ក្រុមហ៊ុន រ៉ឺនេសង់ មីនើរ៉ល Renaissance Minerals (Cambodia) របស់ប្រទេសអូស្ត្រាលី បានទទួលអាជ្ញាប័ណ្ណរុករក រ៉ែមាសមួយកន្លែងទៀត នៅតំបន់សំពៅលូន ក្នុងឃុំជាំតាម៉ៅ ស្រុកមេមត់ ខេត្តត្បូងឃ្មុំ លើផ្ទៃដីទំហំជាង មួយរយគីឡូម៉ែត្រការ៉េ (១០៧,១០)។ កន្លងមកក្រុមហ៊ុននេះ ធ្លាប់ទទួលបានសិទ្ធិរុករករ៉ែមាស នៅតំបន់អូរខ្វាវ ស្រុកកែវសីមា ខេត្តមណ្ឌលគិរី។
ក្រុមហ៊ុន រ៉ឺនេសង់ មីនើរ៉ល ត្រូវបានក្រសួងរ៉ែ និងថាមពលជ្រើសរើស ដើម្បីបន្តនីតិវិធីផ្តល់អាជ្ញាប័ណ្ណរុករករ៉ែ ១ទីតាំង នៅខេត្តត្បូងឃ្មុំ នេះតាំងពីថ្ងៃទី ២១ ខែធ្នូ ឆ្នាំ២០២០។
គេហទំព័ររបស់រដ្ឋបាលខេត្តត្បូងឃ្មុំ បានចុះផ្សាយថា តំណាងក្រុមហ៊ុន រ៉ឺនេសង់ មីនើរ៉ល បានជួបប្រជុំជាមួយអភិបាលខេត្តត្បូងឃ្មុំ លោក ជាម ច័ន្ទសោភ័ណ កាលពីថ្ងៃទី៩ ខែកញ្ញា បានស្នើអាជ្ញាធរក្នុងខេត្តនេះ ជួយសហការជាមួយក្រុមហ៊ុន ដើម្បីរុករករ៉ែមាសនៅតំបន់នោះ។
ចំណែក អភិបាលខេត្តត្បូងឃ្មុំ លោក ជាម ច័ន្ទសោភ័ណ្ឌ ក៏បានស្នើទៅក្រុមហ៊ុនវិញ កុំឱ្យធ្វើសកម្មភាពដែលបង្កភាពថ្នាំងថ្នាក់ដល់ពលរដ្ឋ ដែលរស់នៅ និងរ៉ែងរ៉ែមាស នៅតំបន់នោះជាលក្ខណៈគ្រួសារ។
ក្រុមហ៊ុននេះ ក៏ទើបទទួលបានសិទ្ធិធ្វើអាជីវកម្មរ៉ែមាស និងចម្រាញ់រ៉ែមាសជាលើកដំបូង នៅតំបន់អូរខ្វាវ ស្រុកកែវសីមា ខេត្តមណ្ឌលគិរី កាលពីខែមិថុនា ឆ្នាំ២០២១។
លោកនាយករដ្ឋមន្ត្រី ហ៊ុន សែន កាលពីថ្ងៃទី២១ ខែមិថុនា ថាអាជីវកម្ម រ៉ែ និងចម្រាញ់រ៉ែមាសនេះ មានសមត្ថភាពយករ៉ែឆៅប្រមាណជិត ២លានតោន ក្នុងមួយឆ្នាំ និងអាចចម្រាញ់ជាមាសដុំបានកម្រិត ៩០ភាគរយ។ ក្រុមហ៊ុននេះ បានចាប់ផ្តើមសាងសង់ហេដ្ឋារចនាសម្ព័ន្ធ នៃការដ្ឋានអាជីវកម្ម រ៉ែ និងចម្រាញ់រ៉ែ មាស នៅខេត្តមណ្ឌលគិរីនោះ តាំងពីពាក់កណ្តាលឆ្នាំ ២០២០ និងបានចំណាយថវិកាវិនិយោគប្រមាណ ១២០លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។