អគ្គនាយដ្ឋានអន្តោប្រវេសន៍អះអាងថា គ្មានភាពអសកម្មនៅច្រកទ្វារអន្តរជាតិប៉ោយប៉ែតទេ។ ប៉ុន្តែមន្ត្រីសង្គមស៊ីវិល ដែលឃ្លាំមើលនៅខេត្តបន្ទាយមានជ័យប្រតិកម្មថា ការបញ្ជាក់នេះមិនពិតនោះទេព្រោះមន្ត្រីប្រចាំច្រកទ្វារនេះតែងយកលុយពីពលរដ្ឋ និងអ្នកដំណើរឆ្លងកាត់ច្រកនេះ។
អគ្គនាយកដ្ឋានអន្តោប្រវេសន៍ឱ្យដឹងថា ទោះមានការចោទប្រកាន់ពីអ្នកប្រើប្រាស់បណ្ដាញសង្គម និងសារព័ត៌មានមួយចំនួន បាននិយាយពីភាពអសកម្មរបស់មន្ត្រីនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត កាលពីពេលថ្មីៗ នេះក្តី ក៏ក្រុមប្រឹក្សាវិន័យនៃអគ្គនាយកដ្ឋានអន្តោប្រវេសន៍អះអាងថា មិនមានការបង្ហាញភស្តុតាជាក់លាក់នោះទេ។ សេចក្ដីប្រកាសព័ត៌មានរបស់អគ្គនាយដ្ឋានអន្តោប្រវេសន៍ចុះផ្សាយដោយអគ្គស្នងការដ្ឋាននគរបាលជាតិ កាលពីថ្ងៃទី៩ ខែមីនា ឱ្យដឹងថា ដោយមានការអះអាងបែបនេះ ក្រុមប្រឹក្សាវិន័យបានកោះហៅថ្នាក់ដឹកនាំ និងមន្ត្រីមួយចំនួននៃប៉ុស្តិ៍ច្រកទ្វារអន្តរជាតិប៉ោយប៉ែតឱ្យចូលស្រាយបំភ្លឺ និងបានចាត់វិធានការ ដើម្បីបំបាត់ភាពអសកម្មទាំងឡាយ។
មន្ត្រីអង្គការការពារសិទ្ធិមនុស្ស អាដហុក (Adhoc) ប្រចាំខេត្តបន្ទាយមានជ័យលោក ស៊ុំ ចាន់គា ឱ្យអាស៊ីសេរីដឹងថា លោកតែងឃើញថ្នាក់លើចេញលិខិតអះអាងថា ប៉ុស្តិ៍ច្រកទ្វារអន្តរជាតិប៉ោយប៉ែតគ្មានភាពអសកម្ម ប៉ុន្តែផ្ទុយទៅវិញលោកតែងឃើញមន្ត្រីនៅច្រកទ្វារមួយនេះយកលុយពីអ្នកដំណើរជារៀងរាល់ថ្ងៃ ក្រោមរូបភាពផ្សេងៗ គ្នា និងការបង់ថ្លៃសេវាក្រៅផ្លូវការទៀតផង។ លោកបន្តថាពលរដ្ឋខ្មែរ និងជនបរទេស ដែលឆ្លងកាត់ច្រកនេះសុទ្ធតែដឹងពីទង្វើរបស់មន្ត្រីនៅច្រកទ្វារនេះទាំងអស់៖ «»
លោក ស៊ុំ ចាន់គា ឱ្យដឹងទៀតថា ទោះកន្លែងខ្លះមន្ត្រីច្រកទ្វារមិនចេញមុខមកយកលុយ ប៉ុន្តែមានអ្នករត់ការប្រចាំកន្លែងនោះ ដែលជាអ្នកសរសេរ អ្នករត់ការលិខិតស្នាម និងអ្នករត់ការយកលិខិតឆ្លងដែនដោយមិនចាំបាច់ទៅតម្រង់ជួរ៖ «»
ទោះអគ្គនាយកដ្ឋានអន្តោប្រវេសន៍បញ្ជាក់ថា គ្មានភាពអសកម្មក្ដី ក៏បានចាត់វិធានការបំបាត់ភាពអសកម្មនៅច្រកទ្វារអន្តរជាតិមួយនេះ ដូចជា ត្រូវដាក់ស្លាកអក្សរសម្គាល់បញ្ជាក់ថា ការបម្រើសេវានេះ មិនតម្រូវឱ្យមានការបង់ប្រាក់។ រៀបចំកែលម្អបញ្ជរបំពេញបែបបទចេញ-ចូលឱ្យបានសមស្របនិងរៀបចំលំហូរអ្នកដំណើរឱ្យមានការតម្រង់ជួរត្រឹមត្រូវតាមលំដាប់មុនក្រោយ។
មន្ត្រីនគរបាលគ្រប់ច្រកទ្វារព្រំដែន ត្រូវយកចិត្តទុកដាក់ និងបង្កលក្ខណៈងាយស្រួលដល់ពលរដ្ឋខ្មែរនិងបរទេស ដែលធ្វើដំណើរឆ្លងកាត់ព្រំដែន ជាពិសេស ពលករដែលធ្វើការនៅប្រទេសថៃក្នុងរដូវចូលឆ្នាំខ្មែរខាងមុខឆាប់ៗ នេះ ដោយមិនត្រូវទទួលប្រាក់កាសឡើយ។ ជាងនេះទៀត ត្រូវពង្រឹងការគោរពបទបញ្ជាវិន័យរបស់កងកម្លាំងនគរបាលជាតិ អប់រំសីលធម៌ ឥរិយាបថ និងអាកប្បកិរិយាបំពេញការងាររបស់មន្ត្រី យកចិត្តទុកដាក់លើមុខជំនាញវិជ្ជាជីវៈរបស់ខ្លួន និងដាក់វិន័យយ៉ាងតឹងរឹងបំផុត ចំពោះមន្ត្រីណា ដែលបានប្រព្រឹត្តខុសឆ្គង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។