ក្រសួង​ព័ត៌មាន​កំពុង​ចាត់វិធានការ​លើ​មន្ត្រី​ដែល​មិន​ទៅ​ធ្វើការ​ប៉ុន្តែ​ចាំ​បើក​ប្រាក់ខែ

ដោយ អាស៊ីសេរី
2019-05-26
អ៊ីម៉ែល
មតិ
Share
បោះពុម្ព
លោក ខៀវ កាញារិទ្ធិ រដ្ឋមន្ត្រីក្រសួងព័ត៌មាន
លោក ខៀវ កាញារិទ្ធិ រដ្ឋមន្ត្រីក្រសួងព័ត៌មាន
រូប៖ ក្រសួងព័ត៌មាន

មន្ត្រី​ជាន់ខ្ពស់​ក្រសួង​ព័ត៌មាន​អះអាង ក្រសួង​កំពុង​ចាត់វិធានការ​ដោយសារ​ស្រាវជ្រាវ​ឈ្មោះ​មន្ត្រី​អសកម្ម​មួយ​ចំនួន​ដែល​មិន​មក​ធ្វើ​ការងារ ប៉ុន្តែ​មាន​វត្តមាន​ពេល​បើក​ប្រាក់ខែ​។ អ្នកវិភាគ​យល់ថា ចំណាត់ការ​របស់​ក្រសួង​ព័ត៌មាន ប្រហែល​គ្មាន​ប្រសិទ្ធភាព​នោះ​ទេ។

អនុរដ្ឋលេខាធិការ និង​ជា​អ្នកនាំពាក្យ​ក្រសួង​ព័ត៌មាន​លោក មាស សុភ័ណ្ឌ ឱ្យ​ដឹង​ថា ពេលនេះ ស្ថាប័ន​របស់​លោក កំពុង​ពិនិត្យ​រកមើល​មន្ត្រី​ដែល​មក​បំពេញការងារ​ប្រចាំថ្ងៃ និង​មន្ត្រី​អសកម្ម​។ មន្ត្រី​ជាន់ខ្ពស់​ក្រសួង​ព័ត៌មាន​រូប​នេះ​ថា ក្រសួង​មិន​ទទួល​បាន​ប្រមូល​បាន​ឈ្មោះ​មន្ត្រី​អសកម្ម​ទូទាំង​ក្រសួង​នៅ​ឡើយ​ទេ ប៉ុន្តែ​លោក​ថា មន្ត្រី​អសកម្ម​នៅ​ក្រសួង​ព័ត៌មាន​មិន​សូវ​មាន​ច្រើន​នោះ​ទេ៖ «ដោយសារ​មន្ត្រី​ក្រសួង​ព័ត៌មាន​យើង​ខ្លះ​ទៅ​បំពេញ​ការងារ​នៅ​គោលដៅ​ទៅ​យក​ព័ត៌មាន​អីចឹង​ទៅ​បាន​ជា​មាន​ទស្សនៈ​មួយ​ចំនួន​ថា មន្ត្រី​មួយ​ចំនួន​មិន​បាន​មក​បំពេញ​ការងារ ប៉ុន្តែ​ដូច​ឯកឧត្ដម​រដ្ឋមន្ត្រី​លោក​បាន​បញ្ជាក់​អ៊ីចឹង តម្រូវ​ឱ្យ​អគ្គនាយកដ្ឋាន​មួយៗ​ពិនិត្យ និង​បញ្ជូន​ឈ្មោះ​មន្ត្រី​ទាំងអស់​ហ្នឹង»

ចំណាត់​ការ​របស់​ក្រសួង​ព័ត៌មាន​នេះ ក្រោយ​ពេល លោក ខៀវ កាញារីទ្ធ ដែល​ជា​រដ្ឋមន្ត្រី នៃ​ក្រសួង​នេះ សរសេរ​ត្អូញត្អែរ និង​ព្រមាន​ទៅ​មន្ត្រី​អសកម្ម​នៅ​ក្នុង​ក្រសួង​របស់​លោក​ថា នឹង​បង្ហោះ​រូបថត​អ្នក​ទាំងនោះ​នៅ​លើ​បណ្ដាញ​សង្គម​ហ្វេសប៊ុក។ លោក ខៀវ កាញារីទ្ធ បាន​សរសេរ​លើ​ហ្វេសប៊ុក​របស់​លោក កាលពី​ថ្ងៃ​ទី​២១ ខែ​ឧសភា ដោយ​ព្រមាន​បង្ហោះ​រូប​មន្ត្រី​គេចវេះ​ពី​ការងារ។

នាយក​ប្រតិបត្តិ​អង្គការ​តម្លាភាព​កម្ពុជា​យល់ថា លោក ព្រាប កុល សង្កេត​ឃើញ​ថា មន្ត្រី​ក្នុង​ក្រសួង​មួយ​ចំនួន​នៅ​ក្នុង​ក្រសួង​ស្ថាប័ន​របស់​រដ្ឋ​មានតែ​ឈ្មោះ​ចាំ​បើកប្រាក់​ខែ​ទៀត​ទាត់ ប៉ុន្តែ បំពេញ​ធ្វើ​ការងារ​មិនបាន​ពេញលេញ​ទេ​។ ជុំវិញ​ការព្រមាន​របស់ លោក ខៀវ កាញារីទ្ធ ថា នឹង​បង្ហោះ​រូប​មន្ត្រី​គេចវេះ​ពី​ការងារ​លើ​បណ្ដាញ​សង្គម​នោះ លោក ព្រាប កុល យល់ថា មិនមែន​ជា​មធ្យោបាយ​ដែល​មាន​វិជ្ជាជីវៈ​នោះ​ទេ៖ «ការ​បង្ហោះ​រូប​បុគ្គលិក​តាម​ហ្វេសប៊ុក​ហ្នឹង​ជា​ការ​ធ្វើ​ឱ្យ​គាត់​មាន​ភាព​អាម៉ាស់​ធ្វើ​ឱ្យ​គាត់​ឧស្សាហ៍​មក​ធ្វើការ​ឡើងវិញ​ជា​មធ្យោបាយ​មិន​គ្រប់គ្រាន់ និង​មិន​ប្រកប​វិជ្ជាជីវៈ​ទេ»

ចំណែក អ្នកវិភាគ​នយោបាយ លោក គឹម សុខ ដែល​ធ្លាប់​ធ្វើជា​ទីប្រឹក្សា​ក្រសួង​ព័ត៌មាន​ចន្លោះ​ពី​ឆ្នាំ ២០០៩ ដល់​ឆ្នាំ​២០១៣ មកពី​កូតា​ក្រុម​យុវជន​នៃ​រណសិរ្ស​ប្រជាធិបតេយ្យ​និស្សិត​បញ្ញវន្ត​ខ្មែរ របស់​លោក ស៊ុត ឌីណា ឱ្យ​អាស៊ីសេរី​ដឹង​ថា កាល​ពី​អំឡុង​លោក​បំពេញការងារ​នៅ​ក្រសួង​នេះ ក្នុង​នាយកដ្ឋាន​មួយ ឬ​ការិយាល័យ​មួយ មាន​មន្ត្រី​មក​ធ្វើ​ប្រហែល​ប្រាំ​នាក់​ប៉ុណ្ណោះ។ លោក​ថា មន្ត្រី​មួយ​ចំនួន​ធំ​ដែល​ជាប់សែ​ស្រឡាយ​មន្ត្រី​ធំ មានតែ​ឈ្មោះ​ចាំ​បើក​ប្រាក់ខែ ហើយ​មន្ត្រី​ខ្លះ​ទៀត​មក​ក្រសួង​បង្ហាញមុខ​រួច​ហើយក៏​នាំគ្នា​ទៅ​ផឹក​កាហ្វេ​អស់។ លោក គឹម សុខ កោតសរសើរ​លោក ខៀវ កាញារីទ្ធ ដែលមាន​ចិត្ត​ក្លាហាន​បញ្ចេញ​ព័ត៌មាន​នេះ​ឱ្យ​សាធារណជន​បាន​ដឹង ប៉ុន្តែ លោក​យល់​ថា លទ្ធផល​ទំនងជា​គ្មាន​ប្រសិទ្ធភាព៖ «ដោយសារ​រដ្ឋាភិបាល​របស់​យើង​អត់​មាន​ប្រព័ន្ធ​បែងចែក​ការងារ​ឱ្យ​ប្រាកដ​ប្រជា និង​លើកទឹកចិត្ត​ឱ្យ​មនុស្ស​ធ្វើ​ការងារ ព្រមទាំង​ប្រាក់​បៀវត្សរ៍​ឱ្យ​សមរម្យ​ផង ម្ល៉ោះហើយ មនុស្ស​ចេះតែ​រយាល​ណាស់​ជា​កំហុស​ធំ​ដែល​បង្កើត​ពី​ប្រព័ន្ធ​ដឹកនាំ​មិន​យុត្តិធម៌​បក្សពួកនិយម​ពុករលួយ​របស់​លោក ហ៊ុន សែន»

ការព្រមាន​មន្ត្រី​អសកម្ម​របស់​រដ្ឋមន្ត្រី​ក្រសួង​ព័ត៌មាន​នៅ​ពេលនេះ ខណៈ លោក ហ៊ុន សែន មេដឹកនាំ​នៃ​របប​ក្រុងភ្នំពេញ ចេញ​អភិក្រម​ទាំង​៥ រួមមាន​៖ ឆ្លុះកញ្ចក់ ងូតទឹក ដុសក្អែល ព្យាបាល វះកាត់​ដើម្បី​ឱ្យ​មន្ត្រី​លោក​សកម្ម​នឹង​ការងារ។ លោក ព្រាប កុល យល់​ថា ក្រសួង​គួរ​ប្រើ​យន្ត​ការណ៍​ត្រួតពិនិត្យ​ការងារ​ដោយ​ផ្អែកលើ​លទ្ធផល និង​ការ​ពង្រឹង​ការងារ និង​ក្រមសីលធម៌​ដែល​ជា​មធ្យោបាយ​ប្រកបដោយ​វិជ្ជាជីវៈ ជាង​ការ​បង្ហោះ​រូប​មន្ត្រី​អសកម្ម​តាម​បណ្ដាញ​សង្គម​ហ្វេសប៊ុក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Ta Kahnarith says to HS that our govm't budget is running out now,if we didn't cutoff some Ghost Workers Salary Benefit Program and then the CCP's cronies will break up apart

Worst lazy bumped comrade Ta K.Kahnarith minister department of information stated that many CCP's lazies bump ministries just only showed up faces during the end of month to get their salary and having fun in whatever they want"Ghost Workers Salary Benefit Program",despite its CCP govm't facing in many serious consequences in day ahead"E-B-A+GPS+ECONOMIC SANCTIONS"approaching.Gossip leaking news at abroad that some tmil Hun Sen's CCP cronies who left the Cambodian and looked for asylum at the west,some of them still collecting tmil Hun Sen's"Ghost Workers Salary Benefit Program".

May 28, 2019 11:47 AM

គេហទំព័រ​ទាំងមូល