រដ្ឋាភិបាលអូស្ត្រាលី ផ្តល់ការគាំទ្រដល់កម្ពុជា ដើម្បីពង្រឹងសុវត្ថិភាពការងារក្នុងវិស័យសំណង់ ក្រោយពីមានគ្រោះថ្នាក់បាក់រលំសំណង់អគារ សម្លាប់មនុស្សជាច្រើននាក់ជាបន្តបន្ទាប់។
សេចក្ដីប្រកាសព័ត៌មានរបស់ស្ថានទូតអូស្ត្រាលី កាលពីថ្ងៃទី១៦ ខែកញ្ញា ឲ្យដឹងថា ឯកអគ្គរាជទូតអូស្ត្រាលីប្រចាំកម្ពុជា លោក ប៉ាប្លូ កង (Pablo Kang) និងរដ្ឋលេខាធិការនៃក្រសួងដែនដី នគរូបនីយកម្ម និងសំណង់ លោក ឆាន់ សាផាន បានចុះហត្ថលេខាលើកិច្ចព្រមព្រៀងនេះ ក្នុងកិច្ចសហប្រតិបត្តិការពង្រឹងសុវត្ថិភាពការងារ ក្នុងវិស័យសំណង់នៅកម្ពុជា ដែលនឹងចាប់អនុវត្តនៅចុងឆ្នាំ២០២១ ខាងមុខ។ មុនចុះហត្ថលេខាលើកិច្ចព្រមព្រៀងនេះ លោក ប៉ាប្លូ កង (Pablo Kang) ក៏បានជួបពិភាក្សាជាមួយរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ដើម្បីពិភាក្សាអំពីការគាំទ្រផ្នែកបច្ចេកទេស របស់អូស្ត្រាលីក្នុងវិស័យសំណង់ និងទំនាក់ទំនងទ្វេភាគីរបស់ប្រទេសទាំងពីរ។
សេចក្ដីប្រកាសព័ត៌មានបន្តថា ក្នុងក្របខ័ណ្ឌនៃកិច្ចព្រមព្រៀងនេះ ជាដំបូង អូស្ត្រាលីនឹងបង្កើតគោលការណ៍ណែនាំ លើផ្នែកសុខភាព និងពង្រឹងសុវត្ថិភាព ដើម្បីកាត់បន្ថយហានិភ័យនៃការស្លាប់ និងគ្រោះថ្នាក់នានា នៅការដ្ឋានសំណង់។ បន្ថែមពីនេះអ្នកជំនាញការអូស្ត្រាលី នឹងផ្តល់ការពង្រឹងសមត្ថភាពដល់ក្រុមការងាររបស់ក្រសួងដែនដី លើការត្រួតពិនិត្យ និងការពង្រឹងស្តង់ដារថ្មី ដើម្បីជំរុញការយល់ដឹង និងការទទួលខុសត្រូវរបស់វិស័យឯកជន លើការងារសំណង់នេះ។
កម្មវិធីគាំទ្ររបស់អូស្ត្រាលីលើវិស័យសំណង់នេះ គឺជាផ្នែកមួយនៃកម្មវិធី វិនិយោគក្នុងវិស័យហេដ្ឋារចនាសម្ព័ន្ធរបស់រដ្ឋាភិបាលអូស្ត្រាលីរយៈពេល ៦ឆ្នាំ ក្នុងទឹកប្រាក់ចំនួនជិត ៥០លានដុល្លារអូស្ត្រាលី (៤៩.៤លាន) ដែលស្មើនឹងជិត ៣៦លានដុល្លារអាមេរិក (៣៥.៩៦៩.១២៨)។
ចាប់ពីខែមិថុនាឆ្នាំ២០១៩ ដល់ដើមខែមករា ឆ្នាំ២០២០ មានសំណង់អគារខ្ពស់ៗ កំពុងសាងសង់ចំនួន៣ បានបាក់រំលំរាបដល់ដី ក្នុងនោះ កាលពីថ្ងៃទី២២ ខែមិថុនា ឆ្នាំ២០១៩ មានអគារកម្ពស់ ៧ជាន់ នៅខេត្តព្រះសីហនុ បាក់រលំបណ្ដាលឱ្យកម្មករសំណង់ ២៨នាក់ស្លាប់ និងរបួស ២៦នាក់។ បន្ទាប់មក នៅដើមខែធ្នូ ឆ្នាំ២០១៩ មានករណីបាក់រលំសាលាឆាន់ នៅវត្តគោកចក ក្នុងខេត្តសៀមរាបបណ្ដាលឱ្យកម្មករ ៣នាក់ស្លាប់ និង ១៣នាក់រងរបួស។ ករណីចុងក្រោយកាលពីថ្ងៃទី៣ ខែមករា ឆ្នាំ២០២០ គឺបាក់រលំអគារកម្ពស់ ៧ជាន់ កំពុងសាងសង់នៅក្នុងខេត្តកែប បណ្ដាលឱ្យមនុស្សស្លាប់ ៣៦នាក់ និងរបួស ២៣នាក់។
ករណីបាក់រលំសំណង់ដែលសាងសង់ខុសបច្ចេកទេស និងខុសច្បាប់ទាំងនេះ គ្មានមន្ត្រីរដ្ឋាភិបាលគ្រប់គ្រងផ្នែកសំណង់ណាម្នាក់ ចាប់ឱ្យទទួលខុសត្រូវ និងផ្ដន្ទាទោសឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។