ប្រជាពលរដ្ឋមួយចំនួននៅខេត្តបន្ទាយមានជ័យរិះគន់អាជ្ញាធរខេត្តនេះថាបណ្ដោយឱ្យជនជាតិចិនជាច្រើននាក់បន្តហូរចូលមកស្នាក់នៅក្រុងប៉ោយប៉ែតជាបន្តបន្ទាប់។ ពួកគេអះអាងថា ជនបរទេសទាំងនោះចូលមកកម្ពុជាប្រកបរបរបើកល្បែងអនឡាញខុសច្បាប់។
ប្រជាពលរដ្ឋនៅក្រុងប៉ោយប៉ែតម្នាក់ លោក ជា សុផាន្នី ថ្លែងនៅថ្ងៃទី២៣ មេសាថា ប្រមាណ ១ខែចុងក្រោយនេះ មានជនជាតិចិនរាប់រយនាក់សម្រុកមកស្នាក់នៅតំបន់ព្រំដែនក្រុងប៉ោយប៉ែត។លោកថា អ្នកភូមិនៅតំបន់ព្រំដែនខេត្តមួយនេះ ព្រួយបារម្ភខ្លាចជនជាតិចិនទាំងនោះនាំជំងឺកូវីដ១៩ មកចម្លងដល់ប្រជាពលរដ្ឋខ្មែរ ពីព្រោះបរទេសទាំងនោះ ដើរតាមផ្លូវទាំងហ្វូងៗ ដោយពុំសូវមានពាក់ម៉ាស់ការពារ ដូចពលរដ្ឋខ្មែរឡើយ៖ «ចាប់ជាងគេជនជាតិចិនបើគាត់ចូលរហូតអ៊ីចឹង ហើយបើគេនាំជំងឺមកចម្លងឱ្យយើង ហើយក្រសួងសុខាភិបាលចេះតែផ្សាយតួលេខអត់មានឆ្លងអ៊ីចឹង ចេះតែផ្សាយយកល្អអ៊ីចឹង ហើយពួកចិនវាចេះតែមកអីចឹងដឹងខាងណាត្រួតពិនិត្យ។ បើនៅតែអីចឹងងាប់ប្រជាពលរដ្ឋខ្លួនឯង។ វាមកពេលល្ងាចព្រលប់ៗ វាមកតាមរថយន្ត ប្រហែលគេចុះយន្តហោះនៅខេត្តសៀមរាប ពេលដល់ម៉ោងគេចេញវាដើរប្រមាណ ១០នាក់ទាំងខ្សែៗ អ៊ីចឹងទៅដល់ពេលវាចេញពីធ្វើការ » ។
ចំណែកប្រជាពលរដ្ឋនៅក្រុងប៉ោយប៉ែតម្នាក់ទៀត ថ្លែងសុំមិនឱ្យបញ្ចេញឈ្មោះថា ជនជាតិចិនទាំងនេះ ទំនងគេចមកពីប្រទេសភូមា ឬមីយ៉ាន់ម៉ា និងហ៊្វីលីពីន មករស់នៅកម្ពុជា ដោយសារប្រទេសទាំងនោះមានវិធានការទប់ស្កាត់ជនបរទេសតឹងរ៉ឹង ដើម្បីបង្ការជំងឺកូវីដ១៩។ លោកបន្តថា ជនបរទេសទាំងនោះភាគច្រើនស្នាក់នៅតាមកាស៊ីណូនៅក្រុងប៉ោយប៉ែត ហើយលួចបើកល្បែងភ្នាល់តាមប្រព័ន្ធអ៊ីនធឺណិត នៅក្នុងកាស៊ីណូនោះតែម្ដង៖ «ក្នុងកាស៊ីណូដែលយើងមើលឃើញកាស៊ីណូក្រុមហ៊ុន ក្រោនរីសត (Ground Resort) មានចិនប្រហែល ៧០ភាគរយ ហើយកាស៊ីណូ ហ្គ្រែនដាយមែន (Grand Daiment) ក៏មាន ចិនរហូតដល់ទុកបុគ្គលិកខ្មែរ ថៃ និងឥណ្ឌូណេស៊ីអត់ឱ្យចេញទៅណា ហើយផ្សេងៗ ក៏មានដែរគឺគ្រប់តែកាស៊ីណូហ្នឹងបើកល្បែងអនឡាញ ដោយសារតែគេយល់ឃើញថា ល្បែងអនឡាញ គេលែងភ្នាល់តាមប្រព័ន្ធអ៊ីនធឹណែត»។
ឆ្លើយតបនឹងបញ្ហានេះ ស្នងការរងនគរបាលខេត្តបន្ទាយមានជ័យ លោក ហេង លីហួរ ប្រាប់អាស៊ីសេរីថា ក្នុងខែមេសានេះពុំមានជនជាតិចិនចំណូលថ្មីមកស្នាក់នៅខេត្តបន្ទាយមានជ័យនោះឡើយ។ លោកបញ្ជាក់ថា ជនជាតិចិនដែលប្រជាពលរដ្ឋឃើញដើរជាក្រុមនៅក្រុមប៉ោយប៉ែតនោះ ពួកគេបានមកកម្ពុជាតាំងតែមុនរាតត្បាតជំងឺកូវីដ១៩។ បន្ថែមពីនេះទៀត លោកថា ពុំមានជនជាតិចិនណាម្នាក់បើកល្បែងភ្នាល់តាមប្រព័ន្ធអ៊ីនធឺណិតនៅក្រុងប៉ោយប៉ែតនោះដែរ៖ «គឺមិនមានតែម្ដង បើកាស៊ីណូបិទ១០០ភាគរយ ហើយមិនទាន់មានព័ត៌មានដល់កម្លាំងសមត្ថកិច្ចរបស់ខ្ញុំនៅឡើយទេ ប៉ុន្តែកម្លាំងយើងនឹងព្យាយាមអស់លទ្ធភាពក្រោយពេលទទួលបានព័ត៌មាននេះ។តែរាល់ថ្ងៃនេះយើងធ្វើការរាល់ថ្ងៃ ដោយសារយើងព្យាយាមធ្វើការរស់នៅដាច់ដោយឡែក ពាក់ព័ន្ធនឹងជំងឺកូវិដ យើងព្យាយាមប្រយ័ត្នប្រយែងការដើរហើរ និងប្រយ័ត្នប្រយែងនៅលើទីផ្សារ » ។
ទោះជាយ៉ាងណាលោក ហេង លីហួរ មិនទាន់មានតួលេខចំនួនជនជាតិចិន ដែលស្នាក់នៅខេត្តបន្ទាយមានជ័យមានចំនួនប៉ុន្មាននាក់នៅឡើយទេ ដោយលោកប្រាប់ថា អាជ្ញាធរគ្រោងចុះស្រង់ស្ថិតិជនបរទេសនៅចុងខែមេសានេះ។
ទោះជាយ៉ាងនេះក្ដី ប្រធានសហព័ន្ធ សហជីព កម្មករនិយោជិត វិស័យទេសចរសេវាកម្ម កម្ពុជា លោក ម៉ម រិទ្ធី យល់ថា ជនជាតិចិនហូរចូលមកកម្ពុជាអំឡុងពេលនេះប្រឈមនឹងជំងឺកូវីដ១៩ មកចម្លងដល់ពលរដ្ឋកម្ពុជា ពីព្រោះប្រភពដើមនៃការរាតត្បាតជំងឺរលាកផ្លូវដង្ហើមថ្មីមកពីប្រទេសចិន។លោកស្នើឱ្យអាជ្ញាធរកម្ពុជាគួរតែចាត់វិធានការលើជនជាតិចិនទាំងនោះជាបន្ទាន់ ដើម្បីសេចក្ដីសុខរបស់ពលរដ្ឋក្នុងស្រុក។ រដ្ឋាភិបាលក្រុងភ្នំពេញបានហាមឃាត់ប្រជាពលរដ្ឋប្រទេសចំនួន រួមមាន អាមេរិក បារាំង អ៊ីតាលី អេស្ប៉ាញ និង អ៊ីរ៉ង់ ចូលមកកម្ពុជា ដើម្បីបង្ការជំងឺកូវីដ-១៩ ក៏ប៉ុន្តែរដ្ឋាភិបាលបានបើកទូលាយឱ្យជនជាតិចិនបន្តចូលមកកម្ពុជាបានដោយសេរី បើទោះបីជាប្រទេសនេះជាប្រភពដើមផ្ទុះជំងឺកូវីដ-១៩ ក្ដី។
អាស៊ីសេរីមិនអាចទាក់ទងអ្នកនាំពាក្យអគ្គនាយកដ្ឋានអន្តោប្រវេសន្ត លោក កែវ វណ្ណថន និងលោក អាត់ បូនី ដើម្បីសុំអត្ថាធិប្បាយអំពីបញ្ហាជនជាតិចិនបន្តចូលមកកម្ពុជានៅតំបន់ផ្សេង បានទេ នៅថ្ងៃទី២៣ មេសា ដោយទូរស័ព្ទចូលជាច្រើនដងពុំមានអ្នកទទួល។
របាយការណ៍ក្រសួងមហាផ្ទៃបានឲ្យដឹងថា ឆ្នាំ២០១៩ មានជនជាតិចិនរស់នៅក្នុងប្រទេសកម្ពុជារយ:ពេលវែងចំនួន ២៥ម៉ឺននាក់ (២៥០.០០០) ក្នុងនោះប្រមាណ ១០ ម៉ឺននាក់ (១០០.០០០) នៅទីក្រុងភ្នំពេញ និងជាង ១១ម៉ឺននាក់ (១១០.០០០) នៅខេត្តព្រះសីហនុ។ ក្រៅពីនេះនៅខេត្តស្វាយរៀងមានជនជាតិចិនចំនួនជាង ២ម៉ឺននាក់ (២០.០០០) នៅខេត្តបន្ទាយមានជ័យមានជិត២ម៉ឺននាក់ (២០.០០០) និងនៅខេត្តកណ្ដាលមានជាង ១ម៉ឺននាក់ (១០.០០០)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។