ក្រុម​ជន​រង​គ្រោះ​​ពី​​គ្រឿងញៀន ត្រៀម​ញត្តិ​​ស្នើសុំ​​​សើរើ​​សវនាការ​កាត់​ទោស​​ឧកញ៉ា គិត​ ធាង ឲ្យ​ធ្ងន់ធ្ងរ​​ជាង​នេះ

ដោយ ហេង រស្មី
2020.04.22
Share on WhatsApp
Share on WhatsApp
គិត ធាង ឧកញ៉ា គិត ធាង ម្ចាស់​ក្លឹប​កម្សាន្ត រ៉ុក (Rock) មុន​ពេល​អាជ្ញាធរ​រាជធានី​ភ្នំពេញ​ចាប់​ខ្លួន កាល​ពី​ថ្ងៃ​ទី១១ ខែ​មីនា ឆ្នាំ២០១៩។
រូប៖ ហ្វេសប៊ុក Royal Financial Corp

ក្រុម​ពលរដ្ឋ​មួយ​ចំនួន ដែល​អះអាង​ថា ធ្លាប់​ជា​ជន​រងគ្រោះ ដោយសារ​ការ​ប្រើប្រាស់​គ្រឿងញៀន ​ត្រៀម​ដាក់​ញត្តិ​ ទៅ​រដ្ឋ​មន្ត្រី​ក្រសួង​យុត្តិធម៌ ដើម្បី​ទាមទារ​ឲ្យ​សើរើ​សវនាការ​កាត់​ទោស​ មេ​ឈ្មួញ​គ្រឿង​ញៀន លោក គិត ធាង ជា​ម្ចាស់​ក្លឹប​កម្សាន្ត (Rock) ដើម្បី​ឲ្យ​តុលាការ​ផ្ដន្ទាទោស​លោក​ឲ្យ​ធ្ងន់ធ្ងរ​​ជាង​នេះ។

មនុស្ស​ម្នាក់​ក្នុង​ចំណោម​មនុស្ស​មួយ​ក្រុម ដែល​មាន​ឈ្មោះ​ក្នុង​ញតិ្ត​នោះ គឺ​លោកស្រី គុជ ញេញ ប្រាប់​អាស៊ី​សេរី​កាល​ពី​ថ្ងៃ​ទី២២ ខែ​មេសា​ថា ពួក​គេ​ប្រមូល​ស្នាម​មេដៃ​​អ្នក​ធ្លាប់​រង​គ្រោះ​ពី​គ្រឿង​ញៀន បាន​​គ្នា​ ៧​នាក់​​ហើយ និង​ត្រៀម​​ដាក់​ញត្តិ​ ​ទៅ​រដ្ឋមន្ត្រី​ក្រសួង​យុត្តិធម៌ លោក កើត​ រិទ្ធិ។

លោកស្រី ថា ពួកគាត់​មិន​សុខ​ចិត្ត​ លើ​ការ​សម្រេច​ក្ដី របស់​តុលាការ ដែល​កាត់​ទោស​ស្រាល​ពេក​ លើ​ឧកញ៉ា គិត ធាង ហើយ​មិន​សម​នឹង​ទំហំ ការ​ខូច​ខាត​របស់​លោកស្រី និង​ជន​រងគ្រោះ ផ្សេង​ទៀត ដែល​ខ្លះ​ពិបាក​ចិត្ត​ដល់​ឆ្កួត បាត់​បង់​ផ្ទះ​សម្បែង ខូច​អនាគត មកដល់​សព្វ​ថ្ងៃនេះ៖ «ឲ្យ​គាត់​ (រដ្ឋ​មន្ត្រី​ក្រសួង​យុត្តិធម៌) ពិនិត្យ​សារ​ជា​ថ្មី ព្រោះ​អ្វី​មនុស្ស​ម្នាក់ៗ ខូច​អនាគត​ ទី​១ ហើយ​ទី​២ អ្នក​ខ្លះ​ អស់​ផ្ទះ អស់​សម្បែង​ ហើយ​អ្នក​ខ្លះ​ទៀត ក៏​ទៅ​ជា​ឆ្កួត​លីលា។ និយាយ​រួម​ទៅ គឺ​មាន​សព្វ​ទាំង​អស់។ អ៊ីចឹង គឺ​វា​អត់​នឹង​អ្វី ដែល​ធ្វើ​(សម្រេច​ក្ដី)​ហ្នឹង វា​អត់​សម។ អ៊ីចឹង គ្រាន់​តែ​ថា ទាមទារ​សុំ​ឲ្យ​ខាង​នោះ (​ថ្នាក់​លើ​របស់​តុលាការ) គាត់​ ពិនិត្យ​ពិច័យ​ ​ហើយ​ធ្វើ​សា​ថ្មី ឲ្យ​ម៉ត់ចត់ ឲ្យ​ច្បាស់​លាស់​បន្តិច​ណា​អូន ដើម្បី​ឲ្យ​ប្រជាជន​យើង ដូច​ថា អស់​ចិត្ត។ ធ្វើ​អ៊ីចឹង​ ដូច​ថា មិន​អស់​ចិត្ត។ បង​ហ្នឹង​ ក៏​ជា​ជន​រងគ្រោះ​ដែរ​។​ ពី​មុន​មក បង​ក៏​ជន​រង​គ្រោះ បង​អស់​ផ្ទះ បង​អស់​សម្បែង អ៊ីចឹង​ណា។ បង​​ហ្នឹង គឺ​មិន​មាន​ផ្ទះ មាន​សម្បែង​នៅ​ទេ ដល់​ពេល​អ៊ីចឹង​ហើយ មាន​ហេតុការណ៍​ (កាត់​ក្ដី លោក គិត ធាង) អ៊ីចឹង​មក​ទៀត។ ដល់​ពេល​ហើយ (កាត់​ក្ដី)​វា​តិច​ពេក​អ៊ីចឹង បង​មិន​អស់​ចិត្ត ព្រោះ​ពី​មុន​មក​ បង​ធ្លាក់​ក្នុង​អបាយមុខ (គ្រឿងញៀន) ខូច​អនាគត»

ចៅក្រម​សាលា​ដំបូង​រាជធានី​ភ្នំពេញ បាន​ផ្ដន្ទាទោស​ ឧកញ៉ា គិត ធាង ជា​ម្ចាស់​មជ្ឈមណ្ឌល​កម្សាន្ត​រ៉ក់ (Rock) និង​ជា​បង​ប្រុស​បង្កើត​របស់​​មហា​សេដ្ឋី​ គិត ម៉េង ជា​មនុស្ស​ជំនិត​របស់​លោក ហ៊ុន សែន ឲ្យ​ជាប់​ពន្ធនាគារ​រយៈពេល​៤​ឆ្នាំ ​ពី​បទ​ចាត់​ចែង​សម្រប​សម្រួល​ឲ្យ​ប្រើប្រាស់​សារ​ធាតុ​ញៀន​ខុស​ច្បាប់ និង​សម​គំនិត ពាក់ព័ន្ធ​ករណី​គ្រឿង​ញៀន ជិត​៥០​ (៤៩,៤៤គីឡូក្រាម​ ដែល​សមត្ថកិច្ច​ឆ្មក់​ចូល​ចាប់​បាន​ ក្នុង​មជ្ឈមណ្ឌល​កម្សាន្ត​រ៉ក់។

នៅ​ក្នុង​ញាតិ​ដែល​​គ្រោង​ស្នើ​ទៅ​រដ្ឋមន្ត្រី​ក្រសួង​យុត្តិធម៌​បាន​បញ្ជាក់​ថា ការ​កាត់​ទោស​មាន​រយៈ​ពេល ៤ឆ្នាំ​លើ​សំណុំ​រឿង​គ្រឿង​ញៀន​ជិត​ ៥០​គីឡូក្រាម​នេះ​ធ្វើ​ឲ្យ​ពួក​គេ​​មិន​ជ្រះ​ស្រឡះ​នៅ​ក្នុង​ចិត្ត​នោះ​​ឡើយ​ ពី​ព្រោះ​ថា​ចំនួន​គ្រឿង​ញៀន​ដ៏​ច្រើន​សន្ធឹកសន្ធាប់​បែប​នេះ​មាន​ទោស​ជាប់​ពន្ធនាគារ​តែ​ ៤​ឆ្នាំ​ប៉ុណ្ណោះ។

ញាតិ​ដដែល​បាន​បន្ត​ថា​ បើ​អ្នក​គ្មាន​លុយ​គ្មាន​ឥទ្ធិពល​ក្នុង​សង្គម​វិញ​គ្រាន់​តែ​គ្រឿងញៀន​មួយ​កញ្ចប់​តូច​ ក៏​ជាប់​ពន្ធនាគារ​ពី​២​ទៅ​៣​ឆ្នាំ​ដែរ​ ហើយ​ម្យ៉ាង​វិញ​ទៀត​លោក​ គិត ធាង​មាន​សំណាង​ណាស់​​ឃើញ​ព័ត៌មាន​ផ្សាយ​ថា​សម្រាក​តែ​ក្នុង​មន្ទីរ​ពេទ្យ​ប៉ុណ្ណោះ។​​

ឧកញ៉ា គិត ធាង ត្រូវ​បាន​សមត្ថកិច្ច ​ចាប់​ខ្លួន ក្រោយ​មាន​បញ្ជា​របស់​លោក​នាយករដ្ឋមន្ត្រី​ ហ៊ុន សែន​ កាល​ពី​ថ្ងៃ​ទី​១១​ ខែ​ មីនា​ ឆ្នាំ​២០១៩​ នៅ​ក្នុង​ពិធី​ប្រគល់​សញ្ញាប័ត្រ​នៅ​មជ្ឈមណ្ឌល​កម្សាន្ត​កោះ​ពេជ្រ​ ដែល​ខុស​ពី​ជន​ជាប់​ចោទ គ្រឿងញៀន​លក្ខណៈ​តូច​តាច។ រាល់​សវនាការ​ លោក គិត ធាង​ ម្ដងៗ តែង​ធ្វើ​ឡើង​ជា​អសាធារណៈ ហើយ​លោក តែង​ស្លៀក​សំលៀក​បំពាក់​ធម្មតា និង​មានពាក់​ក្រវាត់​ក​ជាប់​ជា​និច្ច ហើយ​ដៃ​គ្មាន​ជាប់​ខ្នោះ​នោះ​ទេ។

ចំណែក​ស្ថានភាព​ការ​រស់​នៅ​ប្រចាំ​ថ្ងៃ​វិញ លោក គិត ធាង មិន​ជាប់​ក្នុង​ពន្ធនាគារ ជាមួយ​អ្នក​ទោស​ផ្សេង​ទៀត​ទេ គឺ​លោក តែង​​ស្នាក់​​ប្រចាំ​ នៅ​ក្នុង​មន្ទីរ​ពេទ្យ​​មិត្តភាព​ខ្មែរ​សូវៀត (ពេទ្យ​រុស្ស៊ី) ​ដោយ​ប្រើ​ហេតុ​ផល​ថា មាន​ជំងឺ​។ លោក ស្នាក់​នៅ​ ទី​នោះ​ អស់​រយៈ​ពេល​ជាង ១ឆ្នាំ​ហើយ ។

អាស៊ី​សេរី មិន​អាច​សុំ​ការ​បញ្ជា​ពី​មេធាវី​​ការ​ពារ​ក្ដី ឲ្យ​ លោក គិត​ ធាង គឺ លោក​​មេធាវី​ សួង ចាន់ថន​លោកស្រី មេធាវី​ ទី គឹមស្រ៊ាន និង​អ្នក​នាំ​ពាក្យ​ក្រសួង​យុត្តិធម៌ លោក ជិន ម៉ាលីន បាន​ដែរ កាលពី​ថ្ងៃ​ទី២២ មេសា។

នាយក​ប្រតិបត្តិ​អង្គការ​សម្ព័ន្ធ​គណនេយ្យ​សង្គម​ លោក សន ជ័យ យល់​ថា ​តុលាការ​ គួរ​តែ​ពិចារណា​ក្នុង​ការ​សើរើ​ការ​សម្រេច​ក្ដី​​នេះ ដោយសារ​​ការ​មិន​ពេញ​ចិត្ត​របស់​ពលរដ្ឋ ដែល​អះអាង​ជា​ជន​រង​គ្រោះ​នៃ​គ្រឿងញៀន៖ «អ៊ីចឹង កន្លែង​ហ្នឹង តុលាការ​ក៏​អាច​ធ្វើការ​​​ស៊ើប​អង្កេត​ ទៅ​លើ​ អ្វី​ដែល​ប្រជាពលរដ្ឋ​ អះអាង​ដែរ។ នេះ​ជា​រូប​ភាព​ថ្មី​មួយ​ ក្រៅ​តែ​ពី​យើង​បាន​ លឺ​អំពី​ការ​ប្ដឹង​ទាមទារ​សំណង ទៅ​លើ​ក្រុម​ ឬ​ក៏​គ្រួសារ​ជន​រង​គ្រោះ ​ពី​របប​ខ្មែរ​ក្រហម។ តុលាការ​ខ្មែរ​​ក្រហម​ហ្នឹង ក៏​មាន​​ក្រុម​ជន​រង​គ្រោះ​ហ្នឹង គេ​ប្ដឹង​ទារ​សំណង​រដ្ឋប្បវេណី​ ដែរ​ណា។ អ៊ីចឹង នេះ​វា​ជា​មេរៀន​ថ្មី​មួយ ដែល​យើង​បាន​ដឹង​ បន្ទាប់​ពី​ការ​ប្ដឹង​ទាមទារ​ បន្ទាប់​ពី​របប​ខ្មែរ​ក្រហម»

សង្គម​ស៊ីវិល ពិនិត្យ​ឃើញ​ថា ការអនុវត្ត​ច្បាប់ ​លើ​ឧកញ៉ា គិត ធាង មាន​លក្ខណៈ​ស្តង់ដារ​​ពីរ​ តាំង​ពី​ដើម​មក។ ពលរដ្ឋ​មាន​ឈ្មោះ​ក្នុង​ញត្តិ​ថា ពួក​គេ​សង្ឃឹម​ថា រដ្ឋ​មន្ត្រី​ក្រសួង​យុត្តិធម៌​ នឹង​​អន្តរាគមន៍​សើរើ​ ការ​សម្រេច​ក្ដី​​ លើ​ឧកញ៉ា គិត ធាង ឡើង​វិញ នៅ​​ពេល​បាន​ទទួល​ញត្តិ​ប្រជាពលរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល