អ្នក​ឃ្លាំមើល​បារម្ភ​ពី​ភាព​មិន​ប្រក្រតី​ពេល​ផ្ទេរ​ការ​ឃុំ​ខ្លួន​អ្នក​ទោស​ទៅ​ពន្ធនាគារ​ថ្មី

ដោយ វ៉ែន សុមេធ
2019-11-23
អ៊ីម៉ែល
មតិ
Share
បោះពុម្ព
មណ្ឌល​អប់រំ​កែប្រែ​ទី​១ ឬ​ពន្ធនាគារ​ព្រៃស។ រូបថត​ថ្ងៃ​ទី​៩ ខែ​សីហា ឆ្នាំ​២០១៤។
មណ្ឌល​អប់រំ​កែប្រែ​ទី​១ ឬ​ពន្ធនាគារ​ព្រៃស។ រូបថត​ថ្ងៃ​ទី​៩ ខែ​សីហា ឆ្នាំ​២០១៤។
RFA

អ្នកឃ្លាំមើល​ពន្ធនាគារ​ព្រួយបារម្ភ​ពី​ភាព​មិន​ប្រក្រតី និង​អំពើពុករលួយ នៅ​ពេល​ផ្ទេរ ឬ​ឃុំខ្លួន អ្នកទោស​នៃ​ពន្ធនាគារ​រាជធានី​ភ្នំពេញ (PJ) ទៅ​អគារ​ពន្ធនាគារ​ថ្មី ឬ​អតីត​គម្រោង​ពន្ធនាគារ​ទំនើប។ ក្ដី​កង្វល់​នេះ គឺ​បន្ទាប់ពី​មាន​ព័ត៌មាន​ថា អាជ្ញាធរ​ពន្ធនាគារ​គ្រោង​ផ្ទេរ​អ្នក​ជាប់ឃុំ​នៅ​ពន្ធនាគារ ប៉េហ្ស៊ី (PJ) ទៅ​ដាក់​អគារ​ពន្ធនាគារ​ថ្មី ដែល​អតីត​ធ្លាប់​ជា​គម្រោង​ពន្ធនាគារ​ទំនើប (VIP)

អគ្គនាយករង និង​ជា​អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សវនា ឱ្យ​ដឹង​ថា ពន្ធនាគារ​ថ្មី ដែល​ជា​អតីត​របស់​គម្រោង​ពន្ធនាគារ​ទំនើប​នេះ គឺ​ឋិត​នៅ​ខាងក្រោយ​ពន្ធនាគារ​ព្រៃ​ស ត្រូវ​បាន​ក្រុមហ៊ុន​ឯកជន​ប្រគល់​ឱ្យ​រដ្ឋាភិបាល​រួចហើយ កាល​ពី​ដើម​ខែ​វិច្ឆិកា ហើយ​បច្ចុប្បន្ន​អគ្គនាយកដ្ឋាន​ពន្ធនាគារ​រង់ចាំ​ប្រកាស​របស់​ក្រសួង​មហាផ្ទៃ ដើម្បី​រៀបចំ​ផ្ទេរ​អ្នក​ជាប់ឃុំ និង​រៀបចំ​ទីនោះ ជា​ពន្ធនាគារ​របស់​រាជធានី​ភ្នំពេញ ហៅថា ប៉េហ្ស៊ី (PJ)

ទោះ​យ៉ាង​នេះ​ក្ដី លោក នុត សវនា បញ្ជាក់​ថា លោក​មិន​ដឹង​ថា ក្រសួង​មហាផ្ទៃ នឹង​ចេញ​ប្រកាស​នៅ​ពេល​ណា​ពិតប្រាកដ​នៅឡើយ​ទេ។ តែ​ដរាប​ណា មិន​ទាន់​មាន​ប្រកាស​របស់​ក្រសួងមហាផ្ទៃ ការផ្ទេរ​អ្នក​ជាប់ឃុំ និង​ការ​ប្ដូរ​ទីស្នាក់ការ​ពន្ធនាគារ​រាជធានី​ភ្នំពេញ មិន​អាច​ធ្វើ​ទៅ​បានទេ បើ​ទោះ​ជា​ក្រុមហ៊ុន​ឯកជន​បាន​ប្រគល់​អគារ​នោះ ឱ្យ​រដ្ឋាភិបាល​រួច​ហើយ​ក៏ដោយ៖ «បាទ ព្រោះ​ក្នុង​ច្បាប់​ទាល់តែ​ទទួល​ស្គាល់​ដោយ​ប្រកាស​របស់​ក្រសួង​មហាផ្ទៃ ទើប​យើង​អាច​ចាត់ទុកថា ជា​អង្គភាព​មួយ មាន​សិទ្ធិ​ពេញលេញ​អនុវត្ត​ជា​ពន្ធនាគារ ឬ​មណ្ឌល​អប់រំ​កែប្រែ​។ អ៊ីចឹង យើង​ចាំ​ក្រសួង​គេ​ប្រកាស​ចាត់ទុកថា ជាទី​តាំង​មួយ​ស្របច្បាប់ ទើប​យើង​អាច​សម្រេច​ជា​ពន្ធនាគារ​បាន»

អគារ​គម្រោង​ពន្ធនាគារ​ថ្មី ដែល​ជា​អតីត​គម្រោង​ពន្ធនាគារ​ឯកជន ដែល​គេ​ធ្លាប់​ដាក់ឈ្មោះ​ឱ្យ​ថា ពន្ធនាគារ​ទំនើប (VIP) នៅ​ខាងក្រោយ​ពន្ធនាគារ​ព្រៃស​នោះ វិនិយោគ​ដោយ​ក្រុមហ៊ុន​ឯកជន​ឈ្មោះ គន្ធ រីខុន ហូល​ឌី​ង (Kunn Rekon Holdings) ក្នុង​ទំហំ​ទឹកប្រាក់ ៤​លាន​ដុល្លារ​អាមេរិក ក្រោម​កិច្ចសន្យា​រយៈពេល ៤៥​ឆ្នាំ​។ ក្រុមហ៊ុន​បាន​ចាប់ផ្ដើម​ដំណើរការ​សាងសង់​កាល​ពី​ខែ​ឧសភា ឆ្នាំ​២០១៧​។ ប៉ុន្តែ នៅ​ត្រឹម​ពាក់កណ្ដាល​ឆ្នាំ​២០១៩ ក្នុង​ពេល​អគារ​នេះ ត្រូវ​បាន​សាងសង់​ហៀបនឹង​ជិត​ចប់​គម្រោង​ហើយ រដ្ឋមន្ត្រី​ក្រសួង​មហាផ្ទៃ លោក ស ខេង បានសម្រេច​លុបចោល​គម្រោង​ពន្ធនាគារ​ទំនើប​នេះ​វិញ ដោយ​សំអាង​ថា មិន​គួរ​មានការ​បែងចែក​ប្រភេទ​វណ្ណៈ​អ្នក​ជាប់ទោស មាន ឬ ក្រ​ឡើយ។

ចំណែក​ទីស្នាក់ការ​ពន្ធនាគារ​រាជធានី​ភ្នំពេញ ប៉េ​ហ្ស៊ី (PJ) វិញ សព្វថ្ងៃ ស្ថិត​នៅ​ក្នុង​បរិវេណ​អគ្គស្នងការ​នគរបាល​រាជធានី​ភ្នំពេញ​។ ស្ថានភាព​ចង្អៀត​ណែន​នៅ​ក្នុង​ពន្ធនាគារ PJ នេះ ក៏​មិនសូវ​ខុស​ពី​ពន្ធនាគារ​ផ្សេងទៀត​ដែរ ប៉ុន្តែ​អ្នកឃ្លាំមើល​ពន្ធនាគារ​សង្កេត​ឃើញ​ថា ពន្ធនាគារ ប៉េហ្ស៊ី PJ មាន​លក្ខណៈ​ប្រសើរ​ជាង​ពន្ធនាគារ​ផ្សេង បើ​ធៀប​នឹង​ពន្ធនាគារ​ចំនួន ២៧​កន្លែង​ផ្សេង​ទៀត។

នាយករង​ទទួលបន្ទុក​ឃ្លាំមើល​សិទ្ធិមនុស្ស នៃ​អង្គការ​លីកាដូ លោក អំ សំអាត មានប្រសាសន៍ថា ទំហំ​ពន្ធនាគារ​រាជធានី​ភ្នំពេញ ប៉េហ្ស៊ី (PJ) បច្ចុប្បន្ន ពិត​ជា​មាន​ស្ថានភាព​តូច​មែន។ ប៉ុន្តែ​លោក​បារម្ភ​ថា អំពើពុករលួយ និង​ភាព​មិន​ប្រក្រតី នៃ​ការ​ឃុំខ្លួន​អ្នក​ជាប់ឃុំ មិន​ស្មើភាព​គ្នា ដោយសារ​អគារ​ថ្មី ដែល​គ្រោង​ដាក់​ជំនួស​ពន្ធនាគារ PJ នោះ ល្អ និង​មាន​ស្ថានភាព​ស្រួល​ជាង​ពន្ធនាគារ​ផ្សេង​ទៀត៖ «យើង​មើលទៅ​ទំហំ​ពន្ធនាគារ​PJ ហ្នឹង​ក៏​វា​តូច​ដែរ​។ អ៊ីចឹង​បើ​យើង​មើល​ទៅលើ​ពន្ធនាគារ​ថ្មី​ហ្នឹង​វា​ធំ​។ ក៏ប៉ុន្តែ​គ្រាន់​ថា ពន្ធនាគារ​ថ្មី​នេះ វា​មាន​សភាព​ខុសពី​ពន្ធនាគារ​មុន​ៗ វា​ខុស​ពី​PJ ដោយសារ​វា​មាន​លក្ខណៈ​ទំនើប​ណា ហើយ​ពី​មុន​មក នៅ​ពន្ធនាគារ​PJ ហ្នឹង ក៏​វា​ជា​គេ​ថា ពន្ធនាគារ​មួយ​ដែល​ស្រួល​។ បាន​ន័យថា ល្អ​ជាងគេ​ដែរ នៅ​កម្ពុជា​។ អ៊ីចឹង​ផ្ទេរ​ទៅ​ពន្ធនាគារ​ថ្មី​នេះ ខ្ញុំ​បារម្ភ​ទេ ខ្លាច​លោ​ថ្ងៃក្រោយ​ទៅ វា​អាច​នឹង​មាន​ការរិះគន់ ឬក៏​មាន​អំពើពុករលួយ ភាព​មិន​ប្រក្រតី​កើតឡើង ព្រោះ​អ្នក (ទោស​) ដែល​មាន​លុយ មាន​កាក់ ចង់​ទៅ​ពន្ធនាគារ​ថ្មី​ហ្នឹង»

ជុំវិញ​ករណី​​រង់ចាំ​ប្រកាស​របស់​ក្រសួងមហាផ្ទៃ ដើម្បី​ផ្ទេរ​អ្នក​ជាប់ឃុំ និង​ផ្លាស់ប្ដូរ​ទីស្នាក់ការ​ថ្មី របស់​ពន្ធនាគារ​រាជធានី​ភ្នំពេញ​នេះ អាស៊ីសេរី មិន​អាច​សុំ​ការ​បញ្ជាក់​ពី​អ្នកនាំពាក្យ​ក្រសួង​មហាផ្ទៃ លោក ខៀវ សុភ័គ បាន​ទេ នៅ​ថ្ងៃ​ទី​២២ វិច្ឆិកា ដោយសារ​មិន​ទទួល​ទូរស័ព្ទ។

របាយការណ៍​របស់​អគ្គ​នាយកដ្ឋាន​ពន្ធនាគារ បង្ហាញ​ថា គិត​ត្រឹម​បំណាច់​ខែ​តុលា ពន្ធនាគារ និង​មណ្ឌល​អប់រំ​កែប្រែ ទាំង ២៨​ទីតាំង នៅ​ទូទាំង​ប្រទេស មាន​អ្នក​កំពុង​ជាប់ឃុំ​ជាង ៣​ម៉ឺន ៦​ពាន់​នាក់ (៣៦.៦០០​នាក់​) ក្នុង​នោះ​អ្នក​ជាប់ឃុំ​ជា​ស្ត្រី​មាន​ជាង ៣​ម៉ឺន​នាក់​។ អ្នក​កំពុង​ជាប់ឃុំ​ភាគច្រើន​ជា​ប្រភេទ​អ្នក​ប្រព្រឹត្ត​បទល្មើស​គ្រឿង​ញៀន។

ចំណែក​អង្គការ​លីកាដូ ដែល​ឃ្លាំមើល​ពន្ធនាគារ និង​មណ្ឌល​អប់រំ​កែប្រែ​ទូទាំង​ប្រទេស រក​ឃើញ​ថា ស្ថានភាព​ចង្អៀត​ណែន ក្នុង​ពន្ធនាគារ មិន​អាច​ដោះស្រាយ​បានទេ ដោយសារ​រដ្ឋាភិបាល និង​តុលាការ មិនទាន់​អាច​អនុវត្ត​តាម​ក្រមព្រហ្មទណ្ឌ​បាន ដោយ​ដាក់​អ្នកទោស​បទមជ្ឈិម​ឱ្យ​ស្ថិតនៅ​ក្រៅ​ឃុំ ដោយ​អនុវត្ត​យន្តការ​មាត្រា​ទោស​សហគមន៍ និង​ការ​ប្រែក្លាយ​ពន្ធនាគារ ឱ្យ​ទៅ​ជា​មណ្ឌល​អប់រំ​កែប្រែ ពិតប្រាកដ​ជាដើម​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល