រូប៖ លោក សំរ៉ុង បូរី អគ្គលេខាធិការនៃសហជីពស៊ីខៅឌូ ប្រចាំរោងចក្រ ផ្ដល់ឲ្យ
កម្មករនៅរោងចក្រស្យុង យិន (Zhong Yin Cambodia B Textile Co.LTD) នៅក្រុងតាខ្មៅ ខេត្តកណ្ដាល នាំគ្នាផ្ដិតមេដៃ ដើម្បីដាក់ទៅក្រសួងពាក់ព័ន្ធ សុំកិច្ចអន្តរាគមន៍ឲ្យថៅកែបើកប្រាក់ឈ្នួល និងប្រាក់រំលឹកអតីតភាពការងារ។ កម្មករថា បើគ្មានដំណោះស្រាយទេ កម្មករនឹងប្ដឹងទៅតុលាការទៀត ព្រោះថៅកែជនជាតិចិនមិនគោរពច្បាប់ការងារ កេងប្រវ័ញ្ចប្រាក់កម្មករ។
កម្មកររោងចក្រ ស្យុង យិន ប្រាប់ថា ពួកគេរងការបញ្ឈប់ពីថៅកែជាបន្តបន្ទាប់រាល់ថ្ងៃ ចាប់តាំងពីចុងខែកញ្ញា ឆ្នាំ២០១៩ មក ហើយថៅកែមិនទាន់បើកឈ្នួល ប្រាក់អត្ថប្រយោជន៍ ប្រាក់លំហែមាតុភាព និងប្រាក់រំលឹកអតីតភាពការងារឲ្យកម្មករទេ។
កម្មការិនីផ្នែកឆែកអាវ និងកត់បុងម្នាក់ គឺលោកស្រី វណ្ណ សុផា និយាយថា ថៅកែមិនទាន់បញ្ឈប់លោកស្រីទេ ដោយសារលោកស្រីជាប់ឈប់សម្រាកសម្រាលកូនខ្ចី។ ប៉ុន្តែ លោកស្រី ថា ក្រុមហ៊ុន មិនទាន់បើកប្រាក់ឈ្នួលខែវិច្ឆិកាឲ្យគ្រប់ចំនួន មិនទាន់ទទួលបានប្រាក់រំលឹកអតីតភាពការងារពេញមួយ ឆ្នាំ២០១៩ និងមិនទទួលបានប្រាក់លំហែមាតុភាពពេលសម្រាលកូននេះ។ លោកស្រីអះអាងថា ប្រាក់ឈ្នួលសម្រាប់ខែធ្នូ ក៏មិនទាន់បានបើកដែរ។ កម្មការិនីរូបនេះ រំលឹកថា មួយរយៈចុងក្រោយនេះ ថៅកែតែងកុហកកម្មករ និងលើកពេលវេរលុយ ប្រាក់ឈ្នួលប្រចាំខែចូលគណនីកម្មកររហូត ហើយបញ្ឈប់កម្មករជាបន្តបន្ទាប់រាល់ថ្ងៃ៖ «ប្រាក់រំលឹករយៈពេល១ឆ្នាំហើយ បងអត់ទាន់បើកឲ្យពួកខ្ញុំទេ។ ម្ដងថា ខែនេះ ម្ដងថា ខែនោះ ហើយខាងសហជីពសុំជួបក៏អត់ជួប។ សុំណាត់ជួបថ្ងៃនេះ ដល់ថ្ងៃហ្នុង លើកវិញ ថា រវល់ អត់ជួបវិញ រហូតរយៈពេល១ឆ្នាំ ហើយបង គឺពួកខ្ញុំអត់ទាន់បានលុយហ្នឹងទេ»។
រោងចក្រ ស្យុង យិន ស្ថិតនៅភូមិ ព្រែកតាព្រឿង សង្កាត់សិត្បូ ក្រុងតាខ្មៅ។ បុគ្គលិកសហជីពស៊ីខៅឌូ ប្រចាំរោងចក្រ ស្យុង យិន ឲ្យដឹងថា រោងចក្រនេះមានកម្មករសរុបជិត ៦រយ (៥៩២) នាក់ ថៅកែជាជនជាតិចិន និងធ្លាប់ដេរសំលៀកបំពាក់ យីហោ H&M និងម៉ាកផ្សេងទៀត។
អគ្គលេខាធិការសហជីព ស៊ីខៅឌូ ប្រចាំរោងចក្រ ស្យុង យិន លោក សំរ៉ុង បូរី ប្រាប់ថា ថៅកែបានបញ្ចប់កិច្ចសន្យារបស់កម្មករជាបណ្ដើរៗ តាំងពីកញ្ញា ហើយដល់ខែវិច្ឆិកា កម្មករបានប្រមូលផ្ដុំគ្នាតវ៉ា។ លោកថា ការតវ៉ាច្រើនខែមកនេះ ឃើញមានមន្ត្រីនៃមន្ទីរការងារខេត្តកណ្ដាល មកអន្តរាគមន៍ដែរ តែមិនទាន់មានដំណោះស្រាយទេ។ លោកប្រាប់ទៀតថា កម្មករកំពុងប្រមូលស្នាមមេដៃ ធ្វើញត្តិដាក់ទៅស្ថាប័នពាក់ព័ន្ធ ដើម្បីស្នើសុំឲ្យមានការពន្លឿនដំណោះស្រាយ និងមានគម្រោងដាក់ពាក្យប្ដឹងទៅតុលាការ ឲ្យថៅកែគោរពច្បាប់ការងារ៖ «សមាជិកខ្ញុំឥឡូវ សល់ ២៥៩នាក់។ អ៊ីចឹង ឥឡូវប្រហែលផ្ដិតបាន២រយនាក់ជាង ដោយសារ អ្នកផ្សេងគាត់ទៅតាមខេត្ត នៅតាមខេត្តឆ្ងាយៗ គាត់អត់ទាន់បានមកផ្ដិតទេ។ អ្នកផ្សេងទៀត គាត់ឆ្លងទន្លេ ជាប់សម្រាក (កូន) អ៊ីចឹងទៅណា»។
ក្នុងញត្តិរបស់កម្មករ ត្រៀមដាក់ជូនស្ថាប័នពាក់ព័ន្ធ មាន ៦ចំណុច គឺទាមទារឲ្យនិយោជកបើកប្រាក់រំលឹកអតីតភាពការងារ និងប្រាក់បំណាច់អតីតភាពការងារជូនកម្មករ និយោជិត។ ទាមទារឲ្យសងប្រាក់ឈ្នួល និងប្រាក់អត្ថប្រយោជន៍ជូនកម្មករ ដែលរងការព្យួរការងារដោយមិនត្រឹមត្រូវ និងគ្មានការអនុញ្ញាតពីក្រុមអធិការកិច្ចរបស់ក្រសួងការងារ។ ទាមទារឲ្យនិយោជកទទួលយកសមាជិករបស់សហជីពប្រជាធិបតេយ្យកម្មករ ឬសហជីព ស៊ីខៅឌូ ចូលធ្វើការវិញ និងសងប្រាក់រំលឹក ប្រាក់ឈ្នួល និងប្រាក់អត្ថប្រយោជន៍ ចាប់ពីថ្ងៃបញ្ឈប់កម្មករទាំងនោះ។
ជុំវិញករណីនេះ អាស៊ីសេរី គ្មានប្រភពសុំការបញ្ជាក់ពីខាងភាគីរោងចក្រ ស្យុង យិន ទេ។ ចំណែកអគ្គលេខាធិការ នៃអគ្គលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញា និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ទេស រុក្ខាផល មិនទទួលទូរស័ព្ទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
