អាជ្ញាធរ​ខេត្ត​ព្រះសីហនុ​​​​​​ថា ​ជនជាតិ​ចិន​សម្រុក​ចេញពី​កម្ពុជា មិន​ពាក់ព័ន្ធ​ការ​បិទ​​ល្បែង​ភ្នាល់​តាម​អ៊ីនធឹណិត​ទេ

ដោយ ជាតិ ចំណាន
2019-09-04
អ៊ីម៉ែល
មតិ
Share
បោះពុម្ព
រូបភាព​​ដែល​ត្រូវ​បាន​គេ​បង្ហោះ​តាម​ហ្វេសប៊ុក​ថា ជនជាតិ​ចិន​រាប់ពាន់​នាក់​​ចាកចេញពីប្រទេសកម្ពុជា នៅ​ចុង​ខែសីហា ឆ្នាំ២០១៩។
រូបភាព​​ដែល​ត្រូវ​បាន​គេ​បង្ហោះ​តាម​ហ្វេសប៊ុក​ថា ជនជាតិ​ចិន​រាប់ពាន់​នាក់​​ចាកចេញពីប្រទេសកម្ពុជា នៅ​ចុង​ខែសីហា ឆ្នាំ២០១៩។
រូប៖ Screenshot ពីហ្វេសប៊ុក

អាជ្ញាធរ​ខេត្ត​ព្រះសីហនុ អះអាង​ថា ចំនួនជនជាតិ​ចិន​សម្រុក​ចេញ និង​សម្រុក​ចូល​ខេត្ត​នេះ តាម​ប្រលាន​យន្ត​ហោះ​កងកេង​ គឺ​ប្រហាក់​ប្រហែល​គ្នា មិន​ពាក់ព័ន្ធ​​នឹង​ការ​បិទ​ល្បែង​ភ្នាល់​តាម​អ៊ីនអឹណិត (Internet) ឬ​អនឡាញ (Online) ទេ។

អ្នក​នាំ​ពាក្យ​សាលា​ខេត្ត​ព្រះសីហនុ លោក ឃាង ភារម្យ ប្រាប់​អាស៊ី​សេរី​ថា ជនជាតិ​ចិន បាន​សម្រុក​ចាក​ចេញ​យ៉ាង​គំហុក ​កាល​ពី​ថ្ងៃ​ទី២៧ និង​ថ្ងៃ​ទី៣១ ខែ​សីហាកន្លងទៅ។ លោក​ថា ចំនួន​ជនជាតិ​ចិន​ចាកចេញ​ក្នុង​មួយ​ជើង​មាន​ប្រហែល ៣ពាន់ (៣.០០០) នាក់។ ក៏​ប៉ុន្តែ លោក​ថា ​នៅ​​ថ្ងៃ​​ដែល​ជនជាតិ​ចិន​ចាក​ចេញ​នោះ ក៏​មាន​ជន​ជាតិ​ចិន​ផ្សេង​ទៀត បាន​ចូល​មក​ខេត្ត​ព្រះសីហនុ​​ជាង​ ២​ពាន់ (.០០០) នាក់​វិញ​ដែរ។

លោក ឃាង ភារម្យ អះអាង​ថា ការ​សម្រុក​ចេញ​របស់​ជនជាតិ​ចិន គឺជា​រឿង​ធម្មតា​ ដោយ​លោក​អះអាង​មិន​ជាប់​ពាក់ព័ន្ធ​នឹង​ការ​ប្រកាស​ឲ្យ​បិទ​ហ្គេម​អនឡាញ​ទេ។ លោក​ពន្យល់​ថា ​ជនជាតិ​ចិន​ទាំង​នោះ អ្នក​ខ្លះ​​ដល់​ថ្ងៃ​​កំណត់​ផុត​ទិដ្ឋាការ​ការងារ ឯ​អ្នក​ខ្លះ​ជា​ភ្ញៀវ​ទេសចរណ៍ ត្រូវ​​ត្រឡប់​ទៅវិញ៖ «បើ​យើង​យក​កាស៊ីណូ​អនឡាន ទៅ​ភ្ជាប់​នឹង​ការ​ចេញ​ចូល​របស់​អន្តរជាតិ វា​មិន​ទាន់​ត្រឹម​ត្រូវ​ទេ វា​មិន​ទាន់​ឡូហ្ស៊ិក នៅ​ឡើយ​ទេ។ ការ​លើក​ឡើង​របស់​អ្នក​វិភាគ​ អ្នក​យល់​ឃើញ​ជា​រឿង​របស់​គាត់ តែ​រដ្ឋបាល​ខេត្ត​ គឺ​យើង​គោរព​ទៅ​តាម​ការ​សម្រេច​របស់​រដ្ឋាភិបាល»

ការ​ចាក​ចេញ​របស់​ជនជាតិ​ចិន ធ្វើ​ឡើង​ក្រោយ​ពេល​មេដឹកនាំ​របប​ក្រុង​ភ្នំពេញ ​ប្រកាស​​ឈប់​ផ្ដល់​អាជ្ញា​ប័ណ្ណ​អាជីវ​កម្ម​ល្បែង​ភ្នាល់​តាម​ម៉ាស៊ីន​អេឡិចត្រូនិក និង​តាម​អ៊ីនធឹណិត​ ទាំង​ក្នុង​ និង​ក្រៅ​ប្រទេស ចាប់​ពី​ថ្ងៃ​ទី១៨ ខែ​សីហា​តទៅ។ លោក​ ហ៊ុន សែន យល់​ថា ពួក​ឧក្រិដ្ឋ​ជន​បរទេស​មួយ​ចំនួន បាន​ជ្រក​ក្រោម​រូប​ភាព​ល្បែង​ភ្នាល់​ប្រភេទ​នេះ ដើម្បី​ជំរិត​ទារ​ប្រាក់​ពី​ជន​រង​គ្រោះ ទាំង​នៅ​ក្នុង ​និង​នៅ​ក្រៅ​ប្រទេស ដែល​ធ្វើ​ឲ្យ​ប៉ះ​ពាល់​ដល់​សន្តិ​សុខ សណ្ដាប់​ធ្នាប់​​ និង​របៀប​រៀប​រយ​សង្គម​។

អ្នក​សម្រប​សម្រួល​សមាគម​ការពារ​សិទ្ធិ​មនុស្ស អាដហុក (ADHOC) ប្រចាំ​ខេត្ត​ព្រះសីហនុ អ្នកស្រី ជាប សុធារី មិន​ធ្លាប់​ឃើញ ជនជាតិ​ចិន​នៅ​ខេត្ត​ព្រះសីហនុ សម្រុក​ចាកចេញ​ខ្លាំង​បែប​នេះ​ទេ។ ប៉ុន្តែ​អ្នកស្រី​ថា ពលរដ្ឋ​រស់​នៅ​ក្បែរ​ប្រលាន​យន្ត​ហោះ​កេងកង​ខេត្ត​ព្រះសីហនុ ធ្លាប់​ប្រាប់​អ្នកស្រី​ថា ជា​ធម្មតា ដែល​ជនជាតិ​ចិន ​ជិះ​យន្តហោះ​ចេញ​ចូល​ច្រើន​ រាប់​រយ​នាក់​ក្នុង​មួយ​ថ្ងៃៗ។

អ្នកស្រី ជាប សុធារី យល់​ថា ការ​ចាកចេញ​យ៉ាង​គំហុក​របស់​ជនជាតិ​ចិន​នេះ ទំនង​ជា​មិន​​ពាក់ព័ន្ធ​នឹង​ការ​​ប្រកាស​បិទ​ភ្នាល់​ល្បែង​តាម​អនឡាញ​ទេ ព្រោះ​អាជ្ញាធរ​មិន​បាន​ដក​ហូត​អាជ្ញាប័ណ្ណ​ធ្វើ​អាជីវកម្ម​ល្បែង​ភ្នាល់​តាម​​ម៉ាស៊ីន​ ឬ​អន​ឡាន​ទេ គឺ​ទុក​ឲ្យ​ផុត​កំណត់​អាជ្ញាប័ណ្ណ និង​មិន​ចេញ​អាជ្ញា​ប័ណ្ណ​បន្ត​ឲ្យ​។ អ្នកស្រី​យល់​ថា ការ​ចាក​ចេញ​របស់​ជនជាតិ​ចិន​ទាំង​គំហុក អាច​ដោយ​សារ​​អាជ្ញាធរ​​ផ្អាក​ការដ្ឋាន​សំណង់​គ្មាន​គុណ​ភាព​ច្រើន​ជាង៖ «មាន​បណ្ដាញ​សង្គម​ភាគ​ច្រើន​ដែល​គេ​ឃើញ ហើយ Share បន្ត​គ្នា​ទៅ ហើយ​ទទួល​ពេល​រដ្ឋាភិបាល​គាត់​ប្រកាស​បិទ​អា​ហ្នឹង​ទៅ​ គេ​សង្ស័យ​ថា ពួក​គាត់​ចាក​ចេញ​ទៅ​ដោយសារ​តែ រដ្ឋាភិបាល​គាត់​ប្រកាស​ឲ្យ​បិទ​ល្បែង​អន​ឡាន​ហ្នឹង​ណា។ ការ​ប្រកាស​របស់​រដ្ឋាភិបាល​ មិន​មែន​បាន​សេចក្ដី​ថា ទៅ​បិទ​គេ​ឆៅៗ ភ្លាមៗ ឯណា ព្រោះ​អ្វី​គេ​មាន​លិខិត​អនុញ្ញាត​ដែរ​ហ្នឹង។ អ៊ីចឹង​បើ​មិន​ទាន់​ផុត​កិច្ច​សន្យា​ម្ដេច​ទៅ​បិទ​​គេ​បាន​ ព្រោះ​អ្វី យើង​បាន​ផ្ដល់​​ការ​អនុញ្ញាត​ឲ្យ​គេ​ គ្រាន់​តែ​ថា ផ្អាក​មិន​ឲ្យ​មាន​កិច្ច​សន្យា​ថ្មី ក្នុង​ការ​លេង​ល្បែង​រក​ស៊ី​អា​ហ្គេម​ហ្នឹង ហើយ​កាស៊ីណូ​​ធំៗ នៅ​គគ្រឹក​គគ្រេង​រាល់​ថ្ងៃ​ហ្នឹង»

អតីត​អភិបាល​ខេត្ត​ព្រះសីហនុ លោក យន្ត មីន ធ្លាក់​លើក​ឡើង​ កាល​ពី​ខែ​កុម្ភៈថា ​អ្នក​វិនិយោគ​ និង​ទេសចរ​ចិន​ស្នាក់​នៅ​​ខេត្ត​ព្រះ​សីហនុ មាន​ប្រមាណ​ជា ​៧ម៉ឺន​នាក់ ​និង​បាន​ផ្ដល់​ផល​វិជ្ជមាន​​ច្រើន​ ​ជួយ​ឲ្យ​ខេត្ត​​ព្រះសីហនុ បង្កើន​កំណើន​សេដ្ឋ​កិច្ច​​ឆាប់​រហ័ស តែ​ផ្ដល់​ផល​អវិជ្ជមាន​តិចតួច​ដល់​ខេត្ត​ព្រះសីហនុ។ ទោះ​យ៉ាង​ណា អំពើ​ហិង្សា ករណី​ឃាតកម្ម និង​បទល្មើស​ដទៃ​ទៀត​ប្រព្រឹត្ត​ដោយ​ជន​ជាតិ​ចិន បាន​កើត​ឡើង​ជា​ញឹកញាប់​នៅ​ក្នុង​មូលដ្ឋាន​ខេត្ត​ព្រះសីហនុ។ ក្រោយ​​ពី​ថ្លែង​ការពារ​លំហូរ​ចូល​យ៉ាង​គំហុក​នៃ​ជនជាតិ​ចិន​នេះ​បាន​​​កន្លះ​ឆ្នាំ លោក យន្ត​ មីន បាន​សុំ​ឲ្យ​របប​ក្រុង​ភ្នំពេញ​ដក​​លោក​ចេញ​ពី​តំណែង ដោយសារ​គ្មាន​សមត្ថភាព​គ្រប់​គ្រង​ខេត្ត​ព្រះសីហនុ បន្ទាប់​ពី​មាន​ហេតុ​ការណ៍​សំណង់​គ្មាន​គុណភាព​របស់​ក្រុមហ៊ុន​ចិន​រលំ​បាក់ សង្កត់​កម្មករ​ខ្មែរ​ជាង ៥០នាក់​ស្លាប់ និង​រង​របួស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Time for China govm't turm Hun Sen downs before end of this year"2019",China seen HS as useless and worthless

China embassy leaking news-China embassy in P Penh make a signal to alert all their illegal immigration and visitors quick to get out from Cambodia before the end of this year"2019".Bcause,they knew the dictator regime of"HS"will collapses sooner rather later by pple of power.And China herself getting many problems at home turf,facing trade war with the u.s,facing frugal economic recession,high unemployment rates,Hong Kong crisis unsolved mystery,tension over s.China sea,tension over with Taiwan,secreted built NAVA based at Ream/Koh Kong ports"in Cambodia"+Hun Sen's EBA/GPS sanctions coming,and many social issues at home.Indeed,the China commie govm't must gives up dictator"HS"corrupt govm't fail by itself rather better than survival.The China govm't will do corporate with a new Cambodia govm't for both national interest.

Sep 04, 2019 12:19 PM

គេហទំព័រ​ទាំងមូល