ស្ថាប័ន​រដ្ឋ​គ្រោង​រើស​មន្ត្រីរាជការ​បន្ថែម​ជាង​២​ម៉ឺន​នាក់​សម្រាប់​ឆ្នាំ​២០១៩ ជំនួស​មន្ត្រី​ចូល​និវត្តន៍

ដោយ ជាតិ ចំណាន
2019.03.08
ក្រសួង​មហាផ្ទៃ ៨៥៥ ក្រសួង​មហាផ្ទៃ
Photo: RFA

សង្គម​ស៊ីវិល​ជំរុញ​ឱ្យ​ក្រសួង​ស្ថាប័នរដ្ឋ​ប្រើប្រាស់​ធនធាន​មន្ត្រីរាជការ​កំពុង​មាន​សព្វថ្ងៃ​ឱ្យ​មាន​ប្រសិទ្ធភាព​ខ្ពស់​ជាង​ពេល​បច្ចុប្បន្ន។ ការ​ជំរុញ​នេះ ធ្វើឡើង​បន្ទាប់ពី​ក្រសួង​មុខងារ​សាធារណៈ​ប្រកាស​ថា ស្ថាប័ន​មន្ត្រីរាជការ​ស៊ីវិល នឹង​ជ្រើសរើស​មន្ត្រី​២៤.២៨៨នាក់ សម្រាប់​ឆ្នាំ​២០១៩ ដើម្បី​ជំនួស​កន្លែង​មន្ត្រី​ដែល​ចូលនិវត្តន៍។

សង្គម​ស៊ីវិល និង​មន្ត្រីរាជការ សង្កេត​ឃើញ​ថា ភាគច្រើន​នៃ​ស្ថាប័នរដ្ឋ​មិនទាន់​ប្រើ​មន្ត្រីរាជការ​តាម​ជំនាញ​ពេញ​ដៃ​ពេញ​ជើង​ឱ្យ​អស់ពី​សមត្ថភាព​ទេ។

ប្រធាន​មជ្ឈមណ្ឌល​សម្រាប់​ការអភិវឌ្ឍន៍ និង​សន្តិភាព លោក យង់ គឹមអេង ថ្លែង​ថា ការ​ជ្រើសរើស​មន្ត្រី​បន្ថែម​សម្រាប់​មុខតំណែង​របស់​មន្ត្រី​ចូលនិវត្តន៍​ជា​រឿង​ល្អ ប៉ុន្តែ​ការប្រើប្រាស់​មន្ត្រីរាជការ​ក្នុង​ពេល​បច្ចុប្បន្ន គឺ​គ្មាន​ប្រសិទ្ធភាព ហើយ​​​​មន្ត្រី​រាជការ​នៅ​តាម​ស្ថាប័នរដ្ឋ​ខ្លះ​គឺ​អសមត្ថភាព​តែម្ដង​។ លោក យង់ គឹមអេង សង្កេត​ឃើញ​ថា ស្ថាប័ន​ខ្លះ មាន​បញ្ហា​ចាប់​តាំង​ពី​ដំណាក់កាល​ប្រលង​ជ្រើសរើស​មន្ត្រី​ទៅ គឺ​ដាក់​តែ​បក្ខពួក កូនចៅ​ខ្លួនឯង ក្រសោប​យក​ទាំង​តំណែង​តូច​ធំ មាន​អំពើ​ពុក​រលួយ​​តាំងពី​ដំណាក់កាល​ប្រលង​ជ្រើសរើស​មន្ត្រី ទើប​ស្ថាប័ន​ទាំងនោះ មិន​ទទួល​បាន​អ្នកមាន​សមត្ថភាព​ពិតប្រាកដ ឯ​យុវជន ក៏​បាក់​ទឹកចិត្ត​ក្នុង​ការ​ប្រឡង​ធ្វើ​មន្ត្រីរាជការ។

ចំណែក​ប្រសិទ្ធភាព​ការងារ​វិញ មន្ត្រី​តាម​ជំនាញ​ខ្លះ នៅតែ​មិនទាន់​បញ្ចេញ​អស់ពី​សមត្ថភាព ដោយសារ​កត្តា​ជាច្រើន ដូចជា ស្ថានភាព​រើសអើង បក្ខពួក ក្រសួង​គ្រួសារ និង​ស្ថានភាព​ប្រាក់បៀវត្សរ៍​មិនទាន់​បំពេញ​គ្រប់​តម្រូវការ​ជាក់ស្ដែង៖ «ទោះ​យើង​ជ្រើស​ប៉ុណ្ណា​ក៏ដោយ ប៉ុន្តែ​បើ​យើង​មិន​កែប្រែ​បរិបទ របៀបរបប​នៃ​ការ​ធ្វើ​ការងារ​ទេ គឺ​អត់​មាន​អ៊ីចឹង​តែម្ដង អត់​សូវ​មាន​ប្រសិទ្ធភាព ​(ការងារ)។ ឧទាហរណ៍ ឧបមា​ថា កន្លែង​ខ្លះ ដូច​អគ្គនាយក​ពន្ធដារ អ៊ីចឹង​ឃើញ​គេ​ធ្វើការ​អ្វី មនុស្ស​គេ​សស្រាក់សស្រាំ គេ​ធ្វើការ​ត្រឹមត្រូវ ច្បាស់លាស់​។ រឿង​សំខាន់​បំផុត ត្រូវ​កាត់បន្ថយ គេ​ហៅថា ផលប្រយោជន៍​ផ្ទាល់ខ្លួន​របស់​បុគ្គល​ហ្នឹង កុំ​ឱ្យ​មាននៅ​ក្នុង​ក្រសួង​ស្ថាប័ន​។ កាលណា នៅ​ទុក​ឱ្យ​បុគ្គល​ហ្នឹង នៅ​ឆ្លៀត​បាន​ផលប្រយោជន៍ គាត់​នៅតែ​ធ្វើ​បែប​ហ្នឹង»

រដ្ឋមន្ត្រី​ក្រសួង​មុខងារ​សាធារណៈ លោក ពេជ្រ ប៊ុនធិន កាលពី​ថ្ងៃទី៦ ខែមីនា ប្រកាស​អនុញ្ញាត​ឱ្យ​អ្នកគ្រប់គ្រង​តាម​ក្រសួង ស្ថាប័ន អង្គភាព​រដ្ឋ​ចំនួន​ ៣២ ជ្រើសរើស​បេក្ខជន ដែល​មាន​លក្ខណសម្បត្តិ​គ្រប់គ្រាន់​ឱ្យ​ចូល​បម្រើ​ការងារ ដើម្បី​បំពេញ​មុខ​តំណែង​ទំនេរ និង​សេចក្ដី​ត្រូវការ​ពិតប្រាកដ​នៅ​តាម​អង្គភាព​ថ្នាក់​ជាតិ ថ្នាក់ក្រោម​ជាតិ និង​មន្ទីរ​អង្គភាព​ជំនាញ​រាជធានី ខេត្ត បាន​ជាង ​២​ម៉ឺន​នាក់ សម្រាប់​ឆ្នាំ​២០១៩។

ការ​ជ្រើសរើស គឺ​ធ្វើ​ឡើង​តាមរយៈ​ការប្រឡងប្រជែង សិស្ស និស្សិត និង​មន្ត្រីរាជការ​ស៊ីវិល ក្រសួង ស្ថាប័ន ត្រូវ​ធ្វើ​ការ​ជ្រើសរើស​ចេញពី​ការប្រឡងប្រជែង និង​ត្រូវ​ប្រកាស​លទ្ធផល​ប្រឡង​ជាប់​ស្ថាពរ​យ៉ាង​យូរ​ត្រឹម​ដំណាច់​ខែ​កញ្ញា ឆ្នាំ ២០១៩ ព្រម​ទាំង​ចាត់ចែង​រៀបចំ​បើក​ផ្ដល់​បៀវត្សរ៍​ដល់​បេក្ខជន​ប្រឡង​ជាប់​ឱ្យ​បាន​យ៉ាង​យូរ ១ខែក្រោយ​ការ​ទទួល​ស្គាល់​លទ្ធផល​ពី​ក្រសួង​មុខងារ​សាធារណៈ។ មន្ត្រីរាជការ ដែល​នឹង​ត្រូវ​ជ្រើសរើស​ឱ្យ​ប្រឡង​ចូល​ក្របខ័ណ្ឌ​រដ្ឋ នៅ​ឆ្នាំ​២០១៩ ទាំង​ ២៤.២៨៨នាក់ មានតែ​ជាង .៩៩៦នាក់​ទេ ដែល​អាច​ប្រលង​ចូល​តាមរយៈ​ក្របខ័ណ្ឌ​ថ្មី ចំណែក​ជិត ២​ម៉ឺន​ក្របខ័ណ្ឌ​ទៀត គឺ​សម្រាប់​មន្ត្រី​កំពុង​ជាប់កិច្ចសន្យា គ្រូ​បង្រៀន​ពុទ្ធិក​ជាប់កិច្ចសន្យា និង​ឆ្មាំ​ទំនប់​ប្រព័ន្ធ​ធារាសាស្ត្រ។ ក្នុង​នោះ​ក្រសួង​អប់រំ យុវជន​ និង​​កីឡា ត្រូវ​បាន​អនុញ្ញាត​ឱ្យ​រើស​មន្ត្រី​ចូល​ច្រើន​ជាងគេ ព្រោះ​ក្រសួង​នេះ គ្រប​ដណ្ដប់​លើ​គ្រូបង្រៀន​ខ្លះ ត្រូវ​បង្រៀន ​២​ថ្នាក់ គ្រូ​ខ្លះ​បង្រៀន​ ២​ពេល គ្រូបង្រៀន​ថ្នាក់​គួប ២​ថ្នាក់​ចូលគ្នា គ្រូបង្រៀន​ថ្នាក់​គួប ៣​ថ្នាក់​ចូលគ្នា គ្រូបង្រៀន​ជាប់​កិច្ច​សន្យា​​អប់រំ​​ក្រៅ​​ប្រព័ន្ធ និង​គ្រូបង្រៀន​ជាប់កិច្ចសន្យា​ខ្មែរអិស្លាម​ជាដើម។

រដ្ឋលេខាធិការ និង​ជា​អ្នកនាំពាក្យ​ក្រសួង​មុខងារ​សាធារណៈ លោក យក់ ប៊ុនណា មិន​ទទួល​ទូរស័ព្ទ​នៅ​ថ្ងៃ​ទី​៨ មីនា​។ ប៉ុន្តែ​អនុរដ្ឋលេខាធិការ លោក ជុត មន្នី ប្រាប់​កាសែត​ក្នុងស្រុក (Phnom Penh Post) ថា គោលការណ៍​របស់​រដ្ឋាភិបាល កំណត់​ថា ចូលនិវត្តន៍ ៣​នាក់ នឹង​ត្រូវ​រើស​ចូល​វិញ​តែ​ម្នាក់​ទេ កុំ​ឱ្យ​មានការ​យល់​ច្រឡំ​រើស​មន្ត្រី​អ្វី​ក៏​ច្រើន​ម្ល៉េះ​។ លោក ថា ជា​គោលការណ៍ ក្នុង​មួយ​ឆ្នាំ គឺ​ត្រូវតែ​រើស​ម្ដង ព្រោះ​ត្រូវ​ធ្វើតាម​នីតិវិធី​រក្សា​ធនធានមនុស្ស គឺ​មាន​ចេញ និង​មាន​ចូល។

មន្ត្រី​ការិយាល័យ​អប់រំ យុវជន និង​កីឡា ក្រុង​ស្ទឹងសែន ខេត្ត​កំពង់ធំ លោក ថៃ ធីម សង្កេត​ឃើញ​ថា ធនធានមនុស្ស​នៅ​តាម​ស្ថាប័នរដ្ឋ​បច្ចុប្បន្ន​នៅសល់​ច្រើន​ណាស់ មិនទាន់​ត្រូវ​បាន​ប្រើប្រាស់​អស់ពី​លទ្ធភាព​នៅឡើយ​ទេ។ លោក ថៃ ធីម សង្កេត​ឃើញ​ថា នៅ​តំបន់​ទីប្រជុំជន មន្ត្រីរាជការ​គរ​ជើង តែ​នៅ​តំបន់​ដាច់ស្រយាល ខ្វះ​មន្ត្រី​ជំនាញ​ច្រើន​ណាស់ ដោយសារ​ម្នាក់ៗ សម្រុក​ផ្លាស់​ចូល​មក​រកតែ​ទីក្រុង​។ លោក​បន្ត​ថា ការងារ​របស់​មន្ត្រី​រាជការ​ខ្លះ​គ្មាន​ប្រសិទ្ធភាព ហើយ​ក៏​មាន​មន្ត្រី​ខ្លះ​ខ្ជីខ្ជា​ក្នុង​ការងារ​ទៀត​ផង៖ «ខ្ញុំ​ឃើញ​ការិយាល័យ​នៅ​ក្នុង​ក្រុង​ស្ទឹងសែន ដែល​ខ្ញុំ​ឃើញ​ការិយាល័យ​ខ្លះ​បិទទ្វារ មិន​ឃើញ​បុគ្គលិក​មក​ធ្វើការ ហើយ​ដល់​ថ្ងៃ (ឃើញ​គាត់​) មក​ធ្វើការ ខ្ញុំ​សួរ​លេងៗ​ ទៅ គាត់​ឆ្លើយ​ថា មិន​មាន​ការងារ​អ្វី​ធ្វើ​ផង ដូច្នេះ​គាត់​មិន​ចាំបាច់​មក​រាល់ថ្ងៃ​ទេ។ យូរៗ​ គាត់​មក​ម្ដងណា​។ អ៊ីចឹង​ឃើញ​ថា ការិយាល័យ​មួយៗ មិនទាន់​ប្រើ​មនុស្ស​ឱ្យ​ត្រូវ​ទេ»

មិនទាន់​មាន​របាយការណ៍​បង្ហាញ​ពី​មន្ត្រីរាជការ​សាធារណៈ​ចំនួន​ប៉ុន្មាន​នាក់ នឹង​ត្រូវ​ចូលនិវត្តន៍​ឆ្នាំ​២០១៩​ ទេ។ ប៉ុន្តែ កាលពី​ថ្ងៃ​ទី​២០ ខែ​មិថុនា ឆ្នាំ​២០១៨ រដ្ឋលេខាធិការ​ក្រសួង​មុខងារ​សាធារណៈ លោក យក់ ប៊ុនណា ធ្លាប់​បង្ហាញ​តាមរយៈ​បាថកថា នៅ​សាលា​ភូមិន្ទ​រដ្ឋបាល​ថា គិត​ត្រឹម​ឆ្នាំ​២០១៨ មន្ត្រីរាជការ​ទាំងអស់​មាន​ចំនួន ២០៨.៣៦៨នាក់ ក្នុង​នោះ​ស្ត្រី មាន​ចំនួន​ ៨៤.៤៦៦នាក់ ហើយ​ក្រសួង​អប់រំ​មាន​មន្ត្រី​ច្រើន​ជាងគេ គឺ​ចំនួន ១១៩.៥៩៣នាក់។ ក្រសួងសុខាភិបាល​លំដាប់​ទី​២ មាន​ជាង ២​ម៉ឺន​បី​ពាន់​នាក់ ក្រសួងមហាផ្ទៃ​លំដាប់​លេខ​៣ មាន​ជាង​មួយ​ម៉ឺន​ពីរ​ពាន់​នាក់ ក្រសួង​សេដ្ឋកិច្ច​ជិត .០០០នាក់ និង​ស្ថាប័ន​ផ្សេងទៀត មាន​ចំនួន​ជាង ​៤​ម៉ឺន ៧​ពាន់​​នាក់។

មន្ត្រី​សង្គម​ស៊ីវិល​ស្នើ​ឱ្យ​ក្រសួង​រដ្ឋ​និមួយៗ​ប្រើប្រាស់​មន្ត្រីរាជការ​របស់​ខ្លួន​ឱ្យ​មាន​ប្រសិទ្ធភាព ដោយ​កុំ​និយម​បក្សពួក កុំ​យក​អ្នកមាន​សមត្ថភាព​ទៅ​ទុក​កៀន​ជញ្ជាំង ឬ​បញ្ឈរជើង​ចោល​អត់​ប្រើការ ប៉ុន្តែ​ត្រូវ​ប្រើប្រាស់​ពួកគេ​ឱ្យ​បាន​ពេញលេញ ដើម្បី​ទាញ​យក​ផលប្រយោជន៍​ជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។