កម្មកររោងចក្រ ម៉ូនូភា (Monopia – Cambodia) ជិត ៣០០នាក់ ធ្វើដំណើរពីរោងចក្រ នៅឯកំពង់ស្ពឺមកតវ៉ានៅរាជធានីភ្នំពេញ នៅព្រឹកថ្ងៃទី២២ វិច្ឆិកា។ ក្រុមកម្មករទាំងនោះ ទាមទាររកអន្តរាគមន៍ពីរដ្ឋមន្ត្រីក្រសួងការងារ លោក អ៊ិត សំហេង ឲ្យជួយដោះស្រាយដល់តំណាងកម្មករទាំង ៩នាក់ ដែលថៅកែរោងចក្របញ្ឈប់ពីការងារនោះ ឱ្យបានចូលធ្វើការវិញ។
ចាប់ពីថ្ងៃទី១៤ វិច្ឆិកាមក ខាងរោងចក្របានបញ្ឈប់តំណាងកម្មករ ៩នាក់ ដោយចោទថា ពួកគាត់ទាំងនោះ មិនគោរពបទបញ្ជាផ្ទៃក្នុងក្រុមហ៊ុន ដើរចោលកន្លែងការងារក្នុងម៉ោងធ្វើការ ប្រើកាយវិការ និងសំដីមិនសមរម្យចំពោះថៅកែ ញុះញង់ឲ្យកម្មករមិនធ្វើការងារ គំរាមកំហែងកម្មករជាដើម។
ក្រោយការបញ្ឈប់តំណាងកម្មករទាំងនេះ កម្មករជិត ១ពាន់នាក់ នាំគ្នាធ្វើដូកកម្មតវ៉ារហូតមកដល់ថ្ងៃទី២២ វិច្ឆិកា។
នៅពេលនេះ ក្រសួងការងារអនុញ្ញាតឱ្យតំណាងអ្នកតវ៉ា ១០រូប ចូលប្រជុំដោះស្រាយជាមួយមន្ត្រីនៅក្នុងទីស្ដីការក្រសួងការងារ។