សង្គមស៊ីវិលអោយដឹងថា បញ្ជារបស់អាជ្ញាធរក្រុងភ្នំពេញហាមឃាត់ ឡានធុនធំ និងឡានដឹកបេតុងស៊ីម៉ងត៍ មិនឲ្យចូលក្រុងនៅម៉ោងកកស្ទះចរាចរណ៍ គ្មានប្រសិទ្ធិភាពទេ ដោយសារតែខ្វះវិធានការជាក់លាក់។ ប៉ុន្តែ នាយរងការិយាល័យនគរបាលចរាចរណ៍ផ្លូវគោករាជធានីភ្នំពេញ អះអាងថា តែងបានអនុវត្តតឹងរ៉ឹងនូវបទបញ្ជានេះ។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា អាជ្ញាធររាជធានីភ្នំពេញ ទាំងរដ្ឋបាល ទាំងស្នងការរាជធានី មិនទាន់មានវិធានការគ្រប់ជ្រុងជ្រោយក្នុងការអនុវត្តបទបញ្ជាហាមឡានធំ ចូលក្រុងក្នុងម៉ោងហាមឃាត់ ឲ្យមានប្រសិទ្ធិភាពទេ ដោយសារតែការដាក់កម្លាំងពង្រាយអនុវត្តបទបញ្ជានេះ បានត្រឹមតែក្នុងដែនដី មួយចំនួន មិនទាន់មានភាពទូលាយ៖ « អ៊ីចឹង ការលើកឡើងជាវិធានការ ឬក៏ការរឹតបន្តឹងខ្លះ វាគ្រាន់តែជាការយករួចខ្លួន។ គេចពីការរិះគន់ បាទ ! គេចពីការរិះគន់»។
ការលើកឡើងបែបនេះ ក្រោយពេលពលរដ្ឋជាច្រើន នៅតែរអ៊ូរទាំ ថា ឡានធុនធំ ឡានដឹកបេតុងស៊ីម៉ងត៍ នៅតែអាចចេញចូល និងបញ្ឈរបាញ់ស៊ីម៉ងត៍តាមដងផ្លូវនៅក្នុងរាជធានីភ្នំពេញ ក្នុងម៉ោងហាមឃាត់ ដែលបង្កការកកស្ទះ និងគ្រោះថ្នាក់ចរាចរណ៍បើកបុករះលើពលរដ្ឋ ជាញឹកញយ។
ហេតុការណ៍ជាក់ស្ដែង គឺកាលពីម៉ោងប្រមាណ៧ព្រឹក ថ្ងៃទី២០ កុម្ភៈ រថយន្តដឹកបេតុង នៃក្រុមហ៊ុនឯកជនមួយឈ្មោះ អេស.ស៊ី.ជី ខនគ្រីត (SCG Concrete) បានបង្កការបុករះ នៅត្រង់ចំណុចភ្លើងស្តុបបឹងត្របែក ក្នុងសង្កាត់ទន្លេបាសាក់ បង្កឲ្យពលរដ្ឋយ៉ាងតិច៤នាក់រងរបួស និង គ្រូបង្រៀននៅវិទ្យាល័យបឹងត្របែកម្នាក់ស្លាប់។
កាលពីខែធ្នូ ឆ្នាំ២០១៦ អតីតអភិបាលរាជធានីភ្នំពេញ លោក ប៉ា សុជាតិវង្ស បានជូនដំណឹង ឲ្យហាមឃាត់ការធ្វើចរាចរណ៍និងបញ្ឈររថយន្តបាញ់បេតុង ចូលក្នុងរាជធានីភ្នំពេញ នៅពេលព្រឹក ចាប់ពីម៉ោង៦ ដល់ម៉ោង៩ព្រឹក និងនៅពេលល្ងាច ចាប់ពីម៉ោង ៤ល្ងាច ដល់ ៨យប់ ដើម្បីរក្សាសណ្ដាប់ធ្នាប់ របៀបរៀបរយសាធារណៈ និងកាត់បន្ថយការកកស្ទះ ក្នុងរាជធានីភ្នំពេញ។
នាយរងការិយាល័យនគរបាលចរាចរណ៍ផ្លូវគោករាជធានីភ្នំពេញ លោក សែម សុគន្ធា ប្រាប់អាស៊ីសេរី នៅថ្ងៃទី២១ កុម្ភៈ ថា នគរបាលចរាចរណ៍តែងតែអនុវត្តសេចក្ដីជូនដំណឹងរបស់អាជ្ញាធររាជធានីភ្នំពេញ ខ្ជាប់ខ្ជួនជានិច្ច ទាំងមុនពេល ទាំងក្រោយពេលករណីបុករះលើពលរដ្ឋ និងបណ្ដាលឲ្យគ្រូបង្រៀនម្នាក់ស្លាប់នោះ៖ « ការិយាល័យចរាចរណ៍ បានចាត់វិធានការយូរហើយ។ យើងបានអនុវត្តយូរហើយ តាំងពីថ្ងៃទី០៩ ខែមករា។ យើងបានអនុវត្តទាំង៤គោលដៅ ទី១ ផ្លូវហាណូយ ផ្លូវ៥៩៨ ផ្លូវជាតិលេខ៥ និងផ្លូវជាតិលេខ១។ យើងអនុវត្តហើយហើយ។ ជារួមអ្នករិះគន់ គាត់រិះគន់មិនដឹងថា តើអាជ្ញាធរយើង កំពុងតែសស្រាក់សស្រាំប៉ុណ្ណាទេ។ តែដោយឡែកការបញ្ជារបស់ស្នងការឯកឧត្ដម ស ថេត ក៏ដូចជា ឯកឧត្ដមអភិបាលនៃគណៈអភិបាលរាជធានីភ្នំពេញ កម្លាំងការិយាល័យចរាចរណ៍រាជធានីភ្នំពេញយើង បានអនុវត្ត ខ្ជាប់ខ្ជួន»។
បើទោះមានការអះអាងបែបនេះ ក៏ស្នងការនគរបាលរាជធានីភ្នំពេញ លោក ស ថេត ធ្លាប់លើកឡើងថា បទបញ្ជាហាមរថយន្តធុនធំ ចូលរាជធានីភ្នំពេញ ក្នុងម៉ោងហាមឃាត់ កន្លងមកអនុវត្តគ្មានប្រសិទ្ធិភាពទេ៖ « ប្រជាពលរដ្ឋ សិស្សានុសិស្ស មន្ត្រីរាជការ គឺគាត់ជ្រក់ជ្រេញណាស់។ ចៅហ្វាយក្រុង ឡើងមកប៉ុន្មានហើយ ស្នងការ នៅតែអនុវត្តសាបដូចទឹកទន្លេ។ អ៊ីចឹង យើងលេងឲ្យណាណី។ ក៏ប៉ុន្តែយើងជួបបញ្ហាបន្លិច។ តែអាហ្នឹង រឿងរបស់សាលាក្រុងទេ។ គេថា ឥឡូវសំណង់ ការសាងសង់អ្វី គេធ្វើតែពេលថ្ងៃ។ ត្រឹមតែម៉ោង១០ ម៉ោងអ្វី គេបិទហើយ។ កម្មករគេ អត់មានទេ អ៊ីចឹងដឹកពេលយប់ឲ្យគេធ្វើយ៉ាងម្ដេច។ អានេះ តាមកន្លែងដែលគេសាងសង់។ គេនិយាយអ៊ីចឹង ប៉ុន្តែយើងអត់ដឹងទេ។ យើងអនុវត្តតែតាមសារាចររបស់សាលារាជធានី ភ្នំពេញ»។
នាយរងការិយាល័យចរាចរណ៍ផ្លូវគោករាជធានីភ្នំពេញ លោក ប៉ែន ឃុន ប្រាប់សារព័ត៌មានក្នុងស្រុក (Fresh News) ថា ក្រោយមានករណីឡានក្រឡុកស៊ីម៉ងត៍ បុករះ កម្លាំងនគរបាលចរាចរណ៍រាជធានីភ្នំពេញ បានសហការជាមួយសមត្ថកិច្ចពាក់ព័ន្ធ កំពុងបើកប្រតិបត្តិការដូចភ្លៀងរលឹម ក្នុងការចុះចាប់រថយន្តក្រឡុកស៊ីម៉ងត៍បើកចូលក្រុងក្នុងម៉ោងហាមឃាត់ ដោយនៅព្រឹកថ្ងៃទី២១ កុម្ភៈ ចាប់បាន១០គ្រឿង នៅខណ្ឌច្បារអំពៅ។
ទីប្រឹក្សាសុវត្ថិភាពចរាចរណ៍នៃគម្រោងសហភាពអឺរ៉ុប និងអាស៊ាន កញ្ញា សាន់ សុជាតា លើកឡើងថា ជាទូទៅ គេមិនអាចយកករណីគ្រោះថ្នាក់ចរាចរណ៍មួយ ទៅវាយតម្លៃស្ថានភាពទាំងអស់បានទេ។ ប៉ុន្តែទាមទារឲ្យមានការ ចុះទៅសិក្សាឲ្យបានច្បាស់លាស់ លើករណីគ្រោះថ្នាក់ធ្ងន់ធ្ងរ ដូចករណីឡានក្រឡុកស៊ីម៉ងត៍ បុករះ លើពលរដ្ឋនៅម្ដុំភ្លើងស្តុបបឹងត្របែក៖ « សម្រាប់យោបល់ខ្ញុំ បើសិនជាមានគ្រោះថ្នាក់ ជាពិសេសករណីនេះ គឺករណីធ្ងន់ធ្ងរ អ៊ីចឹងគឺគួរតែមានការចុះទៅសិក្សា វាយតម្លៃនៅទីតាំងនោះ ឲ្យច្បាស់លាស់ ក្រៅពីបន្ទោសនៃលក្ខខណ្ឌនៃ ឡាន»។
សង្គមស៊ីវិល លោក សន ជ័យ និងកញ្ញា សាន់ សុជាតា ផ្ដល់យោបល់ថា ដើម្បីឲ្យវិធានការហាមឃាត់រថយន្តធុនធំ ឡានដឹកបេតុងស៊ីម៉ងត៍ របស់អាជ្ញាធររាជធានីភ្នំពេញមានប្រសិទ្ធិភាព ត្រូវទាមទារឲ្យមានការចូលរួមគោរពទាំងអស់គ្នា ទាំងភាគីក្រុមហ៊ុន ពលរដ្ឋ និងអាជ្ញាធរពាក់ព័ន្ធ។ លោក សន ជ័យ បន្ថែមថា ភាគីក្រសួងសាធារណការ និងដឹកជញ្ជូន ក៏ជាប់ពាក់ព័ន្ធការទទួលខុសត្រូវលើករណីឡានធំបុករះ លើពលរដ្ឋដែរ ព្រោះកន្លងមក ឲ្យតែកើតមានករណីឡានធំបុករះ ភាគច្រើនដោយសារបច្ចេកទេសហ្វ្រាំងឡាន ជាហេតុនាំឲ្យមានការសង្ស័យលើការ ត្រួតពិនិត្យបច្ចេកទេស ឬហៅថា ឆៀក (Check) ឡាន មិនត្រឹមត្រូវតាមស្តង់ដារ ឬមានអំពើពុករលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។