គ្នា។

កម្មករ​ម្នាក់ ក្នុងចំណោម​កម្មករ ១២៧​នាក់ ដែល​ថៅកែ​រោងចក្រ ដាប់ប៊ែលយូ អែនឌី សម្រេច​បញ្ឈប់ មិន​ទទួលយក​ធ្វើការ​វិញ​នោះ​គឺ លោក ផាន់ សាមុត ប្រាប់​នៅ​ថ្ងៃ​ទី​១២ កុម្ភៈ ថា ថៅកែ​រោងចក្រ​បាន​បិទ​សេចក្ដីប្រកាស​ជូនដំណឹង​ឱ្យ​កម្មករ​ចូល​ធ្វើ​ការ​ជា​លើក​ទី​២ ដោយ​បន្ត​ឱសានវាទ ៣​ថ្ងៃ​បន្ថែម​ទៀត។ ប៉ុន្តែ ភាគី​រោងចក្រ មិន​ទទួលយក​កម្មករ​ចំនួន ១២៧​នាក់​ទេ ដោយ​ភាគី​ថៅកែ​រោងចក្រ​ចាត់ទុកថា​ជា​ក្រុម​ញុះញង់​ឱ្យ​កម្មករ​ជាង ១​ពាន់​នាក់​ផ្សេងទៀត ប្រឆាំង​នឹង​រោងចក្រ។

ថ្លែងប្រាប់​អាស៊ីសេរី ពី​ក្នុង​អគារ​ប្រជុំ នៃ​ក្រសួង​ការងារ នៅ​ព្រលប់​ថ្ងៃ​ទី​១៣ កុម្ភៈ លោក ផាន់ សាមុត រៀបរាប់​ថា ក្រោយ​កើតហេតុ​ក្រុម​កម្មករ​ជាង​១​ពាន់​នាក់ នាំគ្នា​មិន​ចូល​ធ្វើការ ដូច​កម្មករ​១២៧​នាក់ ដែល​ថៅកែ​បញ្ឈប់​ដែរ ហើយ​បន្ត​កូដកម្ម នៅ​មុខ​រោងចក្រ​ដដែល។ លោក​បន្ត​ថា មួយ​សន្ទុះ​ក្រោយ​មក មន្ត្រី​នៅ​ក្រសួង​ការងារ​ទៅ​សម្របសម្រួល​ជាមួយ​កម្មករ ឱ្យ​ផ្អាក​កូដកម្ម​សិន៖ «ព្រឹក​មិញ ពួក​ខ្ញុំ ទៅ​ធ្វើ​ការ​តវ៉ា​នៅ​ខាងមុខ​រោងចក្រ។ ប៉ុន្តែ​ខាង​ក្រសួង​ការងារ និង​មន្ត្រី​ពាក់ព័ន្ធ​គ្រប់​ផ្នែក គាត់​ថា ឱ្យ​ពួក​ខ្ញុំ​ហ្នឹង​ផ្អាក​កូដកម្ម​មួយថ្ងៃ​កន្លះ គឺ​គិត​ចាប់ពី​ថ្ងៃ​ហ្នឹង និង​ថ្ងៃស្អែក​មួយថ្ងៃ​ទៀត ដើម្បី​រង់ចាំ​ដំណោះស្រាយ ពី​ក្រសួង​ការងារ ហើយ​ថ្ងៃ​នេះ​ដែរ ខ្ញុំ​បាន​មក​ដល់​ក្រសួង​ការងារ កំពុង​ប្រជុំ​។ អង្គប្រជុំ​នេះ និយាយ សាកសួរ​ព័ត៌មាន​ពី​តំណាង​កម្មករ។ ខ្ញុំ​មិន​ទាន់​បាន​ជួប​ចរចា​ជាមួយ​ភាគី​រោងចក្រ​ទេ»

រោងចក្រ ដាប់ប៊ែលយូ អេនឌី ស្ថិត​តាម​បណ្ដោយ​ផ្លូវ​លេខ​៣៧១ ភូមិ​ឫស្សី សង្កាត់​ស្ទឹងមានជ័យ។ជម្លោះ​កម្មករ និង​ថៅកែ​នៅ​រោងចក្រ ដាប់ប៊ែលយូ អេនឌី អូស​បន្លាយ​ជិត​២​ខែ​ហើយ ក្រោយពេល​កម្មករ​ទាមទារ​ឱ្យ​ថៅកែ​រោងចក្រ សម្របសម្រួល​ផ្ដល់​ប្រាក់​អតីតភាព​ការងារ​មុន​ឆ្នាំ​២០១៩ ឱ្យ​ពួកគេ។

រោងចក្រ​នេះ មានកម្ម​ករ​ជាង ១.៨០០​នាក់ ប៉ុន្តែ​ថៅកែ​បាន​បញ្ឈប់​អស់​ជាង ១.៧០០​នាក់។ កាលពី​ថ្ងៃ​ទី​២៦ មករា សមាគម​ថៅកែ​រោងចក្រ បាន​ប្រកាស​ឱ្យ​កម្មករ​ទាំងអស់​ចូល​ធ្វើការ​វិញ​។ ក្រុម​កម្មករ និង​សហភាព​ការងារ​កម្ពុជា ដែល​កម្មករ​បាន​ផ្ទេរសិទ្ធិ​ឱ្យ​ជួយ​នោះ អះអាង​ថា យ៉ាងហោចណាស់ កម្មករ​ជាង ១.២០០​នាក់ មិនទាន់​ត្រូវ​បាន​ថៅកែ​រោងចក្រ ដាប់ប៊ែលយូ អេនឌី អនុញ្ញាត​ឱ្យ​ចូល​ធ្វើការ​វិញ​ទេ​។ អាស៊ីសេរី បាន​ព្យាយាម​សុំ​ការ​បញ្ជាក់ ពី​អគ្គលេខាធិការ​សមាគម​ថៅកែ​រោងចក្រ​លោក ខេន លូ ជាច្រើន​ថ្ងៃ​ហើយ ប៉ុន្តែ​មិន​លើក​ទូរស័ព្ទ។

កម្មករ លោក ផាន់ សាមុត អះអាង​ថា មកដល់​ថ្ងៃ​ទី​១៣ កុម្ភៈ ចំនួន​កម្មករ​នៅតែ​ជាង ១​ពាន់ ២​រយ​នាក់ មិន​ព្រម​ចូល​ធ្វើការ​ទេ។ លោក​ថា កម្មករ​រង់ចាំ​ឱ្យ​រោងចក្រ ធ្វើ​កិច្ចសន្យា​លាយលក្ខណ៍​អក្សរ​ជាមួយ​ខាង​សហជីព​ស៊ីខៅឌូ ឬ​សហភាព​ការងារ​កម្ពុជា ដែល​ជា​តំណាង​កម្មករ​សិន ទើប​ពួកគេ ព្រម​បញ្ឈប់​កូដកម្ម និង​វិល​ចូល​ធ្វើ​ការងារ​វិញ។

មន្ត្រី​ផ្នែក​ច្បាប់ នៃ​សម្ព័ន្ធ​សហជីព​ស៊ីខៅឌូ និង​ជា​តំណាង​ដោះស្រាយ​វិវាទ​សម្រាប់​រោងចក្រ ដាប់ប៊ែលយូ អែនឌី (W&D) លោក ស៊ាង យ៉ូត ប្រាប់​ថា កិច្ចប្រជុំ​មួយ​ល្ងាច នៅ​ក្រសួង​ការងារ គឺ​មន្ត្រី​នៃ​ក្រសូង​ការងារ​មិន​ទាន់​សម្រេច​បែប​ណា​ទេ ដោយ​គ្រាន់តែ​សាកសួរ​ព័ត៌មាន​ពី​កម្មករ និង​អះអាង​បន្ត​នីតិវិធី​បន្ត​ទៀត ជាមួយ​ភាគី​ពាក់ព័ន្ធ។ លោក ស៊ាង យ៉ូត ឱ្យ​ដឹង​ថា ក្នុង​កិច្ច​ប្រជុំ សហជីព និង​ភាគី​កម្មករ ទាមទារ​ឱ្យ​ក្រសួង​ការងារ​បញ្ជូន​សំណុំរឿង​ជម្លោះ​នៅ​រោងចក្រ W&D ទៅ​​ក្រុម​ប្រឹក្សា​​អាជ្ញា​កណ្ដាល ព្រោះ​ក្រសួង​ការងារ​បាន​អនុវត្ត​នីតិវិធី​ផ្សះផ្សា ជិត​មួយ​ខែ​ហើយ តាំង​ពី​ថ្ងៃ​ទី​១៨ មករា​មក តែ​មិន​ទាន់​មាន​ប្រសិទ្ធភាព៖ «អត់​មានការ​ញុះញង់​ទេ គឺ​ការ​ស្ម័គ្រចិត្ត​របស់​គាត់។ គាត់ (កម្មករ​) ចង់បាន​កិច្ចព្រមព្រៀង​មួយ ជា​លាយលក្ខណ៍អក្សរ ជាមួយ​ភាគី​ក្រុមហ៊ុន ព្រោះថា​កន្លងមក មាន​បញ្ហា​ដដែលៗ​។ គ្មាន​លាយលក្ខណ៍អក្សរ គឺ​បាតដៃ ខ្នងដៃ​។ អ៊ីចឹង ធ្វើ​ឱ្យ​ជំនឿ ទុកចិត្ត​ក្រុមហ៊ុន គាត់ (កម្មករ​) អត់​មាន​ទំនុក​ចិត្ត​។ គាត់​ចង់បាន​កិច្ចព្រមព្រៀង​មួយ​។ សម្រាប់​រឿង​កម្មករ​មិន​ចូល (​ធ្វើការ​)​ដោយសារ​រោងចក្រ បញ្ឈប់​កម្មករ​មួយ​ផ្នែក មួយ​ចំនួន»

កម្មករ ថា​ក្រោយពេល​ប្រជុំ​នៅ​រសៀល​ថ្ងៃ​ទី​១៣ កុម្ភៈ​រួច ពួកគេ នឹង​រង់​ចាំ​មើល​ចំណាត់ការ របស់​មន្ត្រី​ក្រសួង​ការងារ ប៉ុន្តែ​ពួកគេ​នឹង​បន្ត​ការ​តវ៉ា​នៅមុខ​រោងចក្រ W&D រាល់ថ្ងៃ ទាល់​តែ​មាន​ដំណោះស្រាយ។ កម្មករ​ក៏​គ្រោង​លើកគ្នា​ទៅ ដាក់​ញត្តិ​ម្ដង​ទៀត នៅ​ខុទ្ទកាល័យ​មេដឹកនាំ​របប​ក្រុង​ភ្នំពេញ លោក ហ៊ុន សែន ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល