ថៅកែចិនសម្រេចបើកប្រាក់ខែឱ្យក្រុមកម្មករសំណង់ធ្វើការក្នុងរមណីយដ្ឋានអូរស្មាច់ខេត្តឧត្តរមានជ័យ ក្រោយពីពួកគាត់បានប្រមូលម្ដុំគ្នាស្រែកតវ៉ានៅថ្ងៃទី១៨ ខែវិច្ឆិកា ទាមទារឱ្យថៅកែបើកប្រាក់ឈ្នួលដែលមិនបានបើកឱ្យក្រុមកម្មករ ២ខែចុងក្រោយនេះ។ មន្ត្រីសហជីពថា កម្មករសំណង់នៅតែរងគ្រោះជាបន្តបន្ទាប់ ដោយសារតែកង្វះការអនុវត្តច្បាប់លើក្រុមថៅកែទុច្ចរិត និងមិនសូវមានការគាំពារពីសំណាក់រដ្ឋាភិបាល។
ក្រុមកម្មករសំណង់ប្រមាណ ៣០០នាក់នៅរសៀលថ្ងៃទី១៨ ខែវិច្ឆិកា បានឈរតម្រង់ជួរនៅក្នុងការដ្ឋានសំណង់ជនជាតិចិននៅក្នុងរមណីយដ្ឋានអូរស្មាច់របស់លោក លី យ៉ុងផាត់ ដើម្បីទទួលលុយពីថៅកែចិន បន្ទាប់ពីថៅកែមិនបានបើកប្រាក់ឈ្នួលឱ្យក្នុងរយៈពេលជាង ២ខែចុងក្រោយនេះ។
ទោះជាយ៉ាងណា ក្រុមកម្មករឱ្យដឹងថា ដំណោះស្រាយរបស់ថៅកែចិនគឺបើកប្រាក់ឈ្នួលជូនកម្មករពាក់កណ្ដាលសិនប៉ុណ្ណោះ ពោលគឺថៅកែបើកជូនកម្មករសម្រាប់ខែកញ្ញា ចំណែកប្រាក់ឈ្នួលសម្រាប់ខែតុលាថៅកែអះអាងថា នឹងបើកជូនកម្មករនៅចុងខែវិច្ឆិកា។ ទន្ទឹមគ្នានេះ ក្នុងចំណោមកម្មករប្រមាណ ៣០០នាក់ អ្នកខ្លះនៅមិនទាន់ទទួលបានប្រាក់ឈ្នួលពីថៅកែនៅឡើយដែលធ្វើឱ្យពួកគាត់ជួបការលំបាកសេដ្ឋកិច្ចគ្រួសារ និងខ្វះថវិកាសម្រាប់ទិញម្ហូបចិញ្ចឹមជីវិត។
កម្មករម្នាក់គឺលោក គីន កុល ប្រាប់វិទ្យុអាស៊ីសេរីនៅថ្ងៃទី១៨ ខែវិច្ឆិកាថា មកដល់ពេលនេះលោកមិនទាន់ទទួលបានប្រាក់ឈ្នួលខ្លះពីថៅកែចិននៅឡើយ ដែលធ្វើឱ្យលោកជួបការលំបាកខ្លាំងក្នុងជីវភាពគ្រួសារ និងពុំមានប្រាក់បង់ធនាគារនោះទេ។ លោកបញ្ជាក់ថា រយៈពេលជិត ២ខែមកនេះ ថៅកែតែងព្យាយាមរកលេស និងពន្យារពេលបើកប្រាក់ខែឱ្យកម្មករ។
កម្មករដដែលឱ្យដឹងថា ការងារសំណង់នៅការដ្ឋានអូស្មាច់ទទួលបានប្រាក់ឈ្នួលពីថៅកែក្នុងមួយថ្ងៃម្នាក់ ៤ម៉ឺន ៥ពាន់រៀល ទៅ ៦ម៉ឺនរៀល តាមជំនាញផ្នែកកម្មករ និងមេជាង។
លោក គីន កុល៖«ជួនកាលអត់មានអីហូប ប៉ុន្តែពេលអត់មែនទែនទៅមេខ្ញុំក៏ទៅជឿអីវ៉ាន់គេឱ្យពួកខ្ញុំហូបអ៊ីចឹងទៅ ឱ្យខ្ចីលុយតិចតួចជួនកាល ១ម៉ឺនរៀល ២ម៉ឺនរៀល។ ក្រុមហ៊ុនចិនខ្ញុំអត់ដែលធ្វើទេ ទើបចូលកន្លែងនេះទេ ប្រាក់ខែយ៉ាប់បណ្ដោយ។ សំណូមពរសុំឱ្យដល់ថ្ងៃបើកលុយសុំឱ្យបើកទៀងទាត់មក កម្មករសុទ្ធតែអ្នកជំពាក់អង្គការនៅចាំគាត់ថ្ងៃនេះ ថ្ងៃនោះខ្ញុំលើសថ្ងៃ[បង់អង្គការ]ជិត ២០ថ្ងៃហើយ»។
រីឯ កម្មករម្នាក់ទៀតលោក វឹក រឿន ស្នើឱ្យភាគីថៅកែបើកប្រាក់ឈ្នួលឱ្យកម្មករតាមពេលវេលាកំណត់ ឬកន្លះខែបើកម្ដង ដើម្បីដោះស្រាយការលំបាករបស់កម្មករ។
លោក វឹក រឿន៖ « ខ្ញុំធ្វើបាន ៨ថ្ងៃបើកបាន ១រយ ៤១ដុល្លារ ( ១៤១ដុល្លារ ) ។ ខ្ញុំសុំស្នើប្រសិនបានកន្លះខែបើកល្អ យើងជំពាក់អង្គការវាប៉ះពាល់ដែរមកធ្វើការរកលុយបើយឺតយ៉ាវយើងពន្យារគេតាមហ្នឹងលុយឡើងតាមហ្នឹង »។
ចំណែក កម្មករម្នាក់ទៀតគឺលោកស្រី លឹម ផរ ឱ្យដឹងថា ការពន្យារពេលបើកប្រាក់ឈ្នួលរបស់ថៅកែនេះធ្វើឱ្យលោកស្រី និងកម្មករភាគច្រើនពុំសូវមានកម្លាំងកំហែងធ្វើការនោះទេ ដោយសារតែពុំមានប្រាក់ទិញម្ហូបអាហារហូបចុកគ្រប់គ្រាន់។ មកទល់ពេលនេះលោកស្រីក៏មិនទាន់ទទួលបានប្រាក់ឈ្នួលខ្លះពីសំណាក់ថៅកែចិននៅឡើយដែរ។
លោកស្រី លឹម ផរ៖«ដូចថា បានហូបពេលព្រឹកពេលល្ងាចអត់ ជួនកាលពេលថ្ងៃក៏អត់បាយទៅធ្វើការទាំងអត់បាយហ្នឹងឯង។ ពេលខ្ញុំអត់អ៊ីចឹងជំពាក់គេធ្វើការ ដើម្បីចង់បានលុយដល់ពេលគេអត់បើកលុយឱ្យមានតែដេកទ្រាំនៅអត់បាយអត់ទឹក។ បើយើងជំពាក់អង្គការមួយថ្ងៃគេខល(Call)មក ៤ ទៅ ១០ដងអ៊ីចឹង។ កូននៅផ្ទះអត់បាយអត់ទឹកទៅបើថា យកមកនេះក៏អត់អីហូបបើគេអត់បើកលុយឱ្យផង»។
វិទ្យុអាស៊ីសេរីមិនអាចទាក់ទងតំណាង និងមេការដ្ឋានសំណង់អគារជនជាតិចិននៅរមណីយដ្ឋានអូរស្មាច់ដើម្បីសាកសួរបន្ថែមបានទេ នៅថ្ងៃទី១៨ ខែវិច្ឆិកា។
ចំណែក អនុប្រធានមន្ទីរស្រាវជ្រាវ និងបង្ក្រាបបទល្មើសនៃបញ្ជាការដ្ឋានកងរាជអាវុធហត្ថខេត្តឧត្តរមានជ័យ លោក យ៉ាន សុខុម ប្រាប់ទ្យុអាស៊ីសេរីថា ភាគីថៅកែកំពុងរៀបចំនីតិវិធីដោះស្រាយបញ្ហាផ្ដល់ប្រាក់ឈ្នួលជូនកម្មករជាបន្តបន្ទាប់ហើយ។
ជុំវិញរឿងនេះ អគ្គលេខាធិការសហព័ន្ធសហជីពសំណង់ និងព្រៃឈើកម្ពុជាលោក យ៉ាន់ ធី លើកឡើងថា កម្មករផ្នែកវិស័យសំណង់នៅតែប្រឈមរងគ្រោះខ្ពស់ជាពិសេសភាគីថៅកែតែងព្យាយាមគេចវេះមិនបើកប្រាក់ឈ្នួលជូនកម្មករ ចំណែកឯ ការដ្ឋានខ្លះទៀតខ្វះការត្រួតពិនិត្យបច្ចេកទេស ដើម្បីធានាសុវត្ថិភាពកម្មករ។ លោកបញ្ជាក់ថា ការណ៍ដែលថៅកែមិនបានគោរពតាមកិច្ចសន្យាក្នុងការបើកប្រាក់ឈ្នួលជូនកម្មករបែបនេះ គឺជាការរំលោភសិទ្ធិកម្មករ ហើយរដ្ឋាភិបាលគួរតែណែនាំមន្ត្រីចុះអធិការកិច្ចត្រួតពិនិត្យ និងចាត់វិធានការលើបញ្ហានេះឱ្យមានប្រសិទ្ធភាព។
លោក យ៉ាន់ ធី៖«បងប្អូនជាកម្មករពួកគាត់ធ្វើការមួយថ្ងៃគឺពួកគាត់រស់មួយថ្ងៃ ពេលធ្វើការហើយអត់បើកប្រាក់ឈ្នួលឱ្យគាត់វាធ្វើឱ្យប៉ះពាល់ធ្ងន់ធ្ងរ ទាក់ទងអ្នកដែលពាក់ព័ន្ធគួរតែមានដំណោះស្រាយដូចជាខាងក្រុមហ៊ុន និងអាជ្ញាធររដ្ឋមានមន្ទីរការងារខេត្តអីហ្នឹងត្រូវធ្វើយ៉ាងណាដោះស្រាយបញ្ហាជូនពួកគាត់ឱ្យទទួលបានប្រាក់ឈ្នួលដែលគាត់បានបញ្ចេញកម្លាំងញើសឈាមរបស់ពួកគាត់ធ្វើការរួចហើយ»។
កម្មករសំណង់បម្រើការងារនៅការដ្ឋានថៅកែចិនក្នុងរមណីយដ្ឋានអូស្មាច់ភាគច្រើនជាអ្នកចំណាកស្រុកពីខេត្តផ្សេងៗ ក្នុងនោះក៏មានកូនកំព្រា និងស្ត្រីមេម៉ាយដែរ។ ក្រុមកម្មករលើកឡើងថា ព្រោះតែជីវភាពលំបាកពួកគាត់បានលះបង់ទាំងកម្លាំងកាយចិត្ត ធ្វើការងារហាលភ្លៀងហាលខ្យល់ក្រោមកម្ដៅថ្ងៃ ដូច្នេះអាជ្ញាធរគួរតែបង្កើនការដាក់សម្ពោធឱ្យថៅកែចិនជួយដោះស្រាយបញ្ហាប្រាក់ឈ្នួលជូនកម្មករឱ្យបានពេញលេញ និងគ្រប់ចំនួនដែលថៅកែជំពាក់កម្មករ ដើម្បីឱ្យកម្មករមានជំនឿ និងកម្លាំងចិត្តធ្វើការងារឱ្យថៅកែបន្តទៀត៕