តុលាការខេត្តសៀមរាបសង្ស័យមន្ត្រីជលផលពាក់ព័ន្ធបទល្មើសនេសាទ
2013.03.09
១៦-កុម្ភៈ-២០១៣៖ អ្នកនេសាទចំនួនជាង ៦០នាក់ ដែលកងរាជអាវុធហត្ថខេត្តសៀមរាប បានចាប់ខ្លួនដោយនាំមកទីបញ្ជាការកងរាជអាវុធហត្ថខេត្ត ដើម្បីកសាងសំណុំរឿងពីបទនេសាទប្រើឧបករណ៍ខុសច្បាប់។
តុលាការ អាចនឹងកោះហៅមន្ត្រីជលផលមួយចំនួន ដែលគេសង្ស័យទាំងនោះ ឱ្យចូលខ្លួនមកឆ្លើយបំភ្លឺនៅពាក់កណ្ដាលខែមីនា ខាងមុខនេះ។
មន្ត្រីខណ្ឌរដ្ឋបាលជលផលខេត្តសៀមរាប បានឱ្យដឹងថា មន្ត្រីរបស់គេចំនួន ១១រូប និងកម្មករចំនួន ២រូបទៀត បានត្រៀមខ្លួនរួចជាស្រេច ដើម្បីចូលទៅបំភ្លឺតាមការកោះហៅរបស់តុលាការ នៅអំឡុងពេលប្រមាណជាង ១សប្ដាហ៍ខាងមុខទៀតនេះ។
នាយកខណ្ឌរដ្ឋបាលជលផលខេត្តសៀមរាប នៃអធិការដ្ឋានរដ្ឋបាលជលផលខាងជើងបឹងទន្លេសាប គឺលោក ព្រិន សាវិន លោកបានមានប្រសាសន៍នៅរសៀលថ្ងៃសៅរ៍ ទី៩ ខែមីនា ថា មន្ត្រីរបស់លោកមួយចំនួនដែលប្រចាំការនៅក្នុងបឹងទន្លេសាប ត្រង់តំបន់ចុងឃ្នៀស ឃុំកំពង់ភ្លុក និងឃុំកំពង់ឃ្លាំង នឹងត្រូវចូលខ្លួនទៅឆ្លើយបំភ្លឺចំពោះមុខតុលាការ នៅពាក់កណ្ដាលខែមីនា៖ «ទៅចូលបំភ្លឺពីករណីបទល្មើសកើតឡើងពីថ្ងៃទី១៥ (ខែកុម្ភៈ) ពីតំបន់ដែលឈរជើងចុងឃ្នៀស កំពង់ភ្លុក កំពង់ឃ្លាំង។ បាទ! មន្ត្រីខ្ញុំបំពេញការងារនៅទីនោះទៅតាមលទ្ធភាពដែលអាចធ្វើទៅបាន ទៅតាមការអញ្ជើញនោះ»។
ប្រភពព័ត៌មាន បានឱ្យដឹងថា មន្ត្រីជលផលដែលត្រៀមនឹងចូលខ្លួនទៅបំភ្លឺនៅចំពោះមុខតុលាការខេត្តនោះ មានឋានៈចាប់ពីនាយផ្នែក នាយផ្នែករង និងនាយសង្កាត់រដ្ឋបាលជលផលខ្លះ ព្រមទាំងនាយសង្កាត់រងខ្លះទៀតផង។
លោក ព្រិន សាវិន បានបញ្ជាក់ថា លោកមិនមានការព្រួយបារម្ភអ្វីទេចំពោះតុលាការដែលកោះហៅមន្ត្រីរបស់លោកទៅបំភ្លឺនោះ។
ទោះយ៉ាងណា លោក អ៊ិត សុធា ជាចៅក្រមអង្កេតនៃសំណុំរឿងបទល្មើសនេសាទ មិនបានបញ្ជាក់ឱ្យច្បាស់ទេ ថាតើពិតជាមានការកោះហៅមន្ត្រីរដ្ឋបាលជលផលមួយចំនួនទៅសាកសួរមែន ឬក៏យ៉ាងណានោះទេ ដោយលោកមានប្រសាសន៍ថាកំពុងជាប់រវល់ប្រជុំ។
ចំណែកលោក អ៊ុយ សំភា ជាតំណាងអយ្យការនៃសំណុំរឿងក្តីនោះ បានមានប្រសាសន៍ថា លោកមិនបានដឹងឱ្យប្រាកដទេ ថានឹងមានការកោះហៅមន្ត្រីជលផលខ្លះមកសាកសួរ ឬយ៉ាងណាឡើយ៖ «ខ្ញុំអត់បានកោះ ខ្ញុំអត់ដឹងផង។ រឿងហ្នឹងសួរទៅខាងចៅក្រមបានដឹង»។
គម្រោងនៃការកោះហៅមន្ត្រីជលផលមួយចំនួនមកសាកសួរនេះ បន្ទាប់ពីកម្លាំងកងរាជអាវុធហត្ថខេត្តសៀមរាប បានចុះប្រតិបត្តិការបង្ក្រាបបទល្មើសនេសាទក្នុងបឹងទន្លេសាប ជាច្រើនកន្លែង ដោយរឹបអូសឧបករណ៍ខុសច្បាប់មួយចំនួន និងចាប់ខ្លួនអ្នកនេសាទជាច្រើននាក់ផងដែរ។
ចាប់តាំងពីថ្ងៃទី១៦ ខែកុម្ភៈ រហូតមកដល់ពេលនេះ សមត្ថកិច្ច រួមនិងតុលាការខេត្តសៀមរាប បានចាប់ខ្លួនអ្នកនេសាទខុសច្បាប់ជាបន្តបន្ទាប់ប្រមាណ ៦៥នាក់ ក៏ប៉ុន្តែមនុស្សប្រមាណជាង ៣០នាក់ ក្នុងចំណោមនោះ ត្រូវបានដោះលែងវិញកាលពីពេលថ្មីៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
