អាណាព្យាបាល និងមន្ត្រីសង្គមស៊ីវិលមួយចំនួននាខេត្តព្រះសីហនុ បានរិះគន់សមត្ថកិច្ចជំនាញខេត្តព្រះសីហនុ ដែលគ្មានសមត្ថភាពបង្ក្រាបល្បែងភ្នាល់ជាច្រើនប្រភេទមានដូចជាជល់មាន់ ភ្នាល់បាល់ និងបនពេស្យាចារ ជាដើម កំពុងធ្វើសកម្មភាពរីកដូចផ្សិត។
ពលរដ្ឋចោទថា បទល្មើសល្បែងស៊ីសងគ្រប់ប្រភេទដែលកំពុងធ្វើសកម្មភាពនាខេត្តព្រះសីហនុ គឺមានជាប់ពាក់ព័ន្ធមន្ត្រីមានអំណាច ឬសមត្ថកិច្ចស្ថាប័នជំនាញខេត្តនេះជាអ្នកកាងការពារ។
សង្វៀនជល់មាន់ ទីតាំងចាក់ភ្នាល់បាល់ បនពេស្យាចារ និងសកម្មភាពលក់ ឬប្រើប្រាស់គ្រឿងញៀនជាដើម កំពុងបន្តធ្វើសកម្មភាពអនាធិបតេយ្យនាមូលដ្ឋានទេសចរណ៍ខេត្តព្រះសីហនុ ប៉ុន្តែមិនឃើញកម្លាំងសមត្ថកិច្ចកងរាជអាវុធហត្ថ សមត្ថកិច្ចនគរបាល និងថ្នាក់ដឹកនាំខេត្តព្រះសីហនុ ចាត់វិធានការបង្ក្រាបទេ។
អាណាព្យាបាលមិនបង្ហាញអត្តសញ្ញាណមួយចំនួននាខេត្តព្រះសីហនុ បានប្រាប់វិទ្យុអាស៊ីសេរី នៅថ្ងៃអង្គារ ទី១៧ ខែកុម្ភៈ ថា សព្វថ្ងៃនេះសង្វៀនជល់មាន់ដ៏ធំបានធ្វើសកម្មភាពទ្រង់ទ្រាយធំនៅក្នុងសង្កាត់លេខ៣ ឋិតនៅជាប់មជ្ឈមណ្ឌលដាយមិនស៊ី (Diamond Sea) ត្រង់អគារឌី (D) គឺមានទីតាំងនៅចំបេះដូងខេត្តព្រះសីហនុ ដោយចំហ។ ប្រជាពលរដ្ឋបានអះអាងថា សង្វៀនជល់មាន់ដ៏ធំនៅជាប់អគារដាយមិនស៊ី គឺមានលោកឧត្តមសេនីយ៍ឯក រស់ ទៀត មេបញ្ជាការរងនៃបញ្ជាការដ្ឋានកងទ័ពជើងគោកជាម្ចាស់សង្វៀន ឬជាអ្នកកាងការពារ។
ម្ចាស់ហ៊ុនម្នាក់នៃសង្វៀនជល់មាន់នេះថ្លែងថា សកម្មភាពរបស់ពួកគេមានច្បាប់ត្រឹមត្រូវពីទីស្ដីការគណៈរដ្ឋមន្ត្រី ឬក្រសួងមហាផ្ទៃ និងអាជ្ញាធរខេត្តព្រះសីហនុ ជាដើម។
ក្រៅពីបទល្មើសជល់មាន់ ប្រជាពលរដ្ឋក៏បានអះអាងថា ល្បែងភ្នាល់បាល់ជ្រកក្រោមស្លាកហាងកាហ្វេ បនពេស្យាចារជ្រកក្រោមស្លាកហាងម៉ាស្សាកោសជប់ និងសកម្មភាពប្រើប្រាស់ ឬជួញដូរគ្រឿងញៀន បានកើតមានគួរឲ្យព្រួយបារម្ភ៖ «ខ្ញុំសង្កេតឃើញសព្វថ្ងៃនេះនាខេត្តព្រះសីហនុ មានល្បែងស៊ីសងគ្រប់ប្រភេទមានដូចជា ជល់មាន់ គ្រឿងញៀន បៀអាប៉ោង បនពេស្យាចារ ពិសេសសង្វៀនជល់មាន់ គឺនៅចំកណ្ដាលក្រុង មានទីតាំងនៅជាប់អគារដាយមិនស៊ី ឬអគារជួលសម្រាប់ពិធីមង្គលការជាដើម។ ទីតាំងល្បែងភ្នាល់ ឬគ្រឿងញៀនទាំងនោះមាននៅតំបន់ទំនប់រលក ភូមិថ្មី នៅរោងមហោស្រពចាស់ តំបន់ភ្នំខៀវជាដើម»។
បញ្ហានេះ មន្ត្រីស៊ើបអង្កេតអង្គការលីកាដូ (Licadho) ខេត្តព្រះសីហនុ លោក ឃុន សាវឿន ក៏បានបង្ហាញក្តីព្រួយបារម្ភចំពោះទីតាំងនៃបនពេស្យាចារ សកម្មភាពប្រើប្រាស់ ឬលក់គ្រឿងញៀន ល្បែងភ្នាល់បាល់ ពិសេសសង្វៀនជល់មាន់ ជាដើម បានកើតមានច្រើនកន្លែងនាមូលដ្ឋាននេះ ប៉ុន្តែមិនឃើញមានកម្លាំងសមត្ថកិច្ចបង្ក្រាប។ លោកបន្តថា ទីតាំងប្រព្រឹត្តបទល្មើសទាំងនោះ សមត្ថកិច្ចមិនពិបាករកទេ បើមានឆន្ទៈចង់បង្ក្រាប ឬទប់ស្កាត់ពិតប្រាកដមែននោះ៖ «ពេលដែលប្រជាពលរដ្ឋរិះគន់ពីសកម្មភាពអសកម្មរបស់អាជ្ញាធររដ្ឋាភិបាលទាក់ទងបទល្មើសល្បែងស៊ីសងផ្សេងៗ ហើយអាជ្ញាធរមិនបង្ក្រាប ឬទប់ស្កាត់ភាពអសកម្មទាំងអស់នេះ នាំឲ្យប្រជាពលរដ្ឋអស់ជំនឿ និងលែងបោះឆ្នោតគាំទ្រគណបក្សប្រជាជនកម្ពុជា បន្តទៀតនាថ្ងៃអនាគត។ ហើយសកម្មភាពអសកម្មរបស់អាជ្ញាធរ បាននាំសំឡេងគាំទ្ររបស់ពលរដ្ឋនៅតាមមូលដ្ឋានទាំងមិនដឹងខ្លួន ដោយសារតែគិតថា ទង្វើរបស់ខ្លួនត្រឹមត្រូវ និងមិនស្តាប់ក្តីបារម្ភ ឬកង្វល់ពលរដ្ឋនៅតាមមូលដ្ឋានជាដើម»។
ទាំងមន្ត្រីសិទ្ធិមនុស្ស និងអាណាព្យាបាលសិស្ស បានចាត់ទុកសកម្មភាពរបស់មន្ត្រីជំនាញស្ថាប័នកងរាជអាវុធហត្ថ មន្ត្រីនគរបាល និងថ្នាក់ដឹកនាំខេត្តព្រះសីហនុ ហាក់មិនសូវយកចិត្តទុកដាក់អនុវត្តគោលនយោបាយភូមិឃុំមានសុវត្ថិភាពទាំង ៩ចំណុច ដែលលោកនាយករដ្ឋមន្ត្រី ហ៊ុន សែន បានឲ្យមានប្រសិទ្ធភាពទេ។
បញ្ហានេះ លោក ជិន សារិន អភិបាលក្រុងព្រះសីហនុ ខេត្តព្រះសីហនុ មានប្រសាសន៍ថា លោកទើបបានទទួលដំណឹងនៃសង្វៀនជល់មាន់នៅម្តុំមជ្ឈមណ្ឌលដាយមិនស៊ី បើកធ្វើសកម្មភាពក្នុងប៉ុន្មានថ្ងៃមកនេះ។ លោកថានឹងបញ្ជូនមន្ត្រីនគរបាលចុះពិនិត្យដល់ទីតាំងមានសកម្មភាពជល់មាន់ និងទីតាំងល្បែងភ្នាល់ដទៃទៀត ដើម្បីឈានដល់បើកយុទ្ធនាការបង្ក្រាបឲ្យមានប្រសិទ្ធភាព៖ «ខ្ញុំទើបបានទទួលដំណឹងនៃការជល់មាន់នៅជាប់អគារដាយមិនស៊ី ទេ។ បញ្ហានេះ ខ្ញុំនឹងឲ្យនគរបាលចុះពិនិត្យអំពីសកម្មភាពជល់មាន់ទាំងនេះ ដើម្បីឲ្យប្រាកដថាមានច្បាប់ទម្លាប់ត្រឹមត្រូវឬទេ?»។
ទាក់ទិនបញ្ហានេះ លោក ស៊ាង កុសល ស្នងការនគរបាលខេត្តព្រះសីហនុ ថ្លែងថា គ្មានបនល្បែងភ្នាល់ជល់មាន់ ឬទីតាំងភ្នាល់បាល់ និងបនពេស្យាចារជាដើម ត្រូវបានអាជ្ញាធរខេត្តនេះអនុញ្ញាតឲ្យធ្វើសកម្មភាពទេ។ លោកស្នងការរូបនេះបានច្រានចោលរាល់ការចោទ ដែលថាកម្លាំងនគរបាលបានជាប់ពាក់ព័ន្ធបទល្មើស ឬនៅពីក្រោយនៃបទល្មើសល្បែងភ្នាល់ផ្សេងៗ ដែលកំពុងកើតមាននៅខេត្តព្រះសីហនុ៖ «ខ្ញុំចេះតែឆ្ងល់ដែរ សង្វៀនជល់មាន់នេះ គឺបើកនៅចំកណ្ដាលហ្វូង ឬចំកណ្ដាលក្រុងតែម្តង ខ្លាចក្រែងគេមានច្បាប់ទម្លាប់ត្រឹមត្រូវ។ ប៉ុន្តែតាមលោកដឹងកន្លងមក គឺមិនដែលមានច្បាប់ជល់មាន់ទេ ប៉ុន្តែខ្លាចក្រែងលោទើបមានច្បាប់ជល់មាន់កើតឡើងថ្មីៗ ខ្ញុំអត់ដឹងដែរ ចាំខ្ញុំពិនិត្យមើលឡើងវិញ»។
ត្រង់ចំណុចនេះ លោកនាយឧត្តមសេនីយ៍ ខៀវ សុភ័គ មន្ត្រីនាំពាក្យក្រសួងមហាផ្ទៃ ថ្មីៗនេះបានផ្ញើសារក្រើនរំឭកជាថ្មីទៀតដល់ថ្នាក់ដឹកនាំតាមខេត្តនីមួយៗ ពិសេសសមត្ថកិច្ចនគរបាលនៅតាមមូលដ្ឋាន មានខេត្តព្រះសីហនុ ជាដើម ត្រូវបន្តចូលរួមអនុវត្តគោលនយោបាយភូមិឃុំមានសុវត្ថិភាពទាំង ៩ចំណុចរបស់លោកនាយករដ្ឋមន្ត្រី ហ៊ុន សែន ដាក់ចេញឲ្យមានប្រសិទ្ធភាព។ ជាងនេះទៀត លោកបានព្រមានដល់កងកម្លាំងសមត្ថកិច្ច មិនត្រូវជាប់ពាក់ព័ន្ធបទល្មើសផ្សេងៗ ឬក៏កាងការពារបទល្មើសល្បែងស៊ីសង មានល្បែងភ្នាល់បាល់ ឬល្បែងជល់មាន់ជាដើមទេ ព្រោះនឹងត្រូវផ្ដន្ទាទោស ឬទទួលពិន័យរបស់កងកម្លាំងធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។