លោក ហ៊ុន ម៉ាណែត បញ្ជាឱ្យអភិបាលខេត្តទូទាំងប្រទេសចាត់វិធានការតឹងរ៉ឹងលើក្មេងទំនើង
2024.05.24
លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងកិច្ចប្រជុំឧត្ដមក្រុមប្រឹក្សាពិគ្រោះ និងផ្តល់យោបល់ នៅវិមានសន្តិភាព កាលពីថ្ងៃទី២៤ ឧសភា ២០២៤។
រូប៖ ហ្វេសប៊ុកលោក ហ៊ុន ម៉ាណែត
លោកនាយករដ្ឋមន្ត្រី ហ៊ុន ម៉ាណែត បញ្ជាឱ្យអភិបាលខេត្តនៅទូទាំងប្រទេសចាត់វិធានការ ទប់ស្កាត់ក្មេងទំនើង។ អ្នកឃ្លាំមើលថា បញ្ហាក្មេងទំនើងកើនឡើង ដោយសារតែមានបញ្ហានៅក្នុងប្រព័ន្ធអប់រំ និងឥទ្ធិពលការផ្សព្វផ្សាយគ្រឿងស្រវឹងកើនឡើង។
បច្ចុប្បន្ននេះ បញ្ហាក្មេងទំនើងដេញកាប់ចាក់គ្នាតាមដងផ្លូវ និងទីប្រជុំបង្កភាពអនាធិបតេយ្យកំពុងកើនឡើង។ ការណ៍នេះ បង្កជាក្ដីបារម្ភដល់ការរស់នៅរបស់ពលរដ្ឋ។ រីឯ រដ្ឋាភិបាល បើទោះជាបានដាក់ចេញគោលនយោបាយ ភូមិឃុំមានសុវត្ថិភាព ដើម្បីទប់ស្កាត់ ករណីចោរកម្ម និងក្មេងទំនើង ហើយក្ដី តែការអនុវត្តជាក់ស្តែងហាក់ពុំមានប្រសិទ្ធភាពនោះឡើយ។
ថ្លែងនៅក្នុងពិធីប្រកាសដាក់ឱ្យអនុវត្តជាផ្លូវការផែនទី បង្ហាញផ្លូវឆ្ពោះទៅការគ្របដណ្ដប់សុខភាពជាសកលឆ្នាំ២០២៤-២០៣៥ នៅថ្ងៃទី២៣ ខែឧសភា លោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យអភិបាលខេត្តទូទាំងប្រទេស រួមនឹងសមត្ថកិច្ច ត្រូវទប់ស្កាត់បញ្ហាក្មេងទំនើងឱ្យបានតឹងរ៉ឹង។ លោក ហ៊ុន ម៉ាណែត បានទទួលស្គាល់ថា បញ្ហាក្មេងទំនើង កំពុងកើនឡើង នៅទីក្រុងភ្នំពេញ បង្កជាក្ដីភ័យខ្លាច ដល់ការរស់នៅរបស់ពលរដ្ឋនាពេលបច្ចុប្បន្ន។
រយៈពេល៥ខែ ចុងក្រោយនេះ ស្នងការដ្ឋាននគរបាលរាជធានីភ្នំពេញ បានបង្ក្រាបក្រុមក្មេងទំនើង ជាង៣០០ករណី (៣៣៧) និង ឃាត់ខ្លួនជិត៨០០នាក់ (៧៨៨នាក់) ហើយបាន បញ្ជូនទៅ តុលាការ ជាង ២០០ ករណី (២៤១) ។ នៅក្នុងសំណុំរឿងក្មេងទំនើងទាំងនោះ ភាគច្រើន ពាក់ព័ន្ធ ការប្រើអំពើហិង្សា ចោរកម្ម និងបង្ហោះម៉ូតូ នៅតាមដងផ្លូវ ដែលធ្វើឱ្យប៉ះពាល់ដល់សណ្ដាប់ធ្នាប់សាធារណៈ។
រីឯ អ្នកឃ្លាំមើលលើកឡើងថា បញ្ហាក្មេងទំនើងកើតមានជាហូរហែនេះដោយសារតែឥទ្ធិពល គ្រឿងញៀន និងគ្រឿងស្រវឹង ដែលកំពុងពង្វក់ស្មារតីយុវជនស្ទើររាល់ថ្ងៃ ចំណែក អាជ្ញាធរពាក់ព័ន្ធ ហាក់ពុំទប់ស្កាត់ឱ្យមានប្រសិទ្ធភាពនៅឡើយ។ រីឯ ប្រព័ន្ធអប់រំវិញ ត្រូវបានគេសង្កេតឃើញថា គុណភាពអប់រំនៅមានកម្រិត។
ទាក់ទិនរឿងនេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង ប្រាប់វិទ្យុអាស៊ីសេរី នៅថ្ងៃទី២៣ ខែឧសភា ថា ជាការល្អដែលរដ្ឋាភិបាល ទប់ស្កាត់ បញ្ហាក្មេងទំនើង។ ក៏ប៉ុន្តែ លោកថា បញ្ហាពុំអាចដោះស្រាយបានយូរអង្វែងទេ ប្រសិនសិនបើរដ្ឋាភិបាល ពុំទប់ស្កាត់ឫសគល់បញ្ហា ដូចជា បញ្ហា គ្រឿងញៀន និងគ្រឿងស្រវឹង ដែលកំពុងពង្វក់ ស្មារតីយុវជនយ៉ាងខ្លាំងនាពេលបច្ចុប្បន្ន។
ក្រសួងមហាផ្ទៃបានចេញរបាយការណ៍ទូទាំងប្រទេសពាក់ព័ន្ធក្មេងទំនើង និងបញ្ហាគ្រឿងញៀន ចាប់ពីខែមេសា ដល់ខែឧសភា បានរកឃើញថា មានមនុស្សជាង២០០នាក់ (២៥៩នាក់) ត្រូវបានឃាត់ខ្លួន ពាក់ព័ន្ធបទល្មើសគ្រឿងញៀន ចំណែក ៨៥នាក់ ពាក់ព័ន្ធករណីក្មេងទំនើងដែលបានបង្កអសន្តិសុខ តាមរយៈការប្រើអំពើហិង្សា កាប់ចាក់ ដោយអ្នកទាំងនោះភាគច្រើន ប្រើប្រាស់គ្រឿងស្រវឹង។
មន្ត្រីសង្គមស៊ីវិល និងប្រជាពលរដ្ឋ សង្កេតឃើញថា ក្មេងទំនើង ភាគច្រើនប្រើប្រាស់គ្រឿងស្រវឹង និងគ្រឿងញៀន ហើយដើរលេងផឹកស៊ីសប្បាយ នៅពេលយប់ជ្រៅ បង្កការរំខាន ដល់ការរស់នៅ របស់ប្រជាពលរដ្ឋ។ មិនតែប៉ុណ្ណោះ ក្រុមក្មេងទំនើងទាំងនោះ បានលួច ទ្រព្យសម្បត្តិពលរដ្ឋ និងបង្កការខូចខាត សម្បត្តិសាធារណៈនានាផងដែរ។
បើទោះបីជា បញ្ហាទាំងនេះបានកើតមានជាហូរហែក្ដី តែ អ្នកឃ្លាំមើល បញ្ហាសង្គមលើកឡើងថា មន្ត្រីពាក់ព័ន្ធ ហាក់ពុំទប់ស្កាត់ឱ្យមានប្រសិទ្ធភាពនោះឡើយ។ ជាក់ស្ដែង ក្រៅពីជិះម៉ូតូដេញ កាប់ចាក់ គ្នាពេញកណ្ដាលទីក្រុងភ្នំពេញ ក្មេងទំនើងខ្លះ បានបើករថយន្តសេរ៊ីទំនើបៗប្រណាំងគ្នាសប្បាយនៅតាមដងផ្លូវ ខ្លះក្នុងស្ថានភាពស្រវឹង បង្កជាគ្រោះថ្នាក់ចរាចរណ៍ផ្តាច់ផ្តិលជីវិតអ្នកធ្វើដំណើរនៅតាមដងផ្លូវក៏មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
