ក្រុមការងារប្រព័ន្ធលូ អូរ ប្រឡាយ និងប្រព័ន្ធប្រព្រឹត្តិកម្ម នៃរដ្ឋបាលខេត្តព្រះសីហនុ បានចុះផ្អាកការដ្ឋានសំណង់មួយកន្លែងជាបណ្ដោះអាសន្ន ជារបស់អ្នកវិនិយោគទុនចិន មានទីតាំងនៅម្តុំឆ្នេរអូរត្រេះ ស្ថិតក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ ដែលសង្ស័យថា បានដឹកដីចាក់រំលោភយកដីចំណីអូរធម្មជាតិ ធ្វើកម្មសិទ្ធិខុសច្បាប់។
អភិបាលខេត្តព្រះសីហនុ លោក យន្ត មីន មានប្រសាសន៍ថា ក្រុមការងារគ្រប់គ្រងប្រព័ន្ធលូ អូរ ប្រឡាយ និងប្រព័ន្ធប្រព្រឹត្តិកម្ម នៃរដ្ឋបាលខេត្តនេះ បានចុះដល់ទីតាំងសំណង់សង់ ១កន្លែង ហើយផ្អាកជាបណ្ដោះអាសន្នសិន ព្រោះសង្ស័យបានសង់រំលោភលើដីចំណីអូរធម្មជាតិ សម្រាប់រំដោះទឹកចេញពីមូលដ្ឋានក្រុងព្រះសីហនុ។
លោក ព្រហ្ម សេង អនុប្រធានមន្ទីរធនធានទឹក និងឧតុនិយម ខេត្តព្រះសីហនុ ដែលដឹកនាំក្រុមការងារចុះផ្អាកសំណង់ដែលសង្ស័យថា សង់រំលោភដីចំណីអូរបង្ហូរទឹក នៅម្តុំឆ្នេរអូរត្រេះ នោះមានប្រសាសន៍ថា ក្រុមការងារសម្រេចផ្អាកការសាងសង់នោះ ជាបណ្ដោះអាសន្ន នៅរសៀលថ្ងៃទី៦ ខែមីនា ដោយតម្រូវឱ្យម្ចាស់ការដ្ឋានសំណង់ខាងលើនេះ ត្រូវរកព្រំអូរ ឬព្រំដីកម្មសិទ្ធិ និងឯកសារពាក់ព័ន្ធ យកមកបង្ហាញដល់ក្រុមការងារ ឱ្យបានត្រឹមត្រូវជាមុនសិន ទើបរដ្ឋបាលខេត្តអនុញ្ញាតឱ្យសង់សំណង់នេះបន្តទៀត។
អ្នកសម្របសម្រួលសមាគមអាដហុក ប្រចាំខេត្តព្រះសីហនុ អ្នកស្រី ជៀប សុធារី សំណូមពរថា សូមឱ្យ ក្រុមការងាររដ្ឋបាលខេត្តនេះ ត្រូវពង្រឹងអនុវត្តច្បាប់ទប់ស្កាត់ការទន្ទ្រានយកដីចំណីអូរ ប្រឡាយ និងលូបង្ហូរ ទឹកនេះ ឱ្យបានត្រឹមត្រូវ និងមានប្រសិទ្ធភាព។ ព្រោះថា រាល់ថ្ងៃនេះ តម្លៃហាងឆេងដីនៅមូលដ្ឋាន ខេត្តព្រះសីហនុ មានតម្លៃខ្ពស់ និងមានការរំលោភយ៉ាងអនាធិបតេយ្យទៅលើដីចំណីអូរ លូបង្ហូរទឹក និងប្រឡាយធម្មជាតិជាដើម។ «»
អភិបាលខេត្តព្រះសីហនុ លោក យន្ត មីន បញ្ជាក់ថា ចាប់ពីពេលនេះតទៅ រដ្ឋបាលខេត្តនេះ នឹងមិនអនុញ្ញាតឱ្យមានសកម្មភាពដឹកដីចាក់លុប ឬរំលោភដីចំណីមាត់អូរ និងលូបង្ហូរទឹក ធ្វើកម្មសិទ្ធិខុសច្បាប់ទៀតទេ។ ជាងនេះទៀត សម្រាប់សំណង់ ដែលកន្លងមកបានសង់រំលោភទៅលើដីមាត់អូរ និងលូបង្ហូរទឹក ក៏ត្រូវសើរើឡើងវិញដែរ។
ទោះជាយ៉ាងណាក៏ដោយចុះ គេសង្កេតឃើញថា អាជ្ញាធរក្រុងព្រះសីហនុអនុវត្តច្បាប់ដោយកន្លែង។ ដូចជា៖ អាជ្ញាធរក្រុងព្រះសីហនុ មិនបានចាត់វិធានការលើក្រុមហ៊ុនឯកជនមួយដែលបានចាក់ដីលុបឆ្នេរព្រែកត្រែង ត្រង់ភូមិសាស្ត្រ ភូមិ៤ ឃុំអូរត្រេះ ស្រុកស្ទឹងហាវទេ។ ក្រុមហ៊ុនដែលចាក់ដីលុបឆ្នេរព្រែកត្រែងនោះ ត្រូវបានគេដឹងថា ជារបស់អ្នកស្រី ជឹង សុភាព ហៅយាយភូ ភរិយារបស់លោកឧកញ៉ា ឡាវ ម៉េងឃីន ម្ចាស់ក្រុមហ៊ុន ស៊ូកាកូ អ៊ីន (Shukaku Inc) ដែលបានចាក់ដីលុបតំបន់បឹងកក់កណ្ដាលក្រុងភ្នំពេញដ៏ចម្រូងចម្រាស កាលពីប៉ុន្មានឆ្នាំមុននេះ។
លោកនាយករដ្ឋមន្ត្រី ហ៊ុន សែន កន្លងមកបានបញ្ជាឱ្យរដ្ឋមន្ត្រីក្រសួងរៀបចំដែនដី និងជាប្រធានគណៈកម្មាធិការគ្រប់គ្រងតំបន់ឆ្នេរ លោក ជា សុផារ៉ា កាយដីដែលក្រុមហ៊ុនបានចាក់លុបឆ្នេរព្រែកត្រែងនោះចេញវិញ ដើម្បីរក្សាឆ្នេរធម្មជាតិឱ្យបានដូចដើម។ ប៉ុន្តែលោក ជា សុផារ៉ា បានត្រឹមតែផ្អាកសកម្មភាពរបស់ក្រុមហ៊ុន មិនឱ្យដឹកដីចាក់លុបឆ្នេរថែមទៀត រីឯសកម្មភាពកាយដីចេញពីឆ្នេរឱ្យដូចដើមវិញនោះ មិនមានសោះឡើយ។ ប្រការដែលបញ្ជារបស់នាយករដ្ឋមន្ត្រីមិនត្រូវបានគោរពតាមនេះ សបញ្ជាក់ថា អ្នកស្រី ជឹង សុភាព ហៅយាយភូ ម្ចាស់ក្រុមហ៊ុនដែលបានដឹកដីលុបឆ្នេរសមុទ្រជាទ្រព្យសម្បត្តិរបស់រដ្ឋនោះ មានឥទ្ធិពលលើនាយករដ្ឋមន្ត្រីកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។