សមត្ថកិច្ច​ឃាត់ខ្លួន​​ខ្មាន់​កាំភ្លើង​​ជនជាតិ​​ចិន ដែល​​បាញ់​សម្លាប់​​ជនជាតិ​​ចិន​​ ២​​នាក់​​នៅ​​ខេត្ត​ព្រះសីហនុ​

2022.08.07
Share on WhatsApp
Share on WhatsApp
សមត្ថកិច្ច​ឃាត់ខ្លួន​​ខ្មាន់​កាំភ្លើង​​ជនជាតិ​​ចិន ដែល​​បាញ់​សម្លាប់​​ជនជាតិ​​ចិន​​ ២​​នាក់​​នៅ​​ខេត្ត​ព្រះសីហនុ​ អគារ​បន​ល្បែង​កាស៊ីណូ​ តុង​ហ្វា​ង​ ប៉ា​លី​រិ​ន (Tong Fang Palirin) ស្ថិតនៅក្រុងកំពង់សោម ខេត្តព្រះសីហនុ។
រូប៖ អគ្គស្នងការដ្ឋាននគរបាលជាតិ

សមត្ថកិច្ច​ខេត្ត​ព្រះសីហនុ អះអាងថា ខ្មាន់កាំភ្លើង​ជនជាតិ​ចិន​ដែល​បាន​បាញ់​សម្លាញ់​ជនជាតិ​ចិន​ដូចគ្នា ស្ថិតនៅ​អគារ​បន​ល្បែង​កាស៊ីណូ​តុង​ហ្វា​ង​ប៉ា​លី​រិ​ន (Tong Fang Palirin) ​ត្រូវបាន​បញ្ជូនទៅ​តុលាការខេត្ត​នេះ​រួចរាល់​ហើយ​។ មន្ត្រី​សង្គម​ស៊ីវិល ជំរុញ​ដល់​អាជ្ញាធរ​ឱ្យ​ព​ន្លឿ​ន​នីតិវិធី​ស៊ើបអង្កេត​រក​អ្នកពាក់ព័ន្ធ និង​អ្នក​ដែល​លក់​កាំភ្លើង​ទៅឱ្យ​ជនជាតិ​ចិន​ប្រើប្រាស់​សម្លាប់​មនុស្ស​តាម​ទំនើងចិត្ត​នៅ​កម្ពុជា​។​

ស្នងការ​នគរបាល​ខេត្ត​ព្រះសីហនុលោក ជួន ណា​រិន្ទ ឱ្យ​វិទ្យុ​អាស៊ីសេរី​ដឹង​នៅ​ថ្ងៃទី​៥ ខែសីហាថា មកដល់ពេលនេះ​សមត្ថកិច្ច​បាន​ឃាត់ខ្លួន​ឧក្រិដ្ឋជន​ជនជាតិ​ចិន​ចំនួន​ ៤​នាក់ ដែលជា​ជនសង្ស័យ ពាក់ព័ន្ធ​នឹង​ការបាញ់សម្លាប់​ជនជាតិ​ចិន​ ២​នាក់​។ លោក​អះអាង​ទៀតថា ជនជាតិ​ចិន​ទាំង​៤​នាក់​នោះ មាន​ម្នាក់​ឈ្មោះ ហ្វេ​ង យី​ង​ហ្វ៊ី (ZHENG YINGFEI) បាន​សារភាពថា ​ខ្លួន​ពិតជា​បាន​បាញ់សម្លាប់​ជនជាតិ​ចិន​ទាំងពីរ​នាក់ និង​ជនជាតិ​ចិន​ម្នាក់ទៀត​បណ្តាលឱ្យ​រងរ​បួស​ធ្ងន់ ដោយសារតែ​រឿង​ជំពាក់​ប្រាក់ និង​មានទំនាស់​ផ្នែក​អាជីវកម្ម​។​

លោក ជួន ណា​រិន្ទ បន្ថែមថា ជនជាតិ​ចិន​ទាំង ​៤​នាក់ និង​សម្ភារៈ​វត្ថុតាង​ដែលមាន​កាំភ្លើង​ចំនួន​ ៥ដើម សមត្ថកិច្ច​បានរៀបចំ​កសាង​សំណុំរឿង​បញ្ជូនទៅ​តុលាការ​រួចរាល់​ហើយ​។ លោក​អះអាង​ទៀតថា ករណី​ឃាតកម្ម​លើ​ជន​ជាតិចិន​នេះ សមត្ថកិច្ច​ក៏​កំពុង​បន្ត​នៅ​នីតិវិធី​តាម​ចាប់ខ្លួន ក្រុម​ជនល្មើស​ដែលមាន​ជាប់​ពាក់ព័ន្ធ​មួយចំនួនទៀត​ដែល​កំពុង​រត់គេចខ្លួន​៖ «​គឺ​យើង​មិន​ដក​ដៃ​ទេ ចំពោះ​អាវុធ​ដែល​យើង​មាន​សកម្មភាព ដែល​ធ្វើ​សកម្មភាព​បើ​យើង​ដក​បាន​ក៏​យើង​ស្រាវជ្រាវ​រក​ប្រភព​បន្តបន្ទាប់ មិនមែន​ទុកចោល​ទេ ព្រោះនេះ​នៅក្នុង​ករណី​ស៊ើបអង្កេត​ស្រាវជ្រាវ​បន្តទៀត​របស់​នគរបាល​ជំនាញ ហើយ​យើង​មិនអាច​លាតត្រដាង​បានទេ​ព្រោះ​នៅសល់​ច្រើន​ដែល​យើង​កំពុង​ធ្វើ ក្នុង​ដៃ​សមត្ថកិច្ច​ដែល​យើង​កំពុង​តាម​អត់​ទាន់​ដកថយ​ទេ​»​។​

កាលពី​យប់​ថ្ងៃទី​៣០ កក្កដា មាន​ជនជាតិ​ចិន​មួយក្រុម​មាន​គ្នា​ជាង ​១០​នាក់ បាន​ដក​កាំភ្លើង​សម្លាញ់​ជនជាតិ​ចិន​ដូចគ្នា បណ្តាលឱ្យ​ជនជាតិ​ចិន​២​នាក់​បាន​ស្លាប់​ភ្លាមៗ ​នៅក្នុង​ថ្លុកឈាម និង​ជនជាតិ​ចិន​ម្នាក់​បាន​រងរបួស​ធ្ងន់ ស្ថិតនៅ​ទីតាំង​អគារ​បន​ល្បែង​កាស៊ីណូ តុង​ ហ្វា​ង​ ប៉ា​លី​រិ​ន (Tong Fang Palirin) ក្នុង​ខេត្ត​ព្រះសីហនុ​។ ទោះជា​យ៉ាងណា លោក ជួន ណា​រិន្ទ មិនទាន់​អាច​បញ្ជាក់ថា អគារ​បន​ល្បែង​កាស៊ីណូ តុង​ ហ្វា​ង​ ប៉ា​លី​រិ​ន (Tong Fang Palirin) នឹង​ផ្អាក​អាជីវកម្ម ឬ​ឱ្យ​ដំណើរ​ការបន្ត​នោះទេ។​

ក្រោយ​មាន​ហេតុការណ៍​ផ្ទុះអាវុធ​នេះ រដ្ឋបាលខេត្ត​ព្រះសីហនុ បានឱ្យដឹង​តាមរយៈ​ទំព័រ​ហ្វេ​ក​ប៊ុ​ក​ផ្លូវការ​របស់ខ្លួន​ថា ចំពោះ​ទីតាំង​កាស៊ីណូ និង​ទីតាំង​អាជីវកម្ម​ផ្សេងទៀត ដែលមាន​ករណី​ត្រូវបាន​រកឃើញថា​មាន ការបាញ់សម្លាប់​មនុស្ស ការចាប់​បង្ខាំង ការប្រើប្រាស់​គ្រឿងញៀន និង​បទល្មើស​ផ្សេងៗ អាជ្ញាធរ​នឹងធ្វើ​ការបិទ​ផ្អាក​អាជីវកម្ម និង​ស្នើ​ដល់​រដ្ឋាភិបាល​ឱ្យ​ដក​អាជ្ញាប័ណ្ណ​មិនឱ្យ​ប្រកប​របរ​រកស៊ី​នៅក្នុង​ខេត្ត​ព្រះសីហនុ​នេះ​ទៀតឡើយ​។​

ទាក់ទង​នឹង​ករណី​ជន​ជាតិចិន​បាញ់បោះ​គ្នា​នេះដែរ ពលរដ្ឋ​ម្នាក់​នៅរស់​ខេត្ត​ព្រះសីហនុ លោក សម សុផាត ឆ្ងល់​ថា​ជនជាតិ​បរទេស ជាពិសេស​ជនជាតិ​ចិន​ដែល​ចូលមក​រកស៊ី​ក្នុង​ខេត្ត​នេះ សុទ្ធសឹង​តែមាន​អាវុធ​កាន់​ក្នុង​ដៃ​បង្ក​អ​សន្តិ​សង្គម​ជា​បន្តបន្ទាប់​។ លោក​ព្រួយបារម្ភ​ថា បើ​ជន​ជាតិចិន​មាន​អាវុធ​ប្រើប្រាស់​ក្នុង​ដៃ​តាម​ទំនើងចិត្ត​ដូច​សព្វថ្ងៃនេះ នោះ​វា​នឹង​បង្កឱ្យមាន​ការគំរាមកំហែង​ធ្ងន់ធ្ងរ​ដល់​ប្រជាពលរដ្ឋ និង​សង្គមជាតិ​ទាំងមូល​៖ «​យើង​ព្រួយបារម្ភ​ណាស់ លើ​ជនជាតិ​បរទេស ដែល​ចូលមក​នៅ​ស្រុក​យើង​ហើយ​ប្រើ​អាវុធ​ដោយ​អនាធិបតេយ្យ​អ៊ីចឹង​។​យើង​ព្រួយបារម្ភ​ណាស់​។ វា​អាចមាន​ផលប៉ះពាល់​ដល់​ប្រជាពលរដ្ឋ​ដែល​គាត់​កំពុង​រស់នៅ​។ អ៊ីចឹង​អាជ្ញាធរ​ដែលមាន​សមត្ថ​កិច្ច​គួរតែ​ចាត់វិធានការ​នៅលើ​រឿង​ដែល​ជនបរទេស​ប្រើ​អាវុធ​ខុសច្បាប់​ហ្នឹង​»​។​

ជុំវិញ​រឿងនេះ​ដែរ អ្នកសម្របសម្រួល​សមា​គម​ការពារ​សិទ្ធិមនុស្ស​អាដហុក (ADHOC) ប្រចាំខេត្ត​ព្រះសីហនុ អ្នកស្រី ជៀប សុធា​រី នៅតែ​បន្ត​ស្នើ​យ៉ាងទទូច​ដល់​អាជ្ញា​ធរមាន​សមត្ថកិច្ច​ត្រូវតែ​អនុវត្ត​ច្បាប់​ឱ្យបាន​ម៉ឺងម៉ាត់ ចំពោះ​ជនជាតិ​ចិន​ដែល​ប្រើប្រាស់​អាវុធ​បាញ់បោះ​គ្នា​ក្នុង​ខេត្ត​ព្រះសីហនុ​ជា​បន្តបន្ទាប់​។ អ្នកស្រី​សង្កេតឃើញថា អាជ្ញាធរ​ហាក់​មិនទាន់មាន​ចំណាត់ការ​ច្បាស់លាស់​ណាមួយ​នៅឡើយ ចំពោះ​ការគ្រប់គ្រង​ជនបរទេស ជាពិសេស​ជនជាតិ​ចិន ដែល​បណ្តោយឱ្យ​ពួកគេ​អាចមាន​អាវុធ​ទំនើបៗ​ប្រើប្រាស់​នៅ​កម្ពុជា​តាម​ទំនើងចិត្ត​បែបនេះ​៖ «​រាល់​បទល្មើស​ដែល​កើតមាន គឺ​ជន​ប្រព្រឹត្ត​បទល្មើស​តែងតែមាន​អាវុធ ដូចជា​កាំភ្លើង​អីហ្នឹង​យកមកប្រើ​។ តើ​ពួកគាត់​ហ្នឹង​បាន​អាវុធ​មកពីណា​? ហើយ​អាវុធ​ហ្នឹង​វា​ចូលមក​តាម​ណា​? អ្វីដែល​ខ្ញុំ​មានការ​ព្រួយបារម្ភ​ដែរ​ថា តើ​យើង​នៅក្នុង​ប្រទេស​យើង ថា​អ្នកខ្លះ​ដែល​គាត់​មាន​សិទ្ធិ​កាន់​អាវុធ​។ តើ​យើង​មាន​ដែល​ធ្វើការ​ត្រួតពិនិត្យ​ទេ​? ថា​តើ​អាវុធ​អ្នក​ដែលមាន​សិទ្ធិ​កាន់​ហ្នឹង​គាត់​បាន​ទុក​នៅជាប់​ខ្លួន​ឬ​អត់​? តាម​ខ្ញុំ​ដឹង​នៅ​ប្រទេស​គេ​អ្នក​ដែលមាន​សិទ្ធិ​កាន់​អាវុធ​គឺ អាវុធ​ហ្នឹង​យកទៅ​កាន់​យកទៅ​ប្រើ​នៅពេលដែល​ចុះ​ប្រតិបត្តិការ​ទេ​។ រួចហើយ​ចប់​ម៉ោង​ការងារ​គេ​មាន​ឃ្លាំង​មួយ​ដាក់​»​។​

ប្រជាពលរដ្ឋ និង​មន្ត្រី​សង្គម​ស៊ីវិល ជំរុញ​ដល់​អាជ្ញាធរខេត្ត​ព្រះសីហនុ​គួរតែ​កំណត់​ចាប់​មុខសញ្ញា​ជនបរទេស​ណា​ដែលមាន​អាវុធ​ក្នុង​ដៃ និង​ត្រូវ​ចាត់វិធានការ​ដោយ​ធានាថា​គ្មាន​ការឃុបឃិត​ប្រព្រឹត្ត​អំពើពុករលួយ ដើម្បី​ធានា​សុវត្ថិភាព​ជូន​ពលរដ្ឋ​ម្ចាស់​ស្រុក​។ លើសពីនេះ ពួកគាត់ក៏​បន្ត​ស្នើ​ដល់​អាជ្ញាធរ​ស៊ើបអង្កេត​ដោយ​ឯករាជ្យ​តាម​ចាប់ខ្លួន​មេខ្លោង​ធំៗ ដែលមាន​លុយ​មានអំណាច​ធ្វើ​អាជីវកម្ម​ជួញដូរ​អាវុធ​ទៅឱ្យ​ជនជាតិ​ចិន​ជា​បន្តបន្ទាប់​មកនេះ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក​នាយក​រដ្ឋមន្ត្រី ហ៊ុន សែន ប្រកាស​មិន​ជួប​អ្នក​គាំទ្រ នៅ​បុរី​ញូវយ៉ក ខណៈ​គណបក្ស​ប្រឆាំង​គ្រោង​ធ្វើ​បាតុកម្ម​ប្រឆាំង​លោក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។