ក្រសួង​ការងារ​ សន្យា​​​​ហាម​ជន​បរទេស​មិន​ឲ្យ​ប្រកប​របរ​​ខ្នាត​តូច និង​​សេដ្ឋកិច្ច​ក្រៅ​ប្រព័ន្ធ​ ព្រោះ​ដណ្ដើម​​ការងារ​ពលរដ្ឋ​​ខ្មែរ​​​ក្នុង​ស្រុក​

ដោយ សេក បណ្ឌិត
2019-07-18
អ៊ីម៉ែល
មតិ
Share
បោះពុម្ព
លោក ហេង សួរ រដ្ឋលេខាធិការ​ក្រសួង​ការងារ និង​បណ្ដុះបណ្ដាល​វិជ្ជាជីវៈ។
លោក ហេង សួរ រដ្ឋលេខាធិការ​ក្រសួង​ការងារ និង​បណ្ដុះបណ្ដាល​វិជ្ជាជីវៈ។
រូប៖ ហ្វេសប៊ុក​ក្រសួង​ការងារ និង​បណ្ដុះបណ្ដាល​វិជ្ជាជីវៈ

ក្រសួង​ការងារ គ្រោង​ហាម​ឃាត់​ជន​បរទេស​ មិន​ឲ្យ​​​​ប្រកប​របរ​​ខ្នាត​តូច និង​សេដ្ឋកិច្ច​ក្រៅ​ប្រព័ន្ធ​ ដោយសារ​​វា​ជា​ការ​ដណ្ដើម​​ការងារ​ពលរដ្ឋ​ និង​កម្មករ​ខ្មែរ​​ម្ចាស់​​ស្រុក។ ​ក្រុម​អ្នក​ប្រកប​របរ​សេដ្ឋកិច្ច​ក្រៅ​ប្រព័ន្ធ និង​សំណង់ ស្វាគមន៍​​ បើ​របប​ក្រុង​ភ្នំពេញ មាន​ឆន្ទៈ​អនុវត្ត​មែន។ ពួកគេ​ជំរុញ​ឲ្យ​របប​ក្រុង​ភ្នំពេញ ពន្លឿន​ការ​អនុវត្ត​ការ​សន្យា​នេះ​ឲ្យ​បាន​លឿន នៅ​ក្នុង​ឆ្នាំ​២០១៩​ នេះ ដើម្បី​កុំ​ឲ្យ​​កម្មករ​បន្ត​ខាត​បង់​ប្រយោជន៍​ទៀត។

ក្រុម​អ្នក​ប្រកប​របរ​សេដ្ឋកិច្ច​​ក្រៅ​ប្រព័ន្ធ មាន​អ្នក​រត់​ម៉ូតូឌុប រ៉ឺម៉ក​កង់​បី អាជីវករ​លក់​ដូរ​តាម​ចិញ្ចើម​ផ្លូវ និង​អ្នក​ធ្វើ​សំណង់​ សុទ្ធ​តែ​ស្វាគមន៍​បំណង​របស់​របប​ក្រុង​ភ្នំពេញ ក្នុង​ការ​ហាម​ឃាត់​ជន​បរទេស​មិន​ឲ្យ​បើក​អាជីវកម្ម​ខ្នាត​តូច និង​ប្រកប​របរ​សេដ្ឋកិច្ច​​​ក្រៅ​ប្រព័ន្ធ។

អ្នក​រត់​ម៉ូតូ​ឌុប​​នៅ​ម្ដុំ​មុខ​​អយស្ម័យយាន ឬ​រ៉ា​រថ​ភ្លើង រាជធានី​ភ្នំពេញ លោក សេង សុខា យល់​ថា ប្រសិន​រដ្ឋាភិបាល ចាប់​ផ្ដើម​អនុវត្ត​វិធានការ​​ហាមឃាត់​ជន​បរទេស​ មិន​ឲ្យ​ដណ្ដើម​ការងារ​កំប៉ិកកំប៉ុក​របស់​ពលរដ្ឋ​ខ្មែរ​មែន​ជា​ការ​ប្រសើរ។ លោក​ថា ជន​បរទេស ដែល​ដណ្ដើម​ការងារ​អ្នក​រត់​ម៉ូតូឌុប រម៉ក​កង់​បី អ្នក​រត់តាក់ស៊ី​ច្រើន​ជាង​គេ​នៅ​សព្វ​ថ្ងៃ​ គឺ​ជនជាតិ​ចិន ព្រោះ​ជនជាតិ​ចិន​ទាំង​នោះ មិន​ប្រើប្រាស់​សេវា​កម្ម​របស់​ពលរដ្ឋ​ខ្មែរ​ទេ។ ក្រៅ​ពី​នេះ ជន​​ជាតិ​ចិន​ទាំង​នោះ បាន​បើក​ហាង​ម្ហូប បើក​ហាង​កាត់​សក់​ជា​ដើម ដែល​ធ្វើ​ឲ្យ​ពលរដ្ឋ​ខ្មែរ ត្រូវ​ធ្លាក់​ចំណូល ឬ​បាត់​បង់​អាជីព​តែ​ម្ដង៖ «​សេវា​កម្ម​ដឹក​ជញ្ជូន​យើង​អត់​សូវ​បាន​ដឹក​ទេ អត់​សូវ​បាន​ដឹក​ទេ​!​បាទ។ យើង​ឃើញ​ថា គាត់​ម៉ៅ ឡាន​ក្រុង​ ក្រុមហ៊ុន​ជនជាតិ​ចិន​គាត់​ទៅ​ហ្មង។ គាត់​ម៉ៅ​ផ្ដាច់។ យើង​ក៏​មិន​សូវ​បាន​ដឹក​ដែរ បាន​ខ្លះ​ដែរ បាន​តិចតួច​ មិនមែន​ថា មិន​បាន​សោះ​ទេ។ រាជ​រដ្ឋាភិបាល​យើង​នេះ គាត់​មិន​ឃើញ​មាន​ការ​ទប់ស្កាត់​អ្វី​ទេ ឃើញ​នៅ​តែ​មាន​ការ​ហូរ​ចូល​មក​ពី​មួយ​ថ្ងៃ​ទៅ​មួយ​ថ្ងៃ ពី​មួយ​ខែ​ទៅ​មួយ​ខែ ពី​មួយ​ឆ្នាំ​ទៅ​មួយ​ឆ្នាំ គាត់​អត់​មាន​អ្វី ទប់​ស្កាត់​ជាមួយ​ជន​បរទេស​ទាំង​ហ្នឹង​ទេ»។

អ្នក​នាំ​ពាក្យ​ក្រសួង​ការងារ និង​បណ្ដុះ​បណ្ដាល​វិជ្ជា​ជីវៈ លោក ហេង សួរ ប្រាប់​ប្រព័ន្ធ​ឃោសនា​ក្នុង​ស្រុក (Phnom Penh Post) ថា ​​​ក្រសួង​មាន​បំណង​ហាម​ឃាត់​ជន​បរទេស​ ដែល​មក​រស់​នៅ​​​ប្រទេស​កម្ពុជា​ មិន​ឱ្យ​ធ្វើ​​ឲ្យ​​ប្រកប​អាជីវកម្ម​ខ្នាត​តូច ឬ​មុខ​របរ​ផ្ទាល់​ខ្លួន​ម្នាក់​ឯង​​​ និង​ការងារ​មួយ​ចំនួន​ទៀត​​ ដើម្បី​ការពារ​​ជន​បរទេស​ទាំង​នោះ មក​ដណ្ដើម​ទីផ្សារ​​របស់​ពលរដ្ឋ​ខ្មែរ​។​​ លោក ហេង សួរ ថា ក្រសួង​នឹង​ចេញ​សេចក្ដី​ប្រកាស​ ដើម្បី​កំណត់​ ថា​ការ​ងារ​​ណា​ខ្លះ ដែល​ត្រូវ​ហាម ​សម្រាប់​ជន​បរទេស​នៅ​​ពេល​ខាង​មុខ ហើយ​សម្រាប់​ការ​ចូល​ជា​ធរមាន​ គ្រោង​​​នឹង​ប្រកាស​ឲ្យ​អនុវត្ត ​នៅ​​សប្ដាហ៍​ទី ២​ នៃ​ខែ ​សីហា ឆ្នាំ២០១៩។

លោក ហេង សួរ ​ប្រាប់​កាសែត​ក្នុង​ស្រុក​ដដែល​ថា ​គោល​ដៅ​ក្នុង​ការ​បង្កើត​ច្បាប់​​​ហាម​ឃាត់​ជន​បរទេស​មិន​ឲ្យ​ប្រកប​របរ​ខ្នាត​តូច និង​សេដ្ឋកិច្ច​ក្រៅ​ប្រព័ន្ធ ​គឺ​ដើម្បី​ការ​ពារ​​​មុខ​របរ​ ឬ​អាជីវ​កម្ម​ខ្នាត​តូច​ ​ជា​លក្ខណៈ​គ្រួសារ​ សម្រាប់​ទុក​ឲ្យ​ប្រជា​ពល​រដ្ឋ​​ខ្មែរ។ ក្នុង​ប្រទេស​​ គឺ​មាន​ការ​តាក់​តែង​លិខិត​បទដ្ឋាន​គតិយុត្តិ​ស្រប​ទៅ​តាម​បច្ចុប្បន្ន​ភាព​នៃ​តម្រូវ​ការ​ជាក់​ស្ដែង​តាម​កាលៈទេសៈ​នី​មួយៗ​ ដែល​បណ្ដា​ប្រទេស​មួយ​ចំនួន​ ក៏​មាន​ការ​កំណត់​នូវ​លក្ខ​ខណ្ឌ ​ឬ​ក៏​ហាម​ជន​បរទេស​មិន​ឲ្យ​ប្រកប​មុខ​របរ​ ឬ​ក៏​ធ្វើ​ការ​ងារ​អាជីវកម្ម​ខ្នាត​តូច​ឬ​ជា​លក្ខណៈ​គ្រួសារ។

អ្នក​រត់​រម៉ក​កង់​បី​ម្នាក់ នៅ​គោលដៅ​សួន​សុបិន​ចម្ការ​ព្រីង និង​ខណ្ឌ​សែន​សុខ លោក ប៉ា សុផល​ យល់​ថា ក្រសួង​គួរ​ប្រញាប់​ពន្លឿន​ការ​ចេញ​ច្បាប់​នេះ ដើម្បី​កុំ​ឲ្យ​ជន​បរទេស​ដណ្ដើម​មុខ​របរ​រត់​រម៉ក និង​បើក​ឡាន​តាក់ស៊ី​ត​ទៅ​ទៀត។ អ្នក​រត់​រម៉ក​កង់​បី​រូប​នេះ​ថា បច្ចុប្បន្ន​នៅ​គ្រប់​កន្លែង ជន​បរទេស​ពិសេស​ជនជាតិ​ចិន កំពុង​ដណ្ដើម​មុខ​របរ​រត់​រម៉ក និង​តាក់ស៊ី​ជំនួស​ខ្មែរ ពិសេស​នៅ​ខេត្ត​ព្រះសីហនុ និង​សៀមរាប។ លោក សុផល ថា ប្រសិន​បើ​ក្រសួង​កំណត់​ច្បាប់​ហាម​ឃាត់​ជន​បរទេស​មែន ពលរដ្ឋ​​ខ្មែរ អាច​រក​លុយ​បាន​ច្រើន​ជា​ពេល​នេះ​មិន​ខាន ព្រោះ​ជន​បរទេស នឹង​ទំនង​ងាក​មក​ប្រើ​សេវា​កម្ម​របស់​ពលរដ្ឋ​វិញ៖ «អ្វី​ដែល​យើង​ខ្ញុំ​ចង់​និយាយ​ណាស់ ជនបរទេស​ៗ គួរ​ណាស់​តែ​ទុក​របរ​តូច​តាច​អ៊ីចឹង​ វា​គួរ​ណាស់​ប្រមុខ​រាជរដ្ឋាភិបាល ឬ​ក្រសួង​អ្វី ទុក​​មុខ​របរ​នេះ​ឲ្យ​ប្រជាពលរដ្ឋ​ ឬ​ក៏​សមាជិក​របស់​ខ្លួន​ ឲ្យ​មាន​ការ​រក​ទទួល​ទាន ដើម្បី​ចិញ្ចឹម​ជីវិត​មក»។

ចំណែក​អ្នក​លក់​ដូរ​តាម​ចិញ្ចើម​ផ្លូវ​ក៏​ពេញ​ចិត្ត​ដែរ បើ​របប​ក្រុង​ភ្នំពេញ ពិត​ជា​ហាមឃាត់​ជន​បរទេស​កុំ​ឲ្យ​លក់ដូរ​ ប្រជែង​នឹង​ពលរដ្ឋ។

អាជីវករ​លក់​ដូរ​​តាម​ចិញ្ចើម​ផ្លូវ​ នៅ​តាម​ផ្សារ​ នៅ​រាជធានី​ភ្នំពេញ​ ម្នាក់ អ្នកស្រី នៅ​ ស្រីលក្ខណ៍ ប្រាប់​ថា អ្នក​លក់​ដូរ​ទោះ​តាម​ចិញ្ចើម​ផ្លូវ ឬ​បើក​ហាង​ខ្នាត​តូច មិន​អាច​មាន​លទ្ធភាព​លក់​ឈ្នះ​ជនជាតិ​បរទេស​ទេ ដោយសារ​ជន​បរទេស​មាន​ដើម​ទុន​ច្រើន និង​ខ្លះ បាន​សូកប៉ាន់​អ្នក​មាន​អំណាច​មិន​ឲ្យ​រក​រឿង​ពួកគេ ពេល​បើក​រកស៊ី។

អ្នកស្រី នៅ ស្រីលក្ខណ៍ រៀបរាប់​ថា កន្លងមក​ក្រុម​អាជីវករ​បាន​ស្នើ​សុំ​​ឲ្យ​រដ្ឋាភិបាល​​ឲ្យ​ហាមឃាត់​ជន​បរទេស​លក់ដូរ​​ខ្នាត​តូច​ច្រើន​ដង​​ហើយ។ អាជីវករ​រូប​នេះ ប្រាប់​ថា ជន​បរទេស​ដែល​ដណ្ដើម​មុខរបរ​​លក់​ដូរ​ របស់​អាជីវករ​ខ្នាត​តូច​​រាល់​ថ្ងៃ គឺ​​ជន​ជាតិ​​​វៀតណាម និង​ជនជាតិ​ចិន៖ «ធ្វើ​ឲ្យ​ប្រជាពលរដ្ឋ​យើង​ខាត​មុខ​របរ​។ ខាត​ចំណូល​។ ឥឡូវ​ហ្នឹង​ មាន​ដល់​ទៅ​ចិន​ហ្នឹង​ លក់​នំ​ប៉ាវ​ទៀត។ ឥឡូវ​អាជីវករ​យើង​ កាល​មុន​គាត់​លក់​នំ​ប៉ាវ​អ្វី​បាន​ ឥឡូវ​គាត់​លក់​នំ​ប៉ាវ គេ​មាន​ការ​ទំនើប​ជាង​យើង អ៊ីចឹង​អ្នក​ញ៉ាំ​ចូលចិត្ត​របស់​ចិន​វិញ ដល់​អ៊ីចឹង អាជីវករ​យើង​ខាត​មុខរបរ​មែន​ទេ»។

ចំណែក​អាជីវករ​លក់​បាយ​ម្ហូប​នៅ​​ឆ្នេរ​អូរ​ឈើ​ទាល ខេត្ត​ព្រះសីហនុ​ម្នាក់​ លោក គឹម សុខ ​​​​ហាង​ ភោជនីយដ្ឋាន រង្គសាល កន្លែង​កម្សាន្ត​នៅ​ខេត្ត​ព្រះសីហនុ ជា​ច្រើន​សុទ្ធ​តែ​គ្រប់​គ្រង​ដោយ​ជន​ជាតិ​ចិន។ លោក​ថា សូម្បី​ជន​ជាតិ​អឺរ៉ុប ក៏​ឈប់​រកស៊ី ហើយ​ចាក​ចេញ​ពី​ខេត្ត​ព្រះសីហនុ​ដែរ ដោយសារ​​កំណើន​ជនជាតិ​ចិន ហើយ​​ជនជាតិ​ចិន​ ចូល​ញ៉ាំ​អាហារ និង​ប្រើ​សេវាកម្ម​តែ​ជនជាតិ​ដូច​គ្នា​ប៉ុណ្ណោះ។

ការ​ដណ្ដើម​មុខ​របរ​ និង​ការងារ​ ពី​សំណាក់​ជន​បរទេស​ កើត​មាន​គ្រប់​វិស័យ​នៅ​កម្ពុជា ទាំង​សេវាកម្ម​​ ទេសចរណ៍​ ផ្ទះ​សំណាក់ សេដ្ឋកិច្ច​ក្រៅ​ប្រព័ន្ធ​ និង​​មុខ​របរ​រើស​អេតចាយ។ នៅ​ក្នុង​វិស័យ​សំណង់​ក៏​រង​ការ​ដណ្ដើម​ការងារ​ពី​ជន​បរទេស​ដែរ។

ប្រធាន​សហព័ន្ធ​សហជីព​កម្មករ​សំណង់ និង​ព្រៃឈើ លោក សុខ គីន ឲ្យ​ដឹង​ថា កាល​ពី​ប៉ុន្មាន​ឆ្នាំ​មុន​កម្មករ​ដែល​មក​ដណ្ដើម​ការងារ​ក្នុង​វិស័យ​សំណង់​មាន​តែ​ជនជាតិ​វៀតណាម​ទេ តែ​បច្ចុប្បន្ន​ជនជាតិ​ចិន​ច្រើន​ណាស់ ក៏​មក​ដណ្ដើម​ការងារ​ជា​កម្មករ​ដែរ។ លោក​ថា ការ​យក​កម្មករ​បរទេស​មក​ធ្វើការ​ ដោយសារ វិនិយោគិន ចូល​មក​រកស៊ី​ភាគច្រើន​ជា​ជន​ជាតិ​ចិន ហើយ​ពួកគេ​ច្រើន​ស្ពាយ​កម្មករ​ចិន​ មក​ជា​មួយ ជា​ហេតុ​នៃ​ការ​ដណ្ដើម​មុខ​របរ​ពលរដ្ឋ។ លោក សុខ គីន មិន​ជំទាស់​ទេ បើ​​​​កម្មករ​​បរទេស​ជា​អ្នក​ជំនាញ ប៉ុន្តែ​បើ​ត្រឹម​កម្មករ​ធម្មតា​ គឺ​ពលរដ្ឋ​ខ្មែរ​អាច​ធ្វើ​បាន។

លោក សុខ គីន រក​ឃើញ​ថា ការដ្ឋាន​សំណង់​ខ្លះ ថៅកែ​យក​កម្មករ​ត្រឹម​ ៣០ភាគ​រយ ឬ ៥០ភាគ​រយ។ ឯ​ប្រាក់​ឈ្នួល​ប្រចាំ​ថ្ងៃ ក៏​មាន​គំលាត​គ្នា​ខ្លាំង​ដែរ រវាង​កម្មករ​ខ្មែរ និង​កម្មករ​បរទេស៖ «កម្មករ​ធម្មតា​ វា​មិន​គួរ​យក​ជន​បរទេស​មក​ធ្វើ ព្រោះ​ខ្មែរ​យើង​អាច​ធ្វើ​ការ​ងារ​ហ្នឹង​បាន​ដែរ ហើយ​ជន​បរទេស​មក​ហ្នឹង​ប្រាក់​ឈ្នួល​ខ្ពស់​ជាង​ខ្មែរ​​ឆ្ងាយ​​ហើយ គាត់​​ធ្វើ​ការ​​បាន​​ដូច​គ្នា ប៉ុន្តែ​ប្រាក់​ខែ​ គាត់​ឲ្យ​ទៅ​ចិន ឲ្យ​ទៅ​ជនជាតិ​បរទេស​ខ្ពស់​ជាង អា​ហ្នឹង​វា​ជា​បញ្ហា​មួយ​ដែរ​ សម្រាប់​វិស័យ​សំណង់»។

ប្រធាន​សមាគម​ឯករាជ្យ​កម្ពុជា​នៃ​សេដ្ឋកិច្ច​ក្រៅ​ប្រព័ន្ធ លោក វ៉ន់ ពៅ ជឿ​​ថា​ បើ​ត្រឹម​តែ​​ក្រសួង​ការងារ​ ចេញ​អនុក្រឹត្យ ឬ​សេចក្ដីប្រកាស​ ការ​ហាម​ឃាត់​ជន​បរទេស​មិន​ឲ្យ​ដណ្ដើម​​មុខ​របរ ឬ​ការងារ​ពលរដ្ឋ​ខ្មែរ មិន​ជោគជ័យ​ទេ។ វា​ទាមទារ​ឲ្យ​អាជ្ញាធរ​អនុវត្ត​ឲ្យ​បាន​តឹងរ៉ឹង​បន្ថែម​ទៀត។ លោក​ វ៉ន់ ពៅ បារម្ភ​ថា សមត្ថកិច្ច​ ឬ​អាជ្ញាធរ​មូលដ្ឋាន មិន​ហ៊ាន​ចាត់​វិធានការ​លើ​ជន​បរទេស​ តាម​អនុក្រឹត្យ​ ព្រោះ​ជនជាតិ​បរទេស​ភាគច្រើន មាន​ខ្នង​ជា​អ្នក​មាន​អំណាច​ធំៗ បណ្ដាល​ឲ្យ​អ្នក​អនុវត្ត​ច្បាប់​ថ្នាក់​ក្រោម​រារែក​ ការ​អនុវត្ត​ច្បាប់៖ «ជន​ជាតិ​បរទេស​ទាំង​អស់​ហ្នឹង​ដែល​ដណ្ដើម​មុខ​របរ​ខ្មែរ ត្រូវ​តែ​ឲ្យ​អាជ្ញាធរ​ថ្នាក់​មូលដ្ឋាន​គ្រប់​ខេត្ត​ ដែល​មាន​ជន​បរទេស​ដណ្ដើម​មុខ​របរ​ខ្មែរ ត្រូវ​ចាត់​ការ​ឲ្យ​មាន​ប្រសិទ្ធិ​ភាព កុំ​ឲ្យ​ខ្លាច​ ហើយ​ក្រសួង​មហាផ្ទៃ​ត្រូវ​ការ​ពារ​មន្ត្រី​របស់​ខ្លួន​ មន្ត្រី​ទាំង​ឡាយ​ណា ដែល​ហ៊ាន​ចាត់​ការ​រឿង​ហ្នឹង​យ៉ាង​ច្បាស់​លាស់ ស្រប​តាម​សេចក្ដី​ប្រកាស​ហ្នឹង។ បើ​មិន​ហ៊ាន​​ចាត់​ការ ហើយ​មិន​ហ៊ាន​ការពារ​កូន​ចៅ​ខ្លួន​នៅ​ថ្នាក់​ក្រោម​ហ្នឹង​ទេ វា​ជា​រឿង​មួយ​ ដែល​យើង​មាន​ការ​សោក​ស្ដាយ​ ​​គិត​ថា មិន​មាន​ប្រសិទ្ធិ​ភាព​ទេ។ ប៉ុន្តែ​បើ​ការពារ​កូន​ចៅ​ថ្នាក់​ក្រោម ដែល​ហ៊ាន​ធ្វើ​រឿង​ហ្នឹង វា​ជា​ការ​សាទរ»។​​

គិត​ត្រឹម​ឆ្នាំ​២០១៨ ពលករ​បរទេស​​កំពុង​ធ្វើការ​នៅ​កម្ពុជា មាន​​ចំនួន​ជាង ១៦ម៉ឺន​នាក់ ក្នុង​នោះ​​​ជនជាតិ​ចិន នាំ​មុខ​គេ គឺ​មាន​​ជាង​ ១០ម៉ឺន​នាក់ តែ​អ្នក​ធ្វើ​ប័ណ្ណ​ការងារ​ជាង​ ៣ម៉ឺន​នាក់។ ក្រៅ​ពី​នេះ ជា​ជន​ជាតិ​ផ្សេងៗ។ ក្រុម​អ្នក​សេដ្ឋកិច្ច​ក្រៅ​ប្រព័ន្ធ​ឲ្យ​ដឹង​ថា ជន​បរទេស​ដែល​កំពុង​ដណ្ដើម​ការងារ​ និង​មុខ​របរ​ពលរដ្ឋ​ខ្មែរ​សព្វថ្ងៃ ភាគច្រើន​មិន​មែន​ជា​ពលករ​បរទេស​ទេ តែ​ចូល​មក​កម្ពុជា​ បន្លំ​ខ្លួន​ក្នុង​នាម​​​អ្នក​ទេសចរណ៍ ឬ​អ្នក​វិនិយោគិន ហើយ​ពួកគេ​បាន​​គេច​កាតព្វកិច្ច​បង់​ពន្ធ​ឲ្យ​កម្ពុជា។

ច្បាប់​ស្ដីពី​ការងារ ចែង​ក្នុង​ន័យ​ថា ជន​បរ​ទេស​ ដែល​មក​ធ្វើ​ការងារ​នៅ​កម្ពុជា​ ត្រូវ​​បង់​អាករ​ចំនួន៣ គឺ​ត្រូវ​បង់​អាករ​ទិដ្ឋាការ​ ឬ​វីសា (Visa) ស្នាក់​នៅ​បណ្ដោះអាសន្ន​រយៈ​ពេល​វែង​ចំនួន​ ១៨០ដុល្លារ​ ក្នុង​ ១ឆ្នាំ អាករ​សៀវភៅ​ការ​ងារ ១៣០​ដុល្លារ​ ក្នុង​ ១ឆ្នាំ និង​ត្រូវ​បង់​ពន្ធ​អាករ​ស្នើ​សុំ​កូតា​ប្រើ​ប្រាស់​ជន​បរទេស​តម្លៃ​​​ ៥០​ដុល្លារ​ ក្នុង​ ១ឆ្នាំ​។​ ដូច្នេះ​ ពលករ​បរទេស​ម្នាក់ ​ត្រូវ​មាន​កាតព្វកិច្ច​​បង់​អាករ ​ជា​ចំណូល​ថវិកា​ជាតិ​ ប្រមាណ ៣៦០​ដុល្លារ​ក្នុង ១​ឆ្នាំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

junior comrade H.Sour failed at his job performance...why they didn't kick him out for long time ago,and why?????

Who's the hell gonna buy his words in the last 40+years failure with sent numerous of illegal human slavery trafficking across the boards.How this junior comrade Heng Sour of dictator Hun Sen's minister of labour department can promises and forbidden of any illegal migrants small micro-business who took over khmer's burden street vendors and now they're going out of business,because there were serious concern over crowed of"C"illegal immigration small micro-businesses widespread across to southwestern coastline and created more serious concern over high crime,murderous,homicide,mafia,gangs,serial killer,prostitute,smuggling drug,illegal human trafficking,illegal gamebling,money laundering,counterfeit in their illegal migrants community"it causes the Cambodian pple and the western tourists fear they own safety there.Otherwise,the evil Hun Sen's rogue thugs authority failed and lost control over illegal population crowing at that region.Sometime those illegal migrant driver hits,or killed traffic police on the street,or pple,it look likes wild animal run on the street,and not fear or no respect to the community,authority and do whatever they wanted.

Jul 20, 2019 10:22 AM

គេហទំព័រ​ទាំងមូល