ពលករ​ខ្មែរ​ជាង​១០០​នាក់​នៅ​ថៃ​នាំគ្នា​ធ្វើ​ពិធី​បង្សុកូល​គោរព​វិញ្ញាណក្ខន្ធ​លោក​បណ្ឌិត កែម ឡី

ដោយ សុជីវី
2023.07.17
ពលករ​ខ្មែរ​ជាង​១០០​នាក់​នៅ​ថៃ​នាំគ្នា​ធ្វើ​ពិធី​បង្សុកូល​គោរព​វិញ្ញាណក្ខន្ធ​លោក​បណ្ឌិត កែម ឡី ក្រុម​ពលករ​ខ្មែរ​នៅ​ទីក្រុង​បាងកក ប្រទេស​ថៃ ជួបជុំគ្នា​ធ្វើ​ពិធី​រំឭក​ខួប​ចងចាំ​ករណី​ឃាតកម្ម​លើ​លោក​បណ្ឌិត កែម ឡី និងឥស្សរជន​ល្បីៗ ផ្សេងទៀត​ដែល​ត្រូវ​បាន​ឃាតក​បាញ់​សម្លាប់​យ៉ាង​អយុត្តិធម៌ កាលពីថ្ងៃទី១៦ កក្កដា ២០២៣។
Photo Provided

ក្រុម​ពលករ​ខ្មែរ​ជាង​១០០​នាក់ រស់នៅ​ទីក្រុង​បាងកក ប្រទេស​ថៃ ជួបជុំគ្នា​ធ្វើ​ពិធី​រំឭក​ខួប​ចងចាំ​ករណី​ឃាតកម្ម​លើ​លោក​បណ្ឌិត កែម ឡី។ ក្រុម​ពលករ​ទាំងនោះ និមន្ត​ព្រះសង្ឃ​ខ្មែរ​ចំនួន ៣​អង្គ ប្រគេន​ចង្ហាន់ នៅ​ថ្ងៃទី​១៦ កក្កដា ដើម្បី​បង្សុកូល​ឧទ្ទិស​កុសល​ដល់​វិញ្ញាណក្ខន្ធ​លោក​បណ្ឌិត កែម ឡី រួម​ទាំង​ឥស្សរជន​ល្បីៗ ផ្សេងទៀត​ដែល​ត្រូវ​បាន​ឃាតក​បាញ់​សម្លាប់​យ៉ាង​អយុត្តិធម៌ រួមមាន​លោក ជា វិជ្ជា លោក ឈុត វុទ្ធី អ្នកនាង ពិសិដ្ឋ ពីលីកា និង​ព្រះតេជព្រះគុណ សំ ប៊ុនធឿន។

តំណាង​ពលករ​ខ្មែរ​ដែល​រៀបចំ​ពិធី​ជួបជុំ​បង្សុកូល​នេះ លោក ឆន សុខឿន ប្រាប់​អាស៊ីសេរី​ថា ដោយសារ​នៅ​ថ្ងៃទី​១០ កក្កដា ជា​ថ្ងៃ​ដែល​ឃាតក​បាន​បាញ់សម្លាប់​លោក​បណ្ឌិត កែម ឡី នៅ​ចំ​កណ្ដាល​រាជធានី​ភ្នំពេញ​កាលពី​៧​ឆ្នាំមុន ពលករ​ភាគច្រើន មិនអាច​ឈប់​សម្រាក​បាន ដូច្នេះ ទើប​ពួកគាត់​នាំគ្នា​លើក​ពិធី​មក​ធ្វើ​នៅ​ថ្ងៃទី​១៦ កក្កដា​វិញ ព្រោះ​ជា​ថ្ងៃ​ឈប់សម្រាក​ពី​ការងារ។

លោក ឆន សុខឿន៖ «តាម​ពិត​ទៅ ពួកគាត់ រួម​ទាំង​រូប​ខ្ញុំ ក៏ដូចជា​ក្រុមការងារ​ទាំងអស់ មក​ប្រារព្ធ​ពិធី​នេះ គឺ​ដោយសារ​មើលឃើញ​ថា អំពើ​អយុត្តិធម៌ ដែល​កើត​ទៅលើ​វីរជន ដែល​បាន​បូជា​អាយុជីវិត ដោយសារ​ជន​កំណាច មិនទាន់​រក​យុត្តិធម៌​ឃើញ​។ អ៊ីចឹង​ហើយ ពួកយើង នៅតែ​ប្រពន្ធ​ពិធី​រំឭក​ដល់​ពួកគាត់ ហើយ​ជាពិសេស យើង​ចាំ​មិន​ភ្លេច​នោះ គឺ​លោក​បណ្ឌិត កែម ឡី ដែល​គាត់​បាន​លាតត្រដាង និង​បង្ហាញ​ពី​ទង្វើ​អាក្រក់​របស់​លោក ហ៊ុន សែន ក៏ដូចជា របប​ដឹកនាំ​រដ្ឋាភិបាល​កម្ពុជា​សព្វ​ថ្ងៃ។ មានកូន​ខ្មែរ​ច្រើន​នាក់ ដែល​គាត់​មើលឃើញ​ពី​ទង្វើ​អាក្រក់​ហ្នឹង ហើយ​ងាក​ចេះ​តាមដាន​ពី​បញ្ហា​សង្គម​បច្ចុប្បន្ន​នេះ»

ក្រុម​ពលករ ធ្វើ​ពិធី​គោរព​វិញ្ញាណក្ខន្ធ​នេះ​នៅក្នុង​អគារ​ជួល ដែល​ពួកគេ​រស់នៅ ដោយ​អ្នកខ្លះ បាន​ពាក់​អាវយឺត មាន​រូបលោក​បណ្ឌិត កែម ឡី រួម​ទាំង​កាន់​រូបថត​របស់​លោក ឈុត វុទ្ធី លោក ជា វិជ្ជា ព្រះតេជព្រះគុណ សំ ប៊ុនធឿន និង​កាន់​ទង់ជាតិ​ខ្មែរ ដើម្បី​ថតរូប​ជុំគ្នា​។ នៅ​ក្រោយ​ចប់​ពិធី​តាម​បែប​សាសនា ពួកគេ​សំណេះសំណាល​សួរសុខទុក្ខ​គ្នា រួម​ទាំង​ជជែក​ពី​ស្ថានភាព​នយោបាយ​នៅក្នុង​ប្រទេស ជាពិសេស​ការបោះឆ្នោត​ជ្រើសតាំង​តំណាងរាស្ត្រ​នៅ​ថ្ងៃទី​២៣ កក្កដា ខាងមុខ​នេះ ដែល​ពួកគាត់​ចាត់​ទុកជា​ការ​បោះឆ្នោត​ក្លែងក្លាយ និង​បាន​ធ្វើ​យុទ្ធនាការ​ឱ្យ​ពលរដ្ឋ ចូលរួម​គូស​ខ្វែង​លើ​សន្លឹកឆ្នោត​ចោល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។