កម្មកររោងសិប្បកម្មតម្បាញ ហុង ស៊ីង (Hong Xing) នៅខណ្ឌមានជ័យ រាជធានីភ្នំពេញ ឲ្យដឹងថា ក្រសួងការងារ ប្រាប់កម្មករថា ថៅកែជនជាតិចិន បានចូលខ្លួន ទៅសន្យាជាមួយមន្ត្រីក្រសួងការងារហើយ ថានឹងដោះស្រាយជូនកម្មករ នូវសំណងទាំងឡាយ។ កម្មការិនីម្នាក់ លោកស្រី ហ៊ឹម សុខរឿន ប្រាប់អាស៊ីសេរីថា មន្ត្រីក្រសួងការងារបានបន្តចុះជួបកម្មករនៅព្រឹកថ្ងៃទី២៤ ធ្នូ នៅមុខរោងសិប្បកម្ម ហើយប្រាប់កម្មករថា ថៅកែជនជាតិចិន ស្នើសុំបន្ត២ថ្ងៃទៀត ដើម្បីដោះស្រាយ។
ទោះជាយ៉ាងណា លោកស្រី ថា មន្ត្រីក្រសួងការងារ មិនបានបញ្ជាក់ថា ដំណោះស្រាយនោះ របៀបណាទេ ដោយគ្រាន់តែស្នើសុំឲ្យកម្មកររក្សាភាពស្ងប់ស្ងាត់ រង់ចាំ២ថ្ងៃទៀត។ លោកស្រី ថា កម្មករសុខចិត្តរង់ចាំ២ថ្ងៃទៀត ប៉ុន្តែទាមទារឲ្យក្រសួងដោះស្រាយឲ្យពិតប្រាកដ និងកុំសន្យា ដើម្បីពន្យារពេលតទៅទៀត ព្រោះកម្មករភាគច្រើន គ្មានលុយបង់ថ្លៃបន្ទប់ជួល ថ្លៃបង់សាលាឲ្យកូន និងថ្លៃម្ហូបអាហារទេ។ លោកស្រីបញ្ជាក់ថា កម្មករខ្លះ បានវេចចាន ឆ្នាំង មុង ភួយ ពីផ្ទះជួល យកទៅដាំបាយហូប និងស្នាក់នៅមុខសិប្បកម្ម បណ្ដើរៗ ហើយ។
អាស៊ីសេរី មិនអាចសុំការបញ្ជាក់ពីអគ្គលេខាធិការរង នៃអគ្គលេខាធិការដ្ឋាន នៃគណៈកម្មការសម្រាប់ដោះស្រាយបញ្ហាកូដកម្មបាតុកម្ម នៅតាមគ្រប់មុខសញ្ញា និងជាអ្នកនាំពាក្យក្រសួងការងារ លោក ទេស រុក្ខាផល បានទេនៅថ្ងៃទី២៤ ធ្នូ ដោយសារលោក មិនទទួលទូរស័ព្ទ។
កម្មករសិប្បកម្មតម្បាញ ហុង ស៊ីង ចំនួន ១៩០នាក់ បានប្រមូលផ្ដុំគ្នាតវ៉ា និងដេកយាមលើចិញ្ចើមផ្លូវមុខរោងសិប្បកម្មទាំងថ្ងៃទាំងយប់ តាំងពីថ្ងៃទី៩ ធ្នូមក ដោយសារថៅកែជនជាតិចិន បានចាក់សោទ្វាររបងសិប្បកម្មទុកចោល ដោយមិនដឹងទៅណា និងមិនបានបើកប្រាក់ឈ្នួលឱ្យគ្រប់ចំនួន ព្រមទាំងមិនទាន់បានទូទាត់ប្រាក់សំណងអតីតភាព ប្រាក់បំណាច់ និងអត្ថប្រយោជន៍ផ្សេងទៀតជូនកម្មករនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។