កម្មករសំណង់ដែលស្លាប់ កើនដល់ ១៨នាក់ ក្នុងនោះមានស្រី ៤នាក់ និងអ្នករបួសធ្ងន់ និងស្រាល ២៤នាក់ មានស្រី ២នាក់ ក្នងករណីរលំបាក់អាគារកម្ពស់ ៧ជាន់ ស្ថិតនៅក្នុងក្រុងព្រះសីហនុ។ អាជ្ញាធរអះអាងថា អាគាររលំបាក់នេះ គឺជារបស់ជនជាតិចិន ដែលកំពុងសាងសង់ទាំងគ្មានច្បាប់អនុញ្ញាត។ សង្គមស៊ីវិលយល់ថា អាជ្ញាធរក្នុងខេត្តព្រះសីហនុ និងម្ចាស់អាគារ គួរតែទទួលខុសត្រូវចំពោះមុខច្បាប់ក្នុងករណីនេះ។
អាជ្ញាធរអះអាងថា អ្នកស្លាប់ និងអ្នករបួសគឺជាកម្មករសំណង់ ដែលស្នាក់នៅក្នុងការដ្ឋាននោះ។ សាកសព និងអ្នករងរបួសត្រូវបានអាជ្ញាធរទាញយកចេញពីគំនរសំណង់បាក់បែកនោះ ជាបន្តបន្ទាប់តាំងពីព្រឹកព្រលឹមរហូតដល់ល្ងាច។ ប្រតិបត្តិការកំពុងបន្ត ដើម្បីជួយសង្គ្រោះជនរងគ្រោះបន្ថែមទៀត ដែលគេសង្ស័យថា កំពុងជាប់នៅក្នុងគំនរអគារបែកបាក់នោះ។
សេចក្តីប្រកាសព័ត៌មានរបស់រដ្ឋបាលសាលាខេត្តព្រះសីហនុ ឲ្យដឹងថា ករណីរលំបាក់អាគារនេះ គឺកើតឡើងនៅម៉ោង ៤ទៀបភ្លឺ ថ្ងៃទី២២ ខែមិថុនា បណ្តាលឲ្យសង្កត់លើកម្មករសំណង់ ដែលកំពុងដេកសម្រាកនៅក្នុងអាគារនោះ។ អាគារនេះ មានទំហំទទឹង ១៥ម៉ែត្រ និងបណ្តោយ ៣០ម៉ែត្រ និង កំពុងដំណើការសាងសងទើបបានប្រមាណ ៧០ ទៅ ៨០ភាគរយ។
អាស៊ីសេរី មិនអាចសុំការឆ្លើយតបពីអភិបាលខេត្តព្រះសីហនុ លោក យន្ត មីន បានទេដោយទូរស័ព្ទមិនអាចទាក់ទង។
អាជ្ញាធរខេត្តព្រះសីហនុ និងក្រសួងរៀបចំដែនដី បានអះអាងប្រាប់អ្នកកាសែតក្នុងស្រុកដូចគ្នាថា មូលហេតុនៃការបាក់រលំអាគារកម្ពស់៧ជាន់នេះ គឺដោយសារតែសាងសង់ខុសបច្ចេកទេស ហើយការសាងសង់នេះ ពុំមានច្បាប់អនុញ្ញាតពីអាជ្ញាធរនោះទេ។ ក្រសួងរៀបចំដែនដី បញ្ជាក់ថា អាជ្ញាធរ ជំនាញបានហាមឃាត់មិនឱ្យសាងសង់ចំនួន ២ដងរួចហើយដែរ ប៉ុន្តែម្ចាស់សំណង់ជាជនជាតិចិនមិនចូលរួមសហការ។ អាគារនេះជាប្រភេទសំណង់ធ្វើពីឆ្អឹងដែកសង់បានកម្ពស់ ៧ជាន់។
អាស៊ីសេរីបានព្យាយាមទូរស័ព្ទទៅអ្នកនាំពាក្យក្រសួងរៀបចំដែនដី លោក សេង ឡូត ជាច្រើនលើក ប៉ុន្តែពុំមានអ្នកទទួល។
សេចក្តីប្រកាសព័ត៌មានរបស់រដ្ឋបាលសាលាខេត្តព្រះសីហនុ បញ្ជាក់ថា ម្ចាស់សំណង់ជាជនជាតិចិននឹងអ្នកពាក់ព័ន្ធបីនាក់ផ្សេងទៀត ត្រូវអាជ្ញាធរឃាត់ខ្លួនបញ្ជួនទៅសាកសួរនៅស្នងការដ្ឋាននគរបាល ដើម្បីចាត់ការផ្លូវតាមច្បាប់។
អគ្គលេខាធិការសហព័ន្ធសហជីពកម្មករសំណង់ និងព្រៃឈើ (BWTUC) លោក យ៉ាន់ ធី បាន សម្តែងក្តីតក់ស្លុត ចំពោះហេតុការណ៍បាក់អាគារបណ្តាលឲ្យកម្មករសំណង់ស្លាប់ និងរបួសជា ច្រើននាក់នេះ។ លោកលើកឡើងថា ហេតុការណ៍គ្រោះថ្នាក់បែបនេះ មិនមែនជាលើកទីមួយ នោះទេ ហើយកម្មករសំណង់តែងតែរងគ្រោះជាញឹកញាប់ ដែលបណ្តាលឲ្យរងរបួស ពិការ និងរហូតបាត់បង់ជីវិតជាច្រើនផងដែរ។ លោកយល់ថា អាជ្ញាធរជំនាញ ដែលបណ្តោយឲ្យមានការ សាងសង់សំណង់អាគារខុសច្បាប់ និងខុសបច្ចេកទេសនេះ ត្រូវតែទទួលខុសត្រូវចំពោះមុខច្បាប់ ដូចគ្នានឹងម្ចាស់សំណង់ និងក្រុមហ៊ុនម៉ៅការសាងសង់ដែរ។
សហព័ន្ធសហជីពកម្មករសំណង់ និងព្រៃឈើ ក៏អំពាវនាវឲ្យអាជ្ញាធរជួយសម្រួលឲ្យជនរងគ្រោះ ទទួលបានសេវាពីបេឡាជាតិរបបសន្តិសុខសង្គម (ប.ស.ស) និងស្នើសុំឲ្យអាជ្ញាធរពង្រឹងវិធានការអនុវត្តច្បាប់ឲ្យមានប្រសិទ្ធិភាព។
ចំណែកក្រសួងការងារ ក៏បានចេញសេចក្តីប្រកាសព័ត៌មានចូលរួមរំលែកទុក្ខ និងប្រកាសថាជនរង គ្រោះទាំងអស់ នឹងទទួលបានការយកចិត្តទុកដាក់បំផុតពីរបេឡាជាតិរបបសន្តិសុខសង្គម។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា កម្មករសំណង់រងគ្រោះទាំងនោះ គឺជាពលរដ្ឋក្រីក្រចំណាកស្រុកមកពីខេត្តផ្សេងៗ ដើម្បីធ្វើការសំណង់ ក្នុងខេត្តព្រះសីហនុដោយពួកគាត់មិនបានដឹងថា ការដ្ឋានសំណង់នោះមានច្បាប់ ឬគ្មានអនុញ្ញាតនោះទេ។ អ្នកស្រីបន្តថា គ្រោះថ្នាក់ការងារនេះ គឺនឹងកាន់តែធ្វើឲ្យប្រជាពលរដ្ឋធ្លាក់ខ្លួនក្រីក្របន្ថែមទៀត។ អ្នកស្រីសម្តែងការសោកស្តាយដែលអាជ្ញាធរឆ្លើយតបថា គ្មានសមត្ថភាពបញ្ឈប់ជនបរទេស មិនឲ្យសាងសង់សំណង់ដែលខុសច្បាប់ និងខុសបច្ចេកទេសបណ្តាលឲ្យពលរដ្ឋរបស់ខ្លួនជាច្រើននាក់ស្លាប់ និងរងរបួស។
អ្នកស្រីបន្ថែមថា នៅក្នុងខេត្តព្រះសីហនុ មិនមែនមានតែអាគារដែលដួលរលំនេះមួយដែលសាងសង់ឡើងដោយគ្មានច្បាប់អនុញ្ញាតនោះ គឺមានសំណង់អាគារផ្ទះល្វែងជាច្រើនទៀត កំពុងសាងសង់ទាំងខុសបច្ចេកទេស និងគ្មានច្បាប់អនុញ្ញាតដែរ។ អ្នកស្រីបន្តថា កន្លងមក អាជ្ញាធរ ក៏ទទួលរងការ រិះគន់ខ្លាំងៗ ចំពោះការបណ្តែតបណ្តោយឲ្យជនជាតិចិនសាងសង់អាគារអនាធិបតេយ្យបែបនេះ ប៉ុន្តែអាជ្ញាធរនៅតែគ្មានវិធានការច្បាប់តឹងរ៉ឹងឡើយ ដែលធ្វើឲ្យមានការសង្ស័យថា ពាក់ព័ន្ធនឹងអំពើពុករលួយជាប្រព័ន្ធ។
អ្នកស្រី ជៀប សុធារី បញ្ជាក់ថា កម្មសំណង់ខ្មែរដែលស្នាក់នៅក្នុងការដ្ឋានសំណង់នោះមានជាង ៣០នាក់ ខណៈមកដល់ល្ងាចនេះ អាជ្ញាធរបានរកឃើញមនុស្សចំនួន ៣០នាក់ហើយ។
ក្រុមអ្នកប្រើប្រាស់បណ្តាញសង្គមហ្វេសប៊ុក បាននាំគ្នាសម្តែងការហួសចិត្ត និងបញ្ចេញប្រតិកម្មជា បន្តបន្ទាប់ចំពោះអាជ្ញាធរ ដែលបណ្តោយឲ្យសំណងកម្ពស់ដល់ទៅ ៧ជាន់ អាចសាងសង់ ដោយគ្មានច្បាប់អនុញ្ញាត ហើយមិនហ៊ានចាត់វិធានការច្បាប់។ ពួកគេទាមទារឲ្យអាជ្ញាធរខេត្តព្រះសីហនុ រួមមានអភិបាលខេត្តព្រះសីហនុ លោក យន្ត មីន និងប្រធានមន្ទីររៀបចំដែនដី លោក ចេង ស្រុង លាលែងពីតំណែង ដើម្បីបង្ហាញការទទួលខុសត្រូវ ដោយសារតែអសមត្ថភាពក្នុងការអនុវត្តច្បាប់ និងបំពេញតួនាទីមិនបានត្រឹមត្រូវ។
រដ្ឋបាលខេត្ពព្រះសីហនុ ឲ្យដឹងថា អាជ្ញាធរ និងក្រុមគ្រូពេទ្យជំនាញៗ កំពុងបន្តយកចិត្តទុកដាក់ជួយសង្គ្រោះអ្នករងរបួស។ ចំពោះជនរងគ្រោះដែលបាត់បង់ជីវិត រដ្ឋបាលខេត្តបានរៀបចំជាក្តារ មឈូស និងថវិកា ២លានរៀល ជូនគ្រួសារសពនីមួយៗ ហើយអាជ្ញាធរកំពុងទំនាក់ទំនងគ្រួសារសព ដើម្បីដឹកសពទៅជូនក្រុមគ្រួសាររៀបចំធ្វើបុណ្យតាមប្រពៃណី។
សេចក្ដីប្រកាសព័ត៌មានរបស់សាលាខេត្តព្រះសីហនុ នៅថ្ងៃទី២៣ មិថុនា បញ្ជាក់ថា ក្នុងករណីដែលសង្ស័យថាមានសាច់ញាតិ ឬមិត្តភក្ដិ បាត់ក្នុងការបាក់អគារនៅក្នុងខេត្តព្រះសីហនុនោះ អាចទាក់ទងសួរបាន តាមទូរស័ព្ទលេខ 016 526 520 ឬ 016 321 010៕
អ្នករបួសដែលត្រូវបានសង្គ្រោះនៅមន្ទីរពេទ្យ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។