មន្ត្រីសហជីពថា ការបញ្ឈប់ការងារស្ត្រីមានផ្ទៃពោះនៅរោងចក្រ សាន ហ្វេង (SAN FENG CAMBODIA) ស្ថិតក្នុងតំបន់សេដ្ឋកិច្ចពិសេសក្រុងបាវិត ខេត្តស្វាយរៀង ជាការរំលោភសិទ្ធិការងារ។ មន្ត្រីសហជីពរូបនោះ អំពាវនាវដល់ក្រសួងការងារឱ្យត្រួតពិនិត្យបទបញ្ជាផ្ទៃក្នុងតាមរោងចក្រនីមួយៗ ដើម្បីការពារសិទ្ធិកម្មករ។ ប្រតិកម្មនេះ គឺបន្ទាប់ពីថៅកែរោងចក្រសាន ហ្វេង បានបញ្ឈប់កម្មការិនី៣នាក់ ដែលកំពុងមានផ្ទៃពោះក្រោមហេតុផលមិនច្បាស់លាស់។
មន្ត្រីសហជីព រកឃើញថា ថៅកែតាមរោងចក្រមួយចំនួន រួមទាំងរោងចក្រ សាន ហ្វេង បានបង្កើតបទបញ្ជាផ្ទៃក្នុងរបស់ខ្លួនខុសអំពីគោលការណ៍ច្បាប់ស្ដីពីការងារ ដើម្បីប្រើជាលេសក្នុងការបញ្ឈប់កម្មករ ឬសហជីព។
ប្រធានសហជីពចលនាកម្មករ លោក ប៉ាវ ស៊ីណា ប្រាប់អាស៊ីសេរីនៅថ្ងៃទី១២ កក្កដា ថា ការបញ្ឈប់ការងារស្ត្រីមានផ្ទៃពោះនៅតែបន្តកើតមានជាបន្តបន្ទាប់ ក្រោមហេតុផលមិនសមរម្យ គឺជាការរំលោភច្បាប់ស្ដីពីការងារ។ លោកបន្តថា ការបញ្ឈប់ការងារស្ត្រីមានផ្ទៃពោះនេះ ធ្វើឲ្យពួកគេបាត់បង់ការងារ និងមិនអាចស្វែងរកកន្លែងការងារផ្សេងទៀតបានដោយងាយនោះទេ ហើយបានប៉ះពាល់ធ្ងន់ធ្ងរដល់សេដ្ឋកិច្ចគ្រួសារពួកគេ។
លោក ប៉ាវ ស៊ីណា៖ «ជាទូទៅនៅពេលដែលគេបញ្ឈប់គាត់ គេតែងតែយកកំហុសឆ្គងមកប្រើ ដើម្បីជាលេស ក្នុងការមិនផ្ដល់សំណង មិនផ្ដល់ការទូទាត់ណាមួយទេ អានេះអ្វីដែលយើងមើលឃើញ បាទ ប៉ុន្តែធាតុពិត គាត់អត់បានប្រព្រឹត្តកំហុសអ្វីទាំងអស់ អ្វីដែលសំខាន់គឺនិយោជកហ្នឹងគាត់ ជាអ្នកប្រព្រឹត្តកំហុសដោយខ្លួនឯង ជាពិសេសនិយោជកកំពុងតែប្រើប្រាស់បទបញ្ជាផ្ទៃក្នុងដែលខុសច្បាប់ ឬក៏ការបង្កើតបទបញ្ជាផ្ទៃក្នុង ដែលខុសច្បាស់ដើម្បីយកបទបញ្ញត្តិទាំងអស់ហ្នឹងមកប្រើទៅលើបងប្អូនកម្មករ ។ នៅពេលដែលគេបញ្ឈប់ គេយល់ថាកម្មករខុស ហើយគេមិនចាំបាច់បង់សំណង ប៉ុន្តែអ្វីដែលយើងរកឃើញទង្វើទាំងអស់ដែលនិយោជក បញ្ឈប់ស្ត្រីដែលមានផ្ទៃពោះសុទ្ធសឹងតែបាន គឺបានកំពុងតែប្រព្រឹត្តផ្ទុយពីច្បាប់ ឬក៏ប្រើប្រាស់បទបញ្ជាផ្ទៃក្នុងដែលខុសពីច្បាប់»។
លោក ប៉ាវ ស៊ីណា បន្ថែមទៀតថា តាមច្បាប់ស្ដីពីការងារ នៅពេលកម្មករឈប់ចាប់ពី៦ថ្ងៃជាប់ៗដោយគ្មានមូលហេតុក្នុងមួយសប្ដាហ៍ ទើបចាត់ទុកថាជាកំហុសធ្ងន់ធ្ងរ អាចឈានដល់ការបញ្ឈប់កម្មករនោះក៏ប៉ុន្តែប្រសិនបើការឈប់នោះ ដោយសារមានធុរៈបន្ទាន់ ឬមានហេតុផលសមរម្យ ភាគីក្រុមហ៊ុនក៏ត្រូវតែពិនិត្យ និងពិចារណាឬក៏គ្រាន់តែណែនាំដល់ពួកគេ។ ប្រធានសហជីពរូបនេះ ស្នើដល់ក្រសួងការងារ ត្រួតពិនិត្យបទបញ្ជាផ្ទៃក្នុងតាមរោងចក្រនីមួយៗ ដើម្បីការពារសិទ្ធិកម្មករ ជាពិសេសស្ត្រីមានផ្ទៃពោះ និងចាត់វិធានការច្បាប់លើរោងចក្រ ដែលមានបទបញ្ជាផ្ទៃក្នុងផ្ទុយពីច្បាប់ការងារ។
វិទ្យុអាស៊ីសេរីនៅមិនទាន់អាចទាក់ទងភាគីរោងចក្រ សាន ហ្វេង និង អ្នកនាំពាក្យក្រសួងការងារ លោក ហេង សួរ ដើម្បីសុំការបកស្រាយជុំវិញបញ្ហានេះបាននៅឡើយទេ នៅថ្ងៃទី១២ កក្កដា។
កម្មការិនីមានផ្ទៃពោះ ៣ខែត្រូវបានថៅកែ រោងចក្រ សាន ហ្វេង បញ្ឈប់ពីការងារ គឺលោកស្រី លម រ៉ានីន ប្រាប់វិទ្យុអាស៊ីសេរីថា បទបញ្ជាផ្ទៃក្នុងនៅក្នុងរោងចក្រអនុញ្ញាតឲ្យឈប់ ៤ថ្ងៃ ក្នុង១ខែ ហើយប្រសិនបើឈប់លើសកំណត់ចំនួន ៣ថ្ងៃ រោងចក្រនឹងបញ្ឈប់ពីការងារ។ លោកស្រីបន្តថា លោកស្រីទើបតែឈប់ត្រឹមតែ២ថ្ងៃប៉ុណ្ណោះ ថែមទាំងបានជូនដំណឹងទៅផ្នែករដ្ឋបាលរោងចក្រ និងទទួលបានការអនុញ្ញាតផងដែរ។ លោកស្រីបន្តទៀតថា នៅថ្ងៃទី១០ កក្កដា ប្រធានផ្នែកគ្រប់គ្រងនៅក្នុងរោងចក្រ បានប្រាប់លោកស្រីថា ថៅកែបានបញ្ឈប់លោកស្រីពីការងារ និងមិនបានបញ្ជាក់ពីមូលហេតុនោះទេ។
លោកស្រី លម រ៉ានីន៖ «ខលទៅគេ ហើយហ្អាថ្ងៃចុងក្រោយខ្ញុំទៅដល់កន្លែងធ្វើការហើយបង ហើយក៏សុំគេចេញ ក៏គេឱ្យចេញដែរ។ ហើយគេក៏ប្រាប់យើងដែរ ក្នុង១ខែហ្នឹងដល់អ៊ីន(Nអវត្តមាន)បីទើបគេបញ្ឈប់ណាបង!តែយើងទើបបានតែពីរទេត្រូវបានគេបញ្ឈប់ចោលពីការងារ» ។
លោកស្រី លម រ៉ានីន និងសហជីពនៅតែស្នើយ៉ាងទទូចដល់ក្រសួងការងារ ឲ្យពង្រឹងវិធានការច្បាប់ដើម្បីការពារសិទ្ធិកម្មករនៅកន្លែងការងារ ជាពិសេសស្ត្រីមានផ្ទៃពោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។