ព្រះអង្គ ប៊ុត ប៊ុនតិញ ចាត់ទុកសេចក្ដីប្រកាសរបស់គណៈសង្ឃនាយក ផ្អាកកម្មវិធីចូលឆ្នាំ ធ្វើតាមលោក ហ៊ុន សែន
2020.04.08

ព្រះសង្ឃឯករាជ្យរិះគន់ វិធានការគណៈសង្ឃនាយក និង សម្ដេចព្រះ មហាសង្ឃរាជ នៃគណៈ ធម្មយុត្តិកនិកាយជុំវិញការបង្ការជំងឺcovid-19។ ព្រះសង្ឃលើកឡើងថា គណៈសង្ឃនាយក និងសម្តេចព្រះ មហាសង្ឃរាជនៃគណៈ ធម្មយុត្តិកនិកាយ សម្រេចផ្អាក ការប្រារព្ធបុណ្យចូលឆ្នាំ គឺធ្វើឡើង តាមបញ្ជារបស់លោកនាយករដ្ឋមន្ត្រី ហ៊ុន សែន។
គណៈសង្ឃនាយក និងសម្តេចព្រះមហាសង្ឃរាជនៃគណៈធម្មយុត្តិកនិកាយនៃប្រទេសកម្ពុជាកាលពីថ្ងៃទី០៧ មេសា បានចេញសេចក្តីប្រកាសដាច់ដោយឡែកៗពីគ្នា ផ្អាកការប្រារព្ធកម្មវិធីបុណ្យចូលឆ្នាំខ្មែរតាមបែបព្រះពុទ្ធសាសនាចាប់ពីថ្ងៃច័ន្ទទី១៣ ដល់ ថ្ងៃព្រហស្បតិ៍ទី១៦សប្ដាហ៍ក្រោយនេះ ដោយអះអាងថា ដើម្បីចូលរួមទប់ស្កាត់ជំងឺកូវីដ១៩ តាមការណែនាំរបស់ក្រសួងសុខាភិបាលមិនឱ្យមានការប្រមូលផ្តុំមនុស្សច្រើន។ សង្ឃប្រកាសនេះ ធ្វើឡើងក្រោយ លោកនាយករដ្ឋមន្ត្រី ហ៊ុន សែន កាលពីថ្ងៃទី០៧ មេសា ប្រាប់អង្គសន្និសីទកាសែតនៅទីស្តីការគណៈរដ្ឋមន្ត្រីថា រដ្ឋាភិបាលបានសម្រេចផ្អាកពីធីបុណ្យចូលឆ្នាំខ្មែរប្រពៃណីជាតិឆ្នាំនេះដើម្បីចូលរួមទប់ស្កាត់ជំងឺកូវីដ១៩។
អាស៊ីសេរីមិនអាចទាក់ទងសម្តេចព្រះសង្ឃនាយក នន្ទ ង៉ែត និងសម្តេចព្រះ មហាសង្ឃរាជនៃគណៈធម្មយុត្តិកនិកាយ ប៊ូ គ្រី បានទេដោយទូរស័ព្ទមិនមានអ្នកទទួល។
ព្រះតេជព្រះគុណ លួន សុវ៉ាត មានថេរដីកាថា ព្រះអង្គក៏គាំទ្រមិនឱ្យមានការជួបប្រជុំដើម្បីទប់ស្កាត់ជំងឺកូវីត១៩ផងដែរ ប៉ុន្តែព្រះសង្ឃត្រូវតែឯករាជ្យមិនត្រូវរង់ចាំតែបទបញ្ជាពីលោកនាយករដ្ឋមន្ត្រី ហ៊ុន សែន ទើបបានចេញសង្ឃប្រកាសជាក្រោយនោះទេ។
ព្រះតេជព្រះគុណ បន្តថា ស្ថាប័នជាតិ សាសនា និងព្រះមហាក្សត្រ សុទ្ធតែជាស្ថាប័នឯករាជ្យ និងអព្យាក្រឹត្យ តែស្ថាប័នព្រះពុទ្ធសាសនាប្រកាសក្រោយប្រសាសន៍របស់លោក ហ៊ុន សែន បែបនេះមិនឆ្លុះបញ្ចាំងពីការដើរតួនាទីភាពជាអ្នកដឹកនាំនៅក្នុងព្រះពុទ្ធសាសនាប្រកបដោយបញ្ញាទេ៖ «ប៉ុន្តែនេះអត់ស្ដែងចេញពីតួនាទីរបស់ព្រះសង្ឃទេ ស្ដែងចេញពីតួនាទីថ្នាក់ដឹកនាំកំពូល។ ថ្នាក់ដឹកនាំកំពូលនៃសង្ឃហ្នឹងក៏ចេញសេចក្តីប្រកាសក្រោយពីស្ថាប័នជាតិទៅទៀត។ អ៊ីចឹងវាអត់មានភាពស្មើគ្នាប្រកបទៅដោយបញ្ញាគេហៅថាបញ្ញានៃការចូលរួមគិតគូរពីស្ថាប័នជាតិក្តី ស្ថាប័នសាសនាក្តីឱ្យមានភាពដើរទន្ទឹមគ្នាហ្នឹង វាអត់ដើរទន្ទឹមគ្នាទេ មានដើរមុខ មានដើរក្រោយ»។
ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ មានថេរដីកាថាកិច្ចការធ្វើបុណ្យនៅក្នុងវត្តអារាមវាជាកាតព្វកិច្ចដែលព្រះសង្ឃជាអ្នកជំនាញដែលត្រូវឱ្យដំបូន្មានទៅអ្នកដឹកនាំប្រទេស និងអ្នកនយោបាយ មិនដឹងត្រូវអង្គុយចាំនាយករដ្ឋមន្ត្រីបញ្ជាមកចេញសេចក្តីថ្លែងការណ៍នោះទេ៖ «ចំពោះប្រទេសយើងមិនបានឈរលើជំហរឯករាជ្យព្រះសង្ឃជាអ្នកនាំផ្លូវជាអ្នកណែនាំ ជាម្លប់ដល់ពុទ្ធបរិស័ទទេ។ អ្នកនយោបាយគឺជាជនកំហូច ឬក៏ជនផ្ដាច់ការហ្នឹងជាអ្នកនាំផ្លូវទៅវិញ។ នៅក្នុងសង្គមយើងមានមនុស្សអាក្រក់អ្នកនាំផ្លូវដូច្នេះសភាវៈអាក្រក់នៅក្នុងសង្គមយើងវាកើតបន្តកន្ទុយគ្នា ហើយប្រសិនបើព្រះសង្ឃដែលតំណាងឱ្យសេចក្ដីល្អ សភាវៈល្អព្រះសង្ឃអត់យកចិត្តទុកដាក់អ្វីសោះ មានន័យថា ព្រះសង្ឃនៅពេលនេះបានបាត់បង់តួនាទីជាម្លប់ ជាអ្នកនាំផ្លូវ ជាអ្នកណែនាំ»។
ក្រសួងសុខាភិបាលនៅថ្ងៃទី០៨ មេសានេះបានរកឃើញករណីកូវីដ១៩ថ្មី ចំនួន ២នាក់បន្ថែមទៀត ដែលធ្វើឱ្យអ្នកមានជំងឺកូវីដសរុបចំនួន ១១៧នាក់នៅទូទាំងប្រទេស ហើយក្នុងនោះមានអ្នកជាសះស្បើយសរុបបានកើនឡើងដល់៦៣នាក់ គឺស្មើនឹង៥៣,៨៤%បើធៀបទៅនឹងចំនួនអ្នកជំងឺកូវីត១៩ ទាំងអស់៕