ក្រុម​អ្នក​លេង​ហ្វេសប៊ុក​ចាត់​ទុក​សាលក្រម​ផ្ដន្ទាទោស​លោក អះម៉ាត់ យ៉ះយ៉ា និង​ក្មួយ​ប្រុស​ថា អយុត្តិធម៌

ដោយ ទីន ហ្សាការីយ៉ា
2019-08-15
អ៊ីម៉ែល
មតិ
Share
បោះពុម្ព
រដ្ឋលេខាធិការ​ក្រ​សួង​សង្គមកិច្ច លោក អះម៉ាត់ យ៉ះយ៉ា មក​ចូល​រួម​ស្ដាប់​ការ​ប្រកាស​សាលក្រម​​នា​​សាលា​ដំបូង​រាជធានី​ភ្នំពេញ នៅ​ថ្ងៃ​ទី​១៥ ខែ​ឧសភា ឆ្នាំ​២០១៦។
រដ្ឋលេខាធិការ​ក្រ​សួង​សង្គមកិច្ច លោក អះម៉ាត់ យ៉ះយ៉ា មក​ចូល​រួម​ស្ដាប់​ការ​ប្រកាស​សាលក្រម​​នា​​សាលា​ដំបូង​រាជធានី​ភ្នំពេញ នៅ​ថ្ងៃ​ទី​១៥ ខែ​ឧសភា ឆ្នាំ​២០១៦។
RFA/Yang Chandara

ក្រុម​អ្នក​លេង​ហ្វេសប៊ុក បាន​សរសេរ​នៅ​ក្នុង​បណ្ដាញ​សង្គម​ពី​មួយ​ទៅ​មួយ​ថា ពួក​គេ​នឹង​នាំ​គ្នា​ធ្វើ​បាតុកម្ម​ទាមទារ​ឲ្យ​ដោះ​លែង​លោក អះម៉ាត់ យ៉ះយ៉ា និង​ក្មួយ​របស់​លោក​វិញ ដោយ​អះអាង​ថា​ សំណុំ​រឿង​ផ្ដន្ទាទោស​លោក​ទាំង​ពីរ ជា​រឿង​អយុត្តិធម៌។ លោក អះម៉ាត់ យ៉ះយ៉ា អះអាង​ថា អ្នក​ដែល​រៀបចំ​គម្រោង​ចាប់​លោក​ដាក់​ពន្ធនាគារ​នេះ គឺ​ក្មួយ​ជីដូន​មួយ​របស់​លោក ដោយ​សារ​តែ​លោក និង​ពលរដ្ឋ​ជំទាស់​នឹង​គម្រោង​ចង់​ធ្វើ​ផ្លូវ​ពុះ​ដី​វិហារ​បឹង​កក់។

. ក្រុម​អ្នក​លេង​ហ្វេសប៊ុក និង​អតីត​និស្សិត អំពាវនាវ​ឲ្យ​ធ្វើ​បាតុកម្ម​ទាមទារ​ឲ្យ​ដោះ​លែង លោក អះម៉ាត់ យ៉ះយ៉ា និង​ក្មួយ​ប្រុស

សំណុំរឿង​ផ្ដន្ទាទោស លោក អះម៉ាត់ យ៉ះយ៉ា អតីត​រដ្ឋលេខាធិការ​ក្រសួង​សង្គមកិច្ច និង​ក្មួយ​របស់​លោក​ឲ្យ​ជាប់​ពន្ធនាគារ​ចំនួន ១៥ឆ្នាំ​នោះ គឺ​ជា​ប្រធាន​បទ​មួយ​ដែល​ក្រុម​អ្នក​លេង​ហ្វេសប៊ុក​យក​មក​ជជែក ហើយ​សម្ដែង​ការ​មិន​ពេញ​ចិត្ត​ចំពោះ​សាលក្រម​នេះ និង​ចាត់​ទុក​ថា ជា​រឿង​អយុត្តិធម៌។

ក្រុម​អ្នក​លេង​ហ្វេសប៊ុក​ទាំង​នោះ សម្ដែង​ការ​សោក​ស្ដាយ និង​អំពាវនាវ​ឲ្យ​អតីត​និស្សិត​ដែល​លោក អះម៉ាត់ យ៉ះយ៉ា ធ្លាប់​បាន​ផ្ដល់​អាហារូបករណ៍​សិក្សា​នៅ​សាកល​វិទ្យាល័យ​ជាង ១ពាន់​នាក់​នោះ ឲ្យ​រួបរួម​គ្នា​ចេញ​មុខ នាំ​គ្នា​តវ៉ា​ប្រឆាំង​សាលក្រម នេះ និង​ទាមទារ​ឲ្យ​ដោះ​លែង លោក អះម៉ាត់ យ៉ះយ៉ា និង​ក្មួយ​របស់​លោក គឺ​លោក អ៊ីសា ពិនអ៊ីស្មាឯល វិញ។

ហ្វេសប៊ុក​ឈ្មោះ សឡេះ សឡះ (Sles Slas Cambodia) សេរសរ​ថា និស្សិត​ជាង ១.០០០នាក់​ធ្លាប់​ទទួល​បាន​អាហារូបករណ៍ ពី​លោក អះម៉ាត់ យ៉ះយ៉ា ហើយ​ពួក​គេ​មាន​ការងារ និង​ជីវភាព​រស់​នៅ​សមរម្យ​នា​ពេល​បច្ចុប្បន្ន។ សូម​ឱ្យ​យុត្តិធម៌​មាន​ចំពោះ​គាត់​ផង។ ហ្វេសហ៊ុក​ឈ្មោះ Nasy San សរសេរ​ថា យើង​គួរ​តែ​នាំ​គ្នា​ធ្វើ​បាតុកម្ម។ រី​ឯ​គណនី​ហ្វេសប៊ុក​ជា​ច្រើន​ទៀត បាន​សរសេរ​បួងសួង​សុំ​ពី​ព្រះ​ឲ្យ​ជួយ​ថែ​រក្សា​លោក អះម៉ាត់ យ៉ះយ៉ា វិញ ដោយ​ពួក​គេ​សរសេរ​ថា លោក អះម៉ះម៉ាត់ យ៉ះយ៉ា ជា​មនុស្ស​ល្អ សង្ឃឹម​ថា ព្រះអល់ឡោះ​នឹង​ជួយ​ថែ​រក្សា​លោក។ អ្នក​ខ្លះ​ទៀត​សរសេរ​ថា ត្រូវ​តែ​រក​យុត្តិធម៌។ អ្នក​ខ្លះ​ទៀត​ថា ទោះ​ជា​យ៉ាង​ណា​ក៏​លោក​ធ្លាប់​បម្រើ​ជាតិ​បម្រើ​ប្រជាជន ស្ទើរ​មួយ​ជីវិត​របស់​គាត់​ដែរ សូម​រក​យុត្តិធម៌​ឱ្យ​គាត់​ផង​នឹង​យោគយល់​ដល់​គាត់​ផង។ ខ្លះ​ទៀត​ថា ១.០០០នាក់ ចេញ​មក​បាតុកម្ម​ទើប​ទទួល​បាន​យុត្តិធម៌ កុំ​អង្គុយ​បន់​ព្រះ​អត់​បាន​ទេ។

អតីត​និស្សិត​ម្នាក់​ឈ្មោះ​ សុខ ក្រី ដែល​បាន​ចូល​រួម​ក្នុង​សវនាការ​នៅ​ថ្ងៃ​ទី១៣ សីហា​ ប្រាប់​​អាស៊ី​​សេរី​​ថា  តុលាការ​​មិន​​បាន​​បង្ហាញ​​ភស្តុតាង​​ណា​មួយ​​រឹងមាំ​មក​ដាក់​បន្ទុក​ទៅ​លើ​ជន​សង្ស័យ​ទាំង​ពីរ​​នោះ​ទេ។ លោក​បាន​ថ្លែង​ថា លោក អះម៉ាត់ យ៉ះយ៉ា​ ​​មិន​​ជាប់​​ពាក់ព័ន្ធ​​នឹង​​ករណី​​ជួញ​​ដូរ​​មនុស្ស​ទេ៖ «លោក​ អះម៉ាត់ យ៉ះយ៉ា​ មិន​មែន​សម្រាប់​ខ្លួន​ខ្ញុំ​ទេ​​ គឺ​សម្រាប់​​​ជនជាតិ​ចាម​នៅ​ទូទាំង​ប្រទេស​ទាំង​អស់​ គឺ​ចាត់​ទុក​គាត់​ជា​មនុស្ស​ល្អ​ដោយសារ​អី? ដោយសារ​គាត់​ជា​មនុស្ស​ដំបូង​គេ​បង្អស់​នៅ​ក្នុង​ប្រទេស​កម្ពុជា​ដែល​មាន​គំនិត​ផ្ដួចផ្ដើម​ដល់​កូន​ខ្មែរ​អ្នក​​កាន់​សាសនា​ឥស្លាម​ទាំង​អស់​បាន​រៀន​សូត្រ​ខាង​ចំណេះ​ដឹង​ទូទៅ ហើយ​សរុប​កូន​សិស្ស​ដែល​គាត់​ជួយ​ហ្នឹង​បាន​ជាង​ ១.០០០​នាក់​ហើយ គឺ​ឲ្យ​បណ្ដុះបណ្ដាល​ឱ្យ​ចប់​មាន​ការងារ​ធ្វើ​ល្អ​ អ្នក​ខ្លះ​​បាន​​ធ្វើ​ជា​ឯកឧត្ដម​អី​ច្រើន​ណាស់​ តាម​រយៈ​គាត់​ហ្នឹង»

. សាលក្រម​ផ្ដន្ទាទោស​ លោក អះម៉ាត់ យ៉ះយ៉ា និង​ក្មួយ​ប្រុស​កាល​ពី​ថ្ងៃ​ទី១៣សីហា

សាលាដំបូងរាជធានីភ្នំពេញកាលពីថ្ងៃទី១៣សីហា បាន​ផ្ដន្ទាទោស លោក អ៊ីស្មាឯល ពិន អូស្មាន បេក្ខជន​តំណាង​រាស្ត្រ​មិន​ជាប់​ឆ្នោត​គណបក្ស​សង្គ្រោះ​ជាតិ និង លោក អះម៉ាត់ យ៉ះយ៉ា អតីត​រដ្ឋលេខាធិការ​ក្រសួង​សង្គមកិច្ច ម្នាក់ ១៥ឆ្នាំ និង​​ពិន័យ​ជា​ប្រាក់​រួម​គ្នា​ចំនួន​ ២០០​លាន​រៀល​ ប្រមាណ​​​ ៥ម៉ឺនដុល្លា​ ទៅ​ឲ្យ​ដើមបណ្ដឹង​ពីរ​នាក់  តាមមាត្រា១១នៃច្បាប់ប្រឆាំងការជូញដូរមនុស្ស។ តុលាការ​ផ្ដន្ទាទោស លោក អះម៉ាត់ យ៉ះយ៉ា និង​ក្មួយ ហើយ​បញ្ជូន​ទៅ​ឃុំ​ខ្លួន​ក្នុង​ពន្ធនាគារ​នេះ នៅ​ចំ​ថ្ងៃ​ទី២ ថ្ងៃ​បុណ្យ​ហាជ្ជ ជា​បុណ្យ​ធំ​នៅ​ក្នុង​សាសនា​ឥស្លាម ដែល​សាសនិក​ឥស្លាម​នៅ​ទូទាំង​ពិភពលោក​កំពុង​តែ​ជូប​ជុំ​គ្នា​សប្បាយ​នៅ​តាម​ភូមិឋាន​នីមួយ​រៀងៗ ខ្លួន។

អ្នកនាំពាក្យ គណៈកម្មាធិការ​ជាតិ​ប្រយុទ្ធ​ប្រឆាំង​ការ​ជួញដូរ​មនុស្ស​កម្ពុជា លោក យឹម វីរៈ បញ្ជាក់​ថា គណៈកម្មាធិការ​របស់​លោក​មិន​ស៊ើប​អង្កេត​ទៅ​លើ​សំណុំ​រឿង​នេះ​ទេ ពី​ព្រោះ​ថា សំណុំ​រឿង​នេះ នគរបាល​យុត្តិធម៌ និង តុលាការ​បាន​ស៊ើប​អង្កេត និង​បាន​ជំនុំជម្រះ​រឿង​នេះ៖ «នីតិវិធី​របស់​តុលាការ​យើង​មិន​បាន​ពិនិត្យ​អី​វែង​ឆ្ងាយ​ទេ គ្រាន់​តែ​ថា យើង​នឹង​ពិនិត្យ​សំណុំ​រឿង​របស់​តុលាការ ហើយ​ភាគី​ណា​មិន​សុខ​ចិត្ត អាច​បន្ត​ប្ដឹង​ទៅ​ណា​នីតិវិធី​បាន»

ទោះ​​ជា​យ៉ាង​នេះ​ក្ដី លោក អះម៉ាត់ យ៉ះយ៉ា បញ្ជាក់​ថា ក្រុមហ៊ុន​របស់​លោក​មិន​បាន​ជួញដូរ​អ្វី​ឡើយ ពី​ព្រោះ​ថា ក្រុមហ៊ុន​របស់​លោក​មាន​អាជ្ញាប័ណ្ណ​ត្រឹម​ត្រូវ​ពី​ក្រសួង​ការងារ។ ហើយ​ក្រោយ​ពី​ក្រសួង​ការងារ​ផ្អាក​ក្រុមហ៊ុន​លោក​មិន​ឲ្យ​នាំ​ពលករ​ទៅ​ធ្វើ​ការងារ​នៅ​ក្រៅ​ប្រទេស​ក្រុមហ៊ុន លោក​ក៏​បញ្ឈប់​ការ​នាំ​ចេញ​ពលករ​ទៅ​ប្រទេស អារ៉ាប៊ី សាអូឌីត ដែរ នៅ​ក្នុង​ឆ្នាំ២០០៥ នោះ។

ហ្វេសប៊ុក​ខ្លះ​ទៀត​សរសេរ​ហាក់​បី​ដូច​ជា​ដឹង​រឿង លោក អះម៉ាត់ យ៉ះយ៉ា ត្រូវ​គេ​ប្រឌិត​ឡើង​ធ្វើ​បាប មិន​មែន​ជា​រឿង​អនុវត្តន៍​ច្បាប់ ដូច​ជា​ហ្វេសប៊ុក​ឈ្មោះ រ៉ូហ្វាតហ្វារីស សរសេរ​ថា ចង់​បាន​តំណែង​ខ្ពស់​បង្កើត​រឿង​អាក្រក់​ចោទ​ឱ្យ​អ្នក​ដទៃ​មាន​ទុក្ខ​ទោស ថ្ងៃ​ណា​មួយ អល់ឡោះ នឹង​ហ្ពឺនើរសើរ (ផ្ដន្ទាទោស) អ្នក​ឯង​វិញ​ពិត​ជា​មិន​ខាន។ សូម អល់ឡោះ ជួយ​ថែ​រក្សា​គាត់ (អះម៉ាត់ យ៉ះយ៉ា) ឱ្យ​បាន​ស្លាម៉ាត់ (សេចក្ដី​សុខ) ផង​ចុះ។ ហ្វេសប៊ុក​ឈ្មោះ រ៉ប៊ែរ ស្រែ​វាល សរសេរ​ថា ប្រហែល​ជា​ពួក​គាត់​គិត​ថា ការ​យក​ឈ្នះ ដោយ​អំពើ​អយុត្តិធម៌​នៅ​ទុនយ៉ា (លោកិយ) អល់ឡោះ នឹង​បញ្ចូល​ពួក​គាត់​ទៅ​ក្នុង​សួគ៌ា (ឋានសួគ៌) ហើយ​មើល​ទៅ?

.មូលហេតុ​នៅ​ពី​ក្រោយ​ខ្នង​នៃ​ការ​ចាប់​ខ្លួន លោក អះម៉ាត់ យ៉ះយ៉ា និង​ក្មួយ​ប្រុស​ដាក់​ពន្ធនាគារ

អតីត​រដ្ឋលេខាធិការ​ក្រសួង​សង្គមកិច្ច លោក អះម៉ាត់ យ៉ះយ៉ា បាន​ប្រាប់​អាស៊ី​សេរី​នៅ​មុន​ពេល​គេ​ចាប់​ខ្លួន​លោក​ថា  សំណុំ​រឿង​ចាប់​ខ្លួន​ក្មួយ​ប្រុស​លោក និង​ចោទ​លោក ពី​បទ​ជួញដូរ​មនុស្ស​នេះ គឺ​ជា​ការ​ប្រឌិត​ឡើង ដោយ​លោក ឧស្មាន ហាស្សាន់ ត្រូវ​ជា​ក្មួយ​ជីដូន​មួយ​របស់​លោក បច្ចុប្បន្ន​ជា​ទេស​រដ្ឋមន្រ្តី និង​ជា​រដ្ឋមន្ត្រី​ទទួល​បន្ទុក​បេសកកម្ម​ពិសេស។ លោក​ថា លោក ឧស្មាន់ ហាសាន់ ជា​អ្នក​នៅ​ពី​ក្រោយ​ខ្នង​ចង់​ចាប់​ខ្លួន​លោក ដោយសារ​តែ​លោក និង​ពលរដ្ឋ​ជា​ច្រើន​ទៀត ធ្លាប់​មាន​ទំនាស់​ជាមួយ​លោក អូស្មាន ហាស្សាន់ រឿង​មិន​គាំទ្រ​ការ​ពុះ​ដី​វិហារ​បឹង​កក់​ធ្វើ​ផ្លូវ។ លោក អះម៉ាត់ យ៉ះយ៉ា អះអាង​ថា លោក និង​ពលរដ្ឋ​មិន​ជំទាស់​លោក អូស្មាន ហាស្សាន់ ចង់​ធ្វើ​ផ្លូវ​ពុះ​ដី​វិហារ​បឹង​កក់​នោះ​ទេ ប៉ុន្តែ​លោក និង​ពលរដ្ឋ​ចង់​ឲ្យ​ធ្វើ​ផ្លូវ​វាង​របង​វិហារ ដោយ​សារ​វិហារ គឺ​ជា​កន្លែង​ប្រតិបត្តិ​សាសនា ហើយ​ចង់​រក្សា​ភាព​ស្ងប់ស្ងាត់៖ «រឿង​នេះ​តាម​ខ្ញុំ​ដឹង ឧស្មាន ហាស្សាន់ ធ្វើ​ផ្លូវ​អត់​បាន គឺ​គាត់​ខាត​ផលប្រយោជន៍ ដោយសារ​នៅ​ខាង​ឆ្វេង​ដៃ​ក្នុង​បរិវេណ​ដី​វិហារ​នោះ គឺ​ជា​ដី​មូលនិធិ​របស់​គាត់ ដែល​គាត់​សុំ​លុយ​អារ៉ាប់ ដើម្បី​មក​សង់​ខុនដូ ហើយ​គាត់​សង់​អត់​បាន គាត់​ប្រាប់​គេ​ថា គាត់​ខាត​រយ​លាន​ដុល្លារ»

នៅក្នុងឆ្នាំ២០១៦ លោក អះម៉ាត់ យ៉ះយ៉ា និង​ពលរដ្ឋ​រាប់​រយ​នាក់​ជំទាស់​ដាច់​ខាត ចំពោះ​គម្រោង​ពុះ​ផ្លូវ​វិហារ​អន្តរជាតិ​បឹង​កក់ ដែល​គាំទ្រ​ដោយ​លោក ឧស្មាន ហាស្សាន់ ត្រូវរ៉ូវ​គ្នា​ជាមួយ​ក្រុមហ៊ុន​ស៊ូកាគួ អភិវឌ្ឍន៍​តំបន់​បឹង​កក់ ហើយ​គម្រោង​ពុះ​ដី​វិហារ​នេះ មិន​ទទួល​បាន​ជោគជ័យ​ទេ​កាល​ណោះ ដោយ​សារ​តែ​កម្លាំង​មហា​ជន​បាតុកម្ម​ជំទាស់​នៅ​រៀង​រាល់​ថ្ងៃ​សុក្រ​ជា​ច្រើន​លើក។

លោក អះម៉ាត់ យ៉ះយ៉ា ក៏​សម្ដែង​ការ​ហួស​ចិត្ត​ដែរ ដែល​លោក អូស្មាន ហាសាន់ ត្រូវ​ជា​ក្មួយ​ជូន​ដី​មួយ​របស់​លោក​ដែរ តែ​បែរ​ជា​គុំកួន​លោក​ចង់​ធ្វើ​បាប​លោក​ដូច្នេះ។ លោក​បញ្ជាក់​ថា ករណី​នេះ គឺ​ជា​សាច់​ញាតិ​កូន​ក្មួយ​ខ្លួន​ឯង ដែល​ធ្វើ​បាប​លោក។ លើស​ពី​នេះ​ទៀត លោក​អះអាង​ថា លោក អ៊ីស្មាឯល ពិនអូស្មាន មិន​បាន​ធ្វើ​ការ​ឲ្យ​ក្រុមហ៊ុន​លោក​ដូច​ការ​ចោទ​ប្រកាន់​របស់​តុលាការ​ទេ៖ «ខ្ញុំ​អត់​ពេល​នេះ ឧស្មាន ហាស្សាន់ ជីវិត​គាត់​ខ្ញុំ​ជួយ​គាត់​ច្រើន​ណាស់ រឿង​អី​ពេល​នេះ គាត់​មក​ធ្វើ​បាប​មា​ខ្លួន​ឯង​វិញ? ហើយ​ម្ដាយ អ៊ីស្មាឯល ពិនអូស្មាន នោះ និង​ម្ដាយ​របស់ ឧស្មាន ហាស្សាន់ នោះ គឺ​ត្រូវ​ជា​បង​ប្អូន​បង្កើត រឿង​នេះ​ក្នុង​តែ​ពូជ​មួយ​ទេ»

ទេស​រដ្ឋមន្ត្រី និង​រដ្ឋមន្ត្រី​ទទួល​បន្ទុក​បេសកកម្ម​ពិសេស​លោក អូស្មាន់ ហាសាន់ មិន​ធ្វើ​អធិប្បាយ​ចំពោះ​ការ​ចោទ​ប្រកាន់​របស់​លោក អះម៉ាត់ យ៉ះយ៉ា នេះ​ទេ​ នៅ​ថ្ងៃ​ទី១៤ សីហា។ ប៉ុន្តែ​លោក​បាន​ប្រាប់​វិទ្យុ​វីអូឌី (VOD) យ៉ាង​ខ្លី​ថា សំណុំ​រឿង​នេះ​មិន​ជាប់​ទាក់ទង​លោក​ទេ​ គឺ​ជា​ការ​សម្រេច​របស់​តុលាការ លោក​គ្មាន​អី​ត្រូវ​ពន្យល់​ឡើយ។

. ភាព​មិន​ប្រក្រតី​នៅ​ក្នុង​ដំណើរ​ការ​នីតិវិធី​សវនាការ​ជំនុំជម្រះ​កាល​ពី​ថ្ងៃ​ទី១៣ សីហា

ភរិយា លោក អ៊ីស្មាឯល ពិនអូស្មាន គឺ​អ្នកស្រី នាគ កញ្ញា ឲ្យដឹងនៅថ្ងៃទី១៤សីហាថា អ្នក​ស្រី​បាន​ពឹង​ពាក់​មេធាវី​ឲ្យ​ដាក់​ពាក្យ​ប្ដឹង​ទៅ​សាលា​ឧទ្ធរណ៍​ឆាប់ៗ នេះ ជំទាស់​សាលា​ក្រម​សាលា​ដំបូង ដែល​បាន​ផ្ដន្ទាទោស​ស្វាមី​អ្នក​ស្រី​ធ្ងន់ធ្ងរ​ទាំង​គ្មាន​ភស្តុតាង​ច្បាស់លាស់។ អ្នក​ស្រី​បន្ថែម​ថា សំណុំ​រឿង​ផ្ដន្ទាទោស​ស្វាមី​របស់​អ្នក​ស្រី​នេះ គឺ​ជា​ការ​រៀបចំ​ឡើង ដើម្បី​ធ្វើ​បាប​ស្វាមី​របស់​អ្នក​ស្រី ពី​ព្រោះ​ថា ការ​សម្រេច​ផ្ដន្ទាទោស​របស់​តុលាការ ដោយ​យោង​លើ​ដើម​បណ្ដឹង​តែ​ម្នាក់ ហើយ​ដើម​បណ្ដឹង​នេះ និយាយ​ម្ដង​ស្គាល់​ស្វាមី​របស់​អ្នកស្រី ម្ដង​ថា​មិន​ស្គាល់ និង​ខុស​ពី​ចម្លើយ​ប្រាប់​ពី​ប៉ូលិស​តាំង​ពី​ដំបូង​ទៀត​ផង។ អ្នកស្រី​បន្ថែម​ថា ដើម​បណ្ដឹង​ទាំង​អស់​មាន​ពីរ​នាក់ តែ​ម្នាក់​ទៀត​ឈ្មោះ ឡោះ ណៈ បាន​ប្រាប់​មេធាវី​ស្វាមី​អ្នក​ស្រី​ថា គាត់​បាន​ដក​ពាក្យ​ប្ដឹង​វិញ​ហើយ៖ «រឿង​នេះ​អយុត្តិធម៌​សម្រាប់​ប្ដី​ខ្ញុំ​ណាស់ នៅ​ក្នុង​បន្ទប់​សវនាការ​ដើម​បណ្ដឹង​ឈ្មោះ អេង ពៅ នេះ គឺ​មាន​បុរស​ម្នាក់​អះអាង​ថា ជា​ប្ដី គឺ​និយាយ​ប្រាប់ អេង ពៅ ឲ្យ​និយាយ​តាម​ខ្លួន​ឆ្លើយ​ប្រាប់​តុលាការ រហូត​ដល់​មេធាវី​របស់​ស្វាមី​គាត់​ស្នើ​តុលាការ​ម្ដង​ជា​ពីរ​ដង​ឲ្យ​ចេញ​ពី​បន្ទប់​សវនាការ

នៅ​មុន​ពេល​សវនាការ​មួយ​ថ្ងៃ លោក អះម៉ាត់ យ៉ះយ៉ា ប្រាប់​អាស៊ី​សេរី​ថា ទាំង​រូប​លោក និង​មេធាវី​របស់​លោក មិន​ទទួល​បាន​លិខិត​កោះ​ហៅ​ពី​ចៅក្រម​ជំនុំជម្រះ ដើម្បី​ទៅ​ចូល​រួម​សវនាការ​ឡើយ ទោះ​ជា​យ៉ាង​នេះ​ក្ដី លោក និង​មេធាវី​សម្រេច​ទៅ​ចូល​រួម​សវនាការ​នេះ ដើម្បី​ទាមទារ​យុត្តិធម៌។ រី​ឯ​ភរិយា​លោក អ៊ីស្មាឯល ពិនអូស្មាន អះអាង​ដែរ​ថា អ្នកស្រី និង​មេធាវី​ស្វាមី​របស់​អ្នក​ស្រី​ក៏​មិន​បាន​ទទួល​លិខិត​កោះ​ហៅ​ពី​តុលាការ​ទៅ​ចូលរួម​សវនាការ​ដែរ តែ​អ្នក​ស្រី​ដឹង​តាម​រយៈ​សាក្សី​ម្នាក់​ប្រាប់​អំពី​ថ្ងៃ​នាំ​ស្វាមី​របស់​អ្នក​ស្រី​មក​បើក​សវនាការ​នេះ។ អ្នកស្រី​បន្ថែម​ថា សាក្សី​ដោះ​បន្ទុក​របស់​ស្វាមី​អ្នកស្រី​មាន​បី​នាក់ តែ​តុលាការ​កោះ​ហៅ​តែ​ម្នាក់​ប៉ុណ្ណោះ​មក​ចូល​រួម​ក្នុង​សវនាការ​នេះ។

ឆ្លើយ​តប​ការ​លើក​ឡើង​នេះ អ្នក​នាំ​ពាក្យ​អយ្យការ​អម​សាលា​ដំបូង​រាជ​ធានី​ភ្នំពេញ លោក គុជ គឹមឡុង ឲ្យ​ដឹង​យ៉ាង​ខ្លី​នៅ​ថ្ងៃ​ទី១៤ សីហា​ថា បើ​ភាគី​ជន​ជាប់​ចោទ​មិន​សុខ​ចិត្ត​នេះ​ទៅ​សាលា​ឧទ្ធរណ៍​បាន៖ «ជន សង្ស័យ​បើ​មិន​សុខ​ចិត្ត​អាច​បន្ត​នីតិវិធី​ប្ដឹង​ទាស់​ទៀត​បាន»

ទោះ​ជា​យ៉ាង​នេះ​ក្ដី នាយរង​ទទួល​បន្ទុក​ផ្នែក​ឃ្លាំ​មើល​ការ​រំលោភ​សិទ្ធិមនុស្ស លោក អំ សំអាត ឲ្យ​ដឹង​ថា តាម​មន្ត្រី​របស់​លោក​ទៅ​ឃ្លាំ​មើល​សវនាការ​នៅ​ថ្ងៃ​ទី១៣ សីហា ឃើញ​ថា សវនាការ​នេះ មាន​ភាព​មិន​ប្រក្រតី​មួយ​ចំនួន ដែល​ធ្វើ​ឲ្យ​មាន​ភាព​អយុត្តិធម៌​សម្រាប់​ជន​ជាប់​ចោទ​ទាំង​ពីរ​នេះ៖ «សាល​សវនាការ​ហ្នឹង ក្នុង​គម្រោង​សាល​ទី៥ វា​តូច ដោយសារ​ជាន់​រឿង​គ្នា គេ​ប្ដូរ​ទៅ​សាល​ទី១ វិញ ហាក់​បី​ដូច​ជា​គេ​មិន​ប្រកាស​ជា​សាធារណៈ​ឲ្យដឹ​ង​ជា​សាធារណៈ ទី២ ការ​ជជែក​ដេញ​ដោល​រក​ភស្ដុតាង​ហ្នឹង​មិន​មាន​អ្វី​គ្រប់គ្រាន់ ហើយ​ដើម​បណ្ដឹង​ហ្នឹង គឺ​មាន​អ្នក​បោះ​ប្រ៊ីយ៉ុង កឺ​មាន​អ្នក​ប្រាប់​ហើយ​ចាំ​ឆ្លើយ​តាម»

លោក អ៊ីស្មាអែល ពិនឧស្ម័ន ត្រូវ​ជា​ក្មួយ​បង្កើត​លោក អះម៉ាត់ យ៉ះយ៉ា និង​ជា​ប្អូន​ជី​ដូន​មួយ​លោក អូស្មាន ហាស្សាន់។ លោក ត្រូវ​​កម្លាំង​​នគរបាល នៃ​​នាយកដ្ឋាន​​ប្រឆាំង​​ការ​​ជួញ​ដូរ​​មនុស្ស និង​​ការពារ​​អនីតិជន ចាប់​ខ្លួន​កាល​ពី​ថ្ងៃ​ទី៩ ខែ​កុម្ភៈ ឆ្នាំ២០១៨ សង្ស័យ​​ថា ជាប់​ពាក់ព័ន្ធ​ករណី​នាំ​ពលករ​ទៅ​ធ្វើ​ការ​ខុស​ច្បាប់ នៅ​ប្រទេស ​អារ៉ាប់ប៊ី សាអូឌីត របស់​ក្រុមហ៊ុន លោក អះម៉ាត់ យ៉ះយ៉ា កាល​ពី​ជាង ១០ឆ្នាំ​មុន។ រី​ឯ​លោក អះម៉ាត់ យ៉ះយ៉ា ដែល​ត្រូវ​ជា​ឪពុក​មា​របស់​លោក អូស្មាន ហាស្សាន់ តុលាការចាប់ខ្លួននៅថ្ងៃទី១៣សីហា និង​បញ្ជូន​យក​ទៅ​ឃុំ​ខ្លួន​នៅ​ពន្ធនាគារ​ព្រៃ​ស​ភ្លាមៗ ក្រោយ​ពី​ប្រកាស​សាលា​ក្រម​នៅ​ក្នុង​បន្ទប់​សវនាការ ខណៈ​លោក​កំពុង​អង្គុយ​ស្ដាប់​សវនាការ​ក្នុង​សំណុំ​រឿង​ចោទ​ប្រកាន់​ក្មួយ​ប្រុស​របស់​លោក និង​រូប​លោក​ទាក់ទង​ការ​នាំ​ពលករ​ទៅ​ធ្វើការ​ប្រទេស​អារ៉ាប់ប៊ី សាអូឌីត ដែល​លោក​អះអាង​ថា លោក និង​ក្មួយ​ប្រុស​មិន​បាន​ប្រព្រឹត្ត​ខុស​ដូច​ការ​ចោទ​ប្រកាន់​របស់​តុលាការ​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល