គ្រួសារស្រ្តីដែលសម្រាលកូននៅខាងមុខបន្ទប់ជួលសំណូមពរឱ្យអាជ្ញាធរយកចិត្តទុកដាក់ជួយដល់ស្រ្តីមានផ្ទៃពោះជិតសម្រាល ឱ្យបានពេញលេញចៀសវាងកើតមានហេតុការណ៍តក់ស្លុត ប្រឈមនឹងគ្រោះថ្នាក់ដូចករណីដែលគ្រួសារនេះបានជួបប្រទះ។
លោក សុខ ប៊ុនលីន ជាប្ដី មានមុខរបរជាជំនួយការចុងភៅនៅភោជនីយដ្ឋានជប៉ុនមួយកន្លែងអោយដឹងថា លោកនៅតែចងចាំភាពភ័យតក់ស្លុតនៅថ្ងៃកើតហេតុនៅឡើយ បើទោះជាបានរំលងទៅជាច្រើនថ្ងៃមកហើយ៖ « និយាយទៅព្រឺសម្បុរហ្មងបង គឺទី១ញ័រដៃញ័រជើង មួយទៀតតឿនដល់អាជ្ញាធរហ្នឹងថា ឱ្យគាត់ជួយផង។ ឱ្យគាត់ប្រញាប់ហៅឡានហៅអីម៉ោ ព្រោះប្រពន្ធខ្ញុំកើតកូន ហើយណាមួយខ្ញុំប្រុស ខ្ញុំអត់ដឹងធ្វើម៉េច អត់ដែលទទួលរូបភាពនៅពេលកូនកើតមកគាត់ស្រែករកខ្ញុំ ហើយខ្ញុំទៅទ្រកូនចឹង។ ពេលហ្នុងខ្ញុំគិតអីអត់ចេញ។ ខ្ញុំមិនដឹងធ្វើម៉េចរបៀបសង្រ្គោះបឋម ជួយរបៀបម៉េចអី ខ្ញុំគិតតែពីកាន់កូន។ ខ្ញុំលែងមាត់ហើយបង របៀបដូចបាត់ម្ចាស់ការខ្លួនឯង ភ័យប្រពន្ធផងអីផង»។
កាលពីថ្ងៃទី២៤ ខែមេសា នៅលើបណ្ដាញសង្គមហ្វេសប៊ុកមានការចែករម្លែកវីដេអូខ្លី ដែលបង្ហាញពីស្រ្តីវ័យប្រមាណ៣០ឆ្នាំម្នាក់បានសម្រាលកូននៅខាងមុខបន្ទប់ជួល។ ស្រ្តីជាម្ដាយបានដេកស្ដូកស្ដឹងនៅលើកម្រាលខាងមុខបន្ទប់ ដោយមានកូនទើបនឹងកើតនៅលើថ្នក់សំពត់នៅចន្លោះភ្លៅរបស់នាង។ បើតាមការរៀបរាប់នៅក្នុងវីដេអូនោះ គឺស្រ្តីជាម្ដាយបានសម្រាលកូននៅលើកៅអី មុនពេលប្ដីបានដាក់នាងទៅលើកម្រាល៖ « មើលឈឺពោះគ្នាកើតហើយ។ មុនដំបូងគ្នាកើតអង្គុយទេ ទើបតែលើកយកមកដាក់ក្រោម ហើយបើឡានពេទ្យវិញគ្នាចាំៗឡើងស្ងួតកូនអស់ហើយ»។
ស្រ្តីដែលបានសម្រាលកូននៅពេលនោះ គឺលោកស្រី ហែម ប៊ុនធា ជាកម្មករនៅរោងចក្រម៉ូតូ ហុងដា ( Honda )។ លោកស្រីថា សម្រាលកូនលើកនេះមិនមែនជាលើកដំបូងទេ គឺលោកស្រីសម្រាលកូនទី៣ហើយ។ លោកស្រីរៀបរាប់ថា ពេលនោះលោកស្រីល្វើយខ្លាំង លែងមានកំលាំងកំហែងអ្វីទាំងអស់ គឺស្ទើតែលែងចាំបានថា មានរឿងអ្វីកើតឡើងខ្លះនៅក្រោយពេល ដែលកូនបានកើតមក។ លោកស្រីថា ម៉្យាងដោយសារតែឈឺពោះយូរម៉ោងពេក ម្យ៉ាងទៀតដោយសារភិតភ័យ ព្រោះមិនធ្លាប់បានជួបប្រទះបទពិសោធន៍បែបនេះពីមុនមក៖ « គិតអីក៏អត់ឃើញវាដូចជាវិលទៅៗ។ ភ្នែកដូចជាចង់តែបិទទៅៗ។ តែបានបងគាត់ឈរច្របាច់ហើយគាត់ចេះតែប្រាប់ថា បងឯងទ្រាំតិចទៅពេទ្យមកដល់ហើយ តែគាត់ពាក់អាចពាក់អី។ គាត់ចេះតែដាស់តឿនយើង និយាយជាមួយយើងរហូត គាត់ឱ្យសម្រួលអារម្មណ៍ និយាយជាមួយយើងរហូត។ គាត់ចេះតែនិយាយទៅកុំឱ្យយើងស្ងាត់ពេកអាចនឹងសន្លប់ ឬក៏យ៉ាងម៉េចចឹងទៅណាស់បង»។
វីដេអូដែលបង្ហោះតាមបណ្ដាញសង្គមបង្ហាញអោយឃើញបុរស ២ នាក់នៅក្បែរលោកស្រី ប៊ុនធា នៅពេលសម្រាលនោះ ម្នាក់ជួយគក់ច្របាច់ដៃលោកស្រី និងម្នាក់ទៀតកំពុងទ្រទារកដែលទើបនឹងកើតទាំងមិនទាន់កាត់ទងផ្ចិតនៅឡើយ។
លោក សុខ ប៊ុនលីន រៀបរាប់ថា ប្រពន្ធរបស់លោកបានឈឺពោះសម្រាលកូនតាំងពីពេលទាបភ្លឺនៅក្នុងបន្ទប់ជួលស្ថិតនៅភូមិអូរបែកក្អម សង្កាត់អូរបែកក្អម ខណ្ឌសែនសុខ គឺចំពេលដែលតំបន់នោះត្រូវអាជ្ញាធរបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ-១៩។ លោកបន្តថា ប្ដីប្រពន្ធ ដែលនៅក្បែរបន្ទប់បានជួយយកអាសារប្រពន្ធរបស់លោកនៅពេលនោះ។ លោកបានផ្ដល់ដំណឹងទៅមេភូមិអោយជួយរកមធ្យោបាយ ដើម្បីបានបញ្ជូនប្រពន្ធទៅឆ្លងទន្លេនៅមន្ទីរពេទ្យ ប៉ុន្តែដោយការរង់ចាំច្រើនម៉ោងពេកទើបធ្វើអោយប្រពន្ធរបស់លោកមិនអាចរង់ចាំបាន គឺត្រូវសម្រាលដោយខ្លួនឯង៖ « ពេលដែលកូនខ្ញុំកើតហ្នឹងគឺអំឡុងពេលដូចជាមួយម៉ោងកន្លះហើយ ដែលឡានពេទ្យបានមកដល់ អ៊ីញ្ចឹងកូនឡើងចង់ស្ងួតហើយហ្នឹង។ ខ្ញុំបានយកសារុងទៅរុំ។ ខ្ញុំចេះតែតាមបងអ្នកនៅក្បែរផ្ទះហ្នុងគាត់ថាឱ្យយកសារុងអីទៅរុំទៅកុំឱ្យស្ងួតអស់អាទឹកភ្លោះ ទឹកអីចឹងទៅណាស់»។
តែទោះជាយ៉ាងណា អ្នកស្រីជាមេភូមិអូរបែកក្អមប្រាប់អាស៊ីសេរីថា អាជ្ញាធរបានជួយសម្របសម្រួលហៅពេទ្យពីមណ្ឌលសុខភាពទឹកថ្លានោះភ្លាមៗក្រោយទទួលបានដំណឹងពីគ្រួសារ។ អ្នកស្រីអះអាងថា ពុំមានការពន្យារពេលយូរទេ ប៉ុន្តែអាចមានភាពយឺតយ៉ាវខ្លះដោយសារក្រុមគ្រូពេទ្យត្រូវចំណាយពេលក្នុងការស្លៀកពាក់តាមបច្ចេកទេសវេជ្ជសាស្រ្ដទប់ស្កាត់ការឆ្លងជំងឺកូវីដ-១៩៖ «កាលហ្នឹងបើនិយាយឱ្យចំយើងបានប្រាប់ទៅថ្នាក់លើក៏ប្រាប់ ប៉ុន្តែយើងក៏តេ (ទូរស័ព្ទ) ទៅគ្រូពេទ្យផ្ទាល់ក៏ប្រាប់ទៀត គឺត្រូវអោយដឹងចឹង។ ហើយគ្រូពេទ្យគាត់ប្រាប់ថា គាត់ឈឺពោះហ្នុងរាងលឿនដែរ។ ឡានពេទ្យប្រាប់ភ្លាមយើងរាយការណ៍ភ្លាម ប៉ុន្តែគាត់មកដល់ មិនទាន់ទេគាត់សម្រាលហើយ។ ពេលគាត់មកដល់គាត់ត្រូវស្លៀកពាក់ ព្រោះគាត់នៅក្នុងចត្តាឡីស័កចឹងពេទ្យមិនអាចលឿនៗ។ ពេលពេទ្យទៅដល់បែបគាត់ (ស្រ្តីជាម្តាយ) រាងខ្សោយដែរបានគេបញ្ជូនទៅពេទ្យជប៉ុន»។
បើតាមវីដេអូខ្លី ដែលគេចែកចាយតាមហ្វេសប៊ុកនៅពេលគ្រូពេទ្យទៅដល់ហើយចាប់ផ្ដើមស្លៀកពាក់នោះ គឺនៅក្រោយពេលដែលស្រ្តីជាម្ដាយបានសម្រាលកូនរួចរាល់ទៅហើយ៖ « អាណិតណាស់ ហើយពេទ្យនៅស្លៀកពាក់ខោអាវ អត់ទាន់ហើយទេពេទ្យ។ ប្រហែលជាកាត់ទងផ្ចិតនៅផ្ទះហ្នុងតែម្ដងតាមមើល»។
អ្នកប្រើប្រាស់បណ្ដាញសង្គមជាច្រើនសរសេរសារពីការអាណិតអាសូរស្រ្តីជាម្ដាយ។ អ្នកខ្លះបានផ្ដល់ជំនួយជាសម្ភារៈ និងថវិកាដល់គ្រួសារនេះថែមទៀត។ ប៉ុន្តែក៏មានអ្នករិះគន់ដែរថា អាជ្ញាធរបានធ្វេសប្រហែសមិនបានត្រៀមខ្លួនរួចរាល់សម្រាប់ជួយសង្រ្គោះស្រ្តីមានផ្ទៃពោះដែលត្រូវដល់ថ្ងៃសម្រាល។
មិនខុសគ្នានេះដែរ អតីតរដ្ឋមន្រ្តីក្រសួងកិច្ចការនារី និងជាអនុប្រធានគណបក្សសង្រ្គោះជាតិ អ្នកស្រី មូរ សុខហួរ ថ្លែងប្រាប់អាស៊ីសេរីថា ការបណ្ដែតបណ្ដោយអោយមានករណីស្រ្តីសម្រាលកូនដោយខ្លួនឯងបែបនេះ បង្ហាញអោយឃើញថា វិស័យសុខាភិបាលនៅមិនទាន់បានឆ្លើយតបអោយបានត្រឹមត្រូវតាមគោលការណ៍សិទ្ធិមនុស្ស ដែលធានាការពារជីវិត ឬសិទ្ធិរស់រានរបស់ពលរដ្ឋគ្រប់រូប៖« យើងត្រូវតែយល់ថា សិទ្ធិទទួលបានសេវាសុខភាពជាសិទ្ធិមនុស្ស ជាសិទ្ធិពលរដ្ឋ មិនថាអ្នកមានមិនថាអ្នកក្រទេ»។
អាស៊ីសេរីមិនអាចសុំការឆ្លើយតបរឿងនេះពីអ្នកនាំពាក្យក្រសួងសុខាភិបាលនៅឡើយទេ។ សារព័ត៌មានក្នុងស្រុកមួយចំនួនបានរាយការណ៍ថា មានអាជ្ញាធរមូលដ្ឋានថ្នាក់ខណ្ឌ សង្កាត់ជាដើម បាននាំអំណោយទៅឱ្យស្រ្តីជាម្ដាយ និងទារកទើបនឹងកើត ប៉ុន្តែពុំមានសេចក្ដីរាយការណ៍ពីការឆ្លើយតបរឿងនេះពីក្រសួងសុខាភិបាលឡើយ។
អ្នកសិក្សាការអភិវឌ្ឍសង្គមលោកបណ្ឌិត សេង សារី មើលឃើញថា ទាំងនេះបង្ហាញអោយឃើញថា ផ្នែកសុខាភិបាលមិនបានត្រៀមខ្លួនឆ្លើយតបនឹងការបិទខ្ទប់ពលរដ្ឋ ដែលជាបទពិសោធន៍សម្រាប់ក្រសួងសុខាភិបាលយកមកកែលម្អចំណុចខ្វះខាតរបស់ខ្លួន៖ «មិនទាន់ហួសពេលទេនៅក្នុងការឆ្លើយតបនេះ ហើយសង្ឃឹមថារឿងកូវីដ- ១៩នេះនឹងក្លាយទៅជាបទពិសោធន៍ដ៏សំខាន់មួយ នៅក្នុងការរៀបចំប្រព័ន្ធសុខាភិបាលឡើងវិញបាទ»។
បើទោះជាយ៉ាងនេះក្ដីមិនបានប៉ុន្មានថ្ងៃរំលងពីករណីស្រ្តីសម្រាលកូននៅខាងមុខបន្ទប់ជួលនេះផង ក៏មានករណីស្រ្តីម្នាក់ទៀតបានឆ្លងទន្លេដោយខ្លួនឯងនៅក្នុងបន្ទប់ជួលនៅក្នុងតំបន់បិទខ្ទប់នេះដែរ។
ចំពោះលោកស្រី ហែម ប៊ុនធា ដែលឆ្លងកាត់បទពិសោធន៍សម្រាលកូនដោយខ្លួនឯងនេះសំណូមពរដល់អាជ្ញាធរឱ្យដោះស្រាយបញ្ហានេះព្រោះស្ថានភាពនេះពិតជាគ្រោះថ្នាក់ និងអោយភ័យខ្លាចសម្រាប់ស្រ្តីជាម្ដាយ៖ «នៅពេលយើងមានសុខភាពមាំទាំដែរ ទម្រាំឆ្លងផុតការរង់ចាំ ( ឡានពេទ្យ ) របស់គាត់។ ប្រសិនបើអ្នកផ្សេងខ្ញុំអត់អាចថា បានទេព្រោះអីពេលហ្នុងខ្ញុំដល់កម្រិតថាស្លេកស្លាំងខ្លាំង គឺអស់ល្បឿនតែម្ដង»។
កម្ពុជាបានកាត់បន្ថយអត្រាមរណភាពស្ត្រីពេលសម្រាលកូនយ៉ាងតិច ៧៥ ភាគរយ នៅឆ្នាំ២០១៥ ទៅតាមគោលដៅកំណត់របស់អង្គការសហប្រជាជតិ ក្នុងនោះអត្រាមរណភាពស្ត្រីបានធ្លាក់ចុះ ៨៤ ភាគរយ នៅចន្លោះឆ្នាំ១៩៩០ និងឆ្នាំ២០១៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។