ក្រសួងការងារ និងបណ្តុះបណ្តាលវិជ្ជាជីវៈ ព្រមានពលរដ្ឋឱ្យប្រុងប្រយ័ត្នចំពោះក្រុមហ៊ុនជ្រើសរើសពលករខ្មែរទៅធ្វើការនៅប្រទេសអូស្ត្រាលី (Australia)។ ការព្រមាននេះ ធ្វើឡើងស្របពេលដែលរដ្ឋាភិបាលកម្ពុជា កំពុងចរចា ជាមួយរដ្ឋាភិបាលអូស្ត្រាលីនៅឡើយ ដើម្បីឱ្យអូស្ត្រាលីទទួលយកពលករខ្មែរទៅធ្វើការនៅប្រទេសនេះក្រោមទិដ្ឋាការប្រភេទ«កសិកម្មអូស្ត្រាលី» (Australian Agriculture Visa)។
សេចក្តីជូនដំណឹងរបស់ក្រសួងការងារ កាលពីថ្ងៃទី៣០ ខែសីហា បញ្ជាក់ថា រដ្ឋាភិបាលអូស្ត្រាលីនៅពុំទាន់សម្រេចថា នឹងផ្តល់ទិដ្ឋាការប្រភេទនេះជូនកម្ពុជានៅឡើយទេ។ ដូច្នេះ ក្រសួងស្នើឱ្យសាធារណជនត្រូវប្រុងប្រយ័ត្នខ្ពស់ចំពោះរាល់ការផ្សព្វផ្សាយអំពីការជ្រើសរើស និងការបញ្ជូនពលករខ្មែរទៅធ្វើការនៅប្រទេសអូស្ត្រាលី ដោយទីភ្នាក់ងារជ្រើសរើស ឬអង្គភាពណាមួយ។ យ៉ាងណា ក្រសួងការងារ មិនបានបញ្ជាក់អំពីចំណាត់ការផ្លូវច្បាប់ជាក់លាក់ណាមួយប្រឆាំងនឹងក្រុមហ៊ុនជ្រើសរើសពលករខ្មែរណាមួយនៅឡើយទេ។ ក្រសួងដដែលគូសបញ្ជាក់ថា ក្រសួងការងារ គឺជាក្រសួងមានសមត្ថកិច្ចក្នុងការគ្រប់គ្រងលើការបញ្ជូនពលករខ្មែរទៅធ្វើការនៅបរទេស ដោយធ្វើកិច្ចសហការជាមួយក្រសួង និងស្ថាប័នពាក់ព័ន្ធ។
បើតាមក្រសួងការងារ ថ្មីៗនេះ រដ្ឋាភិបាលអូស្ត្រាលីបានប្រកាសអំពីការបង្កើតទិដ្ឋាការ «កសិកម្មអូស្ត្រាលី» ដើម្បីឆ្លើយតបទៅនឹងកង្វះខាតកម្លាំងពលកម្មក្នុងវិស័យកសិកម្មនៅក្នុងប្រទេសរបស់ខ្លួន។ បច្ចុប្បន្ននេះ រដ្ឋាភិបាលអូស្ត្រាលី កំពុងពិភាក្សាទ្វេភាគីអំពីការផ្តល់ទិដ្ឋាការប្រភេទនេះ ជាមួយបណ្តាប្រទេសជាដៃគូនានា ក្នុងនោះក៏រួមទាំងកម្ពុជាផង។
កន្លងទៅ ពលករចំណាកស្រុកខ្មែរ មិនតិចនាក់ទេបានចាញ់បោកមេខ្យល់ ឬក្រុមហ៊ុនឯកជនដែលប្រកាសជ្រើសរើសពលករឱ្យទៅធ្វើការនៅបរទេស ដូចជានៅប្រទេសថៃ(Thailand) ម៉ាឡេស៊ី (Malaysia) កូរ៉េខាងត្បូង (Korea) ចិន (China) ជប៉ុន (Japan) ឬ អារ៉ាប់រួម (United Arab Emirates) ជាដើម ជាថ្នូរនឹងការសន្យាថា នឹងទទួលបានប្រាក់ឈ្នួលខ្ពស់ ឬជីវភាពធូរធារ។ ក៏ប៉ុន្តែ ពួកគេទាំងនោះជាញឹកញាប់ទទួលរងនូវការខាតបង់ប្រាក់កាស ពេលវេលា និងខ្លះត្រូវប្រឈមនឹងគ្រោះថ្នាក់ដល់សុខភាព និងជីវិតទៀតផង ដោយសារធ្វើការខុសច្បាប់គ្មានលិខិតស្នាមនៅប្រទេសគេ អំពើជួញដូរមនុស្ស ការកេងប្រវ័ញ្ចកម្លាំងពលកម្ម ឬអំពើទាសភាពសម័យទំនើបជាដើម។ អាជ្ញាធររដ្ឋាភិបាលកម្ពុជា រងការរិះគន់ថា អសមត្ថភាពក្នុងការដោះស្រាយបញ្ហាទាំងនេះ ដោយសារក្រុមហ៊ុនជ្រើសរើសពលករមួយចំនួនជាប់សង្ស័យថា មានភាគហ៊ុនរបស់មន្ត្រីជាន់ខ្ពស់ក្នុងជួររដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។