ភាគី​ថៅកែ​រោងចក្រ​កាត់ដេរ​ថា ការ​បញ្ឈប់​កម្មករ​រោងចក្រ W&D ចំនួន ១២៧នាក់ គឺ​ត្រឹមត្រូវ​តាម​ផ្លូវ​​ច្បាប់ ព្រោះ​ជា​ក្រុម​ញុះញង់

ដោយ ហេង រស្មី
2019.03.11
រោងចក្រ W & D 031019 លោក ខេន លូ Ken Loo (ខាង​ឆ្វេងដៃ) អគ្គលេខាធិការ និង​លោក កាំង ម៉ូនីកា (អាវ​ខ្មៅ) អគ្គលេខាធិការ​រង​​សមាគម​រោងចក្រ​កាត់ដេរ និង​លោក ជីមមី ហ៊្សូ Jimmy Hsu (អាវ​ស) នាយក​គ្រប់គ្រង​ទូទៅ​របស់​ក្រុមហ៊ុន W&D (អាវ​ស) ធ្វើ​សន្និសីទ​សារព័ត៌មាន នៅ​ព្រឹក​ថ្ងៃ​ទី១០ ខែ​មីនា ឆ្នាំ២០១៩ រឿង​បញ្ឈប់​កម្មករ ១២៧នាក់។
Screenshot

សមាគម​រោងចក្រ​កាត់ដេរ​នៅ​កម្ពុជា ឬ​គេ​ស្គាល់​ថា ជា​សមាគម​ថៅកែ នៅ​ព្រឹក​ថ្ងៃ​ទី​១០ មីនា ធ្វើ​សន្និសីទ​សារព័ត៌មាន​ ដើម្បី​បង្ហាញ ​ភាព​ត្រឹម​ត្រូវ​នៃ​ផ្លូវ​ច្បាប់ ​ក្នុង​ការ​​បញ្ឈប់​កម្មករ​រោងចក្រ​ ដាប់​ប៊ែល​យូរ អែនឌី (W&D (cambodia)Co.Ltd) នៅ​ខណ្ឌ​មានជ័យ ចំនួន​ ១២៧​នាក់ ភ្លាមៗ ដោយ​គ្មាន​សំណង​អតីត​ភាព​ការងារ។ តំណាង​កម្មករ​​បដិសេធ​ថា គ្មាន​កម្មករ​ណា​ម្នាក់​​​ប្រព្រឹត្តិ​ខុស​នីតិវិធី​ផ្លូវ​ច្បាប់​​​ទេ តែ​ជា​លេស​របស់​ថៅកែ​ ដោយសារ​គ្មាន​ឥវ៉ាន់​ឲ្យ​កម្មករ​ដេរ និង​ចង់​គេចវេះ​មិន​សង​ប្រាក់​អតីត​ភាព​ឲ្យ​កម្មករ។

ភាគី​សមាគម​រោងចក្រ​កាត់ដេរ​នៅ​កម្ពុជា (GMAC) អះអាង ថា មាន​ភស្តុតាង​គ្រប់គ្រាន់​ក្នុង​ការ​សំអាង​ថា ការ​បញ្ឈប់​កម្មករ​ ១២៧នាក់​ នៅ​រោងចក្រ W&D គឺ​ជា​រឿង​ត្រឹមត្រូវ​តាម​ផ្លូវ​ច្បាប់ ក្រោម​ហេតុ​ផល​ថា​កម្មករ​​ប្រព្រឹត្ត​កំហុស​ធ្ងន់ធ្ងរ មិន​អនុវត្ត​តាម​ដីកា​សម្រេច​ចាត់ចែង​បណ្ដោះ​អាសន្ន ចុះ​ថ្ងៃ​ទី២ ខែ​មករា របស់​សាលា​ដំបូង​រាជធានី​ភ្នំពេញ និង​សេចក្ដី​សម្រេច​​​របស់​ក្រុម​ប្រឹក្សា​អាជ្ញា​កណ្ដាល។

អគ្គលេខាធិការ​រង​នៃ​សមាគម​រោងចក្រ​កាត់ដេរ លោក កាំង មូនីកា លើក​ឡើង​ក្នុង​សន្និសីទ​សារព័ត៌មាន​ នៅ​ស្នាក់​ការ​តំបន់​សេដ្ឋកិច្ច​ពិសេស​រាជធានី​ភ្នំពេញ​ថា ការ​បញ្ឈប់​កម្មករ​និយោជិក​ដែល​មិន​ចូល​ធ្វើការ គឺ​ធ្វើ​តាម​នីតិវិធី​ត្រឹម​ត្រូវ ព្រោះ​នៅ​ដំណាក់​កាល​ ក្រុម​​ប្រឹក្សា​អាជ្ញា​កណ្ដាល គឺ​ កម្មករ​ដែល​​​ធ្វើ​កូដកម្ម​ខុស​នីតិវិធី​ទាំង​នោះ មិន​ព្រម​ចូល​ធ្វើការ​តាម​សេចក្ដី​បង្គាប់​របស់​ក្រុម​ប្រឹក្សា​អាជ្ញា​កណ្ដាល ដែល​ឈាន​ដល់​ការ​ស្នើសុំ​ដីកា​រក្សា​ការពារ​ពី​តុលាការ។ នីតិវិធី​នៅ​តុលាការ គឺ​ក្រោយ​ពី​ទទួល​បាន​ដីកា រក្សា​ការពារ​​ កម្មករ​និយោជិក​នៅ​តែ​បន្ត​កូដកម្ម​មិន​ព្រម​ចូល​ធ្វើការ​ដែល​ការ​ប្រព្រឹត្ត​ដូច្នេះ​ត្រូវ​ចាត់​ទុក​ជា​កំហុស​ធ្ងន់។ ដូច្នេះ កម្មករ​​​ភាគ​តិច រោងចក្រ​​ទទួល​យក​ចូល​ធ្វើការ​វិញ​ទេ ហើយ​ពួកគេ​​ក៏​មិន​ទទួល​បាន​ប្រាក់​អតីត​ភាព​ ឬ​ប្រាក់​អត្ថ​ប្រយោជន៍​អ្វី ក្រៅ​ពី​ប្រាក់​ខែ​ចុង​ក្រោយ​ឡើយ។ តែ​ពួកគេ​ អាច​ដាក់​ពាក្យ​សុំ​ចូល​ធ្វើការ​វិញ ក្នុង​ឋានៈ​ជា​កម្មករ​ថ្មី គ្មាន​អតីត​ភាព៖ «ក្រោម​មូលហេតុ​កំហុស​ធ្ងន់​ នៃ​ច្បាប់​ស្ដីពី​ការងារ​ដោយ​ហេតុ​ថា គាត់ (កម្មករ) មិន​បាន​អនុវត្ត​តាម​ដីកា​រក្សា​របស់​តុលាការ​ទេ។ អ៊ីចឹង​ ការ​បញ្ឈប់​នេះ គឺ​បញ្ឈប់​ក្រោម​មូលហេតុ​កំហុស​ធ្ងន់។ អ៊ីចឹង ជា​មូលដ្ឋាន​ច្បាប់​ ការ​បញ្ឈប់​ក្រោម​មូលហេតុ​​កំហុស​ធ្ងន់ គឺ​បងប្អូន​ទាំង​អស់​ហ្នឹង មិន​បាន​ទទួល​សំណង់​​​៥​ចំណុច ជា​ធម្មតា​ដូច​ការ​បញ្ឈប់​ដោយ​មិន​សម​ហេតុផល​ពី​ភាគី​និយោជក​ទេ។ អ៊ីចឹង អ្វី​ដែល​គាត់ (កម្មករ) ទទួល​បាន​ចុង​ក្រោយ​គេ​នោះ គឺ​មាន​តែ​ប្រាក់​បៀវត្សរ៍​ចុង​ក្រោយ និង​ប្រាក់​ឈប់​សម្រាក​ប្រចាំ​ឆ្នាំ​ ដែល​នៅ​សេសសល់ ប្រសិន​បើ​នៅ​មាន។ អ៊ីចឹង ​មាន​តែ​២​ចំណុច​នេះ​ទេ។ ការ​លើក​ឡើង​ថា គាត់​ត្រូវ​ទទួល​បាន​៥​ចំណុច​នោះ ជា​ការ​លើក​ឡើង​មិន​ត្រឹមត្រូវ​តាម​មូលដ្ឋាន​ច្បាប់​ទេ»

វិវាទ​ការងារ​រវាង​ថៅកែ និង​ កម្មករ​​ចំនួន ១២៧​នាក់ នៅ​រោងចក្រ W&D បន្ត​អូស​បន្លាយ​ជាង​៣​ខែ​មក​នេះ​ ដោយសារ​ថៅកែ​រក្សា​ជំហរ​មិន​ទទួល​កម្មករ​ទាំង​នោះ​ ចូល​ធ្វើការ​វិញ ដោយ​ចោទ​ថា ជា​ក្រុម​ញុះញង់​ឲ្យ​កម្មករ​ជិត ២ពាន់ (.៧២៩) នាក់​ ឲ្យ​ទាមទារ​ប្រាក់​អតីត​ភាព​ការងារ​មុន​ឆ្នាំ២០១៩។ រោង​ចក្រ​នេះ មាន​កម្មករ​សរុប​ជាង ១.៨០០នាក់ មាន​ថៅកែ ជា​ជន​ជាតិ​ចិន និង​ផលិត​ម៉ាក​​ខោរ​អាវ​ល្បីៗ ដូចជា ម៉ាក 511, CARRAT និង​ម៉ាក​មិនសូវ​ល្បឺ​ឈ្មោះ M&S។ ចំណែក​ម៉ាក H&M រោងចក្រ​នេះ មាន​ទទួល​ផលិត​យូរៗ ម្ដង។

តំណាង​កម្មករ​ម្នាក់ ក្នុង​ចំណោម​អ្នក​តំណាង ៦នាក់​របស់​កម្មករ​រោងចក្រ W&D លោក ផាន់ សាមុត ​បដិសេធ​ថា កម្មករ​មិន​ដែល​ធ្វើ​ខុស​នីតិវិធី​ម្ដង​ណា​ទេ គឺ​តែង​អនុវត្ត​តាម​សេចក្ដី​សម្រេច និង​សេចក្ដី​បង្គាប់​របស់​អាជ្ញាធរ​មាន​សមត្ថកិច្ច​ជា​និច្ច។ ប៉ុន្តែ​លោក​ថា សមាគម​រោងចក្រ​កាត់ដេរ មាន​ចិត្ត​ចង់​ឈ្នះ​ និង​រើស​អើង ចំពោះ​កម្មករ​​ទាំង ១២៧នាក់ ទើប​កម្មករ​ជិត ១ពាន់​នាក់​ផ្សេង​ទៀត មិន​ព្រម​ចូល​ធ្វើការ​ និង​បន្ត ធ្វើ​កូដកម្ម​ទាមទារ​ឲ្យ​ទទួល​យក​កម្មករ ១២៧នាក់​ចូល​ធ្វើការ​វិញ៖ «មិន​មែន​កម្មករ​ធ្វើ​កូដកម្ម​ទេ គឺ​ជា​រោងចក្រ​ធ្វើ​កូដកម្ម​ទៅ​វិញ ព្រោះ​អ្វី អត់មាន​ឥវ៉ាន់​ឲ្យ​កម្មករ​ធ្វើ​ រួច​ហើយ​ទៅ​ថត​កន្លែង​គ្មាន​ឥវ៉ាន់ ហើយ​ទម្លាក់​កំហុស​មក​កម្មករ»

កម្មករ​ទាមទារ​​សុំ​ជួប​ចរចា​ផ្ទាល់​ជាមួយ​ភាគី​ថៅកែ​រោងចក្រ W&D។ តែ​អគ្គ​លេខាធិការ​សមាគម​រោងចក្រ​កាត់ដេរ លោក ខេន លូ អះអាង​ថា ភាគី​ថៅកែ​ និង​សមាគម​រោងចក្រ សម្រេច​យក​ការ​ដោះស្រាយ​តាម​ផ្លូវ​តុលាការ មិន​ចរចា​ទេ។ ​

អ្នក​សម្រប​សម្រួល​មជ្ឈមណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស ហៅ​កាត់​​អង្គការ សង់ត្រាល់ (CENTRAL) លោក ឃុន ថារ៉ូ យល់​ថា បើ​ភាគី​ទាំង​ពីរ​នៅ​តែ​ទាញ​ហេតុផល​យក​ឈ្នះ​រៀង​ខ្លួន​បែប​នេះ ជម្លោះ​មិន​អាច​​ចប់​​ទេ។ ដំណោះស្រាយ​ដែល​ល្អ សម្រាប់​ករណី​វិវាទ​នៅ​រោងចក្រ​W&Dនេះ សង្គម​ស៊ីវិល​យល់​ថា គួរ​រក​វិធី​សម្របសម្រួល​ក្រៅ​ប្រព័ន្ធ​តុលាការ ព្រោះ​ផ្អែក​តាម​បទ​ពិសោធន៍​កន្លង​មក វិវាទ​ការងារ មិន​អាច​​​បញ្ចប់​ដោយ​ដីកា ឬ​សាលដីកា​តុលាការ​បាន​ទេ ព្រោះ​​​បើ​ទោះ​និយោជក ឬ​ថៅកែ អាច​ឈ្នះ​ក្ដី​នៅ​តុលាការ​ ប៉ុន្តែ​កម្មករ​នៅ​តែ​​មាន​សិទ្ធិ​​​​​តវ៉ា ព្រោះ​នេះ​ជា​សិទ្ធិ​មូលដ្ឋាន​របស់​កម្មករ។ ដូច្នេះ​ ថៅកែ​មិន​អាច​បិទ​សិទ្ធិ​កម្មករ​ឲ្យ​ឈប់​តវ៉ា​បាន​ទេ ហើយ​ជម្លោះ​នៅ​តែ​អូស​បន្លាយ៖ «ខ្ញុំ​គិត​​ថា បើ​សិន​ជា​យើង​មិន​ដោះ​ស្រាយ​​​ទេ រឿង​ហ្នឹង​វា​កាន់​តែ​ផ្ទុះ​ទៅ ហើយ​វា​ចេះ​តែ​យូរ​ទៅៗ អ៊ីចឹង ខ្ញុំ​គិត​ថា វា​ត្រូវ​តែ​មាន​ដំណោះស្រាយ​ណាមួយ ​ដែល​អាច​ទទួល​យក​បាន​ទាំង​សង​ខាង ហើយ​ខ្ញុំ​គិត​ថា គ្រាន់​តែ​ក្របខ័ណ្ឌ (រោងចក្រ) ទទួល​យក​ចូល​ធ្វើការ​ងារ​វិញ មិន​បញ្ហា​ទេ។ សំខាន់​ថា ​តើ​ចេតនា​របស់​និយោជក​ហ្នឹង គាត់​ចង់​បញ្ចប់​ករណី​វិវាទ​ហ្នឹង ឬ​ក៏​គាត់​នៅ​តែ​បន្ត​​ឲ្យ​វា​រីក​រាល​ដាល​ធំ​ទៅ»

ជាង ២ខែ​ (ថ្ងៃ​ទី២៦ ខែ​ធ្នូ ឆ្នាំ២០១៨ ដល់​ថ្ងៃ​ទី១០ ខែ​មីនា ឆ្នាំ២០១៩) មក​នេះ ក្រៅពី​ធ្វើ​​កូដកម្ម​មុខ​រោងចក្រ W&D តាម​បណ្ដោយ​ផ្លូវ ៣៧១​ ឬ​ផ្លូវ​ទំនប់​បឹង​ទំពុន ​នៅ​ភូមិ​ឫស្សី សង្កាត់​ស្ទឹង​មានជ័យ ក្រុម​កម្មករ​បាន​នាំ​គ្នា​ដង្ហែ​ញត្តិ​​ដាក់​តាម​ស្ថាប័ន​រដ្ឋ និង​មាន​ការ​សម្រប​សម្រួល​ពី​អាជ្ញាធរ​មូលដ្ឋាន​ដែរ​ ក៏​ប៉ុន្តែ​មិន​ទាន់​មាន​ដំណោះស្រាយ​ទេ។ ក្រុម​កម្មករ​ ថា ពួកគេ​កំពុង​រង់​ចាំ​​ដំណោះ​ស្រាយ​ពី​មន្ត្រី​ខុទ្ទកាល័យ​ លោក​នាយក​រដ្ឋមន្ត្រី​ ហ៊ុន សែន។ ប៉ុន្តែ​​រយៈ​ពេល​ប៉ុន្មាន​ថ្ងៃ​ទៀត ប្រសិន​គ្មាន​ដំណោះ​ស្រាយ ហើយ​បន្ត​ឲ្យ​កម្មករ​រង់​ចាំ​ទៀត កម្មករ​មាន​គម្រោង​ដើរ​​ហែ​ញត្តិ​ យក​ទៅ​ជូន​ក្រុម​មេធាវី​​ជួយ​ជន​ក្រីក្រ​របស់​លោក ហ៊ុន សែន ដែល​ទើប​បង្កើត​ថ្មី ឲ្យ​ជួយ​ព្រោះ​ខាង​ភាគី​ថៅកែ​រក្សា​ជំហរ​មិន​ចរចា ទាមទារ​បញ្ចប់​រឿង​​តាម​ផ្លូវ​តុលាការ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
សង្គម
កម្ពុជា​នឹង​បើក​ការដ្ឋាន​សាងសង់​ព្រែកជីក​ហ្វូណន នៅ​ចំ​ថ្ងៃ​ខួបកំណើត​លោក ហ៊ុន សែន ៥ សីហា
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។