សមត្ថកិច្ច អះអាងថា បានរកឃើញជនសង្ស័យជួញដូរគ្រឿងញៀនប្រហែល ១០នាក់ ក្នុងចំណោមមនុស្សជាង ៣០០នាក់ ដែលឃាត់ខ្លួន នៅក្នុងមជ្ឈមណ្ឌលកម្សាន្ត រ៉ក់ (ROCK) កាលពីយប់ទៀបភ្លឺថ្ងៃទី២៣ កុម្ភៈ។ សង្គមស៊ីវិលជំរុញឪពុកម្ដាយ និងអ្នកពាក់ព័ន្ធឲ្យខិតខំជួយជនមានសារធាតុញៀន ដោយយកទៅបន្សាបសារធាតុញៀន តាមមណ្ឌលបន្សាបនានា។
អគ្គលេខាធិការនៃអាជ្ញាធរជាតិបង្ក្រាបគ្រឿងញៀន លោក មាស វីរិទ្ធិ ប្រាប់អាស៊ីសេរីថា មកដល់ពេលនេះ សមត្ថកិច្ចកំពុងបន្តនីតិវិធី លើជនសង្ស័យប្រហែល ១០នាក់ និងមិនទាន់បញ្ជូនទៅតុលាការទេ ដោយសារនីតិវិធីបទល្មើសគ្រឿងញៀន ខុសពីបទល្មើសផ្សេង ព្រោះសមត្ថកិច្ចត្រូវបន្តស្រាវជ្រាវរកប្រភពចែកចាយគ្រឿងញៀន។ ចំណែកមនុស្សជិត ២០០នាក់ ផ្សេងទៀត ដែលរកឃើញថា មាន និងគ្មានផ្ទុកសារធាតុញៀន ត្រូវបង្គាប់ឲ្យឪពុកម្ដាយ ទៅធ្វើកិច្ចសន្យាធានា និងអនុញ្ញាតឲ្យត្រលប់ទៅផ្ទះវិញ។ ឯម្ចាស់អាជីវកម្មមជ្ឈមណ្ឌលក្លឹបកម្សាន្ត រ៉ក់ លោក មាស វីរិទ្ធិ ប្រាប់ថា សមត្ថកិច្ចនឹងអនុវត្តតាមច្បាប់ ប៉ុន្តែមិនបញ្ជាក់វិធានការបែបណាទេ។
ម្ចាស់អាជីវកម្មមជ្ឈមណ្ឌលក្លឹបកម្សាន្ត រ៉ក់ គឺ លោក គិត ធាង ដែលគេស្គាល់ជាបងប្រុសរបស់ឧកញ៉ា គិត ម៉េង ជាឈ្មួញរកស៊ីច្រើនវិស័យនៅកម្ពុជា ហើយទទួលបានការជ្រោមជ្រែងពីលោក ហ៊ុន សែន មេដឹកនាំរបបក្រុងភ្នំពេញ។ អាស៊ីសេរី មិនអាចសុំការបំភ្លឺពីខាងភាគី លោក គិត ធាង បានទេ នៅថ្ងៃទី២៦ កុម្ភៈ ដោយសារលោកមិនលើកទូរស័ព្ទ។
ក្នុងប្រតិបត្តិការចុះចាប់ និងឃាត់ខ្លួន ជនសង្ស័យពាក់ព័ន្ធករណីគ្រឿងញៀន នៅក្លឹបកម្សាន្តរ៉ក់ កាលពីយប់ទៀបភ្លឺ ថ្ងៃទី២៣ កុម្ភៈ សមត្ថកិច្ចឃាត់ខ្លួន បានចំនួន ៣១១នាក់ គ្រឿងញៀន ប្រភេទថ្នាំគ្រាប់ និងប្រភេទទឹក ជាង ៥០គីឡូក្រាម ជញ្ជីងថ្លឹងគ្រឿងញៀន ១២ និងកាំភ្លើងខ្លីមួយដើម។ ភាគច្រើន នៃអ្នកត្រូវបានឃាត់ខ្លួន ជាក្មេងជំទង់ មានប្រុសមានស្រី និង មានសិស្សសាលាផងដែរ។ ក្រោយធ្វើតេស្តទឹកនោមរួច ភាគច្រើនសុទ្ធតែមានផ្ទុកសារធាតុញៀន។
នាយកប្រតិបត្តិអង្គការ ខាណា (Khana) លោក ជួប សុខចំរើន ជឿថា ឪពុកម្ដាយ និងអ្នកពាក់ព័ន្ធ ប្រាកដជាបានដឹងថា កូនមានផ្ទុកសារធាតុញៀន ក្រោយពេលសមត្ថកិច្ចពិនិត្យទឹកនោម និងឲ្យធ្វើកិច្ចសន្យាធានានោះ។ ដូច្នេះ ក្រោយពេលសមត្ថកិច្ចដោះលែង ឪពុកម្ដាយ ឬអាណាព្យាបាលត្រូវជួយជំរុញពួកគេ ទៅបន្សាបគ្រឿងញៀន។ លោកថា មានតែការធ្វើបែបនេះទេ ទើបអាចជួយឲ្យយុវជនទាំងនោះ ផ្ដាច់ពីគ្រឿងញៀនបាន៖ « ប្រសិនបើគាត់ ដឹងថា កូនគាត់ សាច់ញាតិគាត់ មានពាក់ព័ន្ធគ្រឿងញៀន គួរតែគាំទ្រ និងបញ្ជូនពួកគេ ទៅមណ្ឌលសុខភាព ឬក៏មន្ទីរពេទ្យ ដែលមានសេវាព្យាបាលជាង ៤រយកន្លែង ហើយខ្ញុំជឿថា គាត់នឹងប្រឹងប្រែងហើយ ព្រោះនេះជារឿងទាំងអស់គ្នា ហើយជារឿងទាំងអស់គ្នា ដែលត្រូវតែមានការគាំទ្រ»។
របាយការណ៍របស់អាជ្ញាធរជាតិប្រយុទ្ធគ្រឿងញៀន បង្ហាញថា ករណីគ្រឿងញៀននៅ ឆ្នាំ២០១៨ មាន ៨.០១៨ករណី មានការថយចុះជាងឆ្នាំ២០១៧ (៨.១៧៣ ករណី) ជាង ១រយ (១៦៥) ករណី។ ឯការឃាត់ខ្លួនជនសង្ស័យ ពាក់ព័ន្ធនឹងការជួញដូរគ្រឿងញៀន ក៏ថយចុះ ១០%ដែរ។ តែកើនឡើងបរិមាណគ្រឿងញៀន ចាប់បានច្រើនជាងឆ្នាំ២០១៧ បីដង (២០១៧ ចាប់បាន ១៧៣គីឡូក្រាម ឯឆ្នាំ២០១៨ ចាប់បានជាង ៥រយ (៥៣៦,៣៦) គីឡូក្រាម)។ ប៉ុន្តែរបាយការណ៍ពីក្រសួងសុខាភិបាលវិញ បង្ហាញថា ឆ្នាំ២០១៨ អ្នកញៀនគ្រឿងញៀន ដែលទទួលការព្យាបាលនៅមណ្ឌលបន្សាបគ្រឿងញៀន និងតាមសេវាសុខាភិបាលសាធារណៈទូទាំងប្រទេស មានការកើនឡើង បើប្រៀបធៀបនឹងឆ្នាំ២០១៧។
ស្នងការនគរបាលរាជធានីភ្នំពេញ លោក ស ថេត មិនទទួលទូរស័ព្ទអាស៊ីសេរីទេ នៅថ្ងៃទី២៦ កុម្ភៈ ប៉ុន្តែអះអាងតាមសារព័ត៌មានក្នុងស្រុក (ភ្នំពេញប៉ុស្តិ៍) ថា សមត្ថកិច្ចកំពុងស្រាវជ្រាវតាមរយៈ ជនសង្ស័យជាង១០នាក់ ដើម្បីរកប្រភពនាំចូលគ្រឿងញៀន។ បណ្ដាញយុវជន យល់ថា ប្រសិនបើសមត្ថកិច្ចអាចចាប់ឈ្មួញធំ ឬមេក្លោងថ្នាំញៀន នៅមជ្ឈមណ្ឌលកម្សាន្ត រ៉ក់ បាន នឹងទទួលបានការកោតសរសើរ និងជំនឿចិត្តពីពលរដ្ឋ។ តែបើធ្វើមិនបានទេ ពលរដ្ឋនឹងអស់ជំនឿ លើការបង្ក្រាបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។