ក្រុម​ឥស្សរជន​​ជំនិត​​លោក ហ៊ុន សែន រង​ការ​ចោទប្រកាន់​ថា មាន​ទំនាក់ទំនង​ជាមួយ​ជនជាតិ​ចិន​ធ្វើ​ជំនួញ​បែប​ឧក្រិដ្ឋកម្ម

ដោយ ទីន ហ្សាការីយ៉ា
2022.07.20
Share on WhatsApp
Share on WhatsApp
ក្រុម​ឥស្សរជន​​ជំនិត​​លោក ហ៊ុន សែន រង​ការ​ចោទប្រកាន់​ថា មាន​ទំនាក់ទំនង​ជាមួយ​ជនជាតិ​ចិន​ធ្វើ​ជំនួញ​បែប​ឧក្រិដ្ឋកម្ម លោក​នាយករដ្ឋមន្ត្រី ហ៊ុន សែន (ស្ដាំ) និង​លោកឧកញ៉ា​ ទ្រី ភាព ឈ្មួញកាប់​ព្រៃ​ឈើ​នៅ​កម្ពុជា។
Photo Courtesy

មន្ត្រី​អង្គការ​សង្គម​ស៊ីវិល​ស្នើ​ដល់​អាជ្ញាធរ​ចុះ​ត្រួតពិនិត្យ​អគារ​ពាណិជ្ជកម្ម​មួយចំនួន​គ្រប់គ្រង​ដោយ​ជនជាតិ​ចិន ដែល​អាច​មាន​ករណី​ប្រតិបត្តិការ​ឆបោក​តាម​ប្រព័ន្ធ​អ៊ីធឺណិត (Internet) និង​ចាប់​បង្ខាំង​មនុស្ស​ធ្វើ​ទារុណកម្ម​ជម្រិត​ទារប្រាក់​។ ការ​លើកឡើង​នេះ កើតឡើង​ក្រោយ​ពេល​ដែល​ស្ថាប័ន​សារព័ត៌មាន​អន្តរជាតិ​ល្បី​មួយ​ឈ្មោះ អាល់ហ្សា ហ្ស៊ីរ៉ា (Al Jazeera) ថ្មីៗ​នេះ​បាន​លាតត្រដាង​ពី​ក្រុម​ឧកញ៉ា​ដែល​មាន​កេរ្តិ៍ឈ្មោះ​មិនល្អ និង​ឥស្សរជន​នៃ​រដ្ឋាភិបាល​លោក ហ៊ុន សែន ពាក់ព័ន្ធ​នឹង​ការ​ប្រព្រឹត្ត​អំពើពុករលួយ​ក្នុង​ជំនួញ​រកស៊ី​បែប​ឧក្រិដ្ឋកម្ម​។ ក្នុង​នោះ អាល់ហ្សាហ្ស៊ីរ៉ា រកឃើញ​ថា ឧកញ៉ា ទ្រី ភាព សមាជិក​ព្រឹទ្ធសភា លោក កុក អាន និង​ក្រុម​ឈ្មួញ​ដែល​ស្និទ្ធ​នឹង​ខ្សែស្រឡាយ​ត្រកូល «​ហ៊ុន​» រួម​ទាំង​មន្ត្រី​នៃ​រដ្ឋាភិបាល​ឯក​បក្ស​នេះ​មួយ​ចំនួន​ទៀត សុទ្ធ​តែ​មាន​ទំនាក់ទំនង​វិនិយោគ​ទឹកប្រាក់​រាប់ពាន់​លាន​ដុល្លា​ជាមួយ​ក្រុម​ឧក្រិដ្ឋជន​ចិន​ក្នុង​ការ​កំណត់​គោលដៅ​ចាប់​ជម្រិត​មនុស្ស​ជុំវិញ​ពិភព​ដើម្បី​ឆបោក និង​ជម្រិត​ទារប្រាក់​តាម​វិធីសាស្ត្រ​បែប​ទំនើប។

មន្ត្រី​អង្គការ​សង្គម​ស៊ីវិល ជំរុញ​ឱ្យ​អាជ្ញាធរ​រដ្ឋាភិបាល​ស៊ើបអង្កេត​ដោយ​អព្យាក្រឹត្យ​ឥត​លម្អៀង និង​ត្រូវ​បង្ហាញ​របាយការណ៍​ដោយ​តម្លាភាព ដើម្បី​ជម្រះ​មន្ទិល​ពី​មហាជន​ចំពោះ​ករណី​ជនជាតិ​ចិន និង​ក្រុម​ឈ្មួញ​ដែល​រង​ការ​ចោទប្រកាន់​ថា កំពុង​ប្រើប្រាស់​ទឹកដី​ខ្មែរ​ធ្វើ​ជា​កន្លែង​ប្រព្រឹត្ត​បទល្មើស​ឧក្រិដ្ឋកម្ម នៅ​តាម​វិស័យ​សហគ្រាស​គ្រប់គ្រង​ដោយ​ជនជាតិ​ចិន​នៅ​កម្ពុជា។

នាយក​ទទួលបន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិមនុស្ស​លីកាដូ (LICAHDO) លោក អំ សំអាត លើកឡើង​ថា របាយការណ៍​ដែល​លាតត្រដាង​ដោយ​ស្ថាប័ន​ព័ត៌មាន​អន្តរជាតិ អាល់ហ្សាហ្ស៊ី​រ៉ា (Al Jazeera) និយាយ​អំពី​អំពើពុករលួយ និង​ឧក្រិដ្ឋកម្ម​នៅ​កម្ពុជា​នេះ ធ្វើ​ឱ្យ​ប៉ះពាល់​ដល់​មុខមាត់​ប្រទេស​ជាតិ​ធ្ងន់ធ្ងរ។

លោក​បន្ត​ថា តាមរយៈ​ឯកសារ​របស់​ស្ថាប័ន​ព័ត៌មាន​អន្តរជាតិ​មួយ​នេះ អាជ្ញាធរ​កម្ពុជា​អាច​មាន​លទ្ធភាព​គ្រប់គ្រាន់ បើក​ការស៊ើបអង្កេត​ដោយ​យុត្តិធម៌ ដើម្បី​ស្វែងរក​ការពិត ផ្តល់​ទំនុកចិត្ត​ដល់​សាធារណៈ​ជនជាតិ និង​អន្តរជាតិ​ដែល​កំពុង​វិនិយោគ​នៅ​កម្ពុជា។

ទោះបីជា​យ៉ាងណា លោក អំ សំអាត កត់សម្គាល់​ថា ករណី​ចាប់​ជម្រិត ឬ​បង្ខាំង​មនុស្ស​ក្នុង​អគារ​នៅ​កម្ពុជា​កន្លង​មក​នេះ ត្រូវ​បាន​សារព័ត៌មាន​អន្តរជាតិ​ចុះ​ផ្សព្វផ្សាយ​ព្រោងព្រាត​។ ក៏ប៉ុន្តែ​អាជ្ញាធរ​កម្ពុជា​តែងតែ​ច្រានចោល ដោយ​លើក​ហេតុផល​ថា ព័ត៌មាន​ទាំងនោះ​បែប​បំភ្លៃ បំផ្លើស​ខុស​ពី​ការពិត និង​មាន​ចេតនា​ធ្វើ​ឱ្យ​កម្ពុជា​ស្ថិត​ក្នុង​ស្ថានភាព​អាក្រក់​ណាមួយ៖ «​ដូចជា​នៅ​ប្រទេស​ថៃ នៅ​ចិន​អី ដែល​គេ​បាន​ចុះ​នៅ​សារព័ត៌មាន​នៃ​ប្រទេស​គេ​ហ្នឹង វា​ធ្វើ​ឱ្យ​ប៉ះពាល់​សម្រាប់​កម្ពុជា​យើង​។ ឥឡូវ​ហ្នឹង​គឺ​ទូរទស្សន៍ អាល់ហ្សាហ្ស៊ីរ៉ា (Al Jazeera) បាន​ចាក់​ផ្សាយ​រឿង​អ៊ីចឹង​ទៀត វា​ធ្វើ​ឱ្យ​ប៉ះពាល់​សម្រាប់​កម្ពុជា​យើង​។ ណាមួយ​យើង​ឃើញ​ថា កន្លងមក​សហរដ្ឋ​អាមេរិក (US) នៅតែ​ដាក់​ចំណាត់ថ្នាក់​នៃ​ការ​ជួញដូរ​មនុស្ស​សម្រាប់​កម្ពុជា​នៅ​លំដាប់​លេខ ២ ស្ថិតនៅ​តាមដាន»

របាយការណ៍​ស៊ើបអង្កេត​ស្ដីពី ទាសករ​តាម​ប្រព័ន្ធ​អ៊ីនធឺណិត (Internet) នៅ​កម្ពុជា​របស់​ស្ថាប័ន​សារព័ត៌មាន​អន្តរជាតិ អាល់ហ្សាហ្ស៊ីរ៉ា (Al Jazeera) ដែល​បាន​ផ្សព្វផ្សាយ​ថ្មីៗ​នេះ បាន​លាតត្រដាង និង​រៀបរាប់​យ៉ាង​លម្អិត​ចំពោះ​ក្រុមហ៊ុន​ចិន​កំពុង​ប្រតិបត្តិការ​យ៉ាង​ក្ដៅ​គគុក​ក្នុង​ការ​ចាប់​ជម្រិត​ជន​ជាតិចិន​ដូចគ្នា និង​បង្ខាំង​បរទេស​រាប់​រយ​ពាន់​នាក់ ដើម្បី​ឱ្យ​ពួកគេ​ធ្វើ​ការងារ​ផ្នែក​វិស័យ​បន​ល្បែង​ឆបោក​មនុស្ស​តាម​លើ​ប្រព័ន្ធ​អនឡាញ (Online) នៅ​តំបន់​អាស៊ីអាគ្នេយ៍ និង​ជុំវិញ​ពិភពលោក​។​

អាល់ហ្សា ហ្ស៊ីរ៉ា ឱ្យ​ដឹង​ថា បណ្ដាញ​របស់​ឧក្រិដ្ឋជន​ចិន​ទាំងនោះ កំពុង​ដំណើរ​ចាប់​ជម្រិត​បង្ខាំង​មនុស្ស​ដោយ​បង្ខំ​ឱ្យ​ការ​ខុស​ច្បាប់​ដែល​ភាគច្រើន​ស្ថិតនៅ​តំបន់​អគារ​គ្រប់គ្រង​ដោយ​ជនជាតិ​ចិន​ក្នុង​ខេត្ត​ព្រះសីហនុ និង​តំបន់​ដាច់​ស្រយាល​មួយ​ចំនួន​ទៀត​ដូចជា ខេត្ត​ពោធិ៍សាត់ ខេត្ត​តាកែវ ក្រុង​ប៉ោយប៉ែត និង​នៅ​រាជធានី​ភ្នំពេញ​ជាដើម។

ស្ថាប័ន​សារព័ត៌មាន​អន្តរជាតិ​ដដែល បញ្ជាក់​ទៀត​ថា ជនរងគ្រោះ​ដែល​ចាញ់បោក​ក្រុម​ឧក្រិដ្ឋជន​ចិន​មាន​ច្រើន​ទម្រង់​។ ក្នុង​នោះ មាន​ជនរងគ្រោះ​ខ្លះ​ត្រូវ​បាន​ក្រុម​ឧក្រិដ្ឋជន​ចិន​ចាប់​ផ្តើម​បង្កើត​ទំនាក់ទំនង​លើ​បណ្ដាញ​សង្គម​។ បន្ទាប់​មក ជន​ឆបោក​ដែល​ជា​អ្នក​ហែកឃើក (Hacker) ជន​ជាតិចិន​ព្យាយាម​រក​តម្រុយ​ក្នុង​ការ​លួច​លុយ​ពី​ក្នុង​គណនី​ធនាគារ​ជនរងគ្រោះ។

ដោយឡែក ជនរងគ្រោះ​ដទៃទៀត គឺ​ត្រូវ​បាន​ក្រុម​ឆបោក​ជនជាតិ​ចិន រៀបចំ​ឃោសនា​ការងារ​លើ​បណ្ដាញ​សង្គម​នានា ដោយ​ល្បួង​ប្រាប់​ថា មានការ​ងារ​អាច​រកប្រាក់​ចំណូល​បាន​ខ្ទង់ ១​ពាន់ ៥​រយ ដុល្លា (១.៥០០) ក្នុង​មួយ​ខែ​។ ក្រោយ​មក​ទៀត នៅ​ពេល​ដែល​ជនជាតិ​ចិន ឬ​ជនបរទេស​ណា​សម្រេច​ដាក់ពាក្យ​ចូល​ធ្វើ​ការ​នោះ ពួកគេ​ត្រូវ​បាន​ក្រុម​ឆបោក​ជនជាតិ​ចិន​ដែល​ប្រតិបត្តិការ​ក្នុង​ខេត្ត​ព្រះសីហនុ ដកហូត​លិខិតឆ្លងដែន ព្រម​ធ្វើ​កិច្ចសន្យា​ការងារ និង​តម្រូវ​ឱ្យ​បង់ប្រាក់​ចំនួន ១​ពាន់ ២​រយ ដុល្លា (១.២០០) ជាមុន។

ក្នុង​ឃ្លីប​វីដេអូ​របស់ អាល់ហ្សា ហ្ស៊ី​រ៉ា បាន​បង្ហាញថា ជន​ដែល​ត្រូវ​បាន​ជនជាតិ​ចិន​ឆបោក​ទាំងនោះ គឺ​ត្រូវ​បាន​បង្ខាំង​ក្នុង​អគារ​ស្ថិតនៅ​ខេត្ត​ព្រះសីហនុ​ដោយមាន​ព័ទ្ធ​របង​ខ្ពស់ អម​ដោយ​បន្លា​លួស​នៅ​ជុំ​កន្លែង​ដែល​ក្រុម​ឧក្រិដ្ឋ​ចិន​ធ្វើ​ទារុណកម្ម​ពួកគេ​។ ជនរងគ្រោះ​ខ្លះ ត្រូវ​បាន​ក្រុម​ឆបោក​ជនជាតិ​ចិន​សម្រាត​សម្លៀកបំពាក់​វាយ​ខ្នោះ​ដៃ ឆក់​ខ្សែភ្លើង វាយ​នឹង​ដំបង ដោយសារតែ​ពួកគេ​មិនអាច​រក​អតិថិជន​តាម​ប្រព័ន្ធ​អ៊ីនធឺណិត​ដើម្បី​ជម្រិត​ទារប្រាក់​តាម​តម្រូវការ​របស់​ពួកគេ។

ស្ថាប័ន​សារព័ត៌មាន​អន្តរជាតិ អាល់ហ្សា ហ្ស៊ីរ៉ា រកឃើញ​ថា ក្រុមហ៊ុន​ឆបោក​របស់​ចិន​នៅ​កម្ពុជា ដំណើរការ​ទៅ​បាន​ដោយ​សេរី គឺ​ដោយសារតែ​ស្ថិត​ក្រោម​ការ​ការពារ​ដោយ​​ក្រុម​មន្ត្រី​គ្រាក់ៗ របស់​លោកនាយក​រដ្ឋមន្ត្រី ហ៊ុន សែន រួម​ទាំង​ក្រុម​ឧកញ៉ា​ដែល​មាន​កេរ្តិ៍ឈ្មោះ​មិនល្អ សុទ្ធ​សឹង​តែ​មាន​ទំនាក់ទំនង​យ៉ាង​ស្អិតរមួត​ជាមួយ​ក្រុមហ៊ុន​ចិន​ឆបោក​នៅ​កម្ពុជា​។ លើស​ពី​នេះ​ទៀត ក្រុម​វិនិយោគិន​ជន​ជាតិចិន​មួយ​ចំនួន​ទៀត ដែល​ជា​ម្ចាស់​អគារ​សម្រាប់​ឃុំឃាំង​មនុស្ស​ធ្វើ​ទារុណកម្ម​ក្នុង​ខេត្ត​ព្រះសីហនុ​នោះ សុទ្ធសឹងតែ​មានកេរ្តិ៍ឈ្មោះ​អាក្រក់ និង​មាន​ប្រវត្តិ​ជា​អ្នកទោស​ក្នុង​ប្រទេស​ចិន​ដោយសារតែ​ពាក់ព័ន្ធ​នឹង​ការ​លាង​លុយ​កង្វក់ និង​អំពើពុករលួយ​ខ្នាត​អន្តរជាតិ។

ស្ថាប័ន​សារព័ត៌មាន​អន្តរជាតិ​ដដែល បាន​រាយការណ៍​ថា បរិវេណ​តំបន់​អគារ ក្រោន អ៊ីនដាស្ទ្រៀល ផាក (Crown Industrial Park) នៅ​ខេត្ត​ព្រះសីហនុ ក្នុង​នោះ​ម្ចាស់​ក្រុមហ៊ុន​ក្រោន រីសត (Crown Resorts) គឺជា​ក្រុមហ៊ុន​បុត្រ​សម្ព័ន្ធ​នៃ​ក្រុមហ៊ុន​របស់ លោក កុក អាន ដែល​ជា​សមាជិក​ព្រឹទ្ធសភា​ប្រចាំ​ភូមិភាគ​៥ នៃ​រដ្ឋាភិបាល​លោក ហ៊ុន សែន។

ជនរងគ្រោះ​ដែល​រួចខ្លួន​ចេញ​ដែល​ត្រូវ​គេ​បង្ខាំង​ក្នុង​អគារ​នោះ បាន​ឱ្យ​ដឹង​ថា នៅ​មាន​ជនរងគ្រោះ​ចំនួន ២​ពាន់ (.០០០) ទៅ ៣​ពាន់​នាក់ (.០០០) ត្រូវ​គេ​បង្ខាំង​ក្នុង​បរិវេណ​នៃ​អគារ​ដែល​ជា​ម្ចាស់​កម្មសិទ្ធិ​របស់ លោក កុក អាន​។ ប្រភព​ដដែល បញ្ជាក់​ថា ក្រុម​ឆបោក​យក​ជនរងគ្រោះ​ទាំងនោះ​ទៅ​ឃុំ​ក្នុង​អគារ​នេះ ត្រូវ​បាន​ឆ្មាំ​សន្តិសុខ​ដែល​ឯកសណ្ឋាន​មាន​ផ្លាក​សញ្ញា​ផ្គត់ផ្គង់​ទឹក​ឈ្មោះ អាន កូ (Andco Water Supply Co., Ltd.) របស់​លោក កុក អាន ត្រូវ​បាន​យាមកាម​យ៉ាង​តឹងរ៉ឹង មិន​ឱ្យ​ពួកគេ​អាច​ចុះ​បាន​សូម្បីតែ​ជាន់​ផ្ទាល់​ដី។

ចំណែកឯ តំបន់​មួយទៀត​ឈ្មោះ Town Victory Paradise Resort and Casino ដែល​មាន​ចម្ងាយ​ប្រមាណ​ជាង​ ៥​គីឡូម៉ែត្រ​ចេញពី​ក្រុមហ៊ុន​របស់ លោក កុក អាន ក្នុង​នោះ​ជនរងគ្រោះ​ដែល​ត្រូវ​គេ​បង្ខាំង​ធ្វើ​ការ​ខុស​ច្បាប់​បាន​ឱ្យ​ដឹង​ថា​ក្រុមហ៊ុន​នោះ​ឈ្មោះ ហេង ស៊ិន (Heng Xin)​។ លោក ហេង ស៊ិន គឺជា​អ្នក​វិនិយោគិន​ជនជាតិ​ចិន​វ័យក្មេង​ម្នាក់​តែងតែ​បរិច្ចាគ​ថវិកា​ទៅ​កាន់​រដ្ឋាភិបាល​កម្ពុជា រហូត​ត្រូវ​បាន​តែងតាំង​ជាទី​ប្រឹក្សា​របស់​លោក ហ៊ុន សែន ផ្ទាល់​។ អាល់ហ្សាហ្ស៊ីរ៉ា រាយការណ៍​ថា ក្មេងស្រី​ជនជាតិ​ចិន​អាយុ ១៦​ឆ្នាំ​ម្នាក់ នាង​ត្រូវ​បាន​លក់​ទៅ​ឱ្យ​សណ្ឋាគារ White Sand Palace កាលពី​ខែ​សីហា ឆ្នាំ​២០២១​។ ក្មេងស្រី​ម្នាក់​នោះ​ថា នាង​ត្រូវ​បាន​បង្ខំ​ឱ្យធ្វើ​ការ​ឆបោក​ផ្លូវភេទ និង​បំរើ​សេវាកម្ម​ដល់​អតិថិជន​ក្នុង​សណ្ឋាន​គារ​នោះ។

សារព័ត៌មាន​ដដែល ក៏បាន​រក​ឃើញ​ទៀត​ថា អ្នកជំនួញ​ម្នាក់​ដែល​មាន​ឥទ្ធិពល​ក្នុង​របប​លោក ហ៊ុន សែន គឺ​ឧកញ៉ា ទ្រី ភាព ក៏​មាន​អគារ​សហគ្រាស​សម្រាប់​ឲ្យ​ជនជាតិ​ចិន​ប្រតិបត្តិការ​អាជីវកម្ម​បែប​ឧក្រិដ្ឋកម្ម ដោយ​ចាប់​ជម្រិត​មនុស្ស​ធ្វើ​ទារុណកម្ម​ក្នុង​អគារ​ដែល​មាន​សភាព​ងងឹត ស្ថិតនៅ​តំបន់​សេដ្ឋកិច្ច​ពិសេស​ក្នុង​ខេត្ត​ព្រះសីហនុ​ដែរ។ ពលរដ្ឋ​ដែល​ត្រូវ​បាន​ឧកញ៉ា​ ទ្រី ភាព រំលោភ​ដីធ្លី ដើម្បី​ធ្វើជា​តំបន់​ឧក្រិដ្ឋកម្ម​នៅ​កន្លែង​នោះ អះអាង​ថា ពួកគាត់​ធ្លាប់​ឃើញ​មានការ​ចាប់​បញ្ជូន​មនុស្ស​ចូល​បរិវេណ​អគារ​របស់ លោក ទ្រី ភាព និង​មាន​សំឡេង​ស្រែក​ចេញ​ពី​ក្នុង​បរិវេណ​នោះ ដោយសារ​តែ​ការ​ធ្វើ​ទារុណកម្ម​ទៀត​ផង។

លោក ទ្រី ភាព គឺជា​អ្នកជំនួញ​ម្នាក់​ដែល​ស្និទ្ធ​នឹង លោក ហ៊ុន សែន​។ ចំណែកឯ ការ​ធ្វើ​ជំនួញ​របស់​លោក​រង​ការចោទប្រកាន់​ពី​សំណាក់​សហគមន៍​ជាតិ និង​អន្តរជាតិ​ថា ជា​មេ​ឈ្មួញ​ជួញដូរ​កាប់​ឈើ​សម្រាប់​នាំ​ចេញទៅ​ក្រៅប្រទេស​ដែល​ប្រឡូកប្រឡាក់​ទៅ​ដោយ​អំពើពុករលួយ​។ ក្រសួង​រតនាគារ​អាមេរិក កាលពី​ឆ្នាំ​២០១៩ សម្រេច​ចេញ​ច្បាប់​ដ៏​មាន​ឥទ្ធិពល​ដាក់ទណ្ឌកម្ម (Global Magnitsky Act) និង​បង្កក ឬ​រាំង​ខ្ទប់​ទ្រព្យសម្បត្តិ លោក ទ្រី ភាព ដោយសារ​តែ​ពាក់ព័ន្ធ​នឹង​ការ​ប្រព្រឹត្តិ​អំពើពុករលួយ និង​ការ​រំលោភ​សិទ្ធិមនុស្ស​ធ្ងន់ធ្ងរ​នៅ​កម្ពុជា។

សារព័ត៌មាន​អន្តរជាតិ អាល់ហ្សាហ្ស៊ីរ៉ា (Al Jazeera) ក៏បាន​រក​ឃើញ​ទៀត​ថា សណ្ឋាគារ​កាស៊ីណូ​មួយ​ចំនួន​ទៀត ​ដែល​ស្ថិត​ក្នុង​ខេត្ត​ព្រះសីហនុ​សុទ្ធ​សឹង​តែ​មាន​ក្រុម​អ្នក​មានអំណាច​នៃ​របប​លោក ហ៊ុន សែន ដូចជា​លោក ហ៊ុន តូ ដែល​ត្រូវជា​ក្មួយបង្កើត​របស់ និង​ឧកញ៉ា ឫទ្ធី សំណាង មាន​ទំនាក់ទំនង​រកស៊ី​ជាមួយ​ជនជាតិ​ចិន ​ដែល​មាន​ប្រវត្តិ​រឿងរ៉ាវ​អាស្រូវ​ជា​អ្នក​ជាប់ទោស ដែល​ពាក់ព័ន្ធ​នឹង​អំពើពុករលួយ​អន្តរជាតិ។

ចំណែក ឧកញ៉ា ឫទ្ធី សំណាង ត្រូវជា​កូនប្រសា​រលោក កុក អាន សមាជិក​ព្រឹទ្ធសភា ដែល​មាន​ទំនាក់ទំនង​ជាមួយ​ក្រុម​ហ៊ុន​ចិន​ប្រតិបត្តិការ​ឆបោក​មួយចំនួន​ក្នុង​ខេត្ត​ព្រះសីហនុ ដែល​ម្ចាស់​អគារ​គ្រប់គ្រង​ដោយ​ជនជាតិ​ចិន​ទាំងនោះ សុទ្ធ​សឹង​តែ​មាន​ជាប់​ពាក់ព័ន្ធ​នឹង​អំពើ​លាង​លុយ​កង្វក់​នៅ​ប្រទេស​ចិន។ លោក ឫទ្ធី សំណាង ស្លាប់​កាល​ពី​ខែ​ឧសភា ឆ្នាំ​២០២២។

វិទ្យុ​អាស៊ីសេរី​មិនទាន់​អាច​ទាក់ទង សមាជិក​ព្រឹទ្ធសភា​ប្រចាំ​ភូមិភាគ​៥ លោក កុក អាន ឧកញ៉ា ទ្រី ភាព និង​ក្មួយបង្កើត​លោក ហ៊ុន សែន គឺ​លោក ហ៊ុន តូ ដើម្បី​សុំ​អត្ថាធិប្បាយ​ជុំវិញ​រឿង​នេះ​បាន​នៅ​ឡើយ​ទេ​។ ចំណែក​ឯ​ប្រធាន​អង្គភាព​ប្រឆាំង​អំពើពុករលួយ លោក ឱម យិនទៀង និង​អភិបាល​ខេត្ត​ព្រះសីហនុ​លោក គួច ចំរើន ក៏​មិន​អាច​ទាក់ទង​ដើម្បី​សាកសួរ​បញ្ហា​នេះ​បន្ថែម​បាន​ដែរ។

វិទ្យុ​អាស៊ីសេរី​ក៏បាន​ព្យាយាម​ទាក់ទង ប្រធាន​អង្គភាព​អ្នកនាំពាក្យ​រដ្ឋាភិបាល លោក ផៃ ស៊ីផាន អ្នកនាំពាក្យ​ក្រសួង​មហាផ្ទៃ លោក ខៀវ សុភ័គ និង​អ្នកនាំពាក្យ​អគ្គស្នងការដ្ឋាន​នគរ​បាល​ជាតិ លោក ឆាយ គឹមខឿន ដើម្បី​សុំ​ប្រតិកម្ម​ជុំវិញ​ការ​លាតត្រដាង​អំពើពុករលួយ​របស់​អ្នក​មាន​អំណាច​នៅ​កម្ពុជា​នេះ​ដែរ ក៏ប៉ុន្តែ​មិន​អាច​ទាក់ទង​បាន​កាល​ពី​ថ្ងៃទី​១៩ កក្កដា។

រីឯអ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា វិញ​បដិសេធ​មិន​ធ្វើ​អត្ថាធិប្បាយ​អំពី​រឿង​នេះ​ទេ ដោយ​លោក​បាន​ចុច​ផ្តាច់​ប្រព័ន្ធ​ទូរស័ព្ទ​ភ្លាមៗ៖ «បញ្ហា​អស់ហ្នឹង ទៅ​លើ​ថ្នាក់​ជាតិ សួរនាំ​ទៅលើ​ថ្នាក់​ជាតិ»

ទោះបីជា​យ៉ាងណា លោក ផៃ ស៊ីផាន ធ្លាប់​ប្រាប់​វិទ្យុ​អាស៊ីសេរី​កន្លង​មក​ថា ករណី​ចាប់​ជម្រិត​មនុស្ស​ជា​បទល្មើស​ទូទៅ​លើ​សកលលោក​។ លោក​ទទួលស្គាល់​ថា ការ​ចាប់​ជម្រិត​មនុស្ស​នៅ​កម្ពុជា គឺជា​វប្បធម៌​មួយ​សម្រាប់​ក្រុម​ឧក្រិដ្ឋជន តែ​ពួកគេ​ចាប់​ជម្រិត​ជនជាតិ​បរទេស​ដើម្បី​ជម្រិត​ទារប្រាក់​។ លោក​អះអាង​ថា អាជ្ញា​ធរមាន​សមត្ថកិច្ច​អនុវត្ត​ច្បាប់​យ៉ាង​ម៉ឺងម៉ាត់​ទៅលើ​ក្រុម​ឧក្រិដ្ឋជន​ទាំងនោះ​។​

បន្ថែម​ពី​នេះ ស្នងការ​នគរបាល​ខេត្ត​ព្រះសីហនុ លោក ជួន ណារិន្ទ ក៏​ធ្លាប់​អះអាង​ប្រាប់​វិទ្យុ​អាស៊ីសេរី​ដែរ​ថា ករណី​បង្ខាំង​មនុស្ស ជាពិសេស​ជនជាតិ​ថៃ​ក្នុង​ខេត្ត​ព្រះសីហនុ ដែល​បាន​ផ្សព្វផ្សាយ​កន្លង​មក​នេះ គឺជា​រឿង​មិន​ពិត។ លោក​អះអាង​ថា ជនជាតិ​ថៃ​ទាំងនោះ​តែង​ចូល​កម្ពុជា​ធ្វើ​ការ​ដោយ​ខុសច្បាប់ និង​មាន​ទំនាស់​លើ​កិច្ចសន្យាការងារ​ជាមួយ​ក្រុមហ៊ុន​ចិន​នានា​ក្នុង​ខេត្ត​ព្រះសីហនុ​តែប៉ុណ្ណោះ។

លោក​ថា រាល់​ករណី​ដែល​ត្រូវ​បាន​ផ្សព្វផ្សាយ ថា មាន​ករណី​ចាប់​បង្ខាំង​ជនជាតិ​ថៃ​នៅ​ខេត្ត​ព្រះសីហនុ​នា​រយៈពេល​ចុងក្រោយ​នេះ សមត្ថកិច្ច​តែង​ចុះ​ស៊ើបអង្កេត​ដោយ​មិន​មាន​រក​ឃើញ​ដូចជា​ការ​ចោទប្រកាន់​ពី​សំណាក់​សារព័ត៌មាន​ថៃ​ឡើយ៖ «ហើយ​នៅ​ការណ៍​យើង​ទៅ​សហការ​ជាមួយ​កន្លង​គាត់ [​ជនជាតិ​ថៃ​] ធ្វើការ​ហ្នឹង​គាត់​ធ្វើការ​ធម្មតា ហើយ​ក៏​មាន​ជនជាតិ​ថៃ​មួយចំនួន​នៅ​ជាមួយ​គាត់​ដែរ​។ ចូល​ទៅ​ថា មាន​បង្ខាំង​មានអី ដល់​ចូល​ទៅ​នេះ​គឺ​មាន​ជនជាតិ​ថៃ​កំពុងតែ​ធ្វើ​ការងារ។ មិន​មាន​បង្ខាំង​ទេ គាត់ [​ជនជាតិ​ថៃ​] ចេះតែ​ច្នៃប្រឌិត​ការ​បង្ខាំង​ការ​ធ្វើ​ទារុណកម្ម​ដល់​ធាតុ​ពិត​គាត់​ចង់​ចាក​ចេញ​ពី​កន្លង​ធ្វើ​ការងារ»

ទោះបីជា​យ៉ាងណា ជនជាតិ​ថៃ​ត្រូវ​បាន​គេ​ជួយសង្គ្រោះ​កន្លង​មក​នេះ សារព័ត៌មាន​ថៃ​រាយការណ៍​ថា ពួកគាត់​ត្រូវ​បាន​ជនជាតិ​ចិន​បង្ខំ​ឱ្យធ្វើ​ការ​ខុសច្បាប់​នៅ​កម្ពុជា ព្រមទាំង​មាន​ស្លាកស្នាម​ជាំ​លើ​ដងខ្លួន​ដោយសារតែ​រង​ការ​ធ្វើ​ទារុណកម្ម​ពី​សំណាក់​ក្រុម​ឧក្រិដ្ឋជន​ចិន។

អ្នកវិភាគ​សង្គម និង​នយោបាយ លោក គឹម សុខ សម្គាល់​ថា ឯកសារ​ស៊ើបអង្កេត​របស់​ស្ថាប័ន​ព័ត៌មាន​អន្តរជាតិ អាល់ហ្សាហ្ស៊ី​រ៉ា ធ្វើឡើង​មាន​ការ​ស្រាវជ្រាវ​បង្ហាញ​អត្តសញ្ញាណ​ជនឧក្រិដ្ឋ និង​មាន​មូលដ្ឋាន​ច្បាស់លាស់​គួរ​ឱ្យ​ទុកចិត្ត។

លោក​បន្ត​ថា ការ​លាតត្រដាង​ក្រុម​បក្ស​ពួក​លោក ហ៊ុន សែន ដែល​ធ្វើ​ជំនួញ​អាជីវកម្ម​បែប​ឧក្រិដ្ឋកម្ម​បែប​នេះ កាន់តែ​រង​ភាព​អាម៉ាស់៖ «ហើយ​ប្រព័ន្ធ​រដ្ឋបាល​ឆបោក​បែបនេះ​គួរ​ហៅ​ថា ជា​ប្រព័ន្ធ​ចោរ​ឧក្រិដ្ឋ ហើយ​ប្រព័ន្ធ​ចោរ​ឧក្រិដ្ឋ​បើ​យើង​ប្រើ​ពាក្យ​ថា ជា​រដ្ឋាភិបាល​ដែល​អាម៉ាស់មុខ​បំផុត​តែ​ប៉ុណ្ណឹង​ខ្ញុំ​គិតថា​ដូចជា​នៅ​ស្ទើរ​ណាស់»

ជុំវិញ​រឿង​នេះ​ដែរ អ្នកសម្របសម្រួល​សមាគម​ការពារ​សិទ្ធិមនុស្ស​អាដហុក (ADHOC) ប្រចាំ​ខេត្ត​ព្រះសីហនុ អ្នកស្រី ជៀប សុធារី ប្រាប់​វិទ្យុ​អាស៊ីសេរី​ថា អ្នកស្រី​តែង​ទទួល​បាន​ព័ត៌មាន​ពី​ប្រជា​ពលរដ្ឋ​ដែល​រស់នៅ​ក្បែរ​តំបន់​អគារ​ក្រុមហ៊ុន​ចិន​ក្នុង​ខេត្ត​ព្រះសីហនុ​។ ពួកគាត់​លើក​ឡើង​ថា តែងតែ​ឮ​សំឡេង​ស្រែក​ចេញពី​ក្នុង​អគារ​។ អ្នកស្រី​ឱ្យដឹង​ទៀត​ថា កាលពី​អំឡុង​ឆ្នាំ​២០១៩ កន្លងទៅ​ពិតជា​មាន​ករណី​ការ​ធ្វើ​ទារុណកម្ម​មនុស្ស​ក្នុង​អគារ ដោយ​ត្រូវ​បាន​សារព័ត៌មាន​ផ្សព្វផ្សាយ​ជាច្រើន​​ដែរ។ អ្នកស្រី​បញ្ជាក់​ថា ពលរដ្ឋ​ក្នុង​ខេត្ត​ព្រះសីហនុ​ដែល​រស់នៅ​ក្បែរ​អគារ​ក្រុមហ៊ុន​ចិន ទូទៅ​មិន​ហ៊ាន​និយាយ​ពី​ករណី​ចាប់​បង្ខាំង​មនុស្ស​ធ្វើ​ទារុណ​កម្ម​នេះ​ប្តឹង​ទៅ​អាជ្ញាធរ​មាន​សមត្ថកិច្ច​ឡើយ​។ អ្នកស្រី​ថា មូលហេតុ​ដែល​ពលរដ្ឋ​មិន​ហ៊ាន​ផ្តល់​ព័ត៌មាន​ទាំងនេះ​ជូន​សមត្ថកិច្ច ដោយសារតែ​ការ​នាំ​ពាក្យ​ពី​ពលរដ្ឋ​លើ​ករណី​បង្ខាំង​មនុស្ស​នេះ​គ្មាន​ការ​គាំទ្រ​ពី​សមត្ថកិច្ច និង​ព្រួយ​បារម្ភ​ពី​បញ្ហា​សុវត្ថិភាព​របស់​ពួកគាត់៖ «ហើយ​ជា​ការ​ទទូច​យើង​នៅតែ​សុំ​ឱ្យ​រដ្ឋាភិបាល​លោក​មេត្តា​ពង្រឹង​ការ​អនុវត្ត​ច្បាប់ និង​ចុះ​ធ្វើការ​ស្រាវជ្រាវ ហើយ​គួរតែ​មានការ​បោសសំអាត​ដែរ បើសិនជា​មានការ​ឃុបឃិត​គ្នា​។ ព្រោះ​និយាយ​ទៅ​ថា​វា​ទាក់ទង​ទៅ​នឹង​មុខមាត់​ប្រទេស​របស់​យើង​ដែរ ព្រោះ​ប្រទេស​របស់​យើង​និយាយ​ទៅ​ថា ជា​ប្រទេស​មួយ​មាន​ធនធានធម្មជាតិ មាន​លទ្ធភាព​គ្រប់គ្រាន់​ក្នុង​ការ​បើកឱកាស​ឱ្យ​អ្នក​វិនិយោគ​សុចរិត​ចុះ​មក​ដាក់​ទុក​ដើម្បី​រកស៊ី»

ទាក់ទង​នឹង​រឿង​នេះ​ដែរ អង្គការ​សហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា លើកឡើង​ថ្មីៗ​នេះ​ថា ការ​ជួញដូរ​មនុស្ស គឺជា​បញ្ហា​រំលោភសិទ្ធិ​មនុស្ស យ៉ាងធ្ងន់ធ្ងរ ដែល​វា​កើតឡើង​នៅ​ទូទាំង​ពិភពលោក​ក្នុង​នោះ​រួមមាន​ទាំង​កម្ពុជា​ផង​ដែរ។ អង្គការ​សហប្រជាជាតិ​បញ្ជាក់​ថា ការ​ជួញដូរ​មនុស្ស​អាច​ធ្វើឡើង​តាម​ទម្រង់​ផ្សេងៗ ​គ្នា ប៉ុន្តែ​វា​អាច​រំលោភ​ទៅ​លើ​សិទ្ធិ​មាន​សេរីភាព និង​សុវត្ថិភាព សិទ្ធិ​មិន​ទទួលរង​ការ​ធ្វើ​ទារុណកម្ម អំពើ​ឃោរឃៅ អំពើ​អមនុស្សធម៌ ឬ​ការ​បន្ទាបបន្ថោក ឬ​សិទ្ធិ​ផ្សេងៗ​ ជាច្រើន​ទៀត ដែល​អង្គការ​សហប្រជាជាតិ​ទទួល​ស្គាល់​ដើម្បី​ទប់ស្កាត់​បង្ក្រាប និង​ដាក់​ទណ្ឌកម្ម​លើ​ការ​ជួញដូរ​មនុស្ស។

ទោះបីជា​យ៉ាងណា សារព័ត៌មាន​អន្តរជាតិ អាល់ហ្សាហ្ស៊ីរ៉ា (Al Jazeera) បាន​រាយការណ៍​ឱ្យ​ដឹង​ទៀត​ថា មាន​មនុស្ស​រាប់​ពាន់​នាក់​ផ្សេងទៀត​នៅតែ​រង់ចាំ​ការ​ដោះលែង​ចេញ​ពី​កន្លែង​ឃុំឃាំង​នៅ​កម្ពុជា ខណៈ​ដែល​ក្រុមហ៊ុន​ឆបោក​របស់​ចិន​ធ្វើ​សកម្មភាព​ឆបោក ស្របពេល​កម្ពុជា​នៅ​មាន​អំពើ​និទ្ទណ្ឌភាព និង​មាន​អំពើពុករលួយ​គ្មាន​ដែន​កំណត់​ផង​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។