កម្មកររោងចក្រកាត់ដេរ ដាប់ប៊ែលយូរ អែនឌី (W&D (Cambodia) Co.,Ltd) ស្ថិតនៅខណ្ឌមានជ័យ ជាច្រើននាក់ នៅព្រឹកថ្ងៃទី២៥ កុម្ភៈ បានលើកគ្នាទៅតវ៉ា មុខសាលាដំបូងរាជធានីភ្នំពេញ ដើម្បីទាមទារឲ្យបញ្ឈប់ការចេញសាលក្រមជួយភាគីថៅកែរោងចក្រ។ ក្រោយតវ៉ា សាលាដំបូងបានកោះហៅតំណាងកម្មករ ៦នាក់ និងតំណាងសហជីពស៊ីខៅឌូ ៤នាក់ឲ្យចូលជួប។
មន្ត្រីច្បាប់នៃសហជីពស៊ីខៅឌូ (C-CAWDU) លោក ស៊ាង យ៉ូត ឲ្យដឹងថា តំណាងកម្មករបានសំណូមពរឲ្យមន្ត្រីតុលាការ មោឃភាពចោល សេចក្ដីបង្គាប់ទាំងឡាយកន្លងមក ដែលតម្រូវឲ្យកម្មកររោងចក្រ W&D ចូលធ្វើការវិញរយៈពេល ៤៨ម៉ោង។ ទោះយ៉ាងណា មិនទាន់មានការសម្រេចបែបណានៅឡើយទេ។
កម្មការិនីម្នាក់ អ្នកស្រី សំ សុខស្រីមុំ បន្ថែមថា ក្រោយតវ៉ានៅមុខតុលាការក្រុងភ្នំពេញរួច កម្មករបាននាំគ្នា មកតវ៉ាបន្តនៅមុខរោងចក្រ នៅភូមិឫស្សី ខណ្ឌមានជ័យ ជាធម្មតា៖ «»
ចំណែកនៅពេលរសៀល គណៈកម្មការដោះស្រាយវិវាទបាតុកម្ម កូដកម្មគ្រប់មុខសញ្ញា នៃក្រសួងការងារ បានកោះហៅ ភាគីសហជីព កម្មករ និងសមាគមថៅកែរោងចក្រ ជួបប្រជុំដាច់ដោយឡែកពីគ្នា ជាមួយមន្ត្រីក្រសួងការងារ។
មន្ត្រីច្បាប់នៃសហជីព ស៊ីខៅឌូ លោក ស៊ាង យ៉ូត ប្រាប់អាស៊ីសេរី ក្រោយកិច្ចប្រជុំ ថា ក្រុមហ៊ុនផ្ដាំតាមក្រសួងការងារ ថា នឹងទទួលយកសំណើរបស់កម្មករ ទៅពិចារណា ប៉ុន្តែជម្រើសចុងក្រោយ គឺមានតែដោះស្រាយតាមប្រព័ន្ធតុលាការ។ លោក ស៊ាង យ៉ូត ថា កម្មករ ចង់មានការសម្របសម្រួលនៅក្រសួងការងារ ឬ នៅក្រុមប្រឹក្សាអាជ្ញាកណ្ដាល ជាជាងប្រព័ន្ធតុលាការ ព្រោះកម្មករគ្មានថវិកាសម្រាប់តតាំងក្ដីនៅតុលាការទេ៖ «»
ជម្លោះកម្មករ និងថៅកែនៅរោងចក្រ ដាប់ប៊ែលយូ អេនឌី បានអូសបន្លាយ ២ខែហើយ ដោយសារភាគីថៅកែរោងចក្រ រក្សាជំហរមិនទទួលយកកម្មករជាង ១០០នាក់ ឲ្យចូលធ្វើការវិញទេ ដោយចោទថា ពួកគេជាក្រុមញុះញង់ឲ្យកម្មករជាង ១.៧០០នាក់ផ្សេងទៀត ក្នុងចំណោមកម្មករជាង ១.៨០០រយនាក់ ចេញតវ៉ា។ កម្មករឲ្យដឹងថា ក្រោយពេលថៅកែ អំពាវនាវឲ្យកម្មករចូលធ្វើការវិញ តាមការសម្របសម្រួលពីក្រសួងការងារនោះ មានកម្មករខ្លះព្រមចូលធ្វើការវិញ និងមានកម្មករខ្លះ មិនព្រមចូលធ្វើការវិញទេ។ កម្មករឲ្យដឹងថា មកដល់ពេលនេះ កម្មករ ដែលមិនព្រមចូលធ្វើការវិញ នៅតែមានចំនួនជាង១ពាន់នាក់។ ចំណែកសមាគមថៅកែរោងចក្រ ប្រកាសកាលពីចុងខែមករា ថា កម្មករភាគច្រើន បានត្រលប់ចូលធ្វើការតាមការអំពាវនាវហើយ ប៉ុន្តែភាគីក្រុមហ៊ុន មិនទទួលយកកម្មករ ដែលជាក្រុមញុះញង់ដាច់ខាត។
អគ្គលេខាធិការសមាគមកាត់ដេរកម្ពុជា ឬដែលគេស្គាល់ថា ជាសមាគមថៅកែ លោក ខេន លូ ប្រាប់អាស៊ីសេរី ថា ដំណើររឿងនេះ បានឡើងដល់ដៃតុលាការហើយ ដូច្នេះ គ្មានការចរចាអ្វីក្រៅតុលាការទេ គឺរង់ចាំតែការសម្រេចតាមសេចក្ដីសម្រេចរបស់តុលាការតែប៉ុណ្ណោះ៖ «»
កម្មករប្រាប់ថា ការតវ៉ារបស់ពួកគេពេលនេះ គ្រាន់តែដើម្បីបានចូលធ្វើការងារក្នុងរោងចក្រវិញ រកប្រាក់កម្រៃទ្រទ្រង់ជីវភាពប្រចាំថ្ងៃ និងផ្គត់ផ្គង់ក្មេង ចាស់ជរាក្នុងបន្ទុកប៉ុណ្ណោះ។ ពួកគេគ្មានលទ្ធភាពតតាំងក្ដីឈ្នះសមាគមថៅកែរោងចក្រ នៅតុលាការទេ។ កម្មករអះអាងថា បើថៅកែរោងចក្រ W&D ជ្រើសរើសបែបនេះ ជម្លោះមិនអាចបញ្ចប់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។