ក្រុមកម្មកររោងចក្រស្បែកជើងចំនួន ៣០នាក់ បានបន្តធ្វើបាតុកម្មឈានដល់ថ្ងៃទី៣ ដើម្បីទាមទារអោយថៅកែរោងចក្រផ្ដល់ប្រាក់សំណងតាមការសន្យាក្រោយពីរោងចក្រនេះព្យួរការងារដោយសារជំងឺកូវីដ១៩។ ការតវ៉ារយៈពេល ៣ថ្ងៃមកនេះ តំណាងក្រសួងការងារបានចុះមកជួបក្រុមកម្មករដែរ តែនៅមិនទាន់មានដំណោះស្រាយនៅឡើយ។
ក្រុមកម្មកររោងចក្រស្បែកជើង នៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បាននាំគ្នាប្រមូលផ្តុំតវ៉ាដើម្បីអោយចៅកែរោងចក្រគោរពតាមការសន្យារបស់ខ្លួនផ្ដល់សំណងដល់ពួកគេក្រោយពីរោងចក្រប្រកាសពន្យារពេលចូលធ្វើការ។
រោងចក្រស្បែកជើង សាន់ វែល ស៊ូ (Sun Well Shoes Co. Ltd.) បានជូនដំណឹងដល់ក្រុមកម្មករថា ដោយសារតែក្រុមហ៊ុនមិនទាន់ទទួលបាននូវការបញ្ជាទិញពីភ្ញៀវសារជាថ្មី ក្រុមហ៊ុននឹងផ្អាកដំណើរការផលិតកម្មរបស់ខ្លួនចាប់ពីថ្ងៃទី២ ឧសភា រហូតដល់ថ្ងៃទី១ ខែកក្កដា។
ក្នុងលិខិតប្រកាសបិទនៅពីមុខរោងចក្របានបញ្ជាក់ថា ប្រាក់ឈ្នួលសម្រាប់ការព្យួរកិច្ចសន្យាការងារក្នុងខែមេសានេះក្រុមហ៊ុនមានលទ្ធភាពផ្ដល់ជូនត្រឹម ៣០ដុល្លាក្នុងកម្មករម្នាក់ៗ។ ប្រាក់ឈ្នួលនេះនឹងបើករួមជាមួយប្រាក់ ៤០% ដែលនៅសល់ និង ២០% សម្រាប់ខែមីនា។
កម្មកររោងចក្រស្បែកជើង សាន់ វែល ស៊ូ (Sun Well Shoes) អ្នកស្រី ចាន់ សារុំ និយាយថា រយៈពេលតវ៉ាបីថ្ងៃមកនេះថៅកែរោងចក្រមិនបានផ្ដល់ប្រាក់ឧបត្ថម្ភតាមការសន្យាទេ។
អ្នកស្រីបញ្ជាក់ថាក្រុមកម្មករទាំងអស់គ្នាមានការលំបាកក្នុងជីវភាពប្រចាំថ្ងៃសម្រាប់ម្ហូបអាហារថ្ងៃ សាលាកូនរៀន និងថ្លៃជួលបន្ទប់ស្នាក់នៅជាដើម៖ « ឥឡូវកំពុងអង្គុយពិបាកចិត្តអត់មានលុយបង់ ផ្ទះជួលក៏អត់មាន លុយធនាគារក៏អត់មាន។លុយសូម្បីតែទិញអីហូបក៏គ្មានដែរ លំបាកទុកលើគំនរហើយ » ។
ប្រធាននាយកដ្ឋានអធិការកិច្ចការងារ នៃក្រសួងការងារបណ្ដុះបណ្ដាលវិជ្ជាជីវៈ លោក អ៊ុក ចាន់ធូ កាលពីថ្ងៃទី៤ មីនា បានចេញលិខិតជូនដំណឹងដល់រោងចក្រ សាន់ វែល ស៊ូ ថា ក្រសួងអនុញ្ញាតព្យួរកិច្ចសន្យាការងារកម្មករនិយោជិតចំនួន ៥៥៤នាក់ រយៈពេលពីរខែចាប់ពីថ្ងៃទី២ រហូតដល់ថ្ងៃទី៣០ មេសា។ ដើម្បីសម្រួលដល់ជីវភាពប្រចាំថ្ងៃរបស់កម្មករនិយោជិកក្នុងអំឡុងពេលព្យួរកិច្ចសន្យាការងារនេះរោងចក្រត្រូវអនុវត្តបើកប្រាក់ឈ្នួលអោយបានត្រឹមត្រូវតាមកិច្ចព្រមព្រៀង។
តំណាងសហជីពកម្មករនិយោជិក លោក សំ វិចិត្រ ប្រាប់អាស៊ីសេរីថា ខាងតំណាងរោងចក្រមិនបានគោរពតាមកិច្ចសន្យារបស់ខ្លួនទេ។លោកបញ្ជាក់ថា ក្រុមកម្មករនឹងប្រមូលផ្ដុំគ្នាតវ៉ាទ្រង់ទ្រាយធំម្ដងទៀងនៅថ្ងៃទី៧ ឧសភានេះបើនៅតែគ្មានដំណោះស្រាយ៖ « កម្មករយើងអត់ទាន់មានបើកប្រាក់ខែទេ។អញ្ចឹងបងប្អូនយើងមានការខ្វះខាតក្នុងការបង់ផ្ទះជួលនិងធនាគារពីព្រោះថាធនាគារវាប្រឈមមែនទែនមិនមានការពន្យារនូវការបង់ទេ។ដល់អញ្ចឹងបងប្អូនយើងទុកលំបាកមែនទែនក្នុងរយៈពេលពីរខែកន្លងមកនេះគឺអត់ទាន់បានបើក » ។
អាស៊ីសេរីមិនអាចទាក់ទងអ្នកនាំពាក្យក្រសួងការងារលោក ហេង ស៊ួ បានទេដោយទូរស័ព្ទរបស់លោកគ្មានអ្នកទទួល។
ក្នុងលិខិតរបស់សមាគមថៅកែរោងចក្រ ហៅកាត់ថា GMAC កាលពីថ្ងៃទី៤ ខែឧសភា ទៅកាន់អ្នកបញ្ជាទិញឲ្យដឹងថា គិតមកដល់ពេលនេះ មានរោងចក្រនៅក្នុងវិស័យកាត់ដេរ និងផលិតស្បែកជើងចំនួន១៨០ នៅកម្ពុជាបានព្យួរការងារ ហើយក៏មានរោងចក្រចំនួន ៦០ផ្សេងទៀតនឹងឈានទៅព្យួរបណ្ដោះអាសន្នផងដែរ។ ស្ថានភាពនេះកំពុងធ្វើឱ្យប៉ះពាល់ទៅដល់កម្មករជាង ១៥ម៉ឺននាក់។ GMAC អះអាងទៀតថា ការព្យួរការងារនៅក្នុងវិស័យនេះស្ថិតក្នុងភាពមិនច្បាស់លាស់នឹងអាចបន្តការងារឡើងវិញបាននៅពេលណាឡើយ ហើយកម្មករ ដែលត្រូវព្យួរការងារអាចនឹងកើនដល់ជិត២០ម៉ឺននាក់នាពេលខាងមុខ។ GMACថា ផលប៉ះពាល់មិនត្រឹមតែកើតមាននៅលើកម្មករទេ ប៉ុន្តែគឺថែមទាំងទៅដល់សមាជិកគ្រួសារប្រមាណ២លាននាក់ ដែលពឹងផ្អែកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។