ជនសង្ស័យជាជនជាតិចិនម្នាក់ត្រូវម្ចាស់ផ្ទះបាញ់សម្លាប់ នៅខេត្តព្រះសីហនុ។
ស្នងការខេត្តព្រះសីហនុ លោក ជួន ណារិន ប្រាប់អាស៊ីសេរីនៅថ្ងៃច័ន្ទម្សិលមិញថា បុរសជនជាតិចិនម្នាក់ត្រូវបានបាញ់ស្លាប់ និងបក្ខពួកម្នាក់ទៀតបានរងរបួសធ្ងន់ នៅពេលពួកគេចូលគាស់ទូរដែកនៅក្នុងផ្ទះមួយកន្លែងក្នុងភូមិ៣ សង្កាត់លេខ៤ ក្រុងព្រះសីហនុ។
លោក ជួន ណារិន អះអាងថា ម្ចាស់ផ្ទះ បានបាញ់ទៅលើជនជាតិចិនទាំងពីរនាក់នោះ នៅវេលាម៉ោង១២យប់ថ្ងៃទី២២ខែធ្នូ បន្ទាប់ពីជនសង្ស័យទាំងពីរនាក់នេះបានប៉ុនប៉ងវាយប្រហារម្ចាស់ផ្ទះដោយដែកត្បែង ដើម្បីគេចខ្លួន។
លោកបញ្ជាក់ថា ម្ចាស់ផ្ទះឈ្មោះ លី ទី ជាមន្ត្រីនគរបាលព្រំដែនទឹក បង្ក្រាបលើផ្ទៃសមុទ្រ ខេត្តព្រះសីហនុ។ លោកថា ម្ចាស់ផ្ទះមិនត្រូវបានចាប់ខ្លួនទេ ព្រោះគាត់គ្រាន់តែប្រើសិទ្ធិដើម្បីការពារខ្លួន ព្រោះជនល្មើសទាំងពីរប៉ុនប៉ងសម្លាប់គាត់។
ទោះបីជាយ៉ាងណា មន្ត្រីសិទ្ធិមនុស្សនៃ សមាគម អាដហុក ខេត្តព្រះសីហនុ អ្នកស្រី ជាប សុធារី មានប្រសាសន៍ថា សមត្ថកិច្ចគួរធ្វើការឃាត់ខ្លួនមន្ត្រីនគរបាល ដែលបានបាញ់សម្លាប់ជនសង្ស័យ ព្រោះនេះជាការប្រព្រឹត្តអំពើមនុស្សឃាត។
អ្នកស្រីបញ្ជាក់ថា មន្រ្តីនគរបាលនោះមិនគួរបាញ់សម្លាប់ជនសង្ស័យឡើយ ព្រោះគាត់មិនមានកាំភ្លើងនៅក្នុងដៃ។ គាត់គួរតែព្យាយាមចាប់ខ្លួនជនសង្ស័យ ឬត្រឹមបាញ់ឱ្យរបួស ប្រសិនបើជនសង្ស័យមានឧបករណ៍ដែលអាចធ្វើឱ្យគាត់គ្រោះថ្នាក់បាន ដើម្បីយកពួកគេទៅផ្ដន្ទាទោសតាមច្បាប់៖ «សិទ្ធិការពារខ្លួនស្របច្បាប់គឺធ្វើដំណើរគ្នា ហើយឲ្យតុល្យភាពទៅនឹងកម្លាំង។ អ៊ីចឹងបើសិនជនប្រព្រឹត្តបទល្មើស គាត់អត់មានអាវុធ ប៉ុន្តែយើងមានអាវុធភ្ជង់គាត់ការពារអ៊ីចឹងទៅ កុំឲ្យគាត់តដៃជាមួយយើងបាន ហើយយើងបាញ់កន្លែងណាដែលគាត់មិនអាចរត់គេចខ្លួនបាន»។
ស្នងការខេត្តព្រះសីហនុ លោក ជួន ណារិន ប្រាប់ថា ជនជាតិចិនម្នាក់ដែលបានរងរបួសត្រូវបានសមត្ថកិច្ចបញ្ជូនទៅកាន់មន្ទីរពេទ្យបង្អែកភ្លាមៗដើម្បីសង្គ្រោះ។ ចំណែកសាកសពម្នាក់ទៀតត្រូវបានរក្សាទុកនៅទីបញ្ជាការដ្ឋាននគរបាលខេត្ត ប៉ុន្តែសមត្ថកិច្ចគ្រោងនឹងបញ្ជូនទៅនាយកដ្ឋានបច្ចេកទេសក្រុងភ្នំពេញដើម្បីធ្វើកោសល្យវិច័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។