ពលរដ្ឋ​មួយ​ចំនួន ធ្វើ​បុណ្យ​ឧទ្ទិស​កុសល​ដល់​បណ្ឌិត កែម ឡី ក្នុង​ឱកាស​បុណ្យ​ចូល​ឆ្នាំ

ដោយ មាន រិទ្ធិ
2020.04.17
Share on WhatsApp
Share on WhatsApp
ថេង សាវឿន កែម ឡី ២០២០ លោក ថេង សាវឿន អគ្គលេខាធិការ​សម្ព័ន្ធ​សហគមន៍​កសិករ​កម្ពុជា (CCFC) ឧទ្ទិស​កុសល​ដល់​បណ្ឌិត កែម ឡី ក្នុង​ឱកាស​បុណ្យ​ចូល​ឆ្នាំ​ថ្មី។
រូប៖ ហ្វេសប៊ុក​លោក ថេង សាវឿន ថ្ងៃ​ទី១៣ ខែ​មេសា ឆ្នាំ២០២០

ប្រជាពលរដ្ឋ​មួយ​ចំនួន ​នៅ​ក្នុង​ឱកាស​ប្រារព្ធ​ពិធី​បុណ្យ​ចូល​ឆ្នាំ​ខ្មែរ​នេះ ​បាន​ធ្វើ​បុណ្យ​ឧទ្ទិស​កុសល​ដល់​វិញ្ញាណក្ខន្ធ​បណ្ឌិត ​កែម​ ឡី ​អ្នក​ស្រាវជ្រាវ​ការ​អភិវឌ្ឍន៍​សង្គម និង​វិភាគ​នយោបាយ​ដ៏​មាន​ប្រជាប្រិយ ដែល​បាន​ស្លាប់​ដោយសារ​ការ​បាញ់​ប្រហារ​នៅ​ហាង​សាំង​កាល់តិច (Caltex) ស្ដុប​បូកគោ កាល​ពី​ថ្ងៃ​ទី១០ ខែ​កក្កដា ឆ្នាំ​២០១៦។ ការ​ឧទ្ទិស​មគ្គផល​នេះ គឺ​ដោយសារ​ពួកគេ​ចាត់​ទុក​បណ្ឌិត កែម ឡី ថា​ជា​វីរបុរស និង​ជា​អ្នក​មាន​គុណ​មួយ​រូប​សម្រាប់​ជាតិ​ខ្មែរ​ទាំង​មូល។

ការ​រៀបចំ​ពិធីបុណ្យ​ចូលឆ្នាំខ្មែរ​ក្នុង​សម័យ​ប្រទេស​កំពុង​មាន​វិបត្តិ​ជំងឺ​កូវីដ-១៩ នេះ ​ប្រជាពលរដ្ឋ​ខ្មែរ​ ​មិន​សូវ​បាន​នាំ​គ្នា​ទៅ​វត្ត​ប្រារព្ធ​ពិធី​បុណ្យ​ច្រើន​កុះករ​ដូច​ឆ្នាំ​មុនៗ ទេ ប៉ុន្តែ​ពួក​គេ បាន​រៀបចំ​ពិធី​ទទួល​ទេវតា និង​ធ្វើ​ពិធី​សែនព្រេន ឬ​បង្សុកូល​បន្តិចបន្តួច​នៅ​តាម​ផ្ទះ​រៀងៗ ខ្លួន ដើម្បី​បួងសួង​សុំ​សេចក្ដី​សុខ​ផង និង​ឧទ្ទិស​បុណ្យ​កុសល​ជូន​ដល់​វិញ្ញាណក្ខន្ធ​ជីដូន​ជីតា និង​បុព្វការី​ជន​របស់​ពួក​គេ​ផង។ ទោះ​បី​ជា​យ៉ាង​ណា ពលរដ្ឋ​មួយ​ចំនួន​ ក៏​បាន​ឧទ្ទិស​មគ្គផល​ទាំង​ឡាយ​ទៅ​ឱ្យ​ដួង​វិញ្ញាណក្ខន្ធ​បណ្ឌិត កែម ឡី ដូច​គ្នា ដោយ​ពួក​គេ​ចាត់​ទុក​បណ្ឌិត កែម ឡី ថា​ជា​អ្នក​មាន​គុណ​មួយ​រូប​ដែរ គឺ​មាន​គុណ​សម្រាប់​ជាតិ​ខ្មែរ​ទាំង​មូល។

ពលរដ្ឋ​រស់​នៅ​ក្នុង​ក្រុង​ភ្នំពេញ​ម្នាក់ គឺ​លោក ចាន់ ធឿន ប្រាប់​អាស៊ី​សេរី​ថា ទោះ​បី​ជា​បណ្ឌិត កែម ឡី ត្រូវ​បាន​ឃាតក​បាញ់​សម្លាប់​ទាំង​អយុត្តិធម៌​អស់​រយៈ​ពេល​ជិត ៤ឆ្នាំ​ទៅ​ហើយ​ក្តី ក៏​លោក​នៅ​តែ​នឹក​រលឹក និង​ចងចាំ​ក្នុង​បេះដូង​ជា​និច្ច ហើយ​សូម្បី​តែ​ហ្វេសប៊ុក​របស់​លោក ក៏​តាំង​រូបថត​បណ្ឌិត កែម ឡី រហូត​មក។ លោក​បន្ត​ថា ថ្វី​ដ្បិត​ក្នុង​ពិធី​បុណ្យ​ចូល​ឆ្នាំ​នេះ​ លោក មិន​បាន​យក​ចង្ហាន់​ទៅ​ប្រគេន​ព្រះសង្ឃ​នៅ​ក្នុង​វត្ត​ក្តី ក៏​ក្រុម​គ្រួសារ​របស់​លោក បាន​រៀបចំ​ពិធី​សែនព្រេន​នៅ​ក្នុង​ផ្ទះ ហើយ​បាន​តាំង​ចិត្ត​ឧទ្ទិស​បុណ្យ​ដល់​ញាតិ​មិត្ត​ដែល​បាន​ចែក​ឋាន និង​អ្នក​ស្នេហា​ជាតិ​ទាំង​អស់​ក្នុង​នោះ គឺ​មាន​បណ្ឌិត កែម ឡី ម្នាក់​ផង​ដែរ«សម្រាប់​បណ្ឌិត កែម ឡី គាត់​នៅ​ដក​ជាប់​ក្នុង​ចិត្ត​ខ្ញុំ​រហូត នៅ​តែ​គោរព​ស្រឡាញ់​គាត់​រហូត ដ្បិត​ថា ខ្ញុំ​មិន​ចេះ​ដូច​គាត់​ក្តី តែ​យើង​ស្រឡាញ់​នូវ​វីរភាព​របស់ គាត់ ប៉ុន្តែ​គ្រាន់​តែ​ឆ្នាំ​នេះ​ស្ដាយ​អត់​បាន​ទៅ​វត្ត»

ពលរដ្ឋ​រូប​នេះ ឲ្យ​ដឹង​ដែរ​ថា ក្រៅ​ពី​ធ្វើ​បុណ្យ​ឧទ្ទិស​មគ្គផល​ដល់​បណ្ឌិត កែម ឡី ក្នុង​ពេល​មាន​ពិធី​បុណ្យ​សំខាន់ៗ របស់​ជាតិ​នោះ លោក ក៏​តែង​តែ​ឆៀង​ចូល​ទៅ​គោរព​វិញ្ញាណក្ខន្ធ​បណ្ឌិត កែម ឡី ដែល​ស្ថិត​នៅ​ភូមិ​អង្គ​តាកុប ឃុំ​លាយបូរ ស្រុក​ត្រាំកក់ ខេត្ត​តាកែវ ដែរ«ឲ្យ​តែ​ខ្ញុំ​ធ្វើ​ដំណើរ​តាម​ផ្លូវ​នឹង​ខ្ញុំ​ដឹង​តែ​ឆៀង​ចូល​ហើយ​បើ​បុណ្យ​ខួប​ខ្ញុំ​ដឹង​តែ​ទៅ​រហូត។ ឲ្យ​តែ​ទៅ​តាម​ផ្លូវ​តា​កែវ ឬ​ទៅ​កំពត​អី គឺ​ដឹង​ថា ឆៀង​ចូល​ហើយ មិន​ថា​ថ្ងៃ​បុណ្យ ឬ​ថ្ងៃ​អី​នោះ​ទេ»

ចំណែក​អគ្គ​លេខាធិការ​សម្ព័ន្ធ​សហគមន៍​កសិករ​កម្ពុជា (CCFC) លោក ថេង សាវឿន ចាត់​ទុក បណ្ឌិត កែម ឡី ប្រៀប​ដូច​ជា​ទេវតា​មួយ​អង្គ​ ដោយសារ​តែ​កាល​នៅ​មាន​ជីវិត​ គឺ​បណ្ឌិត កែម ឡី បាន​ជួយ​បំភ្លឺ​ផ្លូវ​ប្រជាពលរដ្ឋ​ទូទៅ​យ៉ាង​សកម្ម​ដោយ​មិន​គិត​អំពី​ការ​នឿយហត់ និង​គ្រោះថ្នាក់​ដល់​ជីវិត​នោះ​ទេ ក្នុង​ការ​ចែករំលែក​ការវិភាគ​របស់​លោក​អំពី​បញ្ហា​សង្គម នយោបាយ និង​សេដ្ឋកិច្ច​តាម​រយៈ​ប្រព័ន្ធ​សារ​ព័ត៌មាន ជា​ពិសេស វិទ្យុ និង​ជា​វាគ្មិន​ក្នុង​សិក្ខា​សាលា​ផ្សេងៗ។ លោក បន្ត​ថា ​ដើម្បី​បង្ហាញ​ពី​ការ​គោរព​ស្រឡាញ់ និង​ការ​ដឹង​គុណ​ចំពោះ​ការ​លះបង់​របស់​បណ្ឌិត កែម ឡី គឺ​លោក​បាន​រៀបចំ​គ្រឿង​រណ្ដាប់​ថ្វាយ​ជូន​បណ្ឌិត កែម ឡី នៅ​ក្នុង​ទីស្នាក់ការ​នៃ​សមាគម​របស់​លោក ដោយ​មាន​ផ្កា បង្អែម ផ្លែឈើ និង​ភេសជ្ជៈ នៅ​ចំពោះ​មុខ​រូប​សំណាក​បណ្ឌិត កែម ឡី ដែល​សាងសង់​ឡើង​ពី​ជ័រ​ក្រែប កម្ពស់​ជាង ១ម៉ែត្រ​កន្លះ៖ «តាំង​ពី​ខ្ញុំ​ស្គាល់​គាត់​មក គឺ​គាត់​បាន​ជួយ​ច្រើន​មែនទែន ជា​ពិសេស ជួយ​រៀបចំ​សមាគម ជា​ពិសេស គាត់​បាន​ផ្ដល់​ជា​អ្នក​ប្រឹក្សា​ដោយ​មិន​គិត​ថវិកា​ក្នុង​ការ​រៀបចំ ស្ថាប័ន​សម្រាប់​ជួយ​ការពារ​ដល់​ជន​រង​គ្រោះ ជា​ពិសេស កសិករ និង​ពលរដ្ឋ​ដែល​រង​គ្រោះ​នៅ​ក្នុង​ប្រទេស​កម្ពុជា​កន្លង​មក​រហូត​មក​ដល់​ពេល​បច្ចុប្បន្ន។ ដោយសារ​ឆ្នាំ​នេះ យើង​មិន​អាច​យក​ចង្ហាន់​ទៅ​វត្ត ដោយសារ​មាន​ជំងឺ​កូវីដ-១៩ ដូច្នេះ​ខ្ញុំ​មាន​តែ​រៀបចំ​ទៅ​តាម​លទ្ធភាព​របស់​ខ្ញុំ ហើយ​ខ្ញុំ​នៅ​តែ​យល់​ថា គាត់ គឺ​ជា​មនុស្ស​ដែល​មាន​សារៈសំខាន់ គាត់​ប្រៀប​ដូច​ជា​ទេវតា​នៅ​ក្នុង​ដួង​ចិត្ត​ខ្ញុំ​អ៊ីចឹង។គាត់​បាន​បំភ្លឺ និង​បាន​ចង្អុល​បង្ហាញ​តាម​រយៈ​ផ្សេងៗ ដល់​រូប​ខ្ញុំ ក៏​ដូច​ជា​ប្រជាជន​ផ្សេងៗ ទៀត ឲ្យ​ចូលរួម​គិតគូរ​អំពី​រឿង​សង្គម​ជាតិ រឿង​នយោបាយ លទ្ធិប្រជាធិបតេយ្យ និង​ជីវភាព រស់​នៅ​របស់​ប្រជាជន​ដែរ»

សម្រាប់​ក្រុម​គ្រួសារ​បណ្ឌិត កែម ឡី វិញ ក្នុង​ពិធី​បុណ្យ​ចូល​ឆ្នាំ​នេះ កាន់​តែ​ប្រព្រឹត្ត​ទៅ​ក្នុង​ភាព​ក្រៀមក្រំ​ជាង​ឆ្នាំ​មុនៗ ទៀត។

ម្ដាយ​បង្កើត​បណ្ឌិត កែម ឡី អាយុ ៨០ឆ្នាំ​ គឺ​លោកស្រី ភោគ សេ រៀបរាប់​ថា ​លោកស្រី ​ក៏​បាន​និមន្ត​ព្រះសង្ឃ​សូត្រ​ធម៌​បង្សុកូល​ឧទ្ទិស​បុណ្យ​កុសល​ដល់​កូន​ប្រុស​ជា​ទី​ស្រឡាញ់ ប៉ុន្តែ​ពុំ​មាន​អ្នក​ចូលរួម​ដូច​ឆ្នាំ​មុនៗ ឡើយ ដោយសារ​តែ​មាន​វិបត្តិ​ជំងឺ​កូវីដ-១៩៖ «ពេល​ចូល​ឆ្នាំ​នេះ បាន​ឧទ្ទិស​ទៅ​គ្រប់​តែ​មុខ​មាន​ចេក មាន​រៀបចំ​គ្រឿង​សក្ការៈ ហើយ​បង្សុកូល​លោក​ពីរ​អង្គ​និមន្ត​មក​កន្លែង​នេះ​ហ្មង ។ កាល​មុន​កាល​អត់​ទាន់​មាន​ជំងឺ​កូវីដ-១៩ មាន​គេ​មក​គោរព​សព​មិន​ដែល​ខាន​ទេ ក្នុង​មួយ​ថ្ងៃ​ហោច​ណាស់​ម្នាក់​ទៅ​ពីរ​នាក់​ដែរ។ ពេល​គេ​មក ក៏​បាន​ជូន​លុយ​កាក់​ដល់​ខ្ញុំ​ដែរ ខ្លះ​មួយ​ម៉ឺន ខ្លះ​បួន​ទៅ​ប្រាំ​ពាន់​ហូរ​ហែ​អ៊ីចឹង​ទៅ»

លោកស្រី ភោគ សេ ថ្លែង​បន្ត​ថា ក្នុង​ពេល​រដូវ​បុណ្យទាន​បែប​នេះ គាត់​មាន​អារម្មណ៍​នឹក​រលឹក និង អាណិត​កូន​​​ជា​ខ្លាំង​ដែល​ធ្វើ​តែ​អំពើ​ល្អ។ អ្នក​ម្ដាយ​វ័យ​ចំណាស់​រូប​នេះ ​រៀបរាប់​ទាំង​អួស​ដើមក​រ​ទៀត​ថា ​ប្រសិនបើ​​បណ្ឌិត​ កែម ​ឡី​ នៅ​មាន​ជីវិត​នោះ​ គឺ​លោកស្រី​ នឹង​ក្លាយ​ជា​ម្ដាយ​ដែល​មាន​សំណាង​ ព្រោះ​កូន​ប្រុស​ម្នាក់​នេះ​ មាន​កតញ្ញូ​ចំពោះ​ម្ដាយ មិន​ឱ្យ​លំបាក​នោះ​ទេ​ ។ លោក​ ស្រី​បន្ត​ថា ​នៅ​ពេល​អត់​ពី​កូន​ទៅ​សព្វថ្ងៃ​នេះ លោកស្រី​បាន​ខំ​ប្រឹង​ដាំ​បន្លែ​ខ្លះ ដូច​ជា ស្ពៃ ននោង​ ត្រឡាច ​ជាដើម ​នៅ​លើ​ដី​ទំនេរ​ក្បែរ​ផ្នូរ​របស់​កូន​នោះ ​ដើម្បី​លក់​យក​លុយ​សម្រាប់​ចិញ្ចឹម ជីវិត​ និង​ទុក​សន្សំ​សម្រាប់​ធ្វើ​បុណ្យ​ឧទ្ទិស​ឲ្យ​កូន៖ «បែក​បាក់​គ្នា​អ៊ីចឹង នឹង​នោះ​នឹក​ណាស់​ពេក​ទៅ​ហើយ ប៉ុន្តែ​មិន​ដឹង​ធ្វើ​ម៉េច​ចេះ​តែ​ទ្រាំ​ទៅ។នឹក​ឃើញ​ពេល​កូន​មក​ជុំ​គ្នា មាន​ចៅ ឥឡូវ​ចៅ​ក៏​អត់​ឃើញ​ហើយ​កូន​ក៏​មិន​ឃើញ​ដែរ»

អ្នកស្រាវជ្រាវ​ការ​អភិវឌ្ឍ​សង្គម​ និង​ជា​អ្នកវិភាគ​នយោបាយ​ដ៏​មាន​ប្រជាប្រិយ​ភាព​ បណ្ឌិត​ កែម​ ឡី​ ត្រូវ​បាន​ខ្មាន់​កាំភ្លើង​បាញ់សម្លាប់​នៅ​ព្រឹក​ថ្ងៃ​ទី១០ ខែ​កក្កដា​ ឆ្នាំ២០១៦​ នៅ​ឯ​ស្ដារម៉ាត (Star Mart) ក្នុង​ស្ថានីយ​លក់​ប្រេងឥន្ធនៈ​កាល់​តិច (Caltex)ក្នុង​ទីក្រុង​ភ្នំពេញ​។

តុលាការ​ បាន​ផ្ដន្ទាទោស​ អឿត​ អាង​ ដែល​ហៅ​ខ្លួនឯង​ថា​ ជួប​ សម្លាប់​ ឱ្យ​ជាប់​ពន្ធ​នា​គារ​អស់​មួយ​ជីវិត​ ពី​បទ​ឃាតកម្ម​លើ​បណ្ឌិត កែម ឡី។ ប៉ុន្តែ​មតិ​សា​ធារ​ជន​ទូទៅ​មិន​ជឿ​ថា អឿត អាង ជា​ឃាតក​ពិត ឬ​ជា​មនុស្ស​តែ​ម្នាក់​គត់​ក្នុង​អំពើ​ឃាតកម្ម​បណ្ឌិត កែម ឡី នោះ​ទេ ពីព្រោះ​មាន​ចំណុច និង​ហេតុការណ៍​មិន​ស៊ី​សង្វាក់​គ្នា​ជា​ច្រើន​នៅ​ជុំវិញ​ឃាតកម្ម​ដ៏​កក្រើក​មួយ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល