ក្រសួង​អប់រំ​រៀបចំ​ទិវា​អំណាន​រយៈ​ពេល​ ៣ថ្ងៃ​លើក​កម្ពស់​ការ​អាន​នៅ​កម្ពុជា

ដោយ មួង ណារ៉េត
2019.03.09
សៀវភៅ សៀវភៅ​ចម្រុះ ដាក់​តាំង​ពិព័រណ៍​នៅ​ថ្ងៃ​ដែល​ក្រសួង​អប់រំ​រៀបចំ​ទិវា​អំណាន​រយៈ​ពេល ៣ថ្ងៃ​ចាប់​ពី​ថ្ងៃ​ទី៩ ដល់​ថ្ងៃ​ទី១១ ខែ​មីនា ដើម្បី​លើក​កម្ពស់​ការ​អាន​នៅ​កម្ពុជា។
រូបថត៖ ហ្វេសប៊ុក​ក្រសួង​អប់រំ យុវជន និង​​កីឡា

ក្រសួង​អប់រំ​បាន​រៀបចំ ​ទិវា​អំណាន លើក​ទី៤​ រយៈពេល ៣ថ្ងៃ ចាប់​ពី​ថ្ងៃ​ទី៩ ដល់​ថ្ងៃ​ទី១១ ខែ​មីនា ឆ្នាំ២០១៩ នៅ​វិទ្យាស្ថាន​បច្ចេកវិទ្យា​កម្ពុជា។ ទិវា​អំណាន​លើក​នេះ​ រៀបចំ​ឡើង​ក្រោម​ប្រធានបទ "ការ​អាន​បណ្ដុះ​វប្បធម៌​សិក្សា​ពេញ​មួយ​ជីវិត"

ក្រសួង​អប់រំ​ថា​ប្រធានបទ​ សម្រាប់​ទិវា​អំណាន​ឆ្នាំ​នេះ ​គឺ​ឆ្លុះ​បញ្ចាំង​ថា ​ការ​អាន​ពិត​ជា​មាន​សារៈសំខាន់​ក្នុង​ការ​ពង្រីក​ចំណេះ​ដឹង​បង្កើន​សមត្ថភាព។ ទិវា​អំណាន​លើក​ទី៤ ត្រូវ​បាន​រៀបចំ​ឡើង​នៅ​វិទ្យាស្ថាន​បច្ចេកវិទ្យា​កម្ពុជា ​ដើម្បី​ដាក់​តាំង​បង្ហាញ​នូវ​សៀវភៅ​ជា​ច្រើន​ប្រភេទ​សម្រាប់​លក់ ​និង​ចែក​ជូន​មិន​គិត​ថ្លៃ​ដល់​អ្នក​ចូល។

លោក ហង់​ ជួន​ណា​រ៉ុន រដ្ឋមន្ត្រី​ក្រសួង​អប់រំ​ថ្លែង​នៅ​ក្នុង​ពិធី​បើក​កម្មវិធី​ទិវា​អំណាន​នេះ​ថា ដើម្បី​លើក​កម្ពស់​ការ​អាន​នៅ​កម្ពុជា និង​ទាក់ទាញ​អ្នក​អាន​ជា​ភាសា​ខ្មែរ​ឱ្យ​ចាប់​អារម្មណ៍​ការ​អាន​សៀវភៅ​ជា​ភាសា​ខ្មែរ ក្រសួង​បាន​បង្កើត​ការ​ប្រឡង​ប្រជែង​ការ​តែង​និពន្ធ ដើម្បី​ជ្រើសរើស​អត្ថបទ​អក្សរ​សិល្ប​ល្អៗ ព្រោះ​អត្ថ​បទ​ឆ្នើមៗ ដែល​ជា​ផ្នែក​មួយ​ជួយ​លើក​កម្ពស់​ការ​អាន​បាន​ខ្លាំង។ លោក​រដ្ឋមន្ត្រី​ក្រសួង​ អះអាង​ថា ប្រសិនបើ​យុវជន​មិន​ចេះ​ភាសាជាតិ​ខ្លួន​ និង​មិន​មាន​ការ​លើក​ទឹក​ចិត្ត​ឱ្យ​មាន​ការ​ប្រឡង​តែង​និពន្ធ​ជា​ភាសា​ជាតិ​ទេ វា​នឹង​ធ្វើ​ឱ្យ​ភាសា​ជាតិ​បាត់បង់​ ហើយ​ថែម​ទាំង​ធ្វើ​ឱ្យ​យុវជន​មិន​ស្គាល់​ពី​អត្តសញ្ញាណ​ជាតិ និង​ប្រទេស​ខ្លួន​ច្បាស់​ទៀត​ផង៖ «បើ​សិន​យុវជន​ខ្មែរ​យើង​អត់​ចេះ​ភាសា​ជាតិ​យើង អ៊ីចឹង​យើង​អាច​បាត់​បង​មិន​ស្គាល់​ពី​អត្តសញ្ញាណ​ជាតិ និង​ប្រទេស​ខ្លួន​ឯង​ឱ្យ​ច្បាស់​អ៊ីចឹង​ហើយ​ភាសា​ជាតិ​សំខាន់»

ក្រសួង​អប់រំ​បាន​រៀបចំ​ទិវា​ជាតិ​អំណាន​កាលពី​ឆ្នាំ២០១៥ ដោយ​កំណត់​យក​ថ្ងៃ​ទី១១ ខែ​មីនា ជា​ថ្ងៃ​ប្រារព្ធ​ទិវា​ជាតិ​អំណាន​ជា​រៀងរាល់​ឆ្នាំ។ ទិវា​ជាតិ​អំណាន​ឆ្នាំ​នេះ​គេ​សង្កេត​ឃើញ​ថា មាន​យុវជន​ ចូលរួម​ច្រើន។

នាយក​ប្រតិបត្តិ​សម្ព័ន្ធ​គណនេយ្យ​ភាព​សង្គម​កម្ពុជា​លោក​ សន​ ជ័យ​ ដែល​ធ្វើ​ការងារ​ទាក់ទង​វិស័យ​អប់រំ​ដែរ​នោះ​សង្កេត​ឃើញ​ថា​ ខណៈ​វិស័យ​បច្ចេកវិទ្យា​រីក​ចម្រើន​យុវជន​មួយ​ចំនួន​ហាក់​ចំណាយ​ពេល​អាន​នៅ​លើ​ឧបករណ៍​អេឡិចត្រូនិក ឬ​ប្រព័ន្ធ​បណ្ដាញ​សង្គម។ ប៉ុន្តែ​ឯកសារ​សំ​ខាន់ៗ ឬ​សៀវភៅ​ល្អ​ភាគ​ច្រើន​មិន​ទាន់​បាន​បញ្ចូល​ទៅ​ក្នុង​ប្រព័ន្ធ​នេះ​នៅ​ឡើយ​ទេ។ មន្ត្រី​សង្គម​ស៊ីវិល​រូប​នេះ​យល់ថា​ អ្នក​ពាក់ព័ន្ធ​គួរ​មាន​យន្តការ​ផ្សព្វផ្សាយ​ការ​អាន​បន្ថែម​ទៀត​។លោក​ លើកឡើង​ទៀត​ថា​ក្រសួង​អប់រំ​គួរ​រៀបចំ​ឱ្យ​មាន​បណ្ណាល័យ​តាំង​ពី​ថ្នាក់​បឋម​មក៖ «នៅ​ពេល​ការ​អាន​ក្លាយ​ជា​ទម្លាប់​មួយ​របស់​មនុស្ស ហើយ​ជំនាន់​ក្រោយ​ត​ទៅ​ទៀត បើ​សិន​ឪពុក​ម្ដាយ​ជា​ទម្លាប់​អាន​ពេល​នោះ ក្មេង​ជំនាន់​ក្រោយ ក៏​អាច​នឹង​រៀន​ពី​ទម្លាប់​នោះ​ដែរ»

អនុក្រឹត្យ​ចុះ​ថ្ងៃ​ទី១៤ ខែ​កញ្ញា​ ឆ្នាំ២០១៥​ បញ្ជាក់​ថា​ ទិវា​ជាតិ​អំណាន​ប្រារព្ធ​ឡើង​ក្នុង​គោល​បំណង​ចូលរួម​កាត់​បន្ថយ​អនក្ខរភាព​ដោយ​លើក​ទឹក​ចិត្ត​ឱ្យ​សិស្សានុសិស្ស​និស្សិត​ និង​ប្រជាពលរដ្ឋ​បណ្ដុះ​ទម្លាប់​អាន​ជំរុញ​វប្បធម៌​អាន​លើក​កម្ពស់​សមត្ថភាព​អាន​ និង​ការ​តែង​និពន្ធ​ សំដៅ​រួម​ចំណែក​ការពារ​និង​ពង្រឹង​វប្បធម៌​អរិយធម៌​ខ្មែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។