ក្មេង​ស្រី​ម្នាក់​បាន​បង្ហោះ​សារ​សុំ​​ឱ្យ​ជួយ​រំដោះ​ចេញ​ពី​ប្រទេស​ចិន

ដោយ ហេង រស្មី
2021-03-04
Share
ក្មេង​ស្រី​ម្នាក់​បាន​បង្ហោះ​សារ​សុំ​​ឱ្យ​ជួយ​រំដោះ​ចេញ​ពី​ប្រទេស​ចិន ក្មេង​ស្រី​រង​គ្រោះ​បាន​បង្ហោះ​សារ​សុំ​អន្តរាគមន៍​ពី​លោក​នាយករដ្ឋមន្ត្រី​​ហ៊ុន សែន​ ដើម្បីឱ​រំដោះ​ខ្លួន​ចេញ​ពី​ការ​ជួយ​ដូរ​ផ្លូវ​ភេទ​នៅ​ប្រទេស​ចិន។
រូប៖​ហ្វេសប៊ុក

ជនរងគ្រោះ ​បាន​បញ្ជាក់​នៅ​ក្នុង​វីដេអូ​ឃ្លិប​ ដែល​បាន​ចែក​ចាយ​តៗ ​គ្នា​តាម​បណ្ដាញ​សង្គម​ថា នាង​ត្រូវ​បាន​មេខ្យល់​យក​ទៅ​លក់​នៅ​កន្លែង​រក​ស៊ី​ផ្លូវ​ភេទ​មួយ​កន្លែង​នៅ​ក្នុង​ប្រទេស​ចិន តាំង​ពី​អាយុ ១៥​ឆ្នាំ ហើយ​ត្រូវ​បាន​ថៅកែ​បង្ខំ​ឱ្យ​ទទួល​ភ្ញៀវ​ពី​ម្នាក់​ទៅ​ម្នាក់​ជា​រៀង​រាល់​ថ្ងៃ។

នៅ​ក្នុង​វីដេអូ​ឃ្លិប​រយៈ​ពេល​ជាង​មួយ​នាទី ជន​រងគ្រោះ​បាន​សុំ​អន្តរាគមន៍​ពី​លោក​នាយក​រដ្ឋមន្ត្រី​ ហ៊ុន សែន​ ដើម្បី​ឱ្យ​បាន​វិល​ត្រឡប់​ទៅ​ជួប​ជុំ​ក្រុម​គ្រួសារ​នៅ​ឯ​ស្រុក​ត្បែង​មាន​ជ័យ ខេត្ត​ព្រះ​វិហារ​វិញ៖ «ខ្ញុំ​សូម​ជម្រាប​សួរ​អ្នក​ទាំង​អស់​គ្នា​ ខ្ញុំ​សូម​លើក​ម្រាម​ដៃ១០ ឱ្យ​បង​ប្អូន​ខ្មែរ​ជួយ​យក​ខ្ញុំ​ទៅ​ខ្មែរ​វិញ​ផង។ ឱ្យ​អ្នក​នៅ​ខ្មែរ​ឃើញ​វីដេអូ​ហ្នឹង​ហើយ​ជួយ​ចែក​រំលែក​ឱ្យ​លោក​ជំទាវ ឱ្យ​សម្ដេច​ ហ៊ុន សែន​ ឃើញ​ ឱ្យ​គាត់​យក​ខ្ញុំ​ទៅ​ខ្មែរ​វិញ​ផង។ ខ្ញុំ​ចាញ់​បោក​មេខ្យល់​យក​មក​លក់​នៅ​ប្រទេស​ចិន តាំង​ពី​អាយុ​១៥ឆ្នាំ​ ហើយ​អត់​ឱ្យ​ខ្ញុំ​ទាក់​ទង​ទៅ​អ្នក​ផ្ទះ​ទេ»។

អាស៊ីសេរី​ បាន​ព្យាយាម​ទាក់ទង​ទៅ​ក្រុម​គ្រួសារ​ជនរងគ្រោះ​ដើម្បី​ចង់​ដឹង​ថា ​តើ​ក្មេង​ស្រី​រូបនោះ​ បាន​ទៅ​រស់​នៅ​ក្នុង​ប្រទេស​ចិន​ប៉ុន្មាន​ឆ្នាំ​ហើយ​ ក្រោយ​ពីនាង​ចាកចេញ​ពី​ប្រទេស​កម្ពុជា​ក្នុង​វ័យ​១៥​ឆ្នាំ​នោះ ​ប៉ុន្តែ​នៅ​មិន​ទាន់​អាច​ទាក់ទង​ក្រុម​គ្រួសារ​នាង​បាន​នៅ​ឡើយ​។

អ្នក​នាំ​ពាក្យ​ក្រសួង​ការបរទេស​លោក​ កុយ គួង​ បញ្ជាក់​ថា លោក​បាន​ឃើញ​វីដេអូ​ឃ្លិប​នេះ​ហើយៗ ក្រសួង​ការ​បរទេស​ទេស​កំពុង​ចាត់​វិធានការ​ដើម្បី​នាំ​យក​ក្មេង​ស្រី​រង​គ្រោះ​មក​កាន់​ប្រទេស​កម្ពុជា​វិញ៖ «ខ្ញុំ​បាន​បញ្ជូន​វីដេអូ​ឃ្លិប​នេះ​ទៅ​នាយកដ្ឋាន​ពាក់​ព័ន្ធ​ទៅ​នាយកដ្ឋាន​ក្រសួង​ការ​បរទេស ក៏​ដូច​ជា ទៅ​ស្ថាន​តំណាង​ក្រសួង​ការបរទេស​ចិន ដើម្បី​ធ្វើ​ការ​ស្រាវជ្រាវ​ថា តើ​ស្ថិត​នៅ​ក្នុង​ខេត្ត​ណា ពី​ព្រោះនៅ​ក្នុង​វីដេអូ​នេះ​អត់​មាន​បញ្ជាក់​ទី​កន្លែង​ច្បាស់លាស់។ កាល​ណា​អត់​បញ្ជាក់អ៊ីចឹង​ការ​ស្វែង​រក​មាន​ការ​លំបាក​ខ្លះ​ខ្លាំងហើយ​ប្រសិន​បើ​បញ្ជាក់​ទី​កន្លែង​ច្បាស់​លាស់​នោះ គឺ​ថា យើង​អន្តរាគមន៍​ជា​មួយ​អាជ្ញាធរ​ចិន នៅ​ខេត្ត​ដែល​បាន​កំណត់​នោះ​ថា លឿន។ ប៉ុន្តែ​ក្នុង​វីដេអូ​នេះ​អត់​មាន​ការ​បញ្ជាក់​ទី​កន្លែង​ច្បាស់​លាស់​អ៊ីចឹង​មាន​ការ​លំបាក»

អនុប្រធាន​អង្គការ​លីកាដូ​ទទួល​បន្ទុក​សិទ្ធិមនុស្ស​លោក អំ សំអាត បញ្ជាក់​ថា ស្ថានភាព​នៃ​ការ​ជួញ​ដូរ​មនុស្ស​ពី​កម្ពុជា ទៅ​កាន់​ប្រទេស​ចិន នៅ​តែ​មន្ត​កើត​មាន ហើយ​រដ្ឋាភិបាល​ក៏​បាន​ចូល​រួម​ទប់​ស្កាត់​ផង​ដែរ។ ប៉ុន្តែ​នៅ​តែ​មាន​ស្ត្រី​ខ្មែរ​រង​គ្រោះ​នៅ​តែ​បន្ត​ជួញ​ដូរ​ទៅ​ប្រទេស​ចិន៖ ​«រដ្ឋាភិបាល ​ជា​ពិសេស​ ក្រសួង​ដែល​ពាក់​ព័ន្ធ​ហ្នឹង ត្រូវ​តែ​ចាត់​វិធាន​ការ ហើយ​ដើម្បី​ធ្វើ​យ៉ាង​ណា​រំដោះ​ក្មេង​ស្រី ដើម្បី​យក​កម្ពុជា​វិញ ហើយ​ស្វែង​រក​មេខ្យល់ អ្នក​ដែល​ពាក់​ព័ន្ធ​នឹង​ការ​ជួញ​ដូរ​កុមារ ឬ​ក៏​ការ​ជួញ​ដូរ​ស្ត្រី​ផ្សេង​ទៀត យក​មក​អនុវត្ត​តាម​ផ្លូវ​ច្បាប់ ពី​ព្រោះ​ឥឡូវ​យើង​ឃើញ​ថា​ សូម្បី​តែ​មេ​ខ្យល់​ដែល​នាំ​ពលករ​ពី​ខ្មែរ​ទៅ​ថៃ ឬ​ពី​ថៃ​មក​ខ្មែរ ក៏​ត្រូវ​បាន​ចាប់​នឹង​អនុវត្ត​បញ្ជូន​ទៅ​តុលាការ»

ករណី​ស្ត្រី​ខ្មែរ​ចាញ់បោក គេយកទៅជួញដូរផ្លូវភេទនៅចិនកំពុងកើនឡើង។

កាល​ពី​ថ្ងៃ​កាល​ពី​ថ្ងៃ​ទី១១ កុម្ភៈ កន្លង​ទៅ​នេះ​បាន​រំដោះ​កុមារី​អាយុ ១៤ឆ្នាំ​ម្នាក់ ដែល​ចាញ់​បោក​មេ​ខ្យល់​នាំ​យក​ទៅ​នៅ​ប្រទេស​ចិន​អស់​រយៈ​ពេល​ជាង ៤ខែ ដោយសារ​គេ​សន្យា​ថា នឹង​រក​ការងារ​ធ្វើ​នៅ​ទី​នោះ។ សមត្ថកិច្ច​កម្ពុជា សហការ​ជាមួយ​​អគ្គ​កុងស៊ុល​កម្ពុជា​ប្រចាំ​ប្រទេស​ចិន បាន​រំដោះ​កុមារី​រង​គ្រោះ​ពី​ខេត្ត​ហឺណាន (Hunan) ប្រទេស​ចិន។

សមត្ថកិច្ច​ កាល​ពី​ថ្ងៃ​ទី​២៩ ខែ​មករា ក៏​បាន​រំដោះ​ស្ត្រី​ខ្មែរ​អាយុ ២០ឆ្នាំ​ម្នាក់ ពី​ប្រទេស​ចិន ក្រោយ​ពី​បាន​ចាញ់​បោក​គេ និង​ត្រូវ​គេ​បង្ខំ​ឱ្យ​រៀប​ការ​ជាមួយ​ជនជាតិ​ចិន។

ជន​រង​គ្រោះ​អាយុ ២០ឆ្នាំ រស់​នៅ​ខេត្ត​ក្រចេះ ត្រូវ​បាន​អគ្គ​កុងស៊ុល​កម្ពុជា​ប្រចាំ​ប្រទេស​ចិន​បញ្ជូន​មក​ដល់​ប្រទេស​កម្ពុជា​វិញ កាល​ពី​ថ្ងៃ​ទី២៨ មករា។

កាល​ពី​ឆ្នាំ២០២០ កន្លង​ទៅ​នេះ ក្រសួង​ការ​បរទេស​បាន​រំដោះ​ស្ត្រី​ខ្មែរ ដែល​ចាញ់​បោក​មេខ្យល់​ទៅ​រស់​នៅ​ប្រទេស​ចិន បាន​ចំនួន ១៤៤នាក់​ហើយនិង​បុរស​ម្នាក់​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល