លោក សម រង្ស៊ី លើកទឹកចិត្តឱ្យពលរដ្ឋដែលដាច់បាយស្នើផ្ទាល់ទៅកម្មវិធីស្បៀងអាហារពិភពលោក
2021.04.30
លោក សម រង្ស៊ី ប្រធានស្តីទីគណបក្សសង្គ្រោះជាតិ ស្នើឱ្យពលរដ្ឋខ្មែរដែលកំពុងដាច់បាយ នៅទីក្រុងភ្នំពេញដោយសារការបិទខ្ទប់ ផ្ញើសារអេឡិចត្រូនិក ឬអ៊ីម៉េល (Email) សុំជំនួយស្បៀងអាហារបន្ទាន់ ពីកម្មវិធីស្បៀងអាហារពិភពលោក របស់អង្គការសហប្រជាជាតិ (World Food Programme)។
លោក សម រង្ស៊ី បានបង្ហាញពីគំរូសារជាភាសាអង់គ្លេស បង្ហោះតាមទំព័រហ្វេសប៊ុក កាលពីថ្ងៃទី២៩ ខែមេសា ដែលពលរដ្ឋគួរសរសេរផ្ញើទៅ នាយកប្រតិបត្តិនៃកម្មវិធីស្បៀងអាហារពិភពលោក (WFP) លោក ដេវីដ ប៊ីស ស្ល៊ី (David Beasley) ដោយខ្លឹមសារ ថា យើងខ្ញុំជាពលរដ្ឋខ្មែរក្រីក្រ ដែលត្រូវរដ្ឋអំណាចបិទខ្ទប់ក្នុងផ្ទះ ទូទាំងរាជធានីភ្នំពេញ។ ក្នុងការបិទខ្ទប់ដ៏តឹងរ៉ឹងបែបនេះ យើងខ្ញុំមិនអាចទៅរកចំណីអាហារបានទេ។ យើងខ្ញុំមិនអាចចេញទៅក្រៅផ្ទះ មិនអាចទៅធ្វើការរកប្រាក់ចំណូល ដើម្បីរស់ពីមួយថ្ងៃ ទៅមួយថ្ងៃបាន ដូចអ្វីដែលយើងខ្ញុំធ្លាប់រស់នៅជាធម្មតា ពីមុនមកទេ។ ឥឡូវនេះ យើងខ្ញុំខ្វះចំណីអាហារកាន់តែខ្លាំងឡើង ស្រែកឃ្លានរាល់ថ្ងៃ ហើយកំពុងតែឈានទៅរកភាពទុរភិក្ស ឬភាពអត់ឃ្លាន។
សំណើរបស់លោក សម រង្ស៊ី នេះ ធ្វើឡើងបន្ទាប់ពីតុលាការក្រុងភ្នំពេញ កាលពីថ្ងៃទី២៨ ខែមេសា បានចេញសាលដីកាឱ្យតាមចាប់ខ្លួនលោក សម រង្ស៊ី ចោទប្រកាន់ពីបទញុះញង់ ក្រោយដែលលោកបានអំពាវនាវជាសាធារណៈ ឱ្យប្រជាពលរដ្ឋចេញតវ៉ាឱ្យអាជ្ញាធរផ្តល់ខ្វះស្បៀងអាហារ ដោយសារការបិទខ្ទប់ទីក្រុងភ្នំពេញនិងក្រុងតាខ្មៅ ដើម្បីទប់ស្កាត់ការឆ្លងរាលដាលខ្លាំងនៃជំងឺកូវីដ១៩។
ជុំវិញបញ្ហានេះ អាស៊ីសេរីមិនអាចសុំការឆ្លើយតប ពីអ្នកនាំពាក្យរដ្ឋាភិបាល លោក ផៃ ស៊ីផាន និងអភិបាលក្រុងភ្នំពេញ លោក ឃួង ស្រេង បានទេ កាលពីយប់ថ្ងៃទី ២៩ ខែមេសា។
ពាក់ព័ន្ធនឹងបញ្ហាដាច់ស្បៀងអាហារនេះដែរ សហជីពនៃក្រុមហ៊ុន ណាហ្គាវើលដ៍ (Naga World) អំពាវនាវសុំស្បៀងអាហារ ឬថវិកាពជួយដល់បុគ្គលិកដែលកំពុងប្រឈមការខ្វះខាត ក្នុងអំឡុងវិបត្តិកូវីដ១៩។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ កញ្ញា ឈឹម ស៊ីថរ ប្រាប់អាស៊ីសេរី កាលពីយប់មិញថា រយៈពេលជាងមួយឆ្នាំមកហើយ បុគ្គលិកក្រុមហ៊ុនជួបបញ្ហាប្រឈមក្នុងជីវភាពនិងខ្វះស្បៀងអាហារ ដោយសារតែក្រុមហ៊ុនបានកាត់បន្ថយបុគ្គលិក។ កញ្ញាបន្តថា រហូតមកដល់ពេលនេះ រដ្ឋាភិបាលនិងអាជ្ញាធរក្រុង ក៏មិនបានផ្តល់ជំនួយជាស្បៀងអាហារដល់ពួកគាត់នៅឡើយដែរ៖ «សហជីពបានប្រកាស រកសប្បុរសជន ជួយឧបត្ថម្ភតាមលទ្ធភាព ដូចជាស្បៀងអាហារ ថវិកា ឬសម្ភារៈក្តី ដើម្បីយកមកជួយសមាជិកដែលខ្វះខាត។ ស្ថានភាពសេដ្ឋកិច្ចរបស់បុគ្គលិក ណាហ្គា វើល៍ ជាង៨ពាន់នាក់នេះគឺថា ៩០% រងផលប៉ះពាល់។ ជាងមួយឆ្នាំនេះ ពួកគាត់ធ្វើការអត់បានពេញលេញទេ...»។
កញ្ញា ឈឹម ស៊ីថរ បន្តថា ក្រោយប្រកាសស្វែងរកជំនួយបានមួយថ្ងៃ សហជីពទទួលបានថវិកា និងអង្ករពីសប្បុរសជនមួយចំនួន ក្នុងនោះបុគ្គលិករបស់ក្រុមហ៊ុន ណាហ្គា ផ្សេងទៀត ដែលមានលទ្ធភាពក៏បាននាំគ្នារៃអង្គាសប្រាក់ ជួយដល់បុគ្គលិកដែលកំពុងខ្វះខាត នោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។