ពលរដ្ឋរិះគន់អាជ្ញាធរខេត្តស្ទឹងត្រែងថា ជីកកកាយផ្លូវបេតុងអស់ជាច្រើនខ្សែ ដើម្បីរៀបចំប្រព័ន្ធលូរំដោះទឹកកខ្វក់ជាថ្មីទៀត ធ្វើឱ្យខូចខាតផ្លូវពិបាកធ្វើដំណើរ ដោយសារគ្មានផែនការច្បាស់លាស់។
អាជ្ញាធរខេត្តស្ទឹងត្រែង បន្តរៀបចំប្រព័ន្ធលូរំដោះទឹកកខ្វក់ នៅតាមដងផ្លូវមួយចំនួនក្នុងសង្កាត់ស្ទឹងត្រែង ដោយជីកគាស់កាយផ្លូវបេតុងជាច្រើនខ្សែ ធ្វើឱ្យខូចផ្លូវ ហើយនៅពេលមានភ្លៀងធ្លាក់កន្លែងដែលជីកគាស់កាយ បានផុងដីចុះក្រោម បង្កើតជាជង្ហុកជ្រៅ បង្កគ្រោះថ្នាក់ដល់អ្នកដំណើរ។
ពលរដ្ឋរស់នៅសង្កាត់ស្ទឹងត្រែង ក្រុងស្ទឹងត្រែង លោក ទុយ ធឿន ប្រាប់វិទ្យុអាស៊ីសេរី នៅថ្ងៃទី៦ មិថុនា ថា មុនពេលសាងសង់ផ្លូវបេតុង អាជ្ញាធរគ្មានផែនការច្បាស់លាស់ដើម្បីរៀបចំទុកជាមុននោះទេ ពោលនៅពេលសាងសង់ផ្លូវរួចរាល់ ទើបរៀបចំប្រព័ន្ធលូរំដោះទឹកកខ្វក់តាមក្រោយ ធ្វើឱ្យខូចទ្រង់ទ្រាយផ្លូវ ហើយផ្លូវខ្លះទៀត ត្រូវកាត់ផ្តាច់ផ្លូវជាបន្តបន្ទាប់។
លោកសោកស្តាយ ផ្លូវទាំងនោះ ទម្រាំស្ថាបនាបានដោយចាក់បេតុងមានគុណភាពខ្ពស់ រដ្ឋត្រូវប្រើថវិកាជាតិអស់ជាច្រើន ហើយមកទល់ពេលនេះអាជ្ញាធរនៅមិនទាន់ជួសជុលវិញនៅឡើយទេ។
លោក ទុយ ធឿន៖ «កន្លែងណាក៏វាដើរកាត់ផ្លូវដែរ កាត់ខ្ទេចខ្ទីហ្មង កាត់ហើយចោល ឥលូវអត់មានការងារធ្វើផង កាត់ខ្ទេចខ្ទីហ្មង។ ឥលូវអត់មានការងារធ្វើផង ចោលអ៊ីចឹង មិនដឹងឆ្នាំណា បានធ្វើឱ្យយើងវិញ គេរិះគន់គ្រប់គ្នាវាប្រហោងធំ មុខដំណរវា កៀបកង់ម៉ូតូដួលហ្នឹងហើយ»។
កន្លងទៅ អាជ្ញាធរកសាងផ្លូវភាគច្រើន ឱ្យតែរួចមួយរយៈពេលខ្លីប៉ុណ្ណោះដោយគ្មានស្តង់ដារត្រឹមត្រូវឡើយ ហើយនៅពេលមានតម្រូវការតខ្សែកាប ប្រព័ន្ធលូរំដោះទឹក និងប្រព័ន្ធទឹក ត្រូវកាត់ផ្តាច់ផ្លូវ ធ្វើឱ្យមានជង្ហុកឆាប់ខូចផ្លូវ។
ពលរដ្ឋថា គម្រោងស្ថាបនាផ្លូវចុះឡើងច្រើនដងរបស់អាជ្ញាធរខេត្តនេះ ធ្វើឱ្យពលរដ្ឋលំបាកវេទនាជាច្រើនឆ្នាំមកហើយ ទម្រាំមានផ្លូវបៃតងរឹងមាំធ្វើដំណើរដូចសព្វថ្ងៃនេះ ពួកគាត់ត្រូវរង់ចាំពេលដ៏យូរ ក៏ប៉ុន្តែបែរជាត្រូវកាយកម្ទេចវិញ។
វិទ្យុអាស៊ីសេរីមិនអាចទាក់ទង សុំការបំភ្លឺរឿងនេះ ពីអ្នកនាំពាក្យសាលាខេត្តស្ទឹងត្រែង លោក ម៉ែន គុង បាននៅឡើយទេ នៅថ្ងៃទី៦ មិថុនា ដោយទូរស័ព្ទហៅចូល តែគ្មានអ្នកលើក។ រីឯប្រធានមន្ទីរសាធារណការ និងដឹកជញ្ជូនខេត្តស្ទឹងត្រែង លោក សរ គឹមណាត ក៏មិនទាន់អាចសុំការបំភ្លឺបានដែរនៅថ្ងៃដដែលនេះ។
ជុំវិញរឿងនេះមន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តស្ទឹងត្រែង លោក ចឹក ចិត្រា សង្កេតឃើញថា អាជ្ញាធរកាត់ផ្ដាច់ផ្លូវបេតុងជាច្រើនខ្សែដោយចាក់បំពេញដីបន្ថែម ក្នុងចន្លោះដែលកាត់ផ្ដាច់នោះ ហើយនៅពេលមានភ្លៀងធ្លាក់ ដីស្រុតចុះក្រោមបង្កហានិភ័យខ្ពស់នៅពេលធ្វើដំណើរ និងពិបាកធ្វើដំណើរជាច្រើនខែមកហើយ។
លោកយល់ថា អាជ្ញាធរត្រូវជួសជុលផ្លូវទាំងនេះឱ្យដូចដើមវិញ ដើម្បីសុវត្ថិភាពអ្នកដំណើរនិងសម្រួលជីវភាពពលរដ្ឋ។
លោក ចឹក ចិត្រា៖ «ថ្នាក់ខេត្តគួរតែយកចិត្តទុកដាក់ លើសុវត្ថិភាពពលរដ្ឋ ដែលរងផលប៉ះពាល់ពីការជីកគាស់កាយផ្លូវ ទាំងអស់នេះ ព្រោះយើងមើលទៅ ការជីកកាយផ្លូវមិនបានរៀបចំតាមស្តង់ដារ នឹងប៉ះពាល់ពលរដ្ឋ និងប៉ះពាល់សេដ្ឋកិច្ចការចំណាយរបស់ខេត្តច្រើន លើរឿងទាំងអស់នេះ»។
មន្ត្រីសង្គមស៊ីវិលរូបនេះ ស្នើឱ្យអាជ្ញាធរខេត្តស្ទឹងត្រែងគួរតែធ្វើការរួមគ្នា ដោះស្រាយបញ្ហានេះ និងធ្វើកិច្ចការងារនេះក្នុងពេលតែមួយ កាលពីដំបូងឡើយ។ ជាមួយគ្នានេះដែរ ប្រសិនបើបញ្ហានេះមិនត្រូវបានដោះស្រាយទេ រដ្ឋនឹងត្រូវចំណាយធនធានច្រើនដើម្បីសាងសង់ផ្លូវដដែលៗឡើងវិញ ធ្វើឱ្យពលរដ្ឋមិនសប្បាយចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។