អាជ្ញាធររាជធានីភ្នំពេញប្រកាសហាមឃាត់ការដុតផាវ កាំជ្រួច ឬបង្កសំឡេងផ្ទុះគ្រប់ប្រភេទ នៅក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាម ចាប់ពីថ្ងៃទី២៤ ដល់ទី២៧ មករាខាងមុខ។
ក្រៅពីនេះ អាជ្ញាធរក៏ហាមមិនឱ្យលេងល្បែងស៊ីសងគ្រប់ប្រភេទ និងការហែក្បួនបែបសាសនា ឬប្រពៃណីដែលគ្មានការអនុញ្ញាតផងដែរ។
អាជ្ញាធររាជធានីភ្នំពេញបកស្រាយក្នុងសេចក្ដីជូនដំណឹងនៅថ្ងៃទី២០ មករាថា វិធានការទាំងនេះ គឺដើម្បីរក្សាសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយៈសាធារណៈ។ បន្ថែមពីលើនេះ អាជ្ញាធរណែនាំឱ្យពលរដ្ឋ និងគ្រប់ទីតាំងក្នុងរាជធានីភ្នំពេញ ត្រូវប្រុងប្រយ័ត្នចំពោះការអុជធូបទៀន ក្រដាសសែន ភ្លើងចង្ក្រាន និងចរន្តអគ្គិសនី ដែលអាចបង្កឱ្យមានគ្រោះអគ្គិភ័យកើតឡើងជាយថាហេតុ។
រដ្ឋបាលរាជធានីភ្នំពេញតម្រូវឱ្យអង្គភាព និងមន្ត្រីក្រោមឱវាទ ផ្សព្វផ្សាយដល់ប្រជាពលរដ្ឋ ដើម្បីអនុវត្តតាមសេចក្ដីជូនដំណឹងនេះឱ្យមានប្រសិទ្ធភាព ហើយអាជ្ញាធរព្រមានថា ជនណាប្រព្រឹត្តល្មើស ឬបំពានសេចក្ដីណែនាំនេះ នឹងត្រូវទទួលទោសតាមច្បាប់ជាធរមាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។