សមត្ថកិច្ចនគរបាលខេត្តព្រះសីហនុ ឃាត់ខ្លួនជនជាតិវៀតណាម ចំនួន ១១នាក់ ដែលចូលមករស់នៅខេត្តនេះដោយពុំមានលិខិតស្នាមស្របច្បាប់ត្រឹមត្រូវ។
យុទ្ធនាការនេះទទួលបានការសាទរពីមន្ត្រីសង្គមស៊ីវិល និងប្រជាពលរដ្ឋរស់នៅខេត្តទេសចរណ៍មួយនេះ ហើយពួកគេបានស្នើដល់សមត្ថកិច្ចត្រូវអនុវត្តការងារនេះជាប្រចាំ។
ស្នងការរងនគរបាលខេត្តព្រះសីហនុ ទទួលការងារអន្តោប្រវេសន៍ លោក ហ៊ុន សុរិទ្ធី នៅថ្ងៃសុក្រ ទី៣ ខែកក្កដា បានដឹកនាំកម្លាំងចុះត្រួតពិនិត្យជនជាតិវៀតណាម ត្រង់ចំណុចអ៊ូវៀតណាម ស្ថិតក្នុងក្រុម៣១ ភូមិ៣ សង្កាត់៣ និងនៅក្រុម៤ ភូមិ២ សង្កាត់២ ក្រុងព្រះសីហនុ ដែលចូលមករស់នៅខុសច្បាប់ក្នុងប្រទេសកម្ពុជា។ លោកថា យុទ្ធនាការនេះ កម្លាំងនគរបាលបានឃាត់ខ្លួនជនជាតិវៀតណាម ចំនួន ១១នាក់ រស់នៅក្នុងខេត្តនេះ ដែលសមត្ថកិច្ចរកឃើញគ្មានលិខិតស្នាមស្នាក់នៅស្របច្បាប់។ ក្នុងនោះមានស្ត្រី ២នាក់។ លោកបញ្ជាក់ថា ជនជាតិវៀតណាម ទាំង ១១នាក់នោះ នឹងត្រូវបញ្ជូនទៅអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ នៅល្ងាចថ្ងៃដដែលនេះ បន្ទាប់ពីសមត្ថកិច្ចធ្វើលិខិតស្នាមរួចរាល់។
លោក ហ៊ុន សុរិទ្ធី បន្តថា យុទ្ធនាការនេះ នឹងបន្តអនុវត្តជាប្រចាំនាថ្ងៃអនាគត។ ចំណាត់ការនេះទទួលបានការសាទរពីប្រជាពលរដ្ឋ និងមន្ត្រីសង្គមស៊ីវិល មួយចំនួនក្នុងខេត្តនេះ។
មន្ត្រីអង្កេតអង្គការលីកាដូ (Licadho) ខេត្តព្រះសីហនុ លោក ឃុន សាវឿន ក៏បានស្នើដល់សមត្ថកិច្ចត្រូវចុះអនុវត្ត ឬត្រួតពិនិត្យការងារអន្តោប្រវេសន៍នេះជាប្រចាំ និងត្រូវអនុវត្តអោយស្របតាមច្បាប់អន្តោប្រវេសន៍។ ជាងនេះក៏ស្នើអោយអនុវត្តដោយស្មើភាព ដោយមិនត្រូវអោយមានអ្នករត់ការដោះលែងជនជាតិវៀតណាម ដែលគ្មានលិខិតស្នាមស្របច្បាប់នោះទេ៖ «ត្រង់ចំណុចនេះខ្ញុំគិតថា បើសិនសមត្ថកិច្ចអនុវត្តច្បាប់អន្តោប្រវេសន៍នេះ គឺត្រូវអនុវត្តឲ្យសមស្របតាមលក្ខខណ្ឌនៃច្បាប់ ទោះបីមានការអន្តរាគមន៍បែបណាក៏ដោយ។ ត្រង់ចំណុចនេះ សម្រាប់ជនជាតិវៀតណាម ដែលចូលមករស់នៅខុសច្បាប់ហើយ អាចបន្តរស់នៅកម្ពុជា ដោយមានកិច្ចអន្តរាគមន៍ទៀតនោះ វាជារឿងមិនប្រក្រតីមួយ។ ដូច្នេះសមត្ថកិច្ចត្រូវអនុវត្តឲ្យបានទាំងអស់គ្នា ទៅលើជនជាតិវៀតណាម ដែលចូលមករស់នៅខុសច្បាប់ក្នុងប្រទេសកម្ពុជា»។
មន្ត្រីនគរបាលខេត្តព្រះសីហនុ ស្នើមិនបង្ហាញអត្តសញ្ញាណបានប្រាប់វិទ្យុអាស៊ីសេរីថា សកម្មភាពចុះឆែកឆេរ ឬត្រួតពិនិត្យរដ្ឋបាលទៅលើជនអន្តោប្រវេសន៍នាខេត្តជាប់មាត់សមុទ្រមួយនេះ ក៏មានអ្នករត់ការ ឬមន្ត្រីមានតួនាទីក្នុងស្ថាប័ននគរបាលខេត្តនេះ រត់ការ ឬក៏ស្នើអោយដោះលែងជនអន្តោប្រវេសន៍មួយចំនួនមិនអោយបញ្ជូនទៅភ្នំពេញ ថែមទៀត។ លោកបន្តថា ក្នុងចំណោមជនជាតិវៀតណាម ទាំង ១១នាក់ ដែលឃាត់ខ្លួននៅក្នុងយុទ្ធនាការកាលពីព្រឹកថ្ងៃសុក្រ ទី៣ ខែកក្កដា គឺឃើញមានឈ្មោះជនជាតិវៀតណាមតែ ៩នាក់ទេ មានឈ្មោះបញ្ជូនទៅកាន់អគ្គនាយកដ្ឋានក្រសួងមហាផ្ទៃ។ ប៉ុន្តែជនជាតិវៀតណាម ពីរនាក់ គឺស្រីម្នាក់ និងប្រុសម្នាក់ ត្រូវថ្នាក់ដឹកនាំដោះលែងវិញ ព្រោះអាចដោយសារមានកិច្ចអន្តរាគមន៍ ឬអាចពួកគេមានលិខិតស្នាមស្របច្បាប់ជាដើម។
ត្រង់ចំណុចនេះ លោក ឃុន សាវឿន មន្ត្រីអង្កេតអង្គការលីកាដូ សង្កត់ធ្ងន់ថា សមត្ថកិច្ចគួរអនុវត្តការងារទៅលើជនអន្តោប្រវេសន៍ខុសច្បាប់នៅកម្ពុជា ឲ្យបានត្រឹមត្រូវ និងជៀសឲ្យផុតពីអំពើពុករលួយ ឬបក្សពួកនិយម៖ «បើសិនជាសមត្ថកិច្ចចុះអនុវត្តច្បាប់អន្តោប្រវេសន៍ទៅលើជនជាតិវៀតណាម ចូលមករស់នៅខុសច្បាប់ក្នុងខេត្តព្រះសីហនុ ហើយសមត្ថកិច្ចបែរជាទុកចន្លោះខ្លះ ឬក៏អនុវត្តគ្រាន់តែឲ្យមានរំញោច គឺខ្ញុំជាសង្គមស៊ីវិលមិនគាំទ្រទេ ហើយបើសមត្ថកិច្ចអនុវត្តការងារអន្តោប្រវេសន៍នេះ ត្រូវអនុវត្តឲ្យបានជាប្រចាំ និងស្មើមុខគ្នាទៅលើគ្រប់ជនអន្តោប្រវេសន៍ខុសច្បាប់ទាំងនោះ។ កុំឲ្យមានវប្បធម៌មានអ្នកអន្តរាគមន៍ថា អ្នកនេះ ឬអ្នកនោះជាសាច់ញាតិខ្ញុំទេ ឬក៏ខ្ញុំមានលុយផ្ដល់ជូនចំនួនប៉ុណ្ណេះ ឬប៉ុណ្ណោះ ហើយស្នើកុំឲ្យមានឈ្មោះខ្ញុំបញ្ជូនទៅក្រសួងមហាផ្ទៃ នៅភ្នំពេញ ជាដើមនោះ គឺខ្ញុំមិនគាំទ្រត្រង់ចំណុចនេះ»។
ទោះយ៉ាងណា លោក ហ៊ុន សុរិទ្ធី ស្នងការរងនគរបាលខេត្តព្រះសីហនុ បានសង្កត់ធ្ងន់ថា រាល់ជនបរទេសដែលចូលមករស់នៅ ឬធ្វើការងារខុសច្បាប់ និងគ្មានលិខិតស្នាមត្រឹមត្រូវ នឹងត្រូវបញ្ជូនទៅកាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃ មានវិធានការបន្តទៀត។
កាលពីថ្ងៃទី១ ខែកក្កដា អគ្គស្នងការរងនគរបាលជាតិ និងជាអគ្គនាយកនៃអគ្គនាយកដ្ឋានអន្តោប្រវេសន៍ លោក សុខ ផល បានរំលឹកដល់អាជ្ញាធរពាក់ព័ន្ធទាំងអស់ត្រូវពង្រឹងការអនុវត្តច្បាប់អន្តោប្រវេសន៍ឱ្យបានម៉ឺងម៉ាត់ ដើម្បីគ្រប់គ្រងឱ្យបាននូវការចេញចូល និងស្នាក់អាស្រ័យរបស់ជនបរទេសដោយខុសច្បាប់នៅក្នុងប្រទេសកម្ពុជា។
គិតត្រឹម ៨ខែចុងឆ្នាំ២០១៤ មានជនអន្តោប្រវេសន៍ដែលគ្មានលិខិតស្នាមជិត ២ពាន់នាក់ ក្នុងនោះមានជនជាតិវៀតណាម ១.៥០០នាក់ ត្រូវបានបណ្ដេញពីកម្ពុជា។ នៅដើមឆ្នាំ២០១៥នេះ អគ្គនាយកដ្ឋានអន្តោប្រវេសន៍បានបណ្ដេញចេញជនបរទេសខុសច្បាប់ជាង ១ពាន់នាក់បន្ថែមទៀត ក្នុងនោះស្ទើរ ១០០ភាគរយ ជាជនជាតិវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។