អាជ្ញាធរខ្មែរបន្តស្វែងរកចាប់ខ្លួនមនុស្សមួយចំនួនទៀតដែលសង្ស័យថា ជាប់ពាក់ព័ន្ធនឹងការជួញដូរថ្នាំញៀនជាមួយជនជាតិចិនចំនួន ៤នាក់។ ចំណែកនៅក្នុងខេត្តព្រះសីហនុឯណោះវិញ ជនរងគ្រោះគ្រោងនឹងវិលត្រឡប់ទៅស្រុកកំណើតវិញ ក្រោយពីបានរំដោះពីការចាប់ជំរិតទារប្រាក់ពីជនជាតិចិនដូចគ្នាកាលពីសប្ដាហ៍មុន។
អគ្គស្នងការរងនគរបាលជាតិទទួលបន្ទុកប្រឆាំងគ្រឿងញៀន លោក ម៉ក់ ជីតូ ប្រាប់អាស៊ីសេរីថា សមត្ថកិច្ចមានតម្រុយខ្លះៗ ទាក់ទិនទៅនឹងជនសង្ស័យមួយចំនួនទៀត ដែលបានរកស៊ីជួញដូរថ្នាំញៀនជាមួយជនជាតិចិន ៤នាក់។
លោកមិនបានបញ្ជាក់ថា តើនឹងមានជនសង្ស័យប៉ុន្មាននាក់ទេដែលជាប់ពាក់ព័ន្ធនៅក្នុងសំណុំរឿងជួញដូរគ្រឿងញៀននេះ។ លោកគ្រាន់តែបាននិយាយថា ក្នុងចំណោមជនសង្ស័យនោះ លោកមានជំនឿថា អាចនឹងមានជនជាតិខ្មែរផងដែរ៖ «មានពាក់ព័ន្ធចិន និងខ្មែរយើងដែរ។គ្រាន់ថាយើងមិនទាន់ច្បាស់ពីព្រោះថា ស្អីៗ ទាល់តែមានភស្តុតាងច្បាស់លាស់បានយើងចោទប្រកាន់គេបាន»។
កម្លាំងមានសមត្ថកិច្ចនៅក្នុងទីក្រុងភ្នំពេញបានចាប់ខ្លួនជនជាតិចិនចំនួន ៤នាក់កាលពីថ្ងៃទី៥ មិថុនាកន្លងទៅនេះ និងបានរកឃើញថ្នាំញៀនប្រភេទមេតំហ្វេតាមីនចំនួនជាង ៧គីឡូក្រាម និងសម្ភារៈកែច្នែប្រមាណជាង ១០០គីឡូក្រាមទៀត ក្នុងខណៈដែលជនសង្ស័យកំពុងបើកបររថយន្តនៅតាមផ្លូវ និងបានរកឃើញថា បានលាក់ទុកនៅនៅផ្ទះជួលមួយក្នុងនៅក្នុងសង្កាត់ទន្លេបាសាក់ក្រុងភ្នំពេញ។
សមត្ថកិច្ចក៏បានរករឹបអូសសម្ភារៈកែច្នៃ និង គ្រឿងសម្រាប់ផ្សំសារធាតុគ្រឿងញៀងជាង ១០០គីឡូក្រាម ហើយកាលពីថ្ងៃទី០៩ មិថុនា បានបញ្ជូនទៅតុលាការដើម្បីរងចាំជំនុំជម្រះទោសពីបទជួញដូរ និងកែច្នៃសារធាតុញៀនដោយខុសច្បាប់។
ព្រះរាជអាជ្ញារងនិងជាអ្នកនាំពាក្យតុលាការក្រុងភ្នំពេញលោក គុជ គឹមឡុង មានប្រសាសន៍ថា តុលាការមិនទាន់បញ្ចប់នីតិវិធីស៊ើបសួរនៅឡើយទេ ហើយនៅថ្ងៃទី១០ ខែមិថុនានេះនឹងបន្តស៊ើបសួរបន្ថែមទៀត។
សំឡេង«សំណុំរឿងនេះសមត្ថកិច្ចកំពុងសាកសួរហើយនឹងបញ្ជូនមកតុលាការនៅស្អែក។អញ្ចឹងចាំមានព័ត៌មានអ្វីបន្ថែមទៀតខ្ញុំនឹងជម្រាបជូន»។
ក្នុងរយៈពេល ៦ខែដើមឆ្នាំនេះ សមត្ថកិច្ចបានចាប់ខ្លួនជនបរទេសចំនួនជាង ២០០នាក់ ដែលមានជាង ២០សញ្ជាតិ ជាប់ពាក់ព័ន្ធនឹងការរត់ពន្ធថ្នាំញៀន។ ក្នុងចំណោមជនបរទេសដែលសមត្ថកិច្ចចាប់ខ្លួនរួមមានជនជាតិចិន វៀតណាម កូរ៉េខាងត្បូង នីហ្សើរីយ៉ា ជនជាតិអង់គ្លេស ជាដើម។
ចំណែកនៅក្នុងខេត្តព្រះសីហនុឯណោះវិញ ជនរងគ្រោះគ្រោងនឹងវិលត្រឡប់ទៅប្រទេសចិនវិញក្រោយពីបានរំដោះពីការចាប់បង្ខាំងជំរិតទារប្រាក់មិនបានសម្រេចពីជនជាតិចិនដូចគ្នាកាលពីសប្ដាហ៍មុន។
ស្នងការនគរបាលខេត្តព្រះសីហនុលោក ជូន ណារិន មានប្រសាសន៍ថា ជនរងគ្រោះក្រោយពីជាសះស្បើយពីស្នាមរបួសគ្រោងនឹងវិលត្រឡប់ទៅកាន់ប្រទេសចិនវិញ។ លោកបញ្ជាក់ថា ជនរងគ្រោះត្រូវបានជនសង្ស័យធ្វើទារុណកម្មរហូតដល់ជាំភ្នែក និងមានអាការៈស្លុតបាត់បងស្មារតីនៅឡើយ៖ «តាមពិតគាត់ចូលមកដោយស្របច្បាប់។អញ្ចឹងយើងមិនបាច់បញ្ជូនទេសម្រេចលើគាត់។ប្រហែលជាគាត់នឹងចាកចេញ ពីព្រោះគាត់ចូលមកដោយស្របច្បាប់។ អត់ទាន់ដឹងទេ ពីព្រោះយើងស្នើសុំឲ្យគាត់នៅជាមួយនឹងយើង ដើម្បីផ្តល់ព័ត៌មានលំអិតថែមទៀត អំពីដំណើរដើមទងអោយអស់ក្នុងនីតិវិធី ដែលយើងធ្វើ»។
លោក ជូន ណារិនបញ្ជាក់ថា កាលពីថ្ងៃទី៥ មិថុនាលោកបានទទួលពាក្យបណ្តឹងមួយពីជនជាតិចិនម្នាក់ ដែលត្រូវជាមិត្តភ័ក្ររបស់ជនរងគ្រោះឈ្មោះ វ៉ាង វេង ហ្ស៉ីង ( Wang Wenxing) ត្រូវបានចាប់ជំរិតក្រោយពីជនសង្ស័យមួយក្រុមបានប្រើប្រាស់បណ្ដាញសង្គមដើម្បីជំរិតទារប្រាក់ពីក្រុមគ្រួសារនៅក្នុងប្រទេសចិនចំនួន៥០ម៉ឺនយ័នគឺប្រមាណជិត៧ម៉ឺនដុល្លា តែមិនបានសម្រេចនោះទេ
លោកបញ្ជាក់ថាសមត្ថកិច្ចបានចាប់ខ្លួនជនជាតិចិនចំនួន ៤នាក់ ហើយកំពុងកសាងសំណុំរឿងបញ្ជូនទៅតុលាការពីបទសង្ស័យថា បង្ខាំងមនុស្សខុសច្បាប់ដើម្បីជំរិតទារប្រាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។