អាជ្ញាធរបានជួយសង្គ្រោះបុរសម្នាក់ដោយសុវត្ថិភាពហើយបន្ទាប់ពីជាប់នៅក្នុងរូងភ្នំហុងទឹក អស់រយៈពេល៤ ថ្ងៃ ក្នុងគ្រាដែលជនរងគ្រោះបានចុះទៅចន្លោះប្រហោងថ្ម ដើម្បីរកអាចម៍ប្រចៀវ។ ក្រុមសមត្ថកិច្ចនិយាយថា សុខភាពជនរងគ្រោះមានសភាពល្អប្រសើរឡើងវិញហើយ បន្ទាប់ពីបានយកចេញពីរូងភ្នំ។
លោក សារ៉េត វិសេដ្ឋ អធិការប៉ូលិសស្រុកភ្នំព្រឹក ប្រាប់អាស៊ីសេរីនៅថ្ងៃទី០៧ សីហា ថា ក្រុមអ្នកជួយសង្គ្រោះបានយកជនរងគ្រោះចេញពីកន្លែងជាប់នៅក្នុងប្រឡោះថ្ម ក្នុងរូងភ្នំហុងទឹកមកខាងក្រៅវិញហើយ ខណៈដែលជនរងគ្រោះបានជាប់គាំងនៅទីនោះតាំងពីថ្ងៃទី៣ ខែសីហា៖ «បានហើយរថយន្តពេទ្យកំពុងដឹកយកទៅមន្ទីរពេទ្យ។ អត់អីទេគាត់អាចនិយាយកម្រើកលើកដៃ លើកជើងអីបាន»។
សមត្ថកិច្ចនិយាយថា ជនរងគ្រោះឈ្មោះ ស៊ឹម បូរ៉ា អាយុ៣០ ឆ្នាំ រស់នៅភូមិទួល ឃុំបារាំងធ្លាក់ ស្រុកភ្នំព្រឹក បានបាត់ខ្លួនកាលពីថ្ងៃទី៣ ខែ សីហា ក្រោយពីបានចេញពីផ្ទះដើម្បីទៅរកអាចម៍ប្រចៀវយកមកធ្វើជីដាក់ស្រែ។
លោក សារ៉េត វិសេដ្ឋ អធិការប៉ូលិសស្រុកភ្នំព្រឹកបញ្ជាក់ថា ជនរងគ្រោះបានរអិលជើងចូលក្នុងចន្លោះថ្ម ខណៈដែលលោកបានព្យាយាមចុះតាមរូងភ្នំដើម្បីស្វែងរកអាចម៍ប្រចៀវដែលមានទីតាំងនៅភូមិហុងទឹក ឃុំបារាំងធ្លាក់ ស្រុកភ្នំព្រឹក ដែលតំបន់នោះជាទូទៅប្រជាពលរដ្ឋនៅក្បែរៗនោះតែងតែដើររកអាចម៍ប្រចៀវនៅតាមរូងភ្នំ។
លោក ឃឿន សល់ បងថ្លៃជនរងគ្រោះប្រាប់អាស៊ីសេរីថា លោក ស៊ឹម បូរ៉ា បានបាត់ខ្លួនកាលពីថ្ងៃសៅរ៍ កន្លងទៅនេះ ដោយប្រាប់ភរិយាថា ទៅរកអាចម៍ប្រចៀវមកធ្វើជី៖ «តាមដែលដឹង វាដើររកអាចម៍ប្រចៀវហើយធ្លាក់ពិលទៅ វា ( ជនរងគ្រោះ ) ចេះតែតាមរកភ្លើង ពិលហ្នឹងទៅ វា ( ជនរងគ្រោះ ) ធ្លាក់ជាប់ទៅនឹងភ្លើងពិលហ្នឹងបណ្ដោយ»។
អធិការប៉ូលិសស្រុកភ្នំព្រឹក និយាយថា ក្រុមជួយសង្គ្រោះជាច្រើននាក់ដែលរួមមានឧទ្ធម្ភាគចក្រ និងរថយន្តពេទ្យសង្គ្រោះបន្ទាន់បានជួយសង្គ្រោះជនរងគ្រោះ ទាន់ពេលវេលាបន្ទាប់ពីចំណាយជាង ១០ម៉ោង ហើយឥឡូវនេះក្រុមគ្រូពេទ្យបាននាំយកជនរងគ្រោះទៅព្យាបាលនៅមន្ទីរពេទ្យខេត្តបាត់ដំបង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។