របាយការណ៍គ្រោះថ្នាក់ចរាចរណ៍ប្រចាំឆ្នាំ២០១៩ បង្ហាញថា ចំនួនមនុស្សស្លាប់ ដោយសារគ្រោះថ្នាក់ចរាចរណ៍ កាលពីឆ្នាំ ២០១៩ មានចំនួនកើនឡើងច្រើនជាងឆ្នាំ២០១៨ ជាង ២០០នាក់ ដែលស្មើប្រមាណ ១២ភាគរយ។
របាយការណ៍របស់អគ្គស្នងការដ្ឋាននគរបាលជាតិបង្ហាញថា នៅឆ្នាំ២០១៩ មានករណីគ្រោះថ្នាក់ចរាចរណ៍បានកើតឡើងជាង ៤ពាន់លើក (៤,១២១) ដែលបណ្តាលឱ្យមនុស្សស្លាប់ជិត ២ពាន់នាក់ និងរបួសជាង ៦ពាន់នាក់ (៦,១៤១)។
ដោយឡែកនៅឆ្នាំ ២០១៨ គ្រោះថ្នាក់ចរាចរណ៍មានចំនួនជាង ៣ពាន់ករណី បង្កឱ្យមនុស្សស្លាប់ជិត ២ពាន់នាក់ និងរបួសជិត ៥ពាន់នាក់។
សារព័ត៌មានក្នុងស្រុកបានដកស្រង់សម្ដីរបស់ នាយការិយាល័យនគរបាលចរាចរណ៍ផ្លូវគោកនៃនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈប្រាប់ភ្នំពេញប៉ុស្តិ៍ លោក ម៉ាន សុផាន់ណា ឱ្យដឹងថា ហេតុការណ៍គ្រោះថ្នាក់ចរាចរណ៍ទាំងនេះភាគច្រើនបណ្ដាលមកពីការបើកបរហួសល្បឿនកំណត់ បើកបរវ៉ាជែងក្នុងស្ថានភាពគ្រោះថ្នាក់ និងបើកបរក្នុងភាពស្រវឹងជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។