រដ្ឋបាលខេត្តព្រះសីហនុបញ្ជាឲ្យមន្ត្រីចុះស្រង់ស្ថិតិ និងតម្លៃបន្ទប់ជួលតាមផ្ទះសំណាក់សណ្ឋាគារ
2018.11.29
អភិបាលខេត្តព្រះសីហនុ លោក យន្ត មីន (រូបកណ្ដាល) ចូលរួមសម្ពោធទីស្នាក់ការសម្ព័ន្ធសមាគមសហគ្រាសធុនតូច និងមធ្យមកម្ពុជា សាខាខេត្តព្រះសីហនុ កាលពីថ្ងៃទី៥ ខែមីនា ឆ្នាំ២០១៧។
RFA
រដ្ឋបាលខេត្តព្រះសីហនុ បញ្ជាឲ្យមន្ត្រីចុះស្រង់ស្ថិតិ និងតម្លៃបន្ទប់ជួលតាមសណ្ឋាគារ ផ្ទះសំណាក់ បឹងហ្គាឡូ និងរីហ្សត (Resort) នានា ក្នុងខេត្តព្រះសីហនុ ក្រោយរងការរិះគន់តាមបណ្ដាញសង្គមហ្វេសប៊ុក ថា បន្ទប់ជួលស្នាក់នៅ បានឡើងថ្លៃខ្លាំង នៅខណៈដែលម្ចាស់អាជីវកម្មភាគច្រើន ជាជនជាតិចិន។ សង្គមស៊ីវិលខេត្តព្រះសីហនុចង់ឃើញ អាជ្ញាធរ និងម្ចាស់អាជីវកម្ម បើកកិច្ចប្រជុំរកដំណោះស្រាយរួមគ្នា ក្រោយស្រង់តម្លៃរួច។
អភិបាលរងខេត្តព្រះសីហនុ លោក ហៀក ហ៊ីមុល្លី កាលពីថ្ងៃទី២៨ វិច្ឆិកា បានចេញលិខិតបង្គាប់ឲ្យមន្ត្រីខេត្តចុះស្រង់ស្ថិតិ និងតម្លៃបន្ទប់របស់សណ្ឋាគារ ផ្ទះសំណាក់ បឹងហ្គាឡូ និងរីហ្សត ចាប់ពីថ្ងៃទី២៨ វិច្ឆិកា ដល់ថ្ងៃទី៣១ ធ្នូ ហើយត្រូវធ្វើរបាយការណ៍លទ្ធផល ដាក់ជូនគណៈអភិបាលខេត្ត ដើម្បីពិនិត្យ និងសម្រេច។
អ្នកសម្របសម្រួលសមាគមសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ជាប សុធារី ឲ្យដឹងថា មូលហេតុដែលធ្វើឲ្យតម្លៃបន្ទប់ជួល ឡើងថ្លៃខ្លាំង នៅមួយរយៈចុងក្រោយនេះ ដោយសារតែ ម្ចាស់អាជីវកម្មផ្ទះសំណាក់ភាគច្រើន បានជួលផ្ទះបន្តពីគេ ដើម្បីយកមកធ្វើអាជីវកម្ម និងអាចដោយសារ ការឡើងថ្លៃភាស៊ី បង់ឲ្យមន្ត្រី៖ «អ៊ីចឹងយើងក៏មិនដឹងថា វិធានការរបស់អាជ្ញាធរ នឹងបានជជែកជាមួយ និងអ្នកពាក់ព័ន្ធផ្សេងទៀតនឹង កម្រិតណា? ក្នុងការទប់ទល់ក្នុងការតម្លើងថ្លៃ មិនមែនថាតម្លើងថ្លៃទេ វាថ្លៃហ្មងនៃថ្លៃសេវាដែលគាត់ទទួលបន្តពីគេមកវាថ្លៃដែរ។ ហីបើសិនជា អ្នកដែលគាត់បានផ្សាយតាមប្រព័ន្ធសង្គមថាគាត់មានផ្ទះ មានបន្ទប់ជួល ថ្លៃ ប៉ុណ្ណេះ ប៉ុណ្ណោះ នឹង អាហ្នឹង គាត់មានផ្ទះរបស់គាត់អត់ទាន់មានធ្វើអាជីវកម្មជួលទៅឲ្យជនជាតិចិននៅឡើយទេ។ និយាយទៅខ្ញុំនៅកំពង់សោមមានបន្ទប់ជួល៣០ដុល្លារ ថ្ងៃធម្មតា មាន ប៉ុន្តែវាមានចំនួនតិចណាស់ គេមិនអាចផ្ដល់ឲ្យបានគ្រប់គ្រាន់ទេ។ បើភ្ញៀវគាត់មិនស្គាល់ ពួកគាត់មិនអាចរកបាននោះទេ»។
សង្គមស៊ីវិលរូបនេះ ឲ្យដឹងថា ស្ថានភាពខេត្តព្រះសីហនុបានប្រែប្រួលខ្លាំង ក្រោយវត្តមានជនជាតិចិន ប្រមូលផ្ដុំគ្នាយ៉ាងច្រើនកុះករ នៅខេត្តទេសចរណ៍ជាប់សមុទ្រមួយនេះ។ អ្នកប្រើប្រាស់បណ្ដាញសង្គមហ្វេសប៊ុក ប៉ុន្មានថ្ងៃមកនេះ បាននាំគ្នាបង្ហោះវីដេអូ (Post) និងចែករំលែក (Share)ព័ត៌មាន នៃការឡើងថ្លៃបន្ទប់ជួល តាមសណ្ឋាគារ និងផ្ទះសំណាក់ ក្នុងខេត្តព្រះសីហនុ។ ពួកគេរអ៊ូ ថា មិនហ៊ាន និងមិនចង់ទៅលេងខេត្តទេសចរណ៍ មួយនេះទៀតទេ ដោយសារ អាជីវកម្មទាំងអស់ស្ទើរគ្រប់គ្រងដោយជនជាតិចិនទាំងស្រុងនិងមានតម្លៃថ្លៃមិនធ្លាប់មានហើយថ្លៃជាងតំបន់ទេសចរណ៍ ផ្សេងៗ។
ប៉ុន្ដែ ក៏មានក្រុមមន្ត្រី និងអ្នកប្រើប្រាស់ហ្វេសប៊ុកខ្លះ ជំរុញ និងលើកទឹកចិត្តឲ្យពលរដ្ឋទៅលេងខេត្តមួយនេះដែរ បើទោះជាទទួលស្គាល់ថា បន្ទប់ស្នាក់នៅមានតម្លៃថ្លៃក៏ដោយ។ អ្នកប្រើប្រាស់បណ្ដាញសង្គមខ្លះ បានឡកលើយ ឲ្យក្រុមអ្នករិះគន់ ការដំឡើងថ្លៃបន្ទប់ផ្ទះសំណាក់ហួសហេតុ ថា បើគ្មានលុយត្រឹម ១០០ដុល្លារ ជួលបន្ទប់មួយយប់សម្រាកទេ គួរ វេច កន្ទេល ទៅសម្រាកជាដើម។
ការិយាល័យអ្នកនាំពាក្យរបបក្រុងភ្នំពេញ កាលពីថ្ងៃទី២៧ វិច្ឆិកា បានចេញសេចក្ដីថ្លែងការណ៍ អះអាងថា របបមួយនេះ បានយកចិត្តទុកដាក់ខ្លាំង ចំពោះកង្វល់ពលរដ្ឋមួយចំនួន ដែលបានបង្ហាញអារម្មណ៍តាមបណ្ដាញសង្គមចំពោះហេតុការណ៍ កើតឡើងនៅក្រុងព្រះសីហនុ ដោយសង្ស័យថា មានការពាក់ព័ន្ធនឹងវត្តមានជនជាតិចិន។ អ្នកនាំពាក្យរបបក្រុងភ្នំពេញ បកស្រាយថា កំពុងចាត់វិធានការម៉ឺងម៉ាត់ ហើយអ្នកទេសចរណ៍បរទេស ត្រូវបានឃាត់ខ្លួនជាបន្តបន្ទាប់ និងចាប់បញ្ជូនត្រលប់ទៅវិញ មានគោលនយោបាយច្បាស់លាស់ មិនអនុញ្ញាតឲ្យមានការរើសអើងពូជសាសន៍ លើទឹកដីកម្ពុជា ជាដើម។ ប៉ុន្តែរបបនេះ នៅតែបន្តជំរុញ និងលើកទឹកចិត្ត ដល់វិនិយោគិនជាតិ អន្តរជាតិ និងភ្ញៀវទេសចរណ៍ឲ្យមកកម្សាន្តខេត្តទេសចរណ៍ មួយនេះ ឲ្យបានច្រើន។
អភិបាលខេត្តព្រះសីហនុ លោក យន្ដ មីន បដិសេធការរិះគន់ថា ខេត្តព្រះសីហនុ មិនមានបន្ទប់សមរម្យ តម្លៃត្រឹម២០ ឬ ៣០ដុល្លារ។ លោកបានផ្ដល់បទសម្ភាសន៍ឲ្យក្រុមអ្នកសារព័ត៌មាន ក្រោយកិច្ចប្រជុំ នៅព្រឹកថ្ងៃទី២៩ វិច្ឆិកា ថា ទទួលស្គាល់ ខេត្តទេសចរណ៍មួយនេះ មានការខ្វះខាត តែមន្ត្រីទាំងអស់កំពុងខិតខំដោះស្រាយបញ្ហាទាំងនោះ។ អភិបាលខេត្តរូបនេះអះអាងថា ខេត្តព្រះសីហនុ នៅតែមាន បន្ទប់ជួលស្នាក់នៅ មួយយប់ ចាប់ពីតម្លៃ១៥ដុល្លារ រហូតដល់១ពាន់ ដុល្លារ ហើយ លោកបញ្ជាក់មូលហេតុថា ការឡើងថ្លៃផ្ទះសំណាក់ ជាស្ថានភាពទីផ្សារសេរី៖ «អ៊ីចឹងចំពោះមុខខ្ញុំ សុំ សំណូមពរដល់បងប្អូន ប្រជាពលរដ្ឋយើងទី១ ភ្ញៀវបរទេស ភ្ញៀវក្នុងប្រទេសយើងគឺថាកុំចាត់ទុកខែត្រយើងថាវាអាក្រក់ ពេក កន្លងមកមានព័ត៌មានអត់ដល់ថ្នាក់អត់មានផ្ទះសំណាក់ដែលមានតម្លៃថោកអីទេ។ គឺថាមាន មានដែរតែយើងត្រូវខលទៅកក់ទុកមុន អ៊ីចឹងហើយយើងមើលវាមានអាថ្លៃ មានអាថោក យើងគួរចេះមើលថា វាថ្លៃ វាថោក តាមតម្លៃដែលយើងអាចទទួលយកមកស្នាក់នៅបាន។ ទី២ គឺម្ចាស់ស្រុក យើង ដែលជាម្ចាស់អាជីវកម្ម ពលរដ្ឋអ្នកភ្នំពេញ អ្នកសៀមរាប យើងត្រូវតែមើល នេះជាឪកាសមាស ឪកាសពេជ្រហើយ យើងកំពុងខ្វះបន្ទប់ដេក អ៊ីចឹងវាឡើងថ្លៃដោយដារការខ្វះ បន្ទប់ដេក បើយើងមកសាងសង់ឲ្យវាគ្រប់វានឹងលែងថ្លៃហើយវាមិនអញ្ចឹង រដ្ឋបាលយើងគិតអ៊ីចឹង ហើយយើងមានការលើកទឹកចិត្តអោយពលរដ្ឋយើងមកធ្វើការវិនិយោគថែមទៀត»។
អ្នកសម្របសម្រួលសមាគមអាដហុកខេត្តព្រះសីហនុ អ្នកស្រី ជាប សុធារី ទទួលស្គាល់ថា ពិតជាមានបន្ទប់ជួលផ្ទះសំណាក់ខ្លះ តម្លៃជួលប្រហែល៣០ ឬ ៤០ដុល្លារមែន ដោយសារ ជាផ្ទះផ្ទាល់ខ្លួនរបស់ម្ចាស់អាជីវកម្ម ប៉ុន្ដែមិនអាចមានចំនួនគ្រប់គ្រាន់ និងអ្នកទេសចរណ៍ថ្មីថ្មោង មិនងាយស្រួលរកទេ។ សង្គមស៊ីវិលប្រចាំខេត្តព្រះសីហនុរូបនេះ យល់ថា គួរប្រញាប់បញ្ចប់ការស្រង់ស្ថិតិ និងតម្លៃបន្ទប់ស្នាក់នៅឲ្យបានលឿន ហើយគ្រប់ភាគីពាក់ព័ន្ធ ត្រូវមានការប្រជុំគ្នា ដើម្បីជជែក និងព្រមព្រៀងគ្នា លើតម្លៃបន្ទប់ឲ្យបានសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
