សមត្ថកិច្ចខេត្តព្រះសីហនុ នៅថ្ងៃទី១៧ ខែធ្នូ បង្ហាញការឃាត់ខ្លួនមនុស្ស ៧នាក់ ក្នុងនោះមានជនជាតិចិន ៣នាក់ និងខ្មែរ ៤នាក់ ដោយសង្ស័យថា ពួកគេមានជាប់ពាក់ព័ន្ធនឹងក្រុមជនជាតិចិន ៧នាក់ ដែលសមត្ថកិច្ចចាប់ខ្លួនបាន កាលពីថ្ងៃទី៦ ខែធ្នូ ក្នុងករណីចាប់បង្ខាំងមនុស្ស និងកាន់កាប់អាវុធដោយខុសច្បាប់។
ស្នងការនគរបាលខេត្តព្រះសីហនុ លោក ជួន ណារិន្ទ ឲ្យដឹងថា សមត្ថកិច្ចកំណត់អត្តសញ្ញាណ និងចាប់ខ្លួនជនសង្ស័យបន្ថែម ៧នាក់នេះ ខ្លះនៅរាជធានីភ្នំពេញ ខ្លះទៀតនៅខេត្តព្រះសីហនុ ដោយដកហូតបានកាំភ្លើងវែងប្រភេទ AK47 ១ដើម កាំភ្លើងខ្លីម៉ាក G-Lock៤ដើម និងគ្រាប់រំសេវមួយចំនួនទៀត។ លោកថា សមត្ថកិច្ចកំពុងកសាងសំណុំរឿងបញ្ជូនជនសង្ស័យ និងវត្ថុតាងទៅសាលាដំបូងខេត្តព្រះសីហនុ។
កាលពីថ្ងៃទី៦ ខែធ្នូ កម្លាំងជំនាញនៃនគរបាលព្រហ្មទណ្ឌខេត្តព្រះសីហនុ ឃាត់ខ្លួនជនសង្ស័យជនជាតិចិនមួយក្រុម មានគ្នា ៧នាក់ ដែលជាប់ពាក់ព័ន្ធករណីចាប់ឃុំឃាំងបង្ខាំងមនុស្សខុសច្បាប់ ផ្ដល់ទីតាំងប្រព្រឹត្តិបទល្មើសឧក្រិដ្ឋ និងនាំចូលអាវុធ ដោយគ្មានការអនុញ្ញាត ស្ថិតនៅផ្ទះសំណាក់ ស៊ែងឆីង ក្នុងភូមិ២ សង្កាត់លេខ២ ក្រុងព្រះសីហនុ។ ក្នុងពេលចុះប្រតិបត្តិការនោះ សមត្ថកិច្ចរកឃើញកាំភ្លើងខ្លី ២ដើម កាំភ្លើងវែងម៉ាក់ M16 ១ដើម គ្រាប់កាំភ្លើងជិត ២រយគ្រាប់ និងគ្រឿងញៀនមួយចំនួនធំ៕
(អាវុធ និងគ្រឿងញៀន ដែលនគរបាលប្រមូលបានពីជនសង្ស័យ ចិន និងខ្មែរ ៧នាក់ ពេលចាប់ខ្លួន។ រូបពីគេហទំព័រនគរបាលជាតិ)
(កាំភ្លើងវែងប្រភេទ AK47 ១ដើម កាំភ្លើងខ្លីម៉ាក G-Lock៤ដើម និងគ្រាប់រំសេវមួយចំនួនទៀត ដែលនគរបាលប្រមូលបានពីជនសង្ស័យ ៧នាក់ ពេលចាប់ខ្លួន។ រូបពីគេហទំព័រនគរបាលជាតិ)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។