ក្រុម​កម្មករ​នាំគ្នា​ចលាចល​ក្រោយ​ពី​ក្រសួង​ការងារ​ប្រកាស​លើក​ពេល​ឈប់​ថ្ងៃបុណ្យ​ចូលឆ្នាំ​ខ្មែរ

ដោយ ហេង រស្មី
2020-04-08
អ៊ីម៉ែល
មតិ
Share
បោះពុម្ព
កម្មករ-កម្មការិនី​នៅ​សង្កាត់​ទឹកថ្លា ខណ្ឌ​សែនសុខ រាជធានី​ភ្នំពេញ ចូល​រួម​សំណេះសំណាល​ជាមួយ​លោក​នាយករដ្ឋមន្ត្រី ហ៊ុន សែន កាល​ពី​ព្រឹក​ថ្ងៃ​ទី​២១ ខែ​កុម្ភៈ ឆ្នាំ​២០១៨។
កម្មករ-កម្មការិនី​នៅ​សង្កាត់​ទឹកថ្លា ខណ្ឌ​សែនសុខ រាជធានី​ភ្នំពេញ ចូល​រួម​សំណេះសំណាល​ជាមួយ​លោក​នាយករដ្ឋមន្ត្រី ហ៊ុន សែន កាល​ពី​ព្រឹក​ថ្ងៃ​ទី​២១ ខែ​កុម្ភៈ ឆ្នាំ​២០១៨។
Photo courtesy of SPM's Page

ក្រុម​កម្មករ​សំដែង​ក្តី​បារម្ភ ក្រោយ​ក្រសួង​ការងារ​ប្រកាស​លើក​ពេល​ឈប់សម្រាក​ថ្ងៃបុណ្យ​ចូលឆ្នាំ​ខ្មែរ​ដោយ​លើក​ហេតុផល​ថា ដើម្បី​ចូលរួម​ទប់ស្កាត់​ជំងឺ​កូវីដ-១៩។ មន្ត្រី​សហជីព​ថា វិធានការ​នេះ​នឹង​ធ្វើ​ឱ្យ​ប៉ះពាល់​ដល់​សិទ្ធិ​របស់​ក្រុម​កម្មករ​ដែល​ប្រទេស​កម្ពុជា​បាន​កំណត់​យក​ថ្ងៃបុណ្យ​ចូលឆ្នាំ​ខ្មែរ​ជា​ថ្ងៃ​ឈប់សម្រាក​ប្រចាំ​ឆ្នាំ។

កម្មករ​នៅ​រោងចក្រ​កាត់ដេរ​សំលៀកបំពាក់​ម្នាក់ មាន​ទីតាំង​ក្នុង​ខណ្ឌ​ដង្កោ​ក្រុងភ្នំពេញ​លើកឡើង​ថា ក្រោយពី​បាន​ឃើញ​សេចក្ដី​ជូនដំណឹង​ពី​ក្រសួង​ការងារ​មិន​ឱ្យ​កម្មករ​ឈប់​ចូល​ឆ្នាំ​ថ្មី​រយៈពេល​បួន​ថ្ងៃ​នោះ។ក្រុម​កម្មករ​នៅ​រោងចក្រ​របស់​លោក​នាំគ្នា​ជ្រួលច្របល់ នឹង​មិន​សុខ​ចិត្ត​ទៅ​នឹង​សេចក្ដី​សម្រេច​នេះ​ទេ។

លោក​និយាយ​ថា បើ​ទោះ​បី​ជា​ក្រសួង​ការងារ​មិន​អនុញ្ញាត​ឱ្យ​ក្រុម​កម្មករ​បាន​ឈប់សម្រាក​ក្នុង​ថ្ងៃបុណ្យ​ចូលឆ្នាំ​ក៏ដោយ ក៏​លោក​នឹង​ក្រុម​កម្មករ​ភាគច្រើន​បានសម្រេច​ចិត្ត​រួចហើយ​ថា មិន​ទៅ​ធ្វើ​ការ​ក្នុង​ថ្ងៃបុណ្យ​ចូលឆ្នាំ​ខ្មែរ​ទេ ទោះបីជា​ខាង​ថៅកែ​រោងចក្រ​កាត់​ប្រាក់ខែ​ពួកគេ​ប៉ុន្មាន​ក៏ដោយ៖ «ក្រសួង​ចេញ​សេចក្ដី​ប្រកាស​មក​គាត់​ផ្អើល​ឈុល​តែម្ដង ហើយ​គាត់​មិន​មាន​អារម្មណ៍​ធ្វើ​ការ​ម្នាក់ៗ​គាត់​ផ្អាក​ការងារ​ប្រហែល​កន្លះ​ម៉ោង​ទៅ​មួយ​ម៉ោង​ពីព្រោះ​គាត់​គិត​ថា គាត់​អត់​មាន​អារម្ភ​ទៅ​ធ្វើ​ការ​។​គាត់​ថា បើសិនជា​រដ្ឋាភិបាល​ព្រួយបារម្ភ​ពី​រឿង​ហ្នឹង ម៉េច​ក៏​មិន​ឱ្យ​ឈប់​មួយ​ខែ ឬ ពីរ​ខែ​ដើម្បី​ឱ្យ​ជំងឺ​ហ្នឹង​វា​បាន​ធូរស្រាល​ទៅ ចាំ​ឱ្យ​ពួកគាត់​ចូល​ធ្វើ​ការ​វិញ​អា​ហ្នឹង​វា​ប្រសើរ​ជាង។ អាហ្នឹង​បងប្អូន​កម្មករ​គាត់​និយាយ​អ៊ីចឹង លោកពូ»

ក្រសួង​ការងារ​បណ្ដុះបណ្ដាល​វិជ្ជាជីវៈ កាលពី​ថ្ងៃ​ទី​៧ មេសា បាន​ជូនដំណឹង​ដល់​ម្ចាស់​សហគ្រាស គ្រឹះស្ថាន និង​កម្មករ និយោជិក​ទាំងអស់​ត្រូវ​លើក​ពេល​ឈប់សម្រាក​ចំនួន៤ ក្នុង​ឧកាស​បុណ្យ​ចូលឆ្នាំ​ខ្មែរ​ខាង​មុខ​នេះ ចាប់ពី​ថ្ងៃ​ទី​១៣ រហូត​ដល់​ថ្ងៃ​ទី​១៦ ខែ​មេសា ដោយសារតែ​រដ្ឋាភិបាល​ចូលរួម​បង្ការ និង​ទប់ស្កាត់​ជំងឺ​កូវីត​១៩ ដែល​កំពុង​រីក​រាលដាល​នៅ​លើ​សកលលោក។

ក្រសួង​ការងារ​ក៏បាន​បញ្ជាក់​ផង​ដែរ​ថា ក្រសួង​នឹង​កំណត់​សង​ថ្ងៃ​ឈប់សម្រាក​ចំនួន ៥​ថ្ងៃ ដល់​ក្រុម​កម្មករ​និង​និយោជិក​វិញ តែ​មិនបាន​កំណត់​ថ្ងៃ​ពិតប្រាកដ​ទេ គ្រាន់តែ​បាន​បញ្ជាក់​ថា នឹង​ជូនដំណឹង​នេះ​នៅ​ពេល​ខាង​មុខ។

តំណាង​សហជីព​មួយ​ចំនួន​ដែល​សកម្មករ​ក្នុង​ការ​ការពារ​សិទ្ធិ​ដល់​ក្រុម​កម្មករ​ក៏​មិន​យល់ស្រប​នឹង​សេចក្ដី​ជូនដំណឹង​របស់​ក្រសួង​ការងារ​ផង​ដែរ។

ប្រធាន​សហភាព​សហជីព​កម្ពុជា លោក រ៉ុង ឈុន បញ្ជាក់​ថា សេចក្ដី​ជូនដំណឹង​របស់​ក្រសួង​ការងារ​ហាក់បីដូចជា​មិន​សមស្រប​ទាល់តែសោះ ពីព្រោះ​នៅ​ក្នុង​កាលៈទេសៈ​នេះ បើ​មើល​ពី​ស្ថានភាព​នៃ​ជំងឺ​កូវីដ​១៩ នៅ​កម្ពុជា​ហាក់បីដូចជា​ពុំ​មាន​កំណើន​ខ្លាំងក្លា រហូតដល់​លើក​ពេល​ឈប់​សម្រាក​របស់​ក្រុម​កម្មករ​នោះ​ទេ។

លោក​បញ្ជាក់​ថា គួរតែ​ក្រសួង​ការងារ​អនុញ្ញាត​ឱ្យ​ក្រុម​កម្មករ​បាន​ឈប់សម្រាក​ក្នុង​ថ្ងៃបុណ្យ​ចូលឆ្នាំ​ខ្មែរ​ដើម្បី​ឱ្យ​ពួកគាត់​បាន​ជួបជុំ​ក្រុម​គ្រួសារ​នៅ​ស្រុកកំណើត​រៀងៗ​ខ្លួន​ដើម្បី​ចៀសវាង​ការ​ជួបជុំ​លក្ខណៈ​ទ្រង់ទ្រាយ​ធំ​នៅ​តាម​បណ្ដា​រោងចក្រ​ប្រសើរ​ជាង៖ «ចំពោះ​ទស្សនៈ​របស់ខ្ញុំ​រដ្ឋាភិបាល​ក៏ដូចជា​ក្រសួង​ការងារ​គួរតែ​ឱ្យ​បងប្អូន​ក្រុម​កម្មករ កម្មការិនី​បាន​ឈប់សម្រាក​ដើម្បី​ចូលរួម​អបអរ​សារ​ទរ​ចូលរួម​បុណ្យ​ចូល​ឆ្នាំថ្មី​ប្រពៃណី ជាតិខ្មែរ​យើង​ទាំងអស់​គ្នា​គ្រាន់តែ​ថា យើង​ត្រូវ​ចូលរួម​ប្រុងប្រយ័ត្ន​ទាំងអស់​គ្នា ដើម្បី​ប្រឆាំង​ទៅ​នឹង​ការ​រីក​រាលដាល​នៅ​មេរោគ​កូរ៉ូណា​នេះ»

ប្រធាន​សហភាព​ការងារ​កម្ពុជា លោក អាត់ ធន បញ្ចាក់​ថា ការ​សម្រេច​ភ្លាមៗ​របស់​ក្រសួង​ការងារ​ធ្វើ​ឱ្យ​កម្មករ​មានការ​លំបាក​ដោយសារតែ​កម្មករ​មួយ​ចំនួន​បាន​សុំច្បាប់​ឈប់សម្រាក​ក្នុង​ថ្ងៃបុណ្យ​ចូលឆ្នាំ ហើយ​ក៏​មាន​ក្រុម​កម្មករ​ខ្លះ​បាន​ទៅលេង​ស្រុកកំណើត​រួច​ទៅ​ហើយ៖ «យើង​មិន​មាន​អ្វី​ដែល​ជា​គំនិត​ជំទាស់​ទេ ពី​ព្រោះ​នេះ​ជា​សេចក្ដី​សម្រេច​របស់​រដ្ឋាភិបាល​ពីព្រោះ​នៅ​ក្នុង​ពេល​នេះ​រដ្ឋាភិបាល​ជា​អ្នកគ្រប់គ្រង​ស្ថានការណ៍​នៃ​ជំងឺ​ហ្នឹងហើយ​យើង​ក៏​គិត​ថា ការ​ការពារ​វា​ប្រសើរ​ជាង​ការ​ព្យាបាល ហើយ​គ្រាន់តែ​ថា វា​មិន​ដែល​មាន​ស្ថានភាព​បែប​ហ្នឹង។ ដល់​ពេល​មាន​បែប​ហ្នឹង​វា​ពិបាក​សម្រាប់​ពេល​ភ្លាមៗ ហើយ​យើង​មើល​ហើយ​ថា បើសិនជា​ធ្វើ​រៀង​យូរ​ថ្ងៃ​ដូចជា​នៅ​ថៃ អី​ប្រហែលជា​អាច​ល្អ​ជាង»

អនុប្រធាន​សហព័ន្ធ​សហជីព​សេរី​កម្មករ លោក ម៉ាន់ សេងហាក់ មាន​ប្រសាសន៍​ថា ការ​យក​លេស​នៃ​ការ​រាតត្បាត​នៃ​ជំងឺ​កូវីដ​១៩​ដើម្បី​លើក​ពេល​ការ​ឈប់​សម្រាក​របស់​ក្រុម​កម្មករ លោក​មិន​គាំទ្រ​ទេ ដោយសារ​ថ្ងៃ​ចូលឆ្នាំ​ខ្មែរ​គឺជា​ពេល​ជួបជុំ​ដ៏​សំខាន់៖ «ការ​មិន​គាំទ្រ​ដោយសារតែ​នេះ​ជា​ប្រពៃណី​តាំងពី​បុរាណ​មក​តែម្ដង​ដែល​យើង​ជាទូទៅ​នៅ​ថ្ងៃ​ទី​១២ ១៣ ១៤ យើង​ចូលឆ្នាំ​ប្រពៃណី​ខ្មែរ​តែ​ម្តង​នេះ​ជា​ប្រពៃណី​ផ្នែក​ព្រះពុទ្ធ​សាសនា​ដែ»

អាស៊ីសេរី​មិន​អាច​ទាក់ទង​សុំ​ការ​អត្ថាធិប្បាយ​ពី​លោក ហេង សួរ អ្នកនាំពាក្យ​ក្រសួង​ការងារ​បានទេ​ដោយសារតែ​លោក​មិន​លើក​ទូរស័ព្ទ។

ចំណែក​អគ្គលេខាធិការ​សមាគម​កាត់ដេរ​កម្ពុជា លោក ខែន លូ វិញ បាន​គាំទ្រ​ទៅ​នឹង​វិធានការ​របស់​រដ្ឋាភិបាល។ លោក​បញ្ជាក់​ថា ការ​លើក​ពេល​ឈប់សម្រាក​នេះ​នឹង​អាច​ជួយ​កាត់បន្ថយ​ការ​ឆ្លង​រីក​រាលដាល​នៃ​ជំងឺ​កូវីដ​១៩៖ «ហេតុផល​អាហ្នឹង​ទុក​ឱ្យ​រដ្ឋាភិបាល​គេ​គិតគូរ ប៉ុន្តែ​អ្វី​ដែល​ជា​អនុសាសន៍​របស់​រដ្ឋាភិបាល​យើង​គាំទ្រ យើង​រកស៊ី​នៅ​ស្រុក​ខ្មែរ យើង​ត្រូវតែ​អនុវត្ត​តាម​ច្បាប់​នៅ​ស្រុក​ខ្មែរ​ពេលខ្លះ»

ក្រសួង​ការងារ​ជា​រៀងរាល់​ឆ្នាំ​បាន​ចេញ​សេចក្តី​ជូន​ដំណឹង​ឱ្យ​ក្រុម​កម្មករ និង​និយោជិក​បាន​ឈប់​សម្រាប់​នៅ​ថ្ងៃបុណ្យ​ចូលឆ្នាំ និង​បុណ្យ​ប្រពៃណី​ជាតិ​ផ្សេងៗ។ ប៉ុន្តែ​សម្រាប់​ឆ្នាំនេះ​ដោយសារ​កម្ពុជា​ក៏ដូចជា​បណ្ដា​ប្រទេស​ផ្សេងៗ​ទៀត​នៅ​លើ​ពិភពលោក​កំពុង​ប្រយុទ្ធ​ប្រឆាំង​នឹង​ជំងឺ​កូវីដ១៩ ក្រសួង​ការងារ​ក៏បាន​សម្រេច​លើក​ពេល​ឈប់សម្រាក ដោយ​លើក​ពេល​ទៅ​ថ្ងៃក្រោយ​វិញ។

គិត​ត្រឹម​ថ្ងៃ​ទី៧ មេសា កន្លង​ទៅ​នេះ កម្ពុជា​បាន​រក​ឃើញ​អ្នក​ឆ្លង​ជំងឺ​កូ​វីត​១៩ ថ្មី​ម្នាក់ទៀត​ទៅលើ​ស្ត្រី​ទេសចរណ៍​ជនជាតិ​វៀតណាម​អាយុ ១៧​ឆ្នាំ ដែល​ធ្វើ​ឱ្យ​ចំនួន​អ្នកមាន​ជំងឺ​កូវីដ​១៩ នៅ​ទូទាំង​ប្រទេស​មាន​ចំនួន​១១៥​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល